1 PUOPAOKO 18 - SHEEYU BAIBEL (BSI)

David nou Soureih Veilouyutao

¹ Teile jütou thaisü Veo David nou Philistin maiye reih soua puletao jünou koloue, ae puhnou Gath nuhdu ae süpehao hinou buyu nuhtao sü Philistin mai hinou poloure.

² Puhnou Moab mai jünoua reih koloue, ae Moab mai hai puhvei khakhe hinou hrüa puhye kikha peie.

³ Süthaisü David nou Hanath teidei hilo buyu Zobah maivei Veo Hadadezer ye reih soua reih veiloue, daiolouzü puhnou Euphratis rei hilova hai khasa-a hrülai tea te-e.

⁴ David nou puh hinou rheiluki theli, rhei pfüyu mai thenai, ae soureihmai thekai hai nüloue. Puhnou rhei hai rheiluki kaihli pfülou süyu phasü khailoua rhei kukhetao hai phi soucha khaiwure.

⁵ Damaskas hi Sairia maitao nou veo Hadadezer ye soukha peilai tea veyu phaki, David nou puletaoye reih soukou Sairia maiye thekaihai southawure.

⁶ Süthaisü David nou puletao vei teidei hinou reihmai panou bure donou fühao soukhai peiwure, ae Sairia maisü puhvei khakhe hinou hrüa puhye kikha peie. David nou soureih soutayu teitei hisü Mapao nou puhye panou veilouyu peie.

⁷ Veo Hadadezer vei peikho maitao nou pfüyu sana rüh khesü David nou poloua Jerusalem hi pove khailoue.

⁸ Hadadezer veo nou khasa-a buyu Tibhath ae Kun nuhdu hinoua baosahu taoli hai poloue. (Solomon nou baosahu sütao sü poa dzükhao, rathoki souyu hi deka ae paikhao khesü soue).

⁹ David nou Zobah hi Veo Hadadezer vei reihmai me teitei jünou reih koloure touyu ko hai Hamath hi veo Toi nou sülouyu phaki,

¹⁰ puhnou puh nahpoutu Hadoram-ye David veo hi seive puhvei asah nasü paopeie, daiolouzü veo Hadadezer nou puhye bakha taoli hai soureih souwe. Hadoram nou David veoye sapeina taoli- sana, shahu ae baosahu khesü pove peie.

¹¹ David veo nou sapeina haitao ae puhnou Edom, Moab, Ammon, Philistin ae Amalek tyahrütao hinou polouyu sana ae shahu khesü noupu Mapao vei rathoki hi poa panou vah soure donou posheela peiwure.

¹² Zeruiah pfüpai nahpoutu Abishai nou Tai Deikho hinou Edom mai thekiacha hai southaloue.

¹³ Puhnou Edom maivei teidei teitei hisü reihmaime panou bure donou fühao souloure, ae Edom mai hrülai sü David veo vei khakhe hinou bure. David veo nou soureih soutayu teitei hisü Mapao nou puhye panou veilouyu hai peie.

¹⁴ David nou Israel mai hrülai pei hi khasa-a hrüe, ae puhnou puhvei maitaoye sü kaozü hinou khasa hrü-e.

¹⁵ Zeruiah nahpoutu Joab nou reihmaitao peikho sü soue, Ahilud nahpoutu Jehoshaphat nou larü rüyu hi peicho-e.

¹⁶ Ahitub nahpoutu Zadok ae Abiathar nahpoutu Ahimelek nou napao sou-e, Seraiah nou chikuyu vei rü-apeio nasü soue.

¹⁷ Jehoiada nahpoutu Benaiah nou David veoye khoyu hi peichapu soue, alia David vei nahpoutu maitao nou puhvei kuvah souyu hi-a vahbu matsüyu taosü pfüe.