1 PUOPAOKO 17 - SHEEYU BAIBEL (BSI)

Nathan nou David hi Ko paopeiyu

¹ Teitheli David veo nou rachipaolawo Nathan hi haibüa kopomaiye chi paoho-e, “Chuo Etao louzü sedar süünou veihsho-a soukhai touyu ki hinou bure, ana Mapao vei Vo Sübvü nawo louzü sahpao nou haokhai touyu hisü bua baie!”

² Nathan nou haibüa chila peie, “Nenou tsüchoa buyu nasü soukhaio, daiolouzü Ramai nou neye koa bue.”

³ Ana süzhou khei sü Ramai nou Nathan hi paoe,

⁴ “Taho akilai David hisü Enou haibüa paowe tea paopeio, ‘Enou bure rathoki nasü neye panou soulai moe.

⁵ Daiolouzü Enou Israel maiye Ejipt teidei hinou sapa peiyu nou poa zhou koute rathoki hinou bumoe, ana sahpao hinou bua buh ali hi ho ali hi hoa laibaie.

⁶ Enou Israel maiye süthaisa-a tayu hisü, Israel maiye süthai-apei mai ali koute hia neletao daisounou Eye panou bure ki nasü sedar süü nou soupei moge tea paomoe.’

⁷ “Südonou ne taho avei kilai David hi Khoukhoulai Mapao nou haibüa paowe tea paopeio, ‘Enou neye zhaotu kho-a buyu hinou avei Israel maitao pei hi panou veo soure donou sapaloue.

⁸ Nenou tayu buh veishi hi Enou neye salai peie, ae neye ngaobayu mai hrülaiye sü Enou nevei nghoujü hinou souha peie. Enou neye deiphao hi zhih takayu mai ali soupeilai.

^9-10 Enou avei Israel maitaoye panou hrüre donou buh ali souda peilai, ae puletao nou buh sühisü ngaopiyu ae veahoyu ali-a ha-a nou hrülai. Raichoki büa puletaoye lekha shiyu mainou teidei sühisü souchoropu khailai moe. Enou neletao vei ngaobamai hrülai sü souha peilai touyu sü apaokhaitoue.

¹¹ Ne thaita-a nou nevei puopaoh maitaoye daovuyu buh hinou daovure toulouzü, Enou nevei nahmai aliye panou veo kouloulai alia puhvei vedei sü Enou souduso peilai.

¹² Eye thore donou rathoki ali sü puhnou soupeilai, ae Enou puhvei vebuh sü panou teisa bukoute peilai.

¹³ Enou puh vei puo sü soulai, ae puhnou anah poutu soulai. Enou Saul veoye malaiyu büa puhye sü laiwulai moe.

¹⁴ Enou puhye sü panou avei maitaoye khasa-a hrülai alia puhvei vebuh sü teisa panou bukoute peilai.’ ”

¹⁵ Nathan nou David hi Ramai nou puh hi zho ngaopeikhai touyu teitei sü paopeie.

David nou Kalo Paoyu

¹⁶ Süthaisü Mapao nou buyu Sahpao hisü David veo nou talou buloure alia haibüa veachi paoe, “Oh Ramai Mapao, nenou ahi ae avei kihikhamai hi haizhou koute souduso peiyu hai Enou ngaozümoe.

¹⁷ Chuo nenou vere teithe hia avei tyaosholea maitaoye souduso peipulai touyu sü paosü peie, Oh Ramai Mapao, nenou Eye duso mai ali büa popeie.

¹⁸ Enou ne hisü chi ali-a paopu loure hare! Ne kilai Eye sü nenou veisho-a nou süwe, ana nenou Eye tsükhou peie.

¹⁹ Enou soulai tea tsüchoda khaitouyu thaifüa nevei kilai Eye donou haduso alao soungao peie.

²⁰ Oh Mapaowo, neye raiyu mai ali-a ha-e, ae Etao nou süwe, süolouzü ne likhei Ramai baie.

²¹ Maivei qila soua buyu hinou nevei mai panou soure donou nenou vupa peikhai touyu Israel mai vei tyahrü büyu hai deiphao hi tyahrü aliro ha-e. Nenou puletaoye donou khupayu vah haso soupeikhai touyu khesü deiphao mai hrülai nou süre. Nevei maitaoye sü nenou Ejipt teidei hinou vupa peie, ae nevei maitao nou takouyu phaki tyahrü kukhe maitaoye sü nenou hulai peie.

²² Nenou Israel maitaoye sü panou teisa nou nevei mai soure donou soupeie, ae Oh Mapao, nenou puletao vei Ramai nasü soure.

²³ “Südonou chuo, Oh Mapaowo, nenou nevei kilaiwo vanou ae avei kihikhamai donou paopeikhai touyu khesü souvete peio.

²⁴ Ne zhih sü tasholai alia maikhe mainou haibüa paolai, ‘Khoukhoulai Mapao hai Israel maivei Ramai-e.’ Alia nenou ne kilai David kihikha maiye sü panou teisa nou bukou telai.

²⁵ Nevei kilai ahi nenou paosü ngaopeiyu donou alia avei tyaosholea maitaoye panou veo soukou telai tea paopeiyu donou Oh Mapao Ramai Enou veachi hai nasü khuveisho-a ne hi paowe.

²⁶ Oh Mapaowo, ne hai Ramai-e, ae nenou ahi veisho-a paopei khaitoue.

²⁷ Avei kihikha maitaoye panou teisa nevei zhuvea leshi nasü ngao-a bukoute loure donou shiha peio, Oh Mapaowo nenou shiha peiwure, ae nevei ha nasü puletao hi teisa nou bukoute loulai.”