Roman 8 - Pinyin

Tsaʼnə ŋwùə̀ à chyə̂nə ghù ntɨ̀ŋnə̀ amwuə Àzhwùə̀ Nẅùə̀

¹ Pɨ̌ pòŋə̀ chyâ e ɨ̀sàʼa ɨ̀tse àtwuə̀ pànə̀ nɨ pobə pənə taʼà ŋwùə̀ pobə pɨ Kristù Yěsû apə̀,

² ntiinə mbòomə Àzhwùə̀ wa nɨ à pənə amwuə Yěsû à ghɨ̀rə̀ mə lo n̂furə̀ amwuə mbòomə wa nɨ à tônə nɨ tɨ̀pòŋə̀ pobə nɨ̀wɨghə̀ la.

³ Nẅùə̀ à lə̀ ghɨ̀rə̀ a zhyə̀ za nɨ mbə̀ʼə ka mbòomə a lə̀ chyə̂ ghɨ̀rə̀ e ntiinə mbòbə̀ mbɨ̀ŋmə̀ ŋwùə̀ mɨsoŋə ɨ̀ lə̀ porə̀nə. À lə̀ twuumə̀ moonə̀ e a shwuʼə̀ mbə tsaʼa ŋwùə̀ mɨsoŋə wa nɨ à wa ngɨ̀rə̀ a tɨ̀pòŋə̀ la lo â tyiʼə̀ mbə àzwuumə̀ nɨ̀shwàʼà, nsùu a tɨ̀pòŋə̀ pànə̀ pɨ mɨsoŋə, lenəla, ntsə̀ŋə̀ mɨ̀tɨ̀ŋnə̀ mɨ tɨ̀pòŋə̀ amwuə mbòbə̀ mbɨ̀ŋmə̀ ŋwùə̀ mɨsoŋə.

⁴ Nẅùə̀ à lə̀ ghɨ̀rə̀ a lenə la mbə̀ʼə lẅenə̀ mɨ̀nwùə̀ mɨ təəmə̀nə ma nɨ mbòomə à tàʼnə ambo pə̀ənə̀ pa nɨ pə̀ənə̀ chyə̂nə pə tsaʼnə Àzhwùə̀ a tàʼnə, ka pə zùŋə̀ wə̀ənə̀ pə mbòbə̀ mbɨ̀ŋmə̀.

⁵ Pànə̀ nɨ pɨ chyə̂nə pə tsaʼnə mbòbə̀ mbɨ̀ŋmə̀ ɨ̀ tàʼnə tə̂ ɨ̀twuə̀ ɨ̀pobə la aŋunə ɨ̀nwùə̀ nɨ mbòbə̀ mbɨ̀ŋmə̀ ɨ̀ tàʼnə. La pànə̀ nɨ pobə chyə̂nə pə tsaʼnə Àzhwùə̀ a tàʼnə tə̂ ɨ̀twuə̀ ɨ̀pobə la aŋunə ɨ̀nwùə̀ nɨ Àzhwùə̀ a tàʼnə.

⁶ Nɨ̀tə̂ àtwuə̀ aŋunə ɨ̀pwuumə̀ nɨ mbòbə̀ mbɨ̀ŋmə̀ ɨ̀ tàʼnə à tô nɨ nɨ̀wɨghə̀. La nɨ̀tə̂ àtwuə̀ aŋunə ɨ̀pwuumə̀ nɨ Àzhwùə̀ a tàʼnə à tô nɨ nɨ̀chyə̂mbyə̂ pobə àporə̀porə̀.

⁷ Lenəla, ŋwùə̀ mɨsoŋə ǎ tyiʼə̀ pə ngàŋə̀ mbwùunə̀ Nẅùə̀ nɨ à tə̂nə àtwuə̀ pə aŋunə ɨ̀pwuumə̀ nɨ mbòbə̀ mbɨ̀ŋmə̀ ɨ̀ tàʼnə, ntiinə ka à zuʼnə̀ e a mbòomə Nẅùə̀; a tyìʼə̀ nkǔŋə nkuŋə mbə̀ʼə a zuʼnə̀ e apə̀.

⁸ Mbə̀ʼnə pànə̀ pa nɨ pobə pa ngɨ̀rə̀ a ghobə pə ànwùə̀ nɨ mbòbə̀ mbɨ̀ŋmə̀ ɨzobə ɨ̀ tàʼnə la laʼa ngɨ̀rə̀ a ghobə ànwùə̀ àtse a pòŋə̀ Nẅùə̀ apə̀.

⁹ La ngə̀ aŋunə pɨghə, ka nɨ̀ mə nchyə̂ a wɨghə la tsaʼnə mbòbə̀ mbɨ̀ŋmə̀ ɨ̀ tàʼnə; nɨ̀ chyə̂ pə tsaʼnə Àzhwùə̀ a tàʼnə, mbə̀ʼə a pə nkǔŋə nkuŋə lo Àzhwùə̀ Nẅùə̀ a zə̀ nchyə̂ amwuə pɨghə. Ŋònə̀ nɨ ka à pə e nɨ Àzhwùə̀ Kristù ka à pə e ŋwùə̀ e.

¹⁰ La Kristù à tə mbə amwuə pɨghə mbaa pə tsaʼnə mbòbə̀ mbɨ̀ŋmə̀ ɨ̀zɨghə ɨ̀ kwɨghə̀ mə ntii tɨ̀pòŋə̀ la, yi àzhwùə̀ àzɨghə a zə̀ nchyə̂ ntiinə Nẅùə̀ à ghɨ̀rə̀ mə mɨ̀nwùə̀ ɨ̀mɨghə təəmə̀.

¹¹ Àzhwùə̀ Nẅùə̀ nɨ a lə̀ zhwuumə̀nə a Yěsû aŋunə nɨ̀wɨghə̀ a tə mbə amwuə mɨ̀ntɨŋmə̀ ɨ̀mɨghə, yi ze wa nɨ à lə̀ zhwuumə̀nə a Kristù à pɨ ŋâ nɨ̀chyə̂mbyə̂ ambo mbòbə̀ mbɨ̀ŋmə̀ ɨzɨghə nɨ ɨ̀ ghǎ kwɨghə̀, làŋə̀ a ndzùmə̀ Àzhwùə̀ za nɨ a pənə amwuə pɨghə la.

¹² Lenəla, nɨ pɨlyimə ɨ̀pâ, ka pə̀ənə̀ pə wəənə̀ ɨ̀pùʼù ambo mbòbə̀ mbɨ̀ŋmə̀ nɨ mbə̀ʼə pə̀ənə̀ chyə̂ a nɨ̀chyə̂mbyə̂ ɨ̀wə̀ənə̀ ndzùŋə̀ tsaʼnə mbòbə̀ mbɨ̀ŋmə̀ ɨ̀ nèrə̀nə.

¹³ Mbə̀ʼnə pə̀ənə̀ tə mmə nchyə̂ ndzùŋə̀ tsaʼnə mbòbə̀ mbɨ̀ŋmə̀ ɨ̀ nèrə̀nə yi pə̀ənə̌ kwɨghə̀. La pə̀ənə̀ làŋə̀ a ndzùmə̀ Àzhwùə̀ nzhwuutə̀ mɨ̀nwùə̀ nɨ mbòbə̀ mbɨ̀ŋmə̀ ɨ̀ tàʼnə, yi pə̀ənə̌ chyə̂.

¹⁴ Pànə̀ pɨ̀tsùmə̀ nɨ pobə pa nchyə̂ tsaʼnə Àzhwùə̀ Nẅùə̀ a tàʼnə, la ɨ̀poonə̀ pɨ Nẅùə̀.

¹⁵ Ka Nẅùə̀ a lə̀ ŋâ e a wɨghə nɨ Àzhwùə̀ nɨ a ghɨ̀rə̀ lo nɨ̀ pə ɨ̀pùʼù àkẅàrə̀. La à lə̀ ŋâ wɨghə pə nɨ Àzhwùə̀ nɨ a ghɨ̀rə̀nə lo nɨ̀ pə ɨ̀poonə̀ ɨ̀pe, ntyiʼə̀ ndàŋə̀ a ndzùmə̀ Àzhwùə̀ ghu ngyìi nshwəŋə̀ lo “Abà! Tǎ ɨwəə!”

¹⁶ La Àzhwùə̀ Nẅùə̀ àtwuə̀ ɨ̀pɨ̀ŋmə̀ e nɨ a pwuutə̀nə pobə pɨ àzhwùə̀ àzəənə̀ a nɨ shwəŋə̀ lo pə̀ənə̀ la ɨ̀poonə̀ pɨ Nẅùə̀.

¹⁷ Tsaʼnə pə̀ənə̀ chyə̂nə mbə ɨ̀poonə̀ ɨ̀pe la, pə̀ənə̌ pwuutə̀ pə̀ənə̀ pɨ Kristù a nɨ pə nɨ ɨ̀pwuumə̀ nɨ Tǎ à nùŋə̀nə ambo ɨ̀poonə̀ ɨ̀pe, mbə̀ʼə pə̀ənə̀ mə ndzəənə̀ ngəʼə̀ tsaʼa Kristù, njiilo pə̀ənə̀ kɨ mbə nɨ àghuʼtə̀ e.

Nɨ̀ghaʼà nɨ à ghǎ tô

¹⁸ Ǹdzəənə̀ lo ngəʼə̀ nɨ pə̀ənə̀ zəənə̀nə tɨ̀tsòŋə̀ ka ɨ̀ kùʼnə̀ e àghuʼtə̀ nɨ Nẅùə̀ à ghǎ nèrə̀ ambo pə̀ənə̀.

¹⁹ Ɨ̀pwuumə̀ pa ɨ̀tsùmə̀ nɨ Nẅùə̀ à lə̀ tsùŋə̀nə pə mbyabə̀ a nɨ zəənə̀ njyə̂ za nɨ Nẅùə̀ à ghǎ nèrə̀ ɨ̀poonə̀ ɨ̀pe a sàŋə̀ nɨ ntɨŋmə̀ ɨ̀ghobə ɨ̀tsùmə̀.

²⁰ Mbə̀ʼnə la à lə̀ kòŋə̀ e Nẅùə̀ ntsə̀ŋə̀ ɨ̀pwuumə̀ ɨ̀tsùmə̀ nɨ à lə̀ tsùŋə̀nə pèrə tyìʼə̀ àfǐfǐ, ka pə e ɨ̀pwuumə̀ pɨ̀ghu. Mbaa pə tsaʼnə à lə̀ tsə̀ŋə̀nə la, à lə̀ pə nɨ àkwàŋə̀ lo

²¹ ɨ̀pwuumə̀ pèrə pə nɨ à lə̀ tsùŋə̀nə la ghǎ furə̀ ambo nɨ̀wɨghə̀ wa nɨ à lə̀ ghɨ̀rə̀nə pèrə kwɨghə̀ ndə̂ la, tyiʼə̀ pə àtwuə̀ nɨ pobə amwuə nɨ̀ghaʼà ɨ̀poonə̀ pɨ Nẅùə̀ ghù ngẅùunə.

²² Pə̀ənə̀ zhyə̂ lo ɨ̀pwuumə̀ nɨ Nẅùə̀ à tsùŋə̀nə pyə̀ mmə nchwùunə̀ amwuə àndzaŋə tsaʼa mə̀ngyə̌ nɨ à kòonə a moonə̀ tə mbyàa tɨ̀tsòŋə̀.

²³ Ka pə e pə ɨ̀pwuumə̀ pɨ̀ghu ndàʼà; la pə̀ənə̀ nɨ pə̀ənə̀ kẅiirə̀ mə mɨntyaŋnə mɨ Àzhwùə̀ mɨ ntsàambyə̀ nɨ pə̀ənə̀ pə nkɨ mmə nchwùunə̀ amwuə pə̀ənə̀ mbyabə̀ lo Nẅùə̀ a lòo a wə̀ənə̀ aŋunə ɨ̀poonə̀ ɨ̀pe ntyiʼə̀ nfuukə̀ mbɨ̀ŋmə̀ ɨ̀zəənə̀ amwuə ngəʼə̀.

²⁴ Tsaʼnə Nẅùə̀ à lə̀ fuukə̀nə a wə̀ənə̀ amwuə ngəʼə̀ la, pə̀ənə̌ kɨ tyiʼə̀ mmə pyabə̀ lo Nẅùə̀ a lòo a wə̀ənə̀ aŋunə ɨ̀poonə̀ ɨ̀pe pə̀ənə̀ pirə̀ a wə̀ənə̀ tɨ zəənə̀ àzwuumə̀ nɨ pə̀ənə̀ mənə mbyabə̀. A ɨ̀wə̌ nɨ mbə̀ʼə a mə ndzəənə̀ àzwuumə̀ nchi mmə mbyabə̀ a zèrə?

²⁵ La pə̀ənə̀ tə pəla nnùŋə̀ ntɨŋmə̀ mmə mbyabə̀ àzwuumə̀ nɨ ka pə̀ənə̀ mə ndzəənə̀ a wə̀ənə̀, a pòŋə̀ lo pə̀ənə̀ ẅìimə̀ ntɨŋmə̀ mmə mbyabə̀ tyìʼə̀ pyabə̀nə.

²⁶ Tsaʼnə pə̀ənə̀ mənə mbyabə̀ la, lə̌ tsaʼnə Àzhwùə̀ Nẅùə̀ a zə ngyèmpə̀ a wə̀ənə̀ ntiinə pə̀ənə̀ porə̀nə. Mbə̀ʼnə ka pə̀ənə̀ zhyə̂ a wəənə̀ mɨ̀nwùə̀ nɨ mbə̀ʼə pə̀ənə̀ chàʼtə̀ a Nẅùə̀ aŋunə la. La Àzhwùə̀ Nẅùə̀ àtwuə̀ ɨ̀pɨ̀ŋmə̀ e nɨ a za nchàʼtə̀ a Nẅùə̀ àtwuə̀ nɨ pə̀ənə̀ amwuə ndwuumə̀ nɨ mbə̀ʼə ka ŋwùə̀ mɨsoŋə a zhyə̂ shwəŋə̀ e.

²⁷ Ze wa nɨ à zhyə̂nə àkwàŋə̀ nɨ a pənə amwuə mɨ̀ntɨŋmə̀ pə̀ənə̀ la, à kɨ nzhyə̂ àkwàŋə̀ nɨ a pənə amwuə Àzhwùə̀, ntiinə Àzhwùə̀ a za nchàʼtə̀ a Nẅùə̀ àtwuə̀ nɨ pànə̀ pɨ Nẅùə̀ amwuə ndwuumə̀ nɨ Nẅùə̀ à tàʼnə.

²⁸ Pə̀ənə̀ zhyə̂ lo Nẅùə̀ à tsùŋə̀ àzwuumə̀ àtsùmə̀ lo â pòŋə̀ la ambo pànə̀ nɨ pɨ kòŋə̀nə e; mbə pànə̀ pa nɨ à fuŋə̀nə a ghobə njiilo pobə ghɨ̀rə̀ mɨ̀nwùə̀ nɨ à lə̀ pyə̀ mə nkwàŋə̀.

²⁹ Pànə̀ pa nɨ Nẅùə̀ à lə̀ tsoʼnə a ghobə lo pobə gha mbə pə̀ənə̀ ɨ̀pe, à lə̀ nùŋə̀ lo pobə ghǎ pə tsaʼa moonə̀ e, njiilo moonə̀ e wə̀ a tyiʼə̀ mbə ntsàambyə̀ moonə̀ a tɨ̀tɨ̀rə̀ ɨ̀poonə̀ ɨ̀pe pɨ̀noʼnə.

³⁰ Lenəla, Nẅùə̀ à lə̀ kɨ nfuŋə̀ pànə̀ pèrə pə nɨ à lə̀ tsoʼnə nnùŋə̀ la. Pyə̀ pa nɨ à lə̀ fuŋə̀nə la, à lə̀ ghɨ̀rə̀ mɨ̀nwùə̀ ɨ̀mobə təəmə̀. Pyə̀ nɨ à lə̀ ghɨ̀rə̀nə mɨ̀nwùə̀ ɨ̀mobə təəmə̀, à lə̀ kɨ ndòo a ghobə nkwuunə̀ amwuə àghuʼtə̀ e.

Yěsû a nèrə̀ tsaʼnə Nẅùə̀ à kòŋə̀nə a wə̀ənə̀

³¹ Pə̀ənə̀ tyiʼə̀ nshwəŋə̀ lə lo àkə aŋunə ànwùə̀ zèrə zə̀? Nẅùə̀ à tə mbəla mbə pə̀ənə̀ pɨ pobə, a wə̀ənə̀ a tyiʼə̀ mbètə̀ ɨ̀wə̌?

³² Ka Nẅùə̀ à lə yìʼtə̀ e a moonə̀ e, la ŋŋâ e lo â tô nkwɨghə̀ àtwuə̀ pə̀ənə̀ pɨ̀tsùmə̀, mbə̀ʼə a kɨ ka tyiʼə̀ ŋâ e a wə̀ənə̀ nɨ ɨ̀pwuumə̀ pɨ̀noʼnə kẅìʼnə̀ aŋunə moonə̀ e wə̀?

³³ A ɨ̀wə̌ nɨ mbə̀ʼə a chyâ ɨ̀sàʼa aŋunə pànə̀ pɨ Nẅùə̀ nɨ à tsoʼò mə? A tyìʼə̀ Nẅùə̀ nɨ à ghɨ̀rə̀nə lo mɨ̀nwùə̀ mɨ pànə̀ təəmə̀.

³⁴ A ɨ̀wə̌ nɨ mbə̀ʼə a chyâ ɨ̀sàʼa àtwuə̀ pobə? A Yěsû Kristù wa nɨ à lə̀ kwɨghə̀nə la. Ze wa nɨ pɨ lə̀ zhwuumə̀nə e aŋunə nɨ̀wɨghə̀ a tyiʼə̀ nnwuunə̀ a pàa àpô Nẅùə̀ yè zɨghə̀nə nchàʼtə̀ a Nẅùə̀ àtwuə̀ nɨ pə̀ənə̀ la?

³⁵ A ɨ̀wə̌ nɨ mbə̀ʼə a ghàpə̀ a wə̀ənə̀ pɨ ɨ̀kòŋnə̀ Kristù? Mbə̀ʼə lə a pə ngəʼə̀, kə̀ mɨ̀nwùə̀ mɨ tɨ̀ŋnə̀, kə̀ ntòmnə̀, kə̀ njyə̀, kə̀ àfumə̀, kə̀ nɨ̀pə a ntswùə̀ nɨ̀wɨghə̀, kə̀ nɨ̀wɨghə̀?

³⁶ Tsaʼnə pɨ ŋwàʼnə̀nə amwuə àŋwàʼnə̀ Nẅùə̀ lo, “Ntii o, pəə pə a ntswùə̀ nɨ̀wɨghə̀ njyə̂ ɨ̀tsùmə̀: Pɨ mə naŋə̀ a wəə tsaʼa mɨ̀mbyə̂ mɨ ndzìrə̀ nɨ pɨ pə ntàʼà lo kyiimə̀.”

³⁷ Ngaŋə, aŋunə ɨ̀nwùə̀ pèrə pə ɨ̀tsùmə̀, pəə zɨghə̀ mə ntsòo ndàŋə̀ a ndzùmə̀ ze wa nɨ à lə̀ kòŋə̀nə a wə̀ənə̀ la.

³⁸ Mbə̀ʼnə ǹzhyə̂nə nkǔŋə nkuŋə lo ka àzwuumə̀ àtse a pə e ghu nɨ mbə̀ʼə a ghàpə̀ a wə̀ənə̀ aŋunə ɨ̀kòŋnə̀ Nẅùə̀. Kə̀ a pə nɨ̀wɨghə̀, kə̀ nɨ̀chyə̂mbyə̂, kə̀ pəngèrə̀, kə̀ mɨ̀tɨ̀ŋnə̀ mɨ ndzùmə nɨ mɨ pənə a àtwuə̀ ɨ̀shyə̂ ghə, kə̀ mɨ̀nwùə̀ mɨ tɨ̀tsòŋə̀, kə̀ mɨ̀nwùə̀ nɨ mɨ ghǎ tô, kə̀ mɨ̀tɨ̀ŋnə̀ mɨ̀tse,

³⁹ kə̀ ɨ̀pwuumə̀ nɨ pèrə pənə àtɨ̀ghə a nɨ̀pwuurə̀ kə̀ pyə̀ nɨ pèrə pənə a ɨ̀sùmə ɨ̀shyə̂, kə̀ àzwuumə̀ àtsùmə̀ nɨ a pənə a àtwuə̀ ɨ̀shyə̂ ghə. Ka àzwuumə̀ àtse a àtwuə̀ ɨ̀shyə̂ ghə nɨ mbə̀ʼə a gha ngàpə̀ a wə̀ənə̀ aŋunə ɨ̀kòŋnə̀ Nẅùə̀ nɨ ɨ pənə amwuə Kristù Yěsû Ndòʼnə̀mbyə̂ ɨ̀wə̀ənə̀.