1 PUOPAOKO 10 - SHEEYU BAIBEL (BSI)

Saul Veo Thaiyu

¹ Philistin mainou Israel maipei hi Gilboa deichi hinou reih soue. Reih sühisü Israel mai taoliye southawure, alia shokhaitoua buyu Israel maitao hai Veo Saul ae puhvei nahpoutu maitao-a loua nou tutare.

² Ana Philistin mainou thaihukou Saul nahpoutu Jonathan, Abinadab, ae Malkhishea puletao mai asüye sü southawure.

³ Reih sü soushi sholoua nou ngaobamai vei voulouthou nou Saul Veo ye sü kapeiwure alia zhishi showure.

⁴ Süthaisü Saul veo nou puhvei reihna pfüyu nahlepuna hisü paoe, “Ne khoche nasü popaloua Eye daotha peio, sübümo louzü Ramai ye sümoyu Philistin mainou Eye ngaolouzü, E hai puletao zünü souwulaire.” Ana puhvei bahsei pfüyu nasü ngaopi sholoure. Südonou Saul nou lah puhvei khoche sü poloua khüthawure.

⁵ Nahlepuna nou Saul veo thaiyu sü ngaolou khaie, puh-a lahvei khoche sü popaloua khüthawure.

⁶ Sübüa Saul ae puhvei nahpoutu asü taosü thaire, süthaisü puhvei kihikha mai ali koute-a nuh teidei sü khasa-a hrüpu more.

⁷ Jezreel deikho hinou hrüyu Israel maitao nou Saul veo ae puhvei nahpoutu taosü thaire alia puhvei reihmaitao sü tutare touyu ko sü süloukhaie, puletao vei nuhdu nasü thaokhaiwua tutare; süthaisü Philistin mainou velou nuhdu süna sü thaoloua buloure.

⁸ Reih souyu thainesho sü Philistin mainou thaiphao phouveyu phaiki, puletao nou Gilboa Deichi vanou Saul ae puhvei nahpoutu maitao vei thaiphao sü ngaoloure.

⁹ Puletao nou Saul veo pei sü deloure, ae puhvei reihna khesü poloua Philistin maivei teidei teitei hisü ko aveih nahai kopomaiye seitaho panou puletao vei basharatao hi ae maikhe mai hi paosü pei-e.

¹⁰ Puletao nou puhvei reihna khesü rathoki ali hi pokhailoue, ae puhvei pei nasü Dagon rathoki hi vaozhu khaitoue.

¹¹ Philistin mainou Saul veo hi soupeiyu ko sü Gilead hi hrüyu Jabesh mainou süloukhaie,

¹² khuvei shoyu maitaoli nou taho Saul ae puhvei nahpoutu maitao vei thaiphao poloua pove Jabesh hi khaiwure, alia puletao nou thaiphao taosü phesüübe phi hinou daovu peie, alia teithe anai hai lüh-a nou dopfüe.

¹³ Saul nou Mapao ye louche moyu donou thaire. Puhnou Mapao vei kharochi khesü züpei more, ae thaitayu maivei rako hinou daisoulai touyu khesü noutare,

¹⁴ alia Mapao nou paodou peiyu khesü pobare. Südonou puhye sü Mapao nou southawure, alia vedei sü Jesse nahpoutu David hi thao thou peiwure.