Lukə̀ 1 - Pinyin

Nɨ̀pìʼnə̀nə àŋwàʼnə̀ Lukə̀

¹ Tǎ Theophilus, pànə̀ pɨ̀noʼnə tàʼà mə a nɨ ŋwàʼnə̀ mɨ̀nwùə̀ ma nɨ mɨ lə̀ furə̀nə a tɨ̀tɨ̀rə̀ pə̀ənə̀.

² Pobə ŋwàʼnə̀ tsaʼnə pànə̀ nɨ pɨ lə̀ zəənə̀ ɨ̀nwùə̀ pèrə pə nkɨ mmə nchwìitə̀ ntwuumə̀ a nɨ furə̀ nkwùə̀ ntsàambyə̀ lə̀ shwəŋə̀nə ambo pə̀ənə̀.

³ Tsaʼnə a pənə a lenə la nɨ Tǎ, ǹdzəənə̀ lo a pòŋə̀ ambo mɨ̀ŋə̀ a nɨ tsùŋə̀ nchi ŋŋwàʼnə̀ ndwuumə̀ nɨ mɨ̀nwùə̀ mèrə mə lə̀ pìʼnə̀nə nga ngə̀ ndẅùutə̀ ambo ghò ntiinə ǹdanə mə nshàrə̀ a mèrə.

⁴ Ǹshwəŋə̀ lə a nɨ ghɨ̀rə̀ wə̀ tsùŋə̀ nzhyə̂ a nkǔŋə nkuŋə mɨ̀nwùə̀ myə̀ nɨ pɨ tiitə̀nə o la.

Ntwuumə̀ mbə̀ʼə nɨ̀pyə̂ Jònə ngàŋə̀ àŋâ àkẅiirə̀ nchyə

⁵ Nkwùə̀ nɨ Heròdə̀ à lə̀ pənə ɨ̀fò àlaʼà Judyà, ngàŋə̀ màʼà Nẅùə̀ ghùtse à lə̀ pə ghu pɨ mə nfuŋə̀ e nɨ Tsàkàriyà. À lə̀ furə̀ amwuə aghaŋə Àbijà, nɨ̀linə̀ nɨ ngẅùə e pə Elizabeth nɨ à lə̀ furə̀nə amwuə ngẅàrə̀ Erònə̀.

⁶ Àkwùə̀ nɨ̀yìinə̀ àzobə ngẅùə e a lə̀ təəmə̀ a mbyə̀ Nẅùə̀, ntiinə pobə lə̀ mə ndzùŋə̀ mɨ̀ntə̌ nkɨ mmə nnùŋə̀ pɨ̀mbòomə pɨ Ndòʼnə̀mbyə̂ pɨ̀tsùmə̀, ka àwɨ̀ghə̀ ànwùə̀ àzobə a mbyə̀ Nẅùə̀.

⁷ La ka pobə lə̀ pə a ghobə nɨ ɨ̀poonə̀, ntiinə Elizabeth à lə̀ pənə e nkǐ, pobə kɨ ntyiʼə̀ a ghobə pɨ̀lwùnə̀.

⁸ A laʼa mbə njyə̂ ɨ̀tse, mbə njyə̂ nɨ àshwatə̀ ngàŋə màʼà Nẅùə̀ pɨ Tsàkàriyà a lə̀ pənə nfàʼà amwuə Ndâ Mɨ̀shwàʼà Nẅùə̀ a Yèrusalèmə̀, Tsàkàriyà a pə fàʼà tsaʼa ngàŋə̀ màʼà Nẅùə̀ a mbyə̀ Nẅùə̀,

⁹ a nɨ zùŋə̀ a mbòomə ngàŋə màʼà Nẅùə̀, pobə lə̀ màʼà ɨpirə ntsoʼò e lo â kwuunə̀ a Ndâ Mɨ̀shwàʼà Nẅùə̀ ntòonə̀ alyiinə.

¹⁰ Nkwùə̀ nɨ à lə̀ pənə ntòonə̀ alyiinə zə, àpùŋə̀ pə̀ənə̀ àtsùmə̀ nɨ a lə̀ pənə a àpyìinə a lə̀ mə nchàʼtə̀ a Nẅùə̀.

¹¹ Angèrə̀ Ndòʼnə̀mbyə̂ a furə̀ a mbyə̀ ze ntəəmə̀ a pàa àpô ze yè zɨghə̀nə aŋunə alyiʼə mɨ̀shwàʼà Nẅùə̀.

¹² Nkwùə̀ nɨ Tsàkàriyà à lə̀ zəənə̀nə a angèrə̀ wa, ntɨŋmə̀ e ɨ ləənə̀, àkẅàrə̀ a ẅìimə̀ e.

¹³ La Angèrə̀ wa a shwəŋə̀ ambo ze lo, “Kò wə̀ pô mbǎ Tsàkàriyà, Nẅùə̀ à zuʼù àchàʼtə̀ Nẅùə̀ o. Ngẅùə o Elizabeth à ghǎ pyə̂ a mômbyàŋnə̀ wə̀ chwùə̀ nɨ̀linə̀ ɨ̀tse nɨ Jònə.

¹⁴ À ghǎ pə nɨ̀ghaʼà ambo ghò farə ambo pànə̀ pɨ̀noʼnə ntiinə pɨ pyə̂nə e.

¹⁵ Mbə̀ʼnə à ghǎ pə ŋònə̀ ngẅùunə a ɨ̀myə̂ Ndòʼnə̀mbyə̂. Kò a nô e mɨ̀lùʼù mɨ̀tɨ̀ŋnə̀ mɨ̀tse. Àzhwùə̀ Nẅùə̀ a ghǎ pə amwuə ze nkwùə̀ nɨ à furə̀nə a nɨ̀pùmə̀ mǎ e.

¹⁶ À ghǎ ghɨ̀rə̀ pànə̀ pɨ Israel pɨ̀noʼnə kẅirə̀ nkwə̂ ambo Ndòʼnə̀mbyə̂ Nẅùə̀ ɨghobə.

¹⁷ À ghǎ lèrə̀ a mbyə̀ Ndòʼnə̀mbyə̂ nɨ Àzhwùə̀ Nẅùə̀ pobə mɨ̀tɨ̀ŋnə̀ mɨ Nẅùə̀ tyìʼə̀ tsaʼa Elijah. À ghǎ chi pwuutə̀ pɨ̀tǎ pobə ɨ̀poonə̀; à ghǎ pə̀ŋə̀ ngàŋə àtɨ̀ŋnə̀ àtwuə̀ pobə kwə̂ amwuə àlàŋə pànə̀ nɨ mɨ̀nwùə̀ ɨ̀mobə təəmə̀nə. À ghǎ mə lìʼtə̀ pə̀ənə̀ pobə̂ chwuʼtə̀ mbɨ̀ŋmə̀ a nɨ pyabə̀ a Ndòʼnə̀mbyə̂.”

¹⁸ Tsàkàriyà a pyiitə̀ angèrə̀ wa lo, “Mbɨ zhyə̂ a nkǔŋə nkuŋə aŋunə ànwùə̀ zèrə zə lə ɨla? Ǹdwùnə̀ mə, ngẅùə mə̀ a kɨ ndwùnə̀ e.”

¹⁹ Angèrə̀ wa a kẅùə̀ lo, “Mɨ̀ŋə̌ Gabriel ntəəmə̀ a mbyə̀ Nẅùə̀, a twuumə̀ mə̀ lo n̂tô nchwìitə̀ ntwuumə̀ ghù ɨ̀shìʼnə̀ wə̀ ambo ghò.

²⁰ Naŋə̀! A nɨ furə̀ tɨ̀tsòŋə̀ wə̀, wə̌ zhwemnə̀ chi shwəŋnə̀ o apə̀ tə pyàa njyə̂ nɨ ànwùə̀ zə̀ a ghǎ ghɨ̀rə̀. Ntiinə ka wə̀ pyiimə̀ o ànwùə̀ za nɨ a ghǎ furə̀ amwuə ngotə nkwùə̀ e.”

²¹ Aŋunə nkwùə̀ zə̀ ntsùmə̀ nɨ Tsàkàriyà à lə̀ mənə nshwəŋnə̀ pobə angèrə̀ wa la, pànə̀ nɨ pobə lə̀ pənə a àpyìinə lə̀ mə mbyabə̀ a tyiʼə̀ nkə̀ʼnə̀ a ghobə nɨ ànwùə̀ nɨ a ghɨ̀rə̀nə a Tsàkàriyà a lyàrə̀ amwuə Ndâ Mɨ̀shwàʼà Nẅùə̀.

²² Nkwùə̀ nɨ à lə̀ furə̀nə, ka à lə̀ chi nzhyə̂ shwəŋnə̀ e ambo pobə, pobə zùŋə̀ nzhyə̂ lo à zəənə̀ àzwuumə̀ àtse amwuə Ndâ Mɨ̀shwàʼà Nẅùə̀ ntiinə à laʼa ntyiʼə̀ mmə nnèrə̀ mɨ̀nwùə̀ pə nɨ mbô ambo pobə, ka pə chi zhyə̂ shwəŋnə̀ e.

²³ Nkwùə̀ nɨ à lə̀ myàanə̀nə àfàʼà e a Ndâ Mɨ̀shwàʼà Nẅùə̀ a Yèrusalèmə̀, à lə̀ kwə̂ a ɨmwuə alyiʼə ze.

²⁴ A lə̀ kɨ pə aŋunə mətùmə nkwùə̀ ngẅùə e Elizabeth a pə nɨ moonə̀ ntyiʼə̀ nnwuunə̀ e pə a ndâ lo kò pɨ zəənə̀ e a ye aŋunə ŋwɨgrə̀ ɨtaanə̀.

²⁵ À lə̀ tyiʼə̀ nshwəŋə̀ lo, “Ndòʼnə̀mbyə̂ à ghɨ̀rə̀ ànwùə̀ ɨ̀shìʼnə̀ aŋunə mɨ̀ŋə̀, nfuukə̀ ɨ̀sɨŋnə̀ àtwuə̀ mɨ̀ŋə̀ a tɨ̀tɨ̀rə̀ pə̀ənə̀.”

Ntwuumə̀ mbə̀ʼə nɨ̀pyə̂ Yěsû

²⁶ Ŋwɨgrə̀ ntuurə̀ lə̀ làŋə̀ amwuə nkwùə̀ nɨ Elizabeth à lə̀ pənə nɨ moonə̀, Nẅùə̀ a twuumə̀ a angèrə̀ Gabriel amwuə pàa àlaʼà Nazarètə̀ nɨ à pənə mbòmpə àlaʼà amwuə Galìlyə̂.

²⁷ À lə̀ pə nɨ ntwuumə̀ ambo môngwàngòonə̀ ɨ̀tse ẅùə̀ nɨ à laʼa mə nzhyə̂ e a ŋònə̀ mbyàŋnə̀ apə̀, nɨ Jòsebə̀ ŋwùə̀ ngẅàrə̀ Dàfirə̀ à lə̀ tsoʼnə mɨ̀lùʼù mɨ àtwuə̀ ɨ̀me.

²⁸ Angèrə̀ wə̀ à lə̀ tô ambo Màriyà nshwəŋə̀ lo, “Ngwə̀ nchàʼtə̀ o! Àporə̀porə̀ â pə ambo ghò! Ndòʼnə̀mbyə̂ à wə̀ pɨghə ze.”

²⁹ La Màriyà à lə̀ pə nɨ ntòmnə̀ tyìʼə̀ nɨ nkuŋə̀ amwuə nkwùə̀ nɨ à lə̀ zuʼnə ànwùə̀ nɨ angèrə̀ wə̀ à lə̀ shwəŋə̀nə la, ntyiʼə̀ nkwàŋə̀ ànwùə̀ nɨ mbuurə̀ àchàʼtə̀ zèrə zə̀ ɨ̀ nèrə̀nə.

³⁰ Angèrə̀ wa a shwəŋə̀ ambo ze lo, “Màriyà kò wə̀ pô; àpòŋə̀ ntɨŋmə̀ Nẅùə̀ a chyə̂ aŋunə ghò.

³¹ Naŋə̀! Wə̌ sùŋə̀ a moonə̀ pyə̂ a mômbyàŋnə̀, chwùə̀ nɨ̀linə̀ ɨ̀tse nɨ Yěsû.

³² À ghǎ pə ŋònə̀ ngẅùunə pɨ̀ fuŋə̀ e nɨ Moonə̀ Nẅùə̀ Àkoʼntsirə̀. Ndòʼnə̀mbyə̂ Nẅùə̀ à ghǎ ŋâ e nɨ aləŋə nɨ̀fò tǎ pɨ tǎ ɨghobə Dàfirə̀.

³³ À ghǎ pə ɨ̀fò àtwuə̀ ngẅàrə̀ Yàkobə̀ nɨ nkuŋə̀; aləŋə Nɨ̀fò e a ghǎ lẅùutə̀ e apə̀.”

³⁴ Màriyà a pyiitə̀ angèrə̀ wa lo, “Ka ǹzhyə̂ mə̀ a ŋònə̀ mbyàŋnə̀. Mbə̀ʼə zə̀ ànwùə̀ a làŋə̀ lə ɨla ngɨ̀rə̀?”

³⁵ Angèrə̀ wa a kẅùə̀ lo, “Àzhwùə̀ Nẅùə̀ a ghǎ tô ambo ghò, mɨ̀tɨ̀ŋnə̀ mɨ Nẅùə̀ Àkoʼntsirə̀ kwuunə̀ amwuə ghò. Lenəla, pɨ̌ fuŋə̀ a moonə̀ ghù ndaanə̀nə wa nɨ wə̌ pyə̂ la nɨ Moonə̀ Nẅùə̀.

³⁶ Kẅempə̀ a ŋwùə̀ ngẅàrə̀ o Elizabeth. Pɨ lə̀ pə nshwəŋə̀ lo mbə̀ʼə a pòŋə̀ pyə̂ e apə̀. La tɨ̀tsòŋə̀, à wə̀ nɨ moonə̀ ŋwɨgrə̀ ntuurə̀, mbaa pə tsaʼnə à lwùnə̀ mə tɨsɨŋnə la.

³⁷ Ntiinə ka ànwùə̀ àtse a pə e ghu nɨ mbə̀ʼə ka Nẅùə̀ a ghɨ̀rə̀ e.”

³⁸ Màriyà a kẅùə̀ lo, “Zəənə̀, ǹchyə̂ mbə la àpùʼù Ndòʼnə̀mbyə̂. Ànwùə̀ ghu â ghɨ̀rə̀ aŋunə mɨ̀ŋə̀ tyìʼə̀ tsaʼnə wə̀ shwəŋə̀nə la.” Angèrə̀ wa a tyiʼə̀ mmyàʼtə̀ e, ndèrə̀ e.

Màriyà a ghaanə̀ a Elizabeth

³⁹ Tyìʼə̀ nkwùə̀ ghu, Màriyà a shwatə̀ ɨ̀pwuumə̀ ɨ̀pe ndèrə̀ nɨ mɨ̀tɨ̀ŋnə̀ amwuə mbòmpə àlaʼà ngẅùunə ɨ̀tse nɨ ɨ̀ lə̀ pənə amwuə àlaʼà Judyà zhyə̀ nɨ a pənə àtwuə̀ kòŋə̀.

⁴⁰ Nkwùə̀ nɨ à lə̀ lèrə̀nə ghu la, à lə̀ ghə̀ nkwuunə̀ a ndâ Tsàkàriyà nchàʼtə̀ a Elizabeth.

⁴¹ Tyìʼə̀ tsaʼnə Elizabeth à zuʼnə àchàʼtə̀ Màriyà, moonə̀ wa a kànə̀ a nɨ̀pùmə̀ ze, a tyiʼə̀ ndẅenə̀ nɨ Àzhwùə̀ Nẅùə̀.

⁴² A kyiinə̀ nshwəŋə̀ lo, “Nẅùə̀ à chyâ mborə̀ aŋunə ghò ntsàarə̀ a pɨ̀tse pə̀ngyə̌, mborə̀ ɨ̂ kɨ nchi mbə aŋunə moonə̀ wə̀ nɨ wə̀ ghǎ pyə̂ lə.

⁴³ Ànwùə̀ yè ẅùunə zə a tô ambo mɨ̀ŋə̀ lə ntii àkə, lo mǎ pɨ Ndòʼnə̀mbyə̂ â tô ngaanə̀ mə̀?

⁴⁴ Nkwùə̀ nɨ ǹtənə ndzuʼù àchàʼtə̀ o la, moonə̀ nɨ à pənə a nɨ̀pùmə̀ mɨ̀ŋə̀ à tô nkànə̀ nɨ nɨ̀ghaʼà.

⁴⁵ A pòŋə̀ ambo ghò ntiinə wə̀ lə̀ nùŋə̀nə ntɨŋmə̀ lo ànwùə̀ nɨ Ndòʼnə̀mbyə̂ à lə̀ shwəŋə̀nə ambo ghò a ghǎ ghɨ̀rə̀.”

Nchyə nɨ Màriyà à lə̀ zòbə̀nə

⁴⁶ Lenəla, Màriyà a shwəŋə̀ lo, “Ntɨŋmə̀ mə̀ ɨ̀tsùmə̀ ghuʼtə̀ a Ndòʼnə̀mbyə̂.

⁴⁷ Ntɨŋmə̀ mə̀ wə̀ nɨ nɨ̀ghaʼà mbə̀ʼə Nẅùə̀ ngàŋə̀ nchwarə̀ mə̀,

⁴⁸ ntiinə à kẅuumə̀nə mə̀, ngàŋə̀ àfàʼà e nɨ à pənə àzwuumə̀ àfǐfǐ! A nɨ pìʼnə̀ tɨ̀tsòŋə̀, ɨ̀waanə̀ pə̀ənə̀ ɨ̀tsùmə̀ ghǎ fuŋə̀ mə̀ nɨ ŋònə̀ nɨ à pənə nɨ mborə̀.

⁴⁹ Mbə̀ʼnə ze wa nɨ à faŋə̀nə, à ghɨ̀rə̀ mɨ̀nwùə̀ mɨ̀ẅùunə ambo mɨ̀ŋə̀, nɨ̀linə̀ ɨ̀tse laanə̀.

⁵⁰ À koorə̀ mɨ̀lɨŋə̀ mɨ pànə̀ pyə̀ nɨ pobə pa mbô e nfurə̀ amwuə wə̀ ɨ̀waanə̀ ngə̀ mbyàa amwuə ẅùə̀ ɨ̀waanə̀.

⁵¹ À shwùumə̀ àpô e nnèrə̀ ɨ̀tɨ̀ŋnə̀ e ẅùə̀ nɨ ɨ wa nshàʼtə̀ ngàŋə àkoʼò mbɨ̀ŋmə̀ pobə ɨ̀kwàŋə̀ ɨ̀pobə ɨ̀tsùmə̀.

⁵² “À shwuʼkə̀ mə pɨ̀fò pɨ̀ẅùunə aŋunə ɨləŋə nɨ̀fò ɨ̀pobə, ŋŋaŋə̀ ɨ̀fǐfǐ pə̀ənə̀ a àtɨ̀ghə.

⁵³ À ŋâ ɨ̀pwuumə̀ pɨ̀shìʼnə̀ ambo ngàŋə njyə̀, la ntsàa ngàŋə nkabə̀ pobə lèrə̀ nɨ mbô ɨ̀mobə mɨmbaa.

⁵⁴ À yèmpə̀ a ngàŋə̀ àfàʼà e Israel, nkẅempə̀ àkoorə̀ mɨ̀lɨŋə̀ e aŋunə pə̀ənə̀.

⁵⁵ Tsaʼnə à lə̀ kàʼnə ambo pɨ̀tǎ pɨ̀tǎ ɨ̀pə̀ənə̀, à lə̀ koorə̀ mɨ̀lɨŋə̀ mɨ tǎ ɨ̀wə̀ənə̀ Abràhamə̀ pobə pɨ ngẅàrə̀ e ntsùmə̀ nkwùə̀ ɨ̀tsùmə̀.”

⁵⁶ Màriyà à lə̀ chyə̂ pobə Elizabeth tsaʼa ŋwɨgrə̀ ɨtarə nkẅirə̀ nkwə̂ e.

Pɨ pyə̂ Jònə ngàŋə̀ àŋâ àkẅiirə̀ nchyə

⁵⁷ Nkwùə̀ nɨ Elizabeth à lə̀ pənə pyə̂ ɨ̀ lə̀ kùʼù, a pyə̂ a mômbyàŋnə̀.

⁵⁸ Ngàŋə àpàrə̀ nkaʼà ɨ̀ze pobə pɨ ngẅàrə̀ e lə̀ zuʼù ànwùə̀ yè ẅùunə nɨ Ndòʼnə̀mbyə̂ à lə̀ ghɨ̀rə̀nə ambo ze, pobə pɨ pobə tyiʼə̀ mbwuutə̀ ngaʼà.

⁵⁹ A lə̀ pə aŋunə nòmbàa njyə̂ nɨ̀fàamə̂ pɨ tô a nɨ zə̀ərə̀ a moonə̀ wa, mmə ntàʼà a nɨ chwùə̀ nɨ̀linə̀ ɨ̀tse nɨ Tsàkàriyà nɨ à lə̀ pənə nɨ̀linə̀ nɨ tǎ ɨghobə,

⁶⁰ la mǎ e a twuunə̀ e tyìʼə̀ nɨ ɨ̀tɨ̀ŋnə̀, nshwəŋə̀ lo, “Nɨ̀linə̀ ɨ̀tse la Jònə.”

⁶¹ Pànə̀ pa shwəŋə̀ ambo ze lo, “Ka ŋònə̀ ɨ̀tse amwuə ngẅàrə̀ ɨzɨghə nɨ à pənə nɨ nɨ̀linə̀ tsɨ̀ghu!”

⁶² Pobə lə̀ tyiʼə̀ nshwəŋnə̀ ambo Tsàkàriyà nɨ mbô, mmə mbyiitə̀ e lo à pyə̀ nkòŋə̀ a nɨ chwùə̀ nɨ̀linə̀ nɨ moonə̀ wə̀ la nɨ ɨ̀wə̌?

⁶³ Tsàkàriyà à lə̀ pyiitə̀ àzwuumə̀ nɨ pɨ pa ŋŋwàʼnə̀ aŋunə, ŋŋwàʼnə̀ aŋunə lo, “Nɨ̀linə̀ ɨ̀tse la Jònə.” Ànwùə̀ ghu a lə̀ ghɨ̀rə̀ mɨ̀ntswùə̀ ɨ̀mobə mɨ̀tsùmə̀ kaʼà.

⁶⁴ Tyìʼə̀ nkwùə̀ ghu, ntswùə̀ Tsàkàriyà lə̀ nyaʼkə̀, àləəmə̀ e a shwèntə̀, a kɨ mbìʼnə̀ a nɨ shwəŋnə̀ ntyiʼə̀ ngyetə̀ a Nẅùə̀.

⁶⁵ Àkẅàrə̀ a lə̀ ẅìimə̀ ngàŋə àpàrə̀ nkaʼà ɨ̀zobə. Nɨkerə mbə̀ʼə mɨ̀nwùə̀ mèrə mə lə̀ sìimə̀ amwuə kòŋə̀ àlaʼà Judyà ntsùmə̀.

⁶⁶ Ŋwùə̀ ntsùmə̀ nɨ à lə̀ zuʼnə ànwùə̀ ghu à lə̀ kwàŋə̀ a àtwuə̀ ze, mbyiitə̀ lo, “Moonə̀ ẅèrə wə̀ à ghǎ kẅuə̀ pə lə àkə?” Ntiinə a furə̀ ndaanə̀ lo ɨ̀tɨ̀ŋnə̀ Ndòʼnə̀mbyə̂ ɨ wə̀ aŋunə ze.

Tsàkàriyà a chwìitə̀ ntwuumə̀ Nẅùə̀

⁶⁷ Àzhwùə̀ Nẅùə̀ a lə̀ lẅenə̀ a Tsàkàriyà tǎ pɨ Jònə, a tyiʼə̀ nchwìitə̀ ntwuumə̀ Nẅùə̀ lo,

⁶⁸ “Nɨ̀ ghɨ̀rə̀ pə̀ənə̀ yetə̀ a Ndòʼnə̀mbyə̂, Nẅùə̀ pànə̀ pɨ Israel, ntiinə à tô mə a nɨ yèmpə̀ pə̀ənə̀ ɨ̀pe, ntsuʼù ɨ̀twuə̀ ɨ̀pobə.

⁶⁹ À ŋâ mə a ngàŋə̀ nchwarə̀ pə̀ənə̀, ẅùə̀ nɨ à tɨ̀ŋnə̀nə ambo pə̀ənə̀, mbə ŋwùə̀ ngẅàrə̀ ngàŋə̀ àfàʼà e Dàfirə̀,

⁷⁰ tyìʼə̀ tsaʼnə à lə̀ kàʼnə ndàŋə̀ a ndzùmə̀ ngàŋə ntwuumə̀ Nẅùə̀ yɨ̀ laanə̀nə yɨ̀ ntsàambyə̀ lo,

⁷¹ à ghǎ chwarə̀ a wə̀ənə̀ ambo ngàŋə mbwùunə̀ ɨ̀zəənə̀, kẅiirə̀ a wə̀ənə̀ ambo pànə̀ nɨ pɨ pàanə̀nə a wəənə̀ la.

⁷² À lə̀ kẅempə̀ ɨ̀kàanə̀ yɨ̀ laanə̀nə wa, nnèrə̀ àpòŋə̀ ntɨŋmə̀ e zhyə̀ nɨ à lə̀ kàʼnə ambo pɨ̀tǎ ɨ̀pə̀ənə̀ pɨ̀ntsàambyə̀.

⁷³ À lə̀ tsə̀əmə̀ ambo tǎ ɨ̀wə̀ənə̀ Abràhamə̀ lo,

⁷⁴ à ghǎ kẅiirə̀ a wəənə̀ ambo ngàŋə kɨpaanə ɨ̀zəənə̀ mbə̀ʼə pə̀ənə̀ tyiʼə̀ nfàʼà ambo ze tɨ àkẅàrə̀,

⁷⁵ amwuə ndwuumə̀ nɨ ɨ laanə̀nə nkɨ ntəəmə̀ ɨ̀shìʼnə̀ a mbyə̀ ze aŋunə nkwùə̀ ɨ̀zə̀ənə̀ ntsùmə̀ a àtwuə̀ ɨ̀shyə̂ ghə.

⁷⁶ Moonə̀ mə̀, pɨ ghǎ tyiʼə̀ mmə nfuŋə̀ o nɨ ngàŋə̀ ntwuumə̀ Nẅùə̀ Àkoʼntsirə̀, ntiinə wə̀ ghǎ lèrə̀ a mbyə̀ Ndòʼnə̀mbyə̂ a nɨ tsùŋə̀ àlàŋə e,

⁷⁷ ghɨ̀rə̀ pə̀ənə̀ ɨ̀pe zhyə̂ lo pɨ ghǎ chwarə̀ a ghobə a nɨ làŋə̀ a ndzùmə̀ nɨ̀lə̀ənə̀ ɨ̀fàntə̀ ɨ̀nwùə̀ ɨ̀pobə.

⁷⁸ Ntii àkoorə̀ mɨ̀lɨŋə̀ Nẅùə̀ ɨ̀wə̀ənə̀, njyə̂ ɨ̀ ghǎ furə̀ a nɨ̀pwuurə̀ laanə̀ shwuʼə̀ aŋunə pə̀ənə̀,

⁷⁹ kyàʼà pànə̀ pa nɨ pobə pa nchyə̂ amwuə ndzùmə, farə amwuə ɨlyiʼə ləgrə nɨ̀wɨghə̀, pyabə̀ mɨ̀kwùə̀ ɨ̀məənə̀ mbə̀ʼə pə̀ənə̀ yìinə̀ amwuə àlàŋə àporə̀porə̀.”

⁸⁰ Moonə̀ wa à lə̀ kẅuə̀ ntɨ̀ŋnə̀ amwuə Àzhwùə̀ Nẅùə̀, nchyə̂ amwuə alyiʼə waakə tə mbyàa nkwùə̀ nɨ à lə̀ nèrə̀nə ɨ̀pɨ̀ŋmə̀ e ambo pànə̀ pɨ Israel.