Titus 1 - Pinyin

Àchàʼtə̀

¹ Àŋwàʼnə̀ zə̀ a furə̀ ambo mɨ̀ŋə̀ Pàolò wa nɨ m̀bənə ngàŋə̀ àfàʼà Nẅùə̀, nkɨ mbə ngàŋə̀ ntwuumə̀ Yěsû Kristù la. Nẅùə̀ à lə̀ tsoʼò mə̀ nkɨ ntwuumə̀ mə̀ lo n̂gə̀ ntə ngyèmpə̀ pànə̀ pɨ Nẅùə̀ nɨ à lə̀ tsoʼnə lo pobə pyiimə̀ e mbə̀ʼə àpyiimə̀ ntɨŋmə̀ àzobə a mə nkẅùə̀, nkɨ mmə ngɨ̀rə̀ lo pobə̂ zhyə̂ a nkǔŋə nkuŋə nɨ à pɨ ghɨ̀rə̀ pobə chyə̂ tsaʼnə Nẅùə̀ à tàʼnə.

² Nkǔŋə nkuŋə wə̀ à pɨ yèmpə̀ a ghobə lo pobə̂ nùŋə̀ àkwàŋə̀ àzobə tə mbyabə̀ a Nɨ̀chyə̂mbyə̂ wa nɨ à ghoŋə̀nə nɨ nkuŋə̀ la, nɨ Nẅùə̀ wa nɨ ka à nyìi e a chwìrə̀ la à lə̀ kàʼnə zaʼà mbòŋə̀ tsùŋə̀ àtwuə̀ ɨ̀shyə̂.

³ Ngotə nkwùə̀ ɨ̀ lə̀ kùʼù, Nẅùə̀ ngàŋə̀ nchwarə̀ ɨ̀wə̀ənə̀ a ghɨ̀rə̀ pànə̀ zhyə̂ ntwuumə̀ wə̀ nɨ à lə̀ ŋânə ambo mɨ̀ŋə̀ lo n̂chwìitə̀.

⁴ Ŋ̀ŋwàʼnə̀ àŋwàʼnə̀ zə̀ la ambo ghò moonə̀ mə̀ Titus nɨ pùu pənə nɨ taʼà àpyiimə̀ ntɨŋmə̀ aŋunə Yěsû la. Tǎ Nẅùə̀ pobə Ndòʼnə̀mbyə̂ ɨ̀wə̀ənə̀ Kristù Yěsû ngàŋə̀ nchwarə̀ ɨ̀wə̀ənə̀ nèrə̀ o nɨ àpòŋə̀ ntɨŋmə̀ nkɨ ŋŋâ o nɨ àporə̀porə̀ àzobə.

Àfàʼà nɨ Titus ǎ fàʼà a Kretə̀

⁵ Ndə̀ myàʼtə̀ o a àlaʼà Kretə̀ la lo wə̀ myàanə̀ nshìitə̀ ɨ̀pwùʼə̀ mɨ̀nwùə̀ nɨ lə̀ ghoŋə̀nə, nkɨ ntsoʼò ɨ̀twuə̀ àshwatə̀ ɨ̀poonə̀ pɨ Kristù amwuə mɨ̀mbòmpə mɨ ɨ̀laʼà mɨ̀ẅùunə mɨ̀tsùmə̀ tsaʼnə ndə̀ tiitə̀nə o la.

⁶ A kùʼnə̀ lo àtwuə̀ àshwatə̀ ɨ̀poonə̀ pɨ Kristù a pə ŋònə̀ nɨ ka à pə e nɨ ɨ̀fèrə, mbə nɨ ndàʼà taʼà mə̀ngyə̌; ɨ̀poonə̀ ɨ̀pe pə pànə̀ nɨ pobə nùŋə̀nə mɨ̀ntɨŋmə̀ ɨ̀mobə aŋunə Kristù, ka mə ghɨ̀rə̀ a ghobə pə ànwùə̀ nɨ pobə kòŋə̀nə kə̀ tɨ̀ŋnə̀ àtwuə̀.

⁷ Tsaʼnə àtwuə̀ Àshwatə̀ ɨ̀poonə̀ pɨ Kristù chyə̂nə mbə ngàŋə̀ àfàʼà Nẅùə̀ la, a pòŋə̀ lo kò a pə e nɨ ɨ̀fèrə; kò a tə nkoʼò e mbɨ̀ŋmə̀; kò a tə nfaʼa ndzaŋə̀ e a loŋə; kò a pə e ŋònə̀ nɨ à wa nnô mɨ̀lùʼù mbaarə̀; kò a tə ndzòŋnə̀ e mɨ̀làʼà; kò a pə e nɨ ntoŋə nkabə̀.

⁸ Àtwuə̀ Àshwatə̀ ɨ̀poonə̀ pɨ Kristù a chyə̂ a nɨ kẅiirə̀ pɨ̀ghɨ̀ɨnə̀ a ndâ ze, ɨ kɨ kòŋə̀ a ànwùə̀ nɨ a kùʼnə̀nə; a chyə̂ a nɨ zhyə̂ ẅìimə̀ mbɨ̀ŋmə̀ e, ɨ mɨ̀nwùə̀ ɨ̀me kɨ ndaanə̀ a mbyə̀ Nẅùə̀.

⁹ A chyə̂ a nɨ ẅìimə̀ ntwuumə̀ ghù ɨ̀shìʼnə̀ wa njiilo a nèrə̀ pànə̀ nɨ mbòomə ghù ɨ̀shìʼnə̀, nkɨ ntiitə̀ pànə̀ nɨ pobə nèrə̀nə mɨ̀nwùə̀ nɨ ka mèrə pə e ntwuumə̀ ghù ɨ̀shìʼnə̀ ghu la lo ka pobə mə ngɨ̀rə̀ a ghobə ànwùə̀ ɨ̀shìʼnə̀.

¹⁰ A chyə̂ a lenə la ntiinə pànə̀ pɨ̀tse pa ghu nɨ pobə pa ntàʼà pə lo pɨ zə̀ərə̀ pə̀ənə̀; pobə pa ntɨ̀ŋnə̀ àtwuə̀, nfɨ̀kə̀ pə̀ənə̀ nɨ ɨ̀shwəŋnə̀ ɨ̀fǐfǐ ɨ̀pobə.

¹¹ A kùʼnə̀ lo wə̀ kẅupə̀ mɨ̀ntswùə̀ ɨ̀mobə ntiinə pobə pa ŋŋâ àzhwàʼnə̀ amwuə mɨ̀ngẅàrə̀ mɨ noʼnə, nnèrə̀ mɨ̀nwùə̀ nɨ ka pobə pə a ghobə a nɨ nèrə̀. Pobə pa ngɨ̀rə̀ a lenə la mbə̀ʼə tàʼà nkabə̀.

¹² Ŋwùə̀ àlaʼà ɨghobə yɨ̀tse nɨ à lə̀ pənə ngàŋə̀ àzhìʼtə̀ à lə̀ shwəŋə̀ lo, “Pànə̀ pɨ Kretə̀ noʼò mbə a ghobə la ngàŋə̀ pɨ̀chwìrə̀, ntsə̂ tsaʼa mɨ̀nyàamə̀ mɨ mɨpaʼa, nkɨ mbə pɨ̀nomənkyə̀ la mbə pɨ̀lòŋə.”

¹³ Zèrə zə̀ ànwùə̀ nɨ a shwəŋə̀nə mbə̀ʼə ghobə la a nkǔŋə nkuŋə. La ɨ̀sùmə ànwùə̀ nɨ wə̀ chyə̂ a nɨ saʼà a ghobə nɨ ɨ̀tɨ̀ŋnə̀ njiilo pobə pə nɨ àpyiimə̀ ntɨŋmə̀ nɨ a kùʼnə̀nə,

¹⁴ Mbə̀ʼə pobə kaŋə ŋâ mɨ̀ntɨŋmə̀ ɨ̀mobə aŋunə mɨkerə mɨ pɨ̀chwìrə̀ nɨ pɨ̀Jew pa ntumə̀ la, kə̀ aŋunə mɨ̀ntə̌ nɨ pànə̀ nɨ pobə twuunə̀nə a nkǔŋə nkuŋə ŋânə la.

¹⁵ Àzwuumə̀ àtsùmə̀ a laanə̀ nkùʼnə̀ ambo pànə̀ nɨ pobə àtwuə̀ ɨ̀pɨ̀ŋmə̀ àzobə laanə̀nə. La ambo pànə̀ nɨ ka mɨ̀nwùə̀ ɨ̀mobə laanə̀ e ka pobə kɨ nnùŋə̀ a ghobə mɨ̀ntɨŋmə̀ ɨ̀mobə aŋunə Kristù, ka ànwùə̀ àtse a laanə̀ e ambo pobə ntiinə tɨ̀pòŋə̀ a tsə̀ŋə̀ mə̀ mɨ̀ntɨŋmə̀ ɨ̀mobə nɨ ɨ̀kwàŋə̀ ɨ̀pobə.

¹⁶ Pobə pə nshwəŋə̀ lo pobə zhyə̂ a Nẅùə̀, la ngɨ̀rə̀ mɨ̀nwùə̀ ɨ̀zobə pə nnèrə̀ lo ka pobə zhyə̂ a ghobə a Nẅùə̀; kɨpaanə a pə amwuə pobə, pobə kɨ mmə ntɨŋmə̀ àtwuə̀ ambo Nẅùə̀, ka kùʼnə̀ a ghobə a nɨ ghɨ̀rə̀ ànwùə̀ yè ɨ̀shìʼnə̀ àtse.