1 PUOPAOKO 11 - SHEEYU BAIBEL (BSI)

David nou Israel ae Judah hi Veo Soulouyu

¹ Süthaisü Israel mai hrülai nou Hebron hi taveloua David hi haibüa paoe, “Etao hai nevei ke-zhe baie.

² Raichoki Saul nou Etao pei hi veo soua buyu phaki-a nenou Israel maiye süthaisa-a soureih sü soua baie, ae nevei Ramai Mapao nou neye panou Israel maiye süthaipo-a talai alia puletao vei veo sü panou soulai tea paopeikhai toue.”

³ Südonou Israel hi tsümai hrülai nou David nou buyu Hebron hi ve-e, ae David nou puletaoye saloua Mapao nghoujünou chaachou ali souloure, alia puletao nou David ye sü panou Israel mai vei veo soure donou Mapao nou rachipaolawo Samuel hi paopeiyu büa puhye sü theadzü napeiwure.

⁴ David veo ae Israel mai hrülai nou Jerusalem nuhdu hisü reih huloue. Süphaki nuhdu süna hai Jebus tea nou süwe, alia Jebus mainou teidei sühisü hrüa bue.

⁵ Jebus hi hrüa buyu maitao nou David hi paoe, “Neye panou nuhdu hai hisü loulai moe,” ana sübüa buyuma David nou Zion vei reihbu veisho-a soukhai touyu nasü poloure, ae nuhdu sünasü “David vei nuhdu” tea sütare.

⁶ David nou paoe, “Mai taralia Jebus maiye southalou raikayu maina sü panou reihmai peichayu mai soulai.” Zeruiah touyu pfüpai nahpoutu Joab nou raikasoua talou reih soue, südonou puhye panou reihmai peicho nasü souloure.

⁷ David nou veisho-a soukhai touyu nuhdu sühinou hrüre, südonou sünasü David vei nuhdu tea kuloure.

⁸ Puhnou nuhdu nasü teinghi palova buyu deichi phi hinou nai pothou thoua nou soushu dakhai loure, alia Joab nou souche loumoa shokhai toua buyu nuhdu nasü soushu chepeiwure.

⁹ David veo hai khoupu lailai pare, daiolouzü Khoukhoulai Mapao nou puhye kozho peie.

David vei Zhih Tashoyu Reihmaitao

¹⁰ David vei reihmaitao hrohinou matsüyu maitao sü haitao-e. Puletao nou Israel maisou noupu koa puhye sü veo dopeie alia puhvei vedei sü Mapao nou paopeikhai touyu thaifüa soukhou shopeie.

¹¹ Raikai nasoua Hakhmon khü hinou Jashobeam tea kuyu nanou “Mai Asü” vei peikho nasüe. Puhnou mai kaihsü hai reihbu ali hinou reih soua southa khaitou loue.

¹² Ahai chenasoua reih souveih shoyu mai asü hrohisü Ahoh khü hinou Dodo nahpoutu Eleazar hai-e.

¹³ Philistin mainou reih soulai tea buyu phaki puh hai David ye koa Pas Dammim reihbu hisü bue. Israel mainou Philistin mai nghoujünou tutayu phaki puh hai southou dou hi bue.

¹⁴ Puh nou tutamoa David ye koa dou toutsü hinou Philistin maiye du-e, ae Philistin maiye taoli buh sühinou southaloue, alia Mapao nou puletaoye reih veilouyu sü peie.

¹⁵ Teithe ali mai shirou peikhoyu mai asütao hai David nou buyu Adullam Chuhlya hisü ve-e, süphaki Philistin maivei reihmaitao nou Rephaim Deikho hinou fühao hao-a bue.

¹⁶ Süteile hi David nou chuhlya buyu deichi hinou bue alia Philistin maivei reihmai me ali hai Bethlehem hinou bue.

¹⁷ David nou lah ki hi thai-nüa haibüa paoe, “Mai linou Eye Bethlehem robomü hi buyu dzükhao hinou küyu dzü poloua peilouzü daizhou koute valaisa!”

¹⁸ Süthaisü soureih veikayu mai asütao nou Philistin reihmaitao nou buyu fühao nasü tacholoua Bethlehem robomü pe hinou buyu dzükhao hinou dzü sü poloua David hi pove peie. Ana David nou dzü sü kü bare; puhnou küyu thaosü Mapao hi posheela soua lalaiwure,

¹⁹ alia haibüa paoe, “Enou dzü haisü ke laimoe! Dzü hai keyuo, mai haitao nou thaihri sümoa taho pokhai touyu donou puletao vei zhe keyu bütoua bailai-e.” Südonou puhnou dzü nasü ke more. Mai haitao asü nou haibüa khuveih shoyu vah haso sü soupeie.

²⁰ Joab thaihou Abishai nou soureih souvei shoyu “Mai Shirou” peicha-e. Puhnou heung poloua mai kaihsüye reih soua koloue, südonou mai shirou hrohinou puh sü zhih takayu ngaoloue.

²¹ Puhnou mai shirou hrohinou zhih takayu nasüe, ae puletao pei hi puhnou süthai-apeio nasü souloue, ana puh-a zhih takayu “Mai Asütao” hisü khete loumore.

²² Kabzeel puona Jehoida nahpoutu Benaiah hai soureih souvei shoyu mai ali-e. Puhnou lamoshoyu vah taoli hai soupeie; vuli puhnou Moab mai soureih souvei shoyu mai ahai southaloue. Teithelia puhnou vüra kouyu phaki deiraobvü ali hi ngaolou kipeikhaodu ali southaloue.

²³ Süthaia puhnou dushoyu Ejipt mai ali, mitar ahai la-a sha shoyu maipu ali southaloue. Ejipt puona hai veishoyu reihbasei tupoa lai-e, ana puhnou süpo ali pokou Ejipt puona bah hinou heung sü shaoloua puhye sü khüthaloue.

²⁴ Haitao hai Beneiah nou khuveisho-a souyu vahtao-e, südonou puh-a zhih tashoyu “Mai Shirou” hisü louwe.

²⁵ Puhnou “Mai Shirou” hisü matsü shoyu mai ali soue, ana “Mai Asütao” büa zhih tayu hisü khete loumoe. David veo nou puhye sü panou puhye khoyu reihmaitao peichapu sou-e.

^26-47 Reihmai haitao-a zhih tashoyu reihmaitao-e: Joah thaihou Asahel, Bethlehem puona Dodo nahpoutu Elhanan, Harod Puona Shammoth, Pelet puona Helez, Tekoa hinou veyu Ikkesh nahpoutu Ira, Anathok hinou Abiezer, Hushah hinou Sibbekai, Ahoh hinou Ilai, Netophah hinou Maharai, Netophah puonah Baanah nahpoutu Heled, Benjamin khü hinou Gibeah puona Ribai nahpoutu Ithai, Pirathoa puona Benaiah, Gaash deikho nghia buyu hinou Hurai, Arbah puona Abiel, Bahurum puona Azmaveth, Shaalbon puona Eliahba, Gizon puona Hashem, Harar puona Shagee nahpoutu Jonathan, Harar puona Sakhar nahpoutu Ahiam, Ur nahpoutu Eliphal, Mekherah puona Hepher, Pelon puona Ahijah, Karmel puona Hezro, Ezbai nahpoutu Naarai, Nathan thaihou Joel, Hagri nahpoutu Mibhar, Ammon puona Zelek, Beeroth hinou Joab vei reihbasei pfüyuna Naharai, Jathir hinou Ira ae Gereb, Hit puona Uriah, Ahlai nahpoutu Zabad, Shiza nahpoutu Adina (Reuben khü hinou matsüyu maili-e, puh hai lahvei reihmai me mai shirou bue), Maakah nahpoutu Hanan, Mithan puona Joshaphat, Ashterah puona Uzzia, Aroer hinou Hotham nahpoutu Shamma ae Jeiel Tiz hinou Shimri nahpoutu Jediael ae Joha, Mahavah puona Eliel, Elnaam nahpoutu Jeribai ae Joshaviah, Moab puona Ithanah, ae Zobah hinou Eliel, Obed, ae Jaasiel haimaitao-e.