Roman 2 - Pinyin

Ndwuumə̀ nɨ Nẅùə̀ à wa ntsoʼtə̀ mɨ̀sàʼa mɨ pə̀ənə̀

¹ Tsaʼnə a pənə lə la nɨ ŋònə̀, ghò wa nɨ wə̀ wa ntsoʼtə̀ mɨ̀sàʼa mɨ pə̀ənə̀; ka wə̀ pə o nɨ ɨ̀sùmə ànwùə̀ ɨ̀tse a nɨ shwəŋə̀ lo, “Ka ndə̀ zhyə̂ mə̀.” Ntiinə wə̀ tə mmə ngɨ̀rə̀ a lenə, yi wə̀ chyâ la ɨ̀sàʼa àtwuə̀ ghò ntiinə wə̀ mənə ntsoʼtə̀ mɨ̀sàʼa mɨ pànə̀ la nkɨ mmə ngɨ̀rə̀ mɨ̀nwùə̀ nɨ pobə ghɨ̀rə̀nə.

² La pə̀ənə̀ zhyə̀ lo ntsoʼtə̀ ɨ̀sàʼa Nẅùə̀ ɨ kùʼnə̀, nkɨ kunə̀ e la aŋunə pànə̀ nɨ pɨ ghɨ̀rə̀nə mɨ̀nwùə̀ tsaʼa mèrə mə.

³ Ndyimə mə̀, wə̀ kwàŋə̀ lo wə̀ tə mmə ntsoʼtə̀ mɨ̀sàʼa mɨ pɨ̀tse pə̀ənə̀, la mmə ngɨ̀rə̀ mɨ̀nwùə̀ nɨ pobə ghɨ̀rə̀nə àzobə, yi ntsoʼtə̀ ɨ̀sàʼa Nẅùə̀ ɨ̌ kunə̀ pə aŋunə pànə̀ pɨ̀tse ka pə kunə̀ e aŋunə ghò?

⁴ Kə̀ ka wə̀ zəənə̀ o tsaʼnə Nẅùə̀ à wə̀ ndanə ngɨ̀rə̀ ɨ̀pòŋə̀ e aŋunə ghò, ngwâ mɨ̀nwùə̀ nɨ wə̀ ghɨ̀rə̀nə ka mɨ kùʼnə̀ e nkɨ ngẅìimə̀ ntɨŋmə̀ e? Ka wə̀ zhyə̀ o lo Nẅùə̀ a ghɨ̀rə̀ ɨ̀pòŋə̀ ẅèrə wə̀ aŋunə ghò mbyabə̀ la lo wə̀ pə̀ŋə̀ ntɨŋmə̀ o?

⁵ La, tsaʼnə wə̀ kɨnə mmə ndèrə̀ pə nɨ mbyə̀ ntɨ̀ŋnə̀ àtwuə̀ la, wə̀ ghɨ̀rə̀ la lo àzaŋə̀ ntɨŋmə̀ Nẅùə̀ yè tɨ̀ŋnə̀ a gha nkunə̀ aŋunə ghò amwuə nkwùə̀ za nɨ Nẅùə̀ à ghǎ mə tsoʼtə̀ mɨ̀sàʼa amwuə àlàŋə yè təəmə̀nə?

⁶ Mbə̀ʼnə Nẅùə̀ a ghǎ tsoʼò àfàʼà ŋwùə̀ ntsùmə̀ amwuə ndwuumə̀ nɨ a fàʼnə.

⁷ Ambo pànə̀ nɨ pobə ẅìimə̀nə mɨ̀ntɨŋmə̀ ɨ̀mobə mmə ngɨ̀rə̀ mɨ̀nwùə̀ nɨ mɨ təəmə̀nə, kə̀ nkɨ mmə ntàʼà àghuʼtə̀ ambo Nẅùə̀ ghobə nɨ̀chyə̂mbyə̂ wa nɨ à ghoŋə̀nə nɨ nkuŋə̀ la, Nẅùə̀ à ghǎ ŋâ a ghobə nɨ ẅèrə.

⁸ La ngə̀ aŋunə pànə̀ nɨ pobə pa ntàŋə̀ pə ɨ̀twuə̀ ɨ̀pobə ntwuunə̀ a nkǔŋə nkuŋə nkɨ ngɨ̀rə̀ a ghobə pə a tɨ̀pòŋə̀ la, Nẅùə̀ à ghǎ kẅìrə̀ àtsə̂ ntɨŋmə̀ e pobə àzaŋə̀ ntɨŋmə̀ e aŋunə pobə.

⁹ Nẅùə̀ à ghǎ chyâ ngəʼə̀ tɨ̀pòŋə̀ aŋunə pànə̀ pɨ̀tsùmə̀ nɨ pobə pa ngɨ̀rə̀ a tɨ̀pòŋə̀, pobə lanə ndzuʼù àndzaŋə mbìʼnə̀ aŋunə pɨ̀Jew ntyiʼə̀ ndèrə̀ aŋunə pànə̀ nɨ ka pobə pə ghobə pɨ̀Jew.

¹⁰ La ŋâ a nɨ̀ghaʼà ghobə àporə̀porə̀ ambo ŋwùə̀ ntsùmə̀ nɨ à wa ngɨ̀rə̀ mɨ̀nwùə̀ mɨ̀shìʼnə̀, mbìʼnə̀ aŋunə pɨ̀Jew ntyiʼə̀ ndèrə̀ aŋunə pànə̀ nɨ ka pobə pə ghobə pɨ̀Jew,

¹¹ ntiinə Nẅùə̀ à tsoʼtə̀nə mɨ̀sàʼa mɨ pànə̀ pɨ̀tsùmə̀ la tyìʼə̀ ndəŋə ndəŋə.

Ka nɨ̀nùŋə̀ ndàʼà mbòomə â chwarə̀ e

¹² Pànə̀ pɨ̀tsùmə̀ nɨ pɨ pa ngɨ̀rə̀ a tɨ̀pòŋə̀ ka mə nùŋə̀ a ghobə a mbòomə Nẅùə̀ ghǎ kwɨghə̀ pî, Nẅùə̀ â kɨ ntsoʼtə̀ e ɨ̀sàʼa ɨ̀ghobə a nɨ zùŋə̀ a mbòomə apə̀. La pànə̀ pɨ̀tsùmə̀ nɨ pɨ pa ngɨ̀rə̀ a tɨ̀pòŋə̀ nzhyə̂ a mbòomə Nẅùə̀ la, Nẅùə̀ à ghǎ tsoʼtə̀ ɨ̀sàʼa ɨ̀ghobə zùŋə̀ a mbòomə.

¹³ Mbəʼnə ka a pə e pànə̀ nɨ pɨ zuʼnə a mbòomə nɨ mɨ̀nwùə̀ ɨ̀mobə təəmə̀nə a mbyə̀ Nẅùə̀. La təəmə̀ mɨ̀nwùə̀ mɨ pànə̀ pa nɨ pobə pa ndzùŋə̀ a mbòomə la.

¹⁴ Pànə̀ nɨ ka pobə pə ghobə pɨ̀Jew nɨ ka pobə kẅiirə̀ a ghobə a mbòomə Nẅùə̀ ndàŋə̀ a ndzùmə̀ Mǔsî, pobə tə mə ngɨ̀rə̀ ànwùə̀ nɨ mbòomə à tàʼnə tsaʼnə mɨ̀ntɨŋmə̀ ɨ̀mobə nèrə̀nə, yi a nèrə̀ lo pobə pa nɨ mbòomə mbaa pə tsaʼnə ka pobə lə̀ pə ghobə nɨ mbòomə Nẅùə̀ la.

¹⁵ Pobə tyiʼə̀ nnèrə̀ lo pɨ ŋwàʼnə̀ mə mɨ̀nwùə̀ nɨ mbòomə a tàʼnə amwuə mɨ̀ntɨŋmə̀ ɨ̀mobə, mɨ̀ntɨŋmə̀ ɨ̀mobə tyiʼə̀ saʼà a ghobə, ɨ̀kwàŋə̀ ɨ̀pobə tyiʼə̀ mbyiitə̀ a ghobə lo mɨ̀nwùə̀ nɨ pobə ghɨ̀rə̀nə mɨ kùʼnə̀ kə̀ ka mɨ kùʼnə̀ e lo.

¹⁶ A nɨ zùŋə̀ ntwuumə̀ ghù ɨ̀shìʼnə̀ wa nɨ ngwa nchwìitə̀ la, ànwùə̀ zèrə̀ zə a ghǎ furə̀ amwuə njyə̂ za nɨ Nẅùə̀ à ghǎ làŋə̀ a ndzùmə̀ Yěsû Kristù tsoʼtə̀ mɨ̀nwùə̀ nɨ pànə̀ lə̀ lə̀əmə̀nə amwuə mɨ̀ntɨŋmə̀ ɨ̀mobə.

Pɨ̀Jew pobə mbòomə

¹⁷ Ngə̀ aŋunə ghò, wə̀ wə̀ nfuŋə̀ mbɨ̀ŋmə̀ o nɨ ŋwùə̀ pɨ̀Jew, mmə ntə̂ àtwuə̀ aŋunə mbòomə, nkɨ mmə ntsòo a ghàŋə̀ lo wə̀ zhyə̂ a Nẅùə̀;

¹⁸ Wə̀ zhyə̂ ànwùə̀ nɨ Nẅùə̀ a tàʼnə lo wə̀ ghɨ̀rə̀ nkɨ nzhyə̂ ànwùə̀ nɨ mbòomə a nèrə̀nə ambo ghò lo a pòŋə̀.

¹⁹ Wə̀ tə mbəla mbyiimə̀ lo ghǒ ngẅìimə̀ àpô pɨ̀fə̀, mbə nkàʼà ambo pànə̀ nɨ pobə pənə amwuə ndzùmə,

²⁰ nkɨ mbə ngàŋə̀ àtəətə̀ ambo ɨ̀puukə̀, nkɨ mbə ɨ̀nèrə̀ ambo nkàŋə̀ ŋwùə̀, ntiinə wə̀ pyiimə̀ lo mbòomə à wa nɨ àzhìʼtə̀ àtsùmə̀ pobə nkǔŋə nkuŋə.

²¹ Tyìʼə̀ ghò, wə̀ wə̀ nnèrə̀ pɨ̀tse pə̀ənə̀, a tyiʼə̀ ngɨ̀rə̀ àkə lo kò wə̀ nèrə̀ ɨ̀pɨ̀ŋmə̀ o? Ghò wa nɨ wə̀ shwəŋə̀nə lo kò pànə̀ zə̀ərə̀; Wə̀ wa ndzə̀ərə̀?

²² Wə̀ wa nshwəŋə̀ lo kò pànə̀ ghɨ̀rə̀ àfànə̀; wə̀ wa ngɨ̀rə̀ àfànə̀? Wə̀ lanə mbàanə̀ pɨ̀tɨtoo; wə̀ wa ndzə̀ərə̀ amwuə mɨ̀ndâ mɨ mɨ̀shwàʼà mɨ pɨ̀tɨtoo?

²³ Ghò wa nɨ wə̀ wa ntsòo a ghàŋə̀ lo wə̀ zhyə̂ a mbòomə Nẅùə̀; wə̀ wa mbəʼə̀ a mbòomə Nẅùə̀ nchyâ ɨ̀sɨŋnə̀ àtwuə̀ Ze?

²⁴ Mbə̀ʼnə pɨ ŋwàʼnə̀ amwuə àŋwàʼnə̀ Nẅùə̀ lo, “Pànə̀ nɨ ka pobə pə ghobə pɨ̀Jew pə ndzòomə̀ a Nẅùə̀ ntii wɨghə pɨ̀Jew.”

²⁵ Lenəla, nɨ̀zə̀ərə̀ a ŋwùə̀ a ànwùə̀ ɨ̀shìʼnə̀ mbə̀ʼə wə̀ mə nnùŋə̀ a mbòomə. La wə̀ tə pəla ka mə nùŋə̀ o a mbòomə, yi nɨ̀zə̀ərə̀ o a àfǐfǐ.

²⁶ Njiilo ŋònə̀ nɨ ka pɨ zə̀ərə̀ e a ye à tə pəla mmə nnùŋə̀ a mbòomə yi Nẅùə̀ ǎ ka naŋə̀ a ye tsaʼa ŋònə̀ nɨ pɨ zə̀ərə̀nə e?

²⁷ A chyə̂ lo pànə̀ nɨ ka pɨ zə̀ərə̀ e a ghobə la pobə pə nnùŋə̀ a mbòomə la pobə ghǎ saʼà ɨ̀sàʼa ɨ̀wɨghə nɨ̀ wɨ̀ghə̀ ntiinə nɨ̀ zhyə̂nə a mbòomə nɨ à pənə amwuə àŋwàʼnə̀ pɨ kɨ ndzə̀ərə̀ a wɨghə la ka pə nùŋə̀ a wɨghə a mbòomə.

²⁸ Ntiinə ŋònə̀ nɨ à wa nnèrə̀ pə àpyìinə lo ze la ŋwùə̀ pɨ̀Jew la ka à pə e ŋwùə̀ pɨ̀Jew. Ka nkǔŋə nkuŋə ànwùə̀ a nɨ zə̀ərə̀ a ŋwùə̀ a pə e la nɨ̀zə̀ərə̀ nɨ pɨ pa ndzə̀ərə̀ a ŋwùə̀ la.

²⁹ Nɨ̀pə ngotə ŋwùə̀ pɨ̀Jew nɨ pɨ zə̀ərə̀nə, a ànwùə̀ amwuə ntɨŋmə̀ nkɨ mbə ànwùə̀ nɨ à ghɨ̀rə̀nə Àzhwùə̀, ka pə e ànwùə̀ mbòomə wa nɨ pɨ ŋwàʼnə̀nə la. Ka pànə̀ pɨ mɨsoŋə mə nguʼtə̀ e a ŋònə̀ ẅèrə wə̀, àghuʼtə̀ e a furə̀ la ambo Nẅùə̀.