1 JOHAN 3 - SHEEYU BAIBEL (BSI)

Ramai Nahtao

¹ Zhukhaio, Puonou Eletaoye daizhozhou leshi peiresa! Puh leshihai dushoe süolouzü Eletaoye sü Ramai vei nahmaitao tea kupeire; alia südonou cheche-a Eletao sü sübaie. Qo haina vanou deiphao mainou Eletaoye sümoe; daiolouzü sünanou puhye sümoe.

² Leshiyu Asakhemai, chuwo Eletao sü Ramai nah taore, ana thaikhai hisü Eletao sü daibü laisa touyu sü chuchu sheetou mohie. Ana Eletao nou süwe süolouzü Khrista nou veyu kisü, Eletao sü puh bülai, daiolouzü puh zhuh chekhaoyu süna hinou Eletao nou puhye sü ngaolai.

³ Khrista nou sheeyu donou puh hi areih haina buyu mai hrülai nou lah puhye shee-a khailouwe.

⁴ Mah souyu maitalinou razhai soukhoyu vei mah soure, daiolouzü mah hai razhaiye soukhoyu sünasüe.

⁵ Neletao nou süwe süolouzü Khrista nou Eletao mah pota peiloure donou ve, alia puh hisü mahlia hae.

⁶ Südonou Khristaye koa ali soulouyu mai hrülainou mah soua bumoe; ana mahsoua buyu maitalisü puhye ngaokhai mohie moa puhye sükhai mohie.

⁷ Anah khe maitao, maitaliye panou neletaoye lawuso! Khrista nou checheyu büa, cheche vah souyu puhsü cheche maie.

⁸ Mah soua buyu maitalisü Rashina hinou ve, daiolouzü shurai hinou Rashi nanou mah soure. Ramai Nah poutuwo nou veyu vei qowo louzü Rashi navei vahtaoye souhare donoue.

⁹ Ramai hilonou nalouyu maitalinou mah soua bumoe, daiolouzü Ramai vei zhai vuzü nasü puh hi bue; alia Ramai hai puh Puo baiyu donou, puhsü mah soua bulouhoe.

¹⁰ Hai vanou thaoh thaohmainou Ramai nahtao ea thaoh thaoh mainou Rashi vei nahmaitaoe touyu sü süloue: acheche vah soumoyu moa puh thaihou jüraiye leshi moyu maitalisü Ramainah moe.

Alinou Liye Leshiyu

¹¹ Neletao nou shurai hinou choulouyu chipao nasü haire; Eletao alinou liye leshi vuzülai.

¹² Eletaowo Kain büwu laimoe; puhsü Ashina hinou ve ea lah puh thaihou Abelye southeare. Daidonou Kain nou puhye southea-e? Daiolouzü lah puhvei vahtaosü ashina baie, ana puh thaihou nou souyu taosü chechewe.

¹³ Südonou Athaihou jürai khemai, deiphao mainou neletaoye ngaora louzü khupawuso.

¹⁴ Eletao nou süwe süolouzü Eletao hai athaina hinou tacho paloua ahri nahi velou loure, daiolouzü Eletao nou Eh thaihou jüraimaiye leshiwe. Leshi moyu maitalisü athaina hinou tobai soumoa bue.

¹⁵ Puh thaihou jüraiye ngaorayu maitalisü maiye southeayu maibaie, alia neletao nou süwe süolouzü maiye southeamai puh hisü teisavei ahri nasü hae.

¹⁶ Hai vanou leshi nasü Eletao nou süwe, süolouzü Khrista nou Eletaoye donou puh hrümai nasü thoupeiwure. Südonou Eletao-a Eletao thaihou jürai maitaoye donou Eletao vei hrümai nasü thoupei züe!

¹⁷ Hani mai alinou puh thaihou jüraihi moshilaiyu bue touyu sü ngaoloukhaia, puh lesü puh thaihou jürai hilo khuwu louzü, puhnou kabüa puh hai Ramaiye leshiwe tea paoloulai?

¹⁸ Anah khe maitao, Eletao leshihai chipao moa chi phakuyu likhei hinou bailai mokhe anou vah ea acheche hinou leshilou laikhe.

Ramai Nghojü hinou Khuveiyu

¹⁹ Südonou haina vanou Eletao nou Eletao hai acheche hinou vebaie touyu sü süloulai; alia haina vanou Eletao lesü Ramai nghojünou latoua bulousüe.

²⁰ Eletao vei lekhetsü nanou Eletaoye mah dukhai louzü, Eletao nou süwe süolouzü Ramaiwo Eletao vei lekhe tsüna jünou duhie ea puhnou ha teiteisü sükhaiwe.

²¹ Alia südonou, leshiyu Asamaitao, Eletao vei lekhetsü nanou Eletaoye mah dukhai molouzü, Eletao sü Ramai nghojünou leduyu bue.

²² Eletao nou puh hinou khoyu teiteisü ngaolouwe, daiolouzü Eletao nou puh chikhasü züwe ea puhnou züpayu sü souwe.

²³ Alia haisü puhvei chikhae, süolouzü puhnou Eletao hi chikha peiwuyu sübütoua, Eletao nou puhnah Poutu Jisu Khrista zhihsü louche vuzülai ea alinou liye leshilai.

²⁴ Ramai chikha züyu mai hrülai nou Ramaiye koa ali soua hrüwe ea Ramai nou puhye koa ali soua hrüwe. Alia Ramai nou Eletao hi peikhai touyu Rako süna vanou Eletao nou süwe süolouzü Ramai nou Eletaoye koa ali soua hrüwe.