1 PUOPAOKO 14 - SHEEYU BAIBEL (BSI)

David nou Jerusalem hinou Souyu Vahtao

¹ Tair hi veo Hiram nou David ye panou puhvei ki soure donou kopomaiye koa sedar süü, chuh vah soulou süyu mai ae süü vah soulou süyu maiye seive peie.

² Alia Mapao nou David ye Israel mai hi veo buh thoupeiwure, ae puhvei vedei hai puhvei maitaoye donou souduso peiwure touyu hai süloure.

³ David nou Jerusalem hinou khapfü kukhe mai-a napuloue, ae nahpoutu naotumai taoli hrüpuloue.

⁴ Puhnou ngaopu louyu nahpoutu khesü haitao-e: Shammua, Shobad, Nathan, Solomon,

⁵ Ibhar, Elishua, Elpelet,

⁶ Nogah, Nepheg, Japhia,

⁷ Elishama, Beeliada, ae Eliphelet.

Philistin Mai hinou Reih Kolouyu

⁸ Philistin mainou David hai chuo Israel mai hrülai pei hi veo souloure touyu süloukhaie, puhye nüloulai tea Philistin mainou phoutare. Südonou David nou puletaoye daore donou tapare.

⁹ Philistin mainou Rephaim deikho hisü reih huloure.

¹⁰ David nou Ramai hi nou-e, “Enou Philistin mai pei hi reih soulouzü, ne nou Eye kolouyu sü peilai moge?” Mapao nou chila peie, “Reih soukhaio, Enou neye veilouyu sü peilai.”

¹¹ David nou Baal Perazim hinou puletaoye sü reih soua puletao jünou reih veiloure; ae David nou paoe, “Dzüdu nou pfüphe pfüpho louyu büa Ramai nou Eye pa ngaoba maiye pfüpholoue.” Südonou füdei sünasü Baal Perazim (Pfüpho-apei Mapao) tea kuwe.

¹² Philistin mainou puletao vei bashara nasü sühi thaokhaiwua tutare, ae David nou sükhesü poloua maideiwuo tea kharochi peiwure.

¹³ Philistin mainou deikho hisü soureih huloupu khaire.

¹⁴ Alia David nou Ramai hi noupuyu phaki, Ramai nou haibüa chila peie, “Nenou puletaoye buh hai hinou hukouso, anou tasühao poa kou alilo vatha nou balsam süübe buyu phi hinou souda-a bulo.

¹⁵ Nenou süübe pei hinou takouyu kho sülouzü, reih hukoukhaio, daiolouzü Enou ne jünou rai-a kou Philistin maiye reih soupeilai.”

¹⁶ Ramai nou kharochi peikhai touyu thaifüa David nou souloue, ae puletao nou Philistin maiye Gibeon hinou Gezer hi koute hulaiwure.

¹⁷ Ae teidei teitei hisü David zhih hai tashore, ae Mapao nou tyahrü hrülaiye sü panou puhye ngaopire.