1 PUOPAOKO 13 - SHEEYU BAIBEL (BSI)

Kiriath Jearim hinou Vo Sübvü Potayu

¹ David veo nou mai theli peikhoyu maitao, mai kaihli peikhoyu maitao alia süthai-apei mai hrülaiye saloua chipha-e.

² Israel maisou vejüa buyu hinou David nou paoe, “Neletao ae-ao tea lüthou peilouzü alia Ramai Mapao vei leli louzü, Israel mainou hrüa buyu vakou teidei teitei hi kopomaiye seiho panou napao maitao ae Levi maitaoye buh hai hinou tave jüpeio tea paolaikhe.

³ Süthaisü Etao nou Ramai vei Vo Sübvü nasü hai hi podakhai ve khailou laishe, daiolouzü Saul nou veo soua buki sünasü ngaophou moa khaiwure.”

⁴ Maisou sünou David nou paoyu sü kaore tea ae-ao souloure.

⁵ Südonou David nou Israel mai hrülai, Ejipt maivei deirai hinou buyu Shihor hinou poa reilova Hamath hi talouyu ludu hi khete, Ramai vei Vo Sübvü nasü Kiriath Jearim hinou Jerusalem hi povere donou maisou ye kuve jüloure.

⁶ David ae Israel mai hrülai nou Judah teidei hi buyu Baalah nuhdu hi, süolouzü Keriath Jearim nuhdu hisü velou Ramai vei Vo Sübvü, sühisü Mapao vei zhih pfüa buyu shouh pfüyu khaona ahai (Cherubim) kohinou khaitouyu nasü poloulai tea vere.

⁷ Puletao nou Ramai vei Vo Sübvü nasü Abinadab ki hinou poloua popa rheiluki ashu ali hi thouloua Uzza ae Ahio puhai panou rheiluki nasü pfütare.

⁸ David alia Israel mai hrülai nou Ramai nghoujünou puletao vei pfüchi teitei nou peia asasoua lou soupoa, gaigou ka-a, khubvü da-a ae shabe nghou-a chopoa ta-e.

⁹ Puletao nou Kidon vei chathai hi talouyu phaki, chode nasü phi hraloua Sübvü nasü dekou laire tea buyu hinou Uzzah nou bah thaipa Sübvü sü mouloure.

¹⁰ Puhnou Sübvü nasü deiyu donou Mapao nou raroulou puhye sü southawure. Puhsü sübüa Ramai nghoujü hinou thaire,

¹¹ südonou buh sünasü Perez Uzzah tea sapeie. Mapao vei lekha rarou hinou Uzzah ye southayu donou David sü lekha loure.

¹² Süthaisü David nou Ramai ye ngaopiloua haibüa paore, “Kabüa Vo Sübvü nasü Enou ki hi pove loulaige?”

¹³ Südonou David nou Vo Sübvü sü Jerusalem hi pove more, ana sünasü Gett puona Obed Edom ki hi pove khaiwure.

¹⁴ Vo Sübvü nasü Obed Edom ki hinou khouh asü bue. Obed Edom kihikhamai ae puhvei buyu na teitei hisü Mapao nou ha peie.