Rèvə̀leshònə̀ 1 - Pinyin

¹ Àŋwàʼnə̀ zə̀ a za ntiitə̀ la mɨ̀nwùə̀ nɨ mèrə ghǎ lòo alyiʼə nɨ Yěsû Kristù à lə̀ ghɨ̀rə̀nə lo pɨ̀ zhyə̂ a mèrə. Nẅùə̀ à lə̀ ŋâ e nɨ mɨ̀nwùə̀ mə lo pɨ̀ zhyə̂ njiilo à nèrə̀ a mèrə ambo ngàŋə àfàʼà ɨ̀ze, mbə mɨ̀nwùə̀ nɨ mɨ̌ faʼa lòo alyiʼə. Kristù à lə̀ tsàa a angèrə̀ e lo â tô nnèrə̀ mɨ̀nwùə̀ mə ambo ngàŋə̀ àfàʼà e Jònə lo pànə̀ zhyə̂.

² Jònə a kɨ ntiitə̀ mɨ̀nwùə̀ mɨ̀tsùmə̀ nɨ à lə̀ zəənə̀nə. Lə̌ mɨ̀nwùə̀ nɨ à lə̀ shwəŋə̀nə mbə̀ʼə ntwuumə̀ nɨ ɨ furə̀nə ambo Nẅùə̀ nkɨ mbə ndzəənə̀ zəənə̀nə aŋunə mɨ̀nwùə̀ nɨ Yěsû à lə̀ tiitə̀nə lo mèrə ghǎ lòo alyiʼə la.

³ Mborə̀ ɨ̀ chyə̂ ambo ŋònə̀ wa nɨ à wa nfuŋə̀ àŋwàʼnə̀ ntwuumə̀ Nẅùə̀ zèrə zə̀. Mborə̀ ɨ̀ kɨ nchi mbə ambo ŋònə̀ wa nɨ à wa ndzuʼù ànwùə̀ nɨ pɨ ŋwàʼnə̀nə amwuə àŋwàʼnə̀ zèrə zə ngẅìimə̀. Nkwùə̀ ɨ̀ paatə̀ nɨ mɨ̀nwùə̀ mə mɨ̀tsùmə̀ ghǎ lòo alyiʼə.

Jònə a tsàa àchàʼtə̀ ambo Ɨ̀shwatə̀ Ɨ̀poonə̀ pɨ Kristù pa Sàmbaa

⁴ A mɨ̀ŋə̀ Jònə, mmə ŋŋwàʼnə̀ àŋwàʼnə̀ zə̀ ambo pɨghə, ɨ̀shwatə̀ ɨ̀poonə̀ pɨ Kristù pa sàmbaa nɨ pənə amwuə pàa àlaʼà Asia la. Àpòŋə̀ ntɨŋmə̀ Nẅùə̀ ghobə àporə̀porə̀ e â pə aŋunə pɨghə. Nẅùə̀ la ze wa nɨ à pənə ghu, mbə ze wa nɨ à lə̀ pənə ghu, nkɨ mbə ze wa nɨ à ghǎ pə. Àpòŋə̀ ntɨŋmə̀ Nẅùə̀ ghobə àporə̀porə̀ e a kɨ nfurə̀ ambo ɨ̀zhwùə̀ Nẅùə̀ pa sàmbaa nɨ pənə a mbyə̀ aləŋə nɨ̀fò Nẅùə̀ a nɨ̀pwuurə̀ la.

⁵ Yěsû Kristù à wə̀ nkɨ mmə ntsàa a wɨghə nɨ àpòŋə̀ ntɨŋmə̀ e ghobə àporə̀porə̀ e. À chyə̂ mbə nkǔŋə nkuŋə ndzəənə̀ zəənə̀nə ambo Nẅùə̀. À kɨ mbə ntsàambyə̀ ŋwùə̀ a nɨ zhwuumə̀ a nɨ̀wɨghə̀, ntyiʼə̀ mbuʼtə̀ pɨ̀fò pɨ̀tsùmə̀ a àtwuə̀ ɨ̀shyə̂ ghə. Tsaʼnə Yěsû à lə̀ kòŋə̀nə a wə̀ənə̀ la, à lə̀ kwɨghə̀ tsaʼa mômbyə̂ nɨ̀shwàʼà a nɨ fuukə̀ a wə̀ənə̀ amwuə tɨ̀pòŋə̀.

⁶ À ghɨ̀rə̀ pə̀ənə̀ tyiʼə̀ tsaʼa ngàŋə màʼà Nẅùə̀ nɨ pobə pa nfàʼà ambo Nẅùə̀ Tǎ ɨ̀ghobə nɨ à wa mbuʼtə̀ a ghobə. Àghuʼtə̀ pobə ɨ̀tɨ̀ŋnə̀ pə ambo Yěsû Kristù ngoŋə̀ nɨ nkuŋə̀ nɨ nkuŋə̀! Amen.

⁷ Nɨ̀ zəənə̀, à wə̀ ntô amwuə mbàʼà! Ɨ̀myə̂ mɨ̀tsùmə̌ zəənə̀ e, farə pànə̀ pa nɨ pɨ lə̀ sòpə̀nə e la. Ɨ̀laʼà ɨ̀tsùmə̀ a àtwuə̀ ɨ̀shyə̂ ghǎ yìi e. A tsaʼnə a ghǎ pə! Amen.

⁸ Ndòʼnə̀mbyə̂ Nẅùə̀ Àkoʼntsirə̀ nɨ à pənə, ndə̀ kɨ mbə, mbə ghǎ tô, à shwəŋə̀ lo, “A mɨ̀ŋə̀ mbə Alfàa nkɨ mbə Omegà.”

Ndzə̀əmə̀ ɨ̀ làŋə̀ a ɨ̀myə̂ Jònə a zəənə̀ a Kristù

⁹ A mɨ̀ŋə̀ ndyimə ɨwɨghə Jònə nɨ ǹkɨnə mbə tsaʼa pɨghə a nɨ ẅìimə̀ ntɨŋmə̀ amwuə ngəʼə̀ nɨ ɨ̀ za ntô ambo pànə̀ nɨ Yěsû à mənə mbuʼtə̀ a ghobə. Pɨ lə̀ chyâ mə̀ a ndâ ɨ̀tsaŋə̀ a Patmòsə̀ nɨ à pənə àpàbə ɨ̀shyə̂ a tɨ̀tɨ̀rə̀ nchyə ntiinə ndə̀ mənə nchwìitə̀ ntwuumə̀ Nẅùə̀ ghobə nkǔŋə nkuŋə nɨ Yěsû à lə̀ mənə nnèrə̀ la.

¹⁰ A lə̀ pə njyə̂ Ndòʼnə̀mbyə̂, Àzhwùə̀ Nẅùə̀ a tô aŋunə mɨ̀ŋə̀. Ndə̀ zuʼù ngyə̀ ntɨ̀ŋnə̀ ɨ̀ furə̀ a ndzùmə̀ mɨ̀ŋə̀ mmə ntswuə̀ tsaʼa ntàŋnə̀.

¹¹ Ngyə̀ ghu ɨ̀ lə̀ mə nshwəŋə̀ lo, “Ŋwàʼnə̀ ànwùə̀ nɨ ghò wə̀ ndzəənə̀ amwuə àŋwàʼnə̀ ntsàa ambo ɨ̀shwatə̀ ɨ̀poonə̀ pɨ Kristù pə sàmbaa nɨ pənə a Efesòsə̀, nɨ Sìminà, nɨ Pegamùmə̀, nɨ Tyatirà, nɨ Sadìsə̀, nɨ Fìlàdefyà pobə Laodicea.”

¹² M̀bə̀ŋə̀ nnaŋə̀ lo zəənə̀ a ŋònə̀ nɨ à wə̀ nshwəŋnə̀ ambo mɨ̀ŋə̀. Nkwùə̀ nɨ ndə̀ pə̀ŋə̀nə, ndə̀ zəənə̀ ɨləŋə làamə̀ sàmbaa nɨ pɨ lə̀ tsùŋə̀nə nɨ goldə̀ nɨ pɨ̀làamə̀ aŋunə.

¹³ A tɨ̀tɨ̀rə̀ ɨləŋə làamə̀ pə, àzwuumə̀ àtse à lə̀ təəmə̀ mbə tsaʼa moonə̀ ŋwùə̀. Ŋònə̀ wə̀ à lə̀ ẅî atsəʼə a sàa nshwuʼə̀ mbyàa a mɨ̀kwùə̀ ze, nkɨ ngẅî ɨ̀kòbə̀ nɨ pɨ tsùŋə̀nə nɨ goldə̀ a ghàŋə̀ ze.

¹⁴ Ɨ̀nyùŋə̀ àtwuə̀ e ɨ̀ lə̀ mə nfuə tsaʼa kotə̀nə̀, ɨ̀myə̂ ɨ̀me mə ntsìinə̀ tsaʼa ɨ̀mǔ;

¹⁵ mɨ̀kwùə̀ ɨ̀me pə ntsìinə̀ tsaʼa àtɨ̀ŋnə nɨ pɨ pa nfuŋə̀ nɨ bronzə̀ nɨ pɨ tòonə̀nə amwuə ɨ̀mǔ; ngyə̀ e ɨ̀ mə ndzòrə̀ tsaʼa maa maa nɨ̀fuurə̀.

¹⁶ Pɨsaŋə sàmbaa lə̀ pə amwuə àpô e yè zɨghə̀nə, ɨ̀nẅùə ntsòo ndzùmə̀ ntsùmə̀ nɨ ɨ̀ lə̀ mənə ntsə̂ ɨ̀ furə̀ a ntswùə̀ ze. Ɨ̀sɨghə̀ e ɨ mə ntsìinə̀ tsaʼa nẅùumə̀ ntɨ̀ŋnə̀ àzhwùunə.

¹⁷ Nkwùə̀ nɨ ndə̀ zəənə̀nə e, ndə̀ kunə̀ a mɨ̀kwùə̀ ze tsaʼa àkwuə̀ ŋwùə̀. Lenəla a tyiʼə̀ nnùŋə̀ àpô e yè zɨghə̀nə aŋunə mɨ̀ŋə̀ nshwəŋə̀ lo, “Kò wə̀ pə nɨ àkẅàrə̀. Ǹchyə̂ mbə la ntsàambyə̀ ŋwùə̀ nkɨ mbə ndẅùə̀ndzùmə̀ ŋwùə̀.

¹⁸ A mɨ̀ŋə̀ ze wa nɨ À Wa Nchyə̂! Ndə̀ kwɨghə̀, la nɨ̀ zəənə̀ ngwə̀ yɨ̀ ntɨ̀ŋnə̀, ngoŋə̀ ghu nɨ nkuŋə̀ nɨ nkuŋə̀. Ngwə̀ nɨ ɨ̀tɨ̀ŋnə̀ àtwuə̀ nɨ̀wɨghə̀ farə àtwuə̀ àlaʼà pɨ̀kwuə̀.

¹⁹ Tɨ̀tsòŋə̀, ŋwàʼnə̀ mɨ̀nwùə̀ myə̀ nɨ wə̀ zəənə̀nə; myə̀ nɨ mɨ mə nfurə̀ pobə myə̀ nɨ mɨ ghǎ furə̀,

²⁰ Ànwùə̀ yè lə̀əmə̀nə nɨ a pənə mbə̀ʼə pɨsaŋə pa sàmbaa amwuə àpô mə̀ yè zɨghə̀nə pobə ɨləŋə làamə̀ pa sàmbaa nɨ pɨ lə̀ tsùŋə̀nə nɨ goldə̀ a chyə̂ lo, pɨsaŋə pa sàmbaa la pəngèrə̀ pɨ ɨ̀shwatə̀ ɨ̀poonə̀ pɨ Kristù pa sàmbaa, ɨləŋə làamə̀ pa sàmbaa nkɨ mbə ɨ̀shwatə̀ pɨ̀ghu sàmbaa.”