1 PITAR 5 - SHEEYU BAIBEL (BSI)

Ramai Zhaokho

¹ Südonou lah E-a tsümaili soua, Enou neletao hrohi buyu lüloumaime tsümaitao hi khoe. Ehai Khrista veahoyu veihi zhopaohmai alie, alia pongaopei laiyu khouko ava hisü E-a zha ngaozholai.

² Neletao bah hi thaothou peikhai touyu Ramai vei zhaokhoye sü moshilaiyu hinou moa, sasa-a khopeilo; neletao vahsü pousha ngaore donou mo-a sounü shoyu hinou soulo.

³ Neletao bah hi thaothou peikhai touyu maitao pei hisü tukha-tudeire donou tewuso, ana zhaokho hisü zhai aveinou soungaokhaio.

⁴ Alia zhaokhowo peichananou veyu kisü neletao nou vütakhai laimoyu khouko avavei Veo peirüsü ngaolai.

⁵ Sübüa, nahlemaitao neletao-a tsümaitao khakhe hinou hrülo. Alia neletao hrülai nou alinou liye kuvah soure donou nataiyu vei sahnü nasü noulo; daiolouzü, “Ramai nou khaophu souyu maiye bawe, ana nataiyu mai hisü zhuvea peiwe.”

⁶ Südonou Ramaiye panou puhvei teile kaovei hinou neletaoye souku peiloure donou khouko buyu Ramai khakhe hinou lah neletao natai-a hrülo.

⁷ Neletao vei le kiyu pfüphou puh hi thaothouwo, daiolouzü puhnou neletaoye zhupeiwe.

⁸ Leikeilo, zhai helo! Neletaoye ngaobawo Rashi nasünou kamaiye tsütou loure donou ra sühao-a laiyu khaosouveo alikua tasühao-a laiwe.

⁹ Neletao lü nasü tsüloua puhye sü nulo, daiolouzü deiphao teiteihi buyu thaihou jürai maitao hrülai-a haikuyu veahoyu hai daokhaiwe touyu sü neletao nou süwe.

¹⁰ Ana neletao nou phajütou veayu thaisü, Khrista hinou neletaoye puhvei teisa khouko ava zha panou ngaozhore donou kulouyu, zhuvea pfüphou vei Ramai puhnou neletaoye southou liche peiwu-a soutsü, soukhou ea soula peilai.

¹¹ Teisanou khoukosü puhvei soulouwo! Amen.

Akhai Khurüyu Chidoh

¹² Enou acheche thaihou jüraimai alie tea poa buyu Sailas vei soukha hinou jüshoyu Seiko haina hai Enou neletao hi rüwe. Enou haihai Ramai vei chekhaoyu zhuvea nasüe tea zhopaoh peia neletaoye le souho peiwe. Sühinou soutaosoua la-a bulo.

¹³ Babilon hi buyu Ramai nou dolouyu neletao tupai lüloumaimenou neletao hi khurüyu chidoh seiwe; alia sübüa Anahpoutuwo Mark nou-a seiwe.

¹⁴ Leshiyu vei mü teiyu nou alinou liye khurükhaio. Khrista hi buyu neletao hrülai hisü kaonayu buloutheo.