1 JOHAN 2 - SHEEYU BAIBEL (BSI)

Eletaoye Soukha-apeio Khrista

¹ Anah khe maitao, neletao nou mah soulou more donou Enou haisü neletao hi rüwe; ana maitalinou mah souwu louzü, Eletao sühsoua Puo nghojü hinou chi veikhayu maili bue—puhsü Jisu Khrista Achecheo nasüe.

² Alia Khrista puhnou Eletao mah khaipeiyu bo nasüe, alia Eletao mah likhei donou baimoe, ana deiphaomai hrülai vei mah donoue.

³ Eletao nou Ramai vei chikhatao züa bulouzü, süvanou Eletao nou Eletao hai puhye süvuzüe touyu sü süwe.

⁴ Maitalinou puh hai Ramaiye süwe tea paokhai-a, puhnou puh chikhataosü zümo louzü, sübüyu maisü dayumai baie ea acheche nasü puh hi hae.

⁵ Ana maitalinou puh chi züa bulouzü, puh hisü chekhao-a Ramaiye leshiyu nasü southou liche peiwure. Haivanou Eletao nou Eletao hai puh hinou bue touyu sü süloure:

⁶ Ramai hinou tobai soumoa bue tea paoyu puhnou Jisu Khrista nou hrüyu bütoua hrüvu zülai.

Chikha Ashuna

⁷ Leshiyu Asakhemai, Enou neletao hi rüpei-a buyu chikha haina hai ashu moe; haisü neletao hi shurai hinou buyu chikha akuna baie. Chikha aku nasü neletao nou choulouyu chipao sünasüe.

⁸ Sütoukhaia Enou neletao hi chikha ashuli rüwe, daiolouzü hainavei acheche nasü Khrista hinou ngaoe ea neletao hi-a ngaoe. Daiolouzü teizhi nasü talata-a bure, alia checheyu ava nasü varupoa bure.

⁹ Maitalinou puh hai avahi bue tea paokhaia, puh thaihou jüraiye ngaora louzü, chukoutea puhsü teizhihi buhie.

¹⁰ Thaihou jüraiye leshiyu maitalisü ava hinou hrüa bue, alia südonou puh hisü mai kukhe taliye mah hi southou peire halia hae.

¹¹ Ana puh thaihou jüraiye ngaorayu maitalisü teizhihi bue; alia teizhi hinou talai-a bue ea daiki tahosa touyu hai puhnou sümoe, daiolouzü teizhi nanou puh nghithousü souchawure.

¹² Anah khe maitao, Enou neletao hi rüwe, daiolouzü Khristaye donou neletao mahsü khaipeiwure.

¹³ Puo khe maitao, Enou neletao hi rüwe, daiolouzü shurai hinou hria buyu puhye sü neletao nou süwe. Nahle maitao Enou neletao hi rüwe, daiolouzü neletao nou ashinaye sü koloure.

¹⁴ Anah khe maitao Enou neletao hi rüwe, daiolouzü neletao nou Puoye süwe. Puo khe maitao, Enou neletao hi rüwe, daiolouzü shurai hinou hria buyu puhye sü neletao nou süwe. Nahlemaitao, Enou neletao hi rüwe, daiolouzü neletaosü khouwe; alia Ramai vei chipaosü neletao hinou tobai soumoa bue, alia neletao nou ashinaye sü koloure.

¹⁵ Deiphaoye moa deiphao hi buyu nataoye leshiso. Maitalinou deiphaoye leshi louzü, Puoye leshiyu nasü puh hi hae.

¹⁶ Daiolouzü deiphao hi buyu na teitei, süolouzü kezhe züpa, nghithou züpa ea khaophu soua hrüyu haitao teitei talia Puo hinou vemoe, ana deiphao hinou vebaie.

¹⁷ Deiphao ea sühi buyu emainou züpayu ha teiteisü tabaiwe; ana Ramai vei leli souyu puhsü teisanou hriwe.

Khristaye Ngaobana

¹⁸ Anah khe maitao, haisü akhai teilecho nare! Alia Khristaye ngaobanasü velai touyu sü neletao nou choulouyu sübüa, chuo Khristaye ngaobamai alaosoua veloure; südonou haisü akhai teilecho nare touyu sü Eletao nou süre.

¹⁹ Puletao sü Eletao hinou tapae, ana puletaowo Ehmai moe; daiolouzü puletao hai Eletao maie toulouzü, puletao sü Eletaoye thaomoa koa buvu zülai. Ana puletao hrülaisü Ehmaitao moe touyu sü sheesha-a popa ngaopeire donou puletaosü tapare.

²⁰ Ana neletaoye sü Mashio nanou theadzü napeire, alia süsü neletao hrülainou süwe.

²¹ Südonou Enou neletao hi rüwe, süsü neletao nou achechena sümoyu donou moe, ana neletao nou sünaye süyu donoue, alia achechena hinou madayu ali-a vemoe touyu süna-a neletao nou süwe.

²² Sübülouzü dayu nasü thaoh-e? Puhsü Jisu hai Khristae touyu bayu nasüe. Sübüyu mainasü Puo ea Nahpoutuye bayu Khrista vei ngaobamai sünasüe.

²³ Daiolouzü Nah Poutuye bayu maitalinou Puoye-a babaiwe; Nahpoutuye popeiyu puhnou Puoye-a popeiwe.

²⁴ Südonou shuraikinou neletao nou choulouyu chipao nasü neletao lekhehi pokhai vuzüloukhaio. Neletao nou chipao süsü pokhaire toulouzü, süthaisü neletao nou Nah Poutu ea Puoye koa alikheisoua teisanou hriloulai.

²⁵ Alia Khrista puhnou Eletao hi peilai tea apaopei khaitouyu sünasü teisavei ahri hainae.

²⁶ Chi haisü Enou neletao hi neletaoye laloure te-a buyu puletao vanou rüwe.

²⁷ Ana neletaoye donou louzü, Khrista nou puhvei rako hai neletao pei hi lakhai peiwure. Puh Rakonou neletao hi busasü, neletaoye donou maitaliye panou neletao hi doupeiyu matsü hae. Daiolouzü puhvei Rakonou neletaoye sü hateitei vanou doupeiwe, alia puhnou doupeiyu sü chechewe, madamoe. Südonou Rakonou doupeiyu sü zülo, alia Khristaye koa ali soua bulo.

²⁸ Ovai, Anah khemaitao, puhnou veyuki Eletao sü khu veishoa buloure donou ea puhnou veyu Teitheki puh hinou ahrao-a tutsü talou more donou puhye koa ali soua bulo.

²⁹ Puh hai chechewe touyu hai neletao nou sülouzü, cheche vah soua buyu maitalisü Ramai nahbaie touyu sü neletao nou süvuzülai.