Kòlosè 1 - Pinyin

Pàolò a tsàa àchàʼtə̀

¹ Àŋwàʼnə̀ zə a furə̀ ambo mɨ̀ŋə̀ Pàolò, ngàŋə̀ ntwuumə̀ Kristù Yěsû amwuə ndwuumə̀ nɨ Nẅùə̀ à lə̀ tàʼnə. Pəə ndyimə ɨ̀wəənə̀ Timotì a ndzùmə̀ Yěsû Kristù mə chàʼtə̀.

² Zèrə a mə ndèrə̀ ambo pɨghə nɨ nɨ̀ pənə pànə̀ pɨ Nẅùə̀ a mbòmpə àlaʼà Kòlosè, nkɨ mbə pɨlyimə ɨ̀pə̀ənə̀ nɨ pobə nùŋə̀nə ntɨŋmə̀ ɨ̀ghobə lo pə taʼà ŋwùə̀ pobə pɨ Kristù la. Àpòŋə̀ ntɨŋmə̀ nɨ àporə̀porə̀ Nẅùə̀ Tǎ ɨ̀wə̀ənə̀ â pə aŋunə pɨghə.

Pàolò a chàʼtə̀ a Nẅùə̀ ŋŋâ a mɨyàa ambo Nẅùə̀

³ Pəə pə ŋŋâ a mɨyàa ambo Nẅùə̀ tǎ pɨ Ndòʼnə̀mbyə̂ ɨ̀wə̀ənə̀ Yěsû Kristù nkwùə̀ ntsùmə̀ nɨ pəə mənə nchàʼtə̀ a Nẅùə̀ aŋunə pɨghə.

⁴ Pəə pə ŋâ a mɨyàa ambo Nẅùə̀ ntiinə pəə zuʼù mə tsaʼnə àpyiimə̀ ntɨŋmə̀ àzɨghə aŋunə Kristù a pənə ghobə ɨ̀kòŋnə̀ nɨ nɨ̀ pənə nɨ ẅèrə aŋunə pànə̀ pɨ Nẅùə̀ pɨ̀tsùmə̀.

⁵ Pəə zhyə̂ lo nɨ̀ wə̀ ngɨ̀rə̀ a lenəla ntiinə àpyiimə̀ ntɨŋmə̀ nɨ ɨ̀kòŋnə̀ nɨ nɨ̀ pənə nɨ ẅèrə ɨ lə pəla ntiinə nɨ̀ zhyə̂nə àzwuumə̀ nɨ nɨ̀ pyabə̀nə, nɨ pɨ nùŋə̀nə a nɨ̀pwuurə̀ ambo pɨghə. Nɨ̀ lə̀ zhyə̂ lo nɨ̀ chyə̂ a nɨ pyabə̀ a àzwuumə̀ nɨ a pənə ntô nkwùə̀ nɨ nɨ̀ lə̀ zàamə̀nə ndzuʼù ntwuumə̀ nkǔŋə nkuŋə wa nɨ ɨ pənə ntwuumə̀ ghù ɨ̀shìʼnə̀ la.

⁶ Ntwuumə̀ ghù ɨ̀shìʼnə̀ wa nɨ ɨ lə̀ tônə ambo pɨghə la, ɨ kẅùə̀ alyiʼə àtsùmə̀ amwuə àtwuə̀ ɨ̀shyə̂, ndòo mborə̀ ntô tyìʼə̀ tsaʼnə ɨ lə̀ kɨnə mbə tɨ̀tɨ̀rə̀ pɨghə a nɨ furə̀ ntsàambyə̀ njyə̂ nɨ nɨ̀ lə̀ zuʼnə nkɨ nzhyə̂ a nkǔŋə nkuŋə mbə̀ʼə àpòŋə̀ ntɨŋmə̀ a Nẅùə̀, ɨ̀twuə̀ pɨghə ɨ laanə̀.

⁷ Tsaʼnə nɨ̀ lə̀ lanə̀nə ambo Epafràsə̀ ɨ̀swùə ɨ̀wəə, nkɨ mbə ngàŋə̀ àkwùə̀ nɨ̀yìinə̀ ɨ̀wəə amwuə àfàʼà Ndòʼnə̀mbyə̂. Ze a ŋònə̀ nɨ a wa nfàʼà ambo Kristù nɨ ntɨŋmə̀ e ntsùmə̀ àtwuə̀ nɨ pəə.

⁸ À tiitə̀ a wəə lo Àzhwùə̀ Nẅùə̀ a ghɨ̀rə̀ nɨ̀ kòŋə̀ a pànə̀ pɨ Nẅùə̀.

⁹ Tsaʼnə a pənə lə la, a nɨ furə̀ njyə̂ nɨ pəə lə̀ zuʼnə mɨ̀nwùə̀ mə, pəə pa nchàʼtə̀ a Nẅùə̀ tyìʼə̀ nkwùə̀ ɨ̀tsùmə̀ àtwuə̀ nɨ pɨghə. Pəə chàʼtə̀ Nẅùə̀ la lo â lẅenə̀ a wɨghə nɨ àzhìʼtə̀ mbə̀ʼə nɨ̀ zhyə̀ ànwùə̀ nɨ a tàʼnə. Pəə kɨ mə nchàʼtə̀ a Nẅùə̀ lo â ŋâ a wɨghə nɨ àzhìʼtə̀ mbə̀ʼə nɨ̀ zhyə̂ mɨ̀nwùə̀ nɨ Àzhwùə̀ Nẅùə̀ a za ŋŋâ.

¹⁰ Ànwùə̀ zə̀ a pɨ ghɨ̀rə̀ lo nɨ̀ chyə̂ a nɨ̀chyə̂mbyə̂ nɨ à pənə tsaʼa yɨ̀ ɨ̀poonə̀ pɨ Nẅùə̀ nkɨ mmə ngɨ̀rə̀ mɨ̀nwùə̀ nɨ mɨ ma ngɨ̀rə̀ Nẅùə̀ a pə nɨ nɨ̀ghaʼà. Nɨ̀ tyiʼə̀ mmə ngɨ̀rə̀ pə mɨ̀nwùə̀ mɨ̀shìʼnə̀, ndwuumə̀ nɨ nɨ̀ zhyə̂nə a Nẅùə̀ ɨ̂ tyiʼə̀ nkẅùə̀ ndèrə̀ nɨ mbyə̀.

¹¹ Pəə pə nkɨ nchi mmə nchàʼtə̀ a Nẅùə̀ lo â ghɨ̀rə̀ nɨ̀ tɨ̀ŋnə̀ ndàŋə̀ a ndzùmə̀ mɨ̀tɨ̀ŋnə̀ ɨ̀me ma nɨ mɨ tsàarə̀nə mɨ̀tɨ̀ŋnə̀ mɨ̀tsùmə̀ mbə̀ʼə nɨ̀ pyiimə̀ ànwùə̀ àtsùmə̀ nɨ a tônə, mbə nɨ àwìimə̀ ntɨŋmə̀ nkɨ mbə nɨ nɨ̀ghaʼà aŋunə ànwùə̀ àtsùmə̀.

¹² Nɨ mə ŋŋâ a mɨyàa ambo Tǎ aŋunə ànwùə̀ àtsùmə̀. A ze nɨ à ghɨ̀rə̀nə nɨ̀ kùʼnə̀ a nɨ pə pànə̀ nɨ pobə kẅiirə̀ mə ɨ̀pobə ɨ̀pwuumə̀ amwuə ɨ̀pwuumə̀ nɨ à nùŋə̀ mə ambo pə̀ənə̀ ɨ̀pe alyiʼə nɨ nkàʼà pənə ghu.

¹³ À fuukə̀ a wəənə̀ amwuə alyiʼə nɨ ŋònə̀ tɨ̀pòŋə̀ wa à wa mbuʼtə̀ nchyâ amwuə alyiʼə nɨ Moonə̀ e nɨ à kòŋə̀nə la à wa mbuʼtə̀.

¹⁴ Nẅùə̀ à lə̀ lə̀ənə̀ ɨ̀fàntə̀ ɨ̀nwùə̀ ɨ̀pə̀ənə̀ ndàŋə̀ a ndzùmə̀ Moonə̀ nɨ à lə̀ kwɨghə̀nə a nɨ tsuʼù ɨ̀twuə̀ ɨ̀pə̀ənə̀.

Kristù à chyə̂ àtwuə̀ àzwuumə̀ àtsùmə̀

¹⁵ Ka ŋònə̀ ɨ̀tse a zhyə̂ e Nẅùə̀. La pànə̀ lə̀ zhyə̂ e nkwùə̀ nɨ pobə lə̀ zəənə̀nə a Kristù nɨ à shwuə̀nə e, mbə moonə̀ nɨ̀twuə̀ e aŋunə àzwuumə̀ àtsùmə̀ nɨ a lə̀ tsùŋə̀nə.

¹⁶ Mbə̀ʼnə Nẅùə̀ à lə̀ làŋə̀ la a ndzùmə̀ Kristù ntsùŋə̀ àzwuumə̀ àtsùmə̀, ntsùŋə̀ àzwuumə̀ àtsùmə̀ nɨ a pənə a nɨ̀pwuurə̀ ghobə zhyə̀ nɨ a pənə àtwuə̀ ɨ̀shyə̂. À lə̀ tsùŋə̀ a zhyə̀ nɨ pɨ pa ndzəənə̀ pobə zhyə̀ nɨ ka pɨ mə ndzəənə̀ e. À lə̀ tsùŋə̀ pɨ̀saʼà pɨ ɨ̀laʼà pobə pànə̀ pa pɨ̀tsùmə̀ nɨ pɨ pənə nɨ ɨ̀tɨ̀ŋnə̀ a nɨ puʼtə̀ nsaʼà àlaʼà. Nẅùə̀ à lə̀ làŋə̀ la a ndzùmə̀ ze ntsùŋə̀ a àzwuumə̀ àtsùmə̀, nkɨ ntsùŋə̀ la ambo ze.

¹⁷ Kristù la ze wa nɨ à lə̀ pyə̀nə mbə ghu zaʼà pɨ̀ pòŋə̀ tsùŋə̀ àzwuumə̀ àtsùmə̀, nkɨ mbə ze wa nɨ à wa ngɨ̀rə̀ àzwuumə̀ àtsùmə̀ a pə alyiʼə àtsùmə̀ nɨ a pyə̀nə mbə pə.

¹⁸ Ze a àtwuə̀ ambo àshwatə̀ ɨ̀poonə̀ pɨ Kristù nɨ pobə a pənə tsaʼa mbɨ̀ŋmə̀ e la. A ze nɨ a wa ŋŋâ a nɨ̀chyə̂mbyə̂ ambo pànə̀ pɨ̀ghu ntiinə a ze mbə ntsàambyə̀ ŋwùə̀ nɨ Nẅùə̀ à lə̀ zhwuumə̀nə aŋunə nɨ̀wɨghə̀. A lə̀ pə a lenə la mbə̀ʼə â puʼtə̀ àzwuumə̀ àtsùmə̀.

¹⁹ Mbə̀ʼnə Nẅùə̀ à lə̀ nùŋə̀ lo moonə̀ a kɨ mbə tyìʼə̀ tsaʼnə à pənə.

²⁰ Nẅùə̀ à lə̀ làŋə̀ a ndzùmə̀ Moonə̀ e ndòo àzwuumə̀ àtsùmə̀ ntô a ɨ̀sùmə ze. Ɨ̀pwuumə̀ pə̀ lə̀ pə pyə̀ nɨ pənə àtwuə̀ ɨ̀shyə̂ pobə pyə̀ nɨ pənə a nɨ̀pwuurə̀ ntiinə moonə̀ e à lə̀ kẅìrə̀ àləəmə̀ e aŋunə àtɨ̀ghə pànkə̀nə. Lenəla àzwuumə̀ àtsùmə̀ â pə nɨ àporə̀porə̀ pobə pɨ Nẅùə̀.

²¹ Nɨ̀ lə̀ pə nkwùə̀ ɨ̀tse mbə ndyə̌ sàa aŋunə Nẅùə̀ ntyiʼə̀ mbə ngàŋə kɨpaanə Nẅùə̀ ghu ntii mɨ̀nwùə̀ mɨ tɨ̀pòŋə̀ nɨ nɨ̀ lə̀ kwàŋə̀nə nkɨ ngɨ̀rə̀.

²² La tɨ̀tsòŋə̀ wə̀, tsaʼnə Moonə̀ e nɨ à lə̀ pənə ŋwùə̀ mɨsoŋə nkwɨghə̀ aŋunə àtɨ̀ghə pànkə̀nə, Nẅùə̀ à lòo a wɨghə nkẅirə̀ nkwə̂ nɨ̀ tyiʼə̀ mbə taʼà ŋwùə̀ pɨghə pɨ pobə. Nẅùə̀ à lə̀ ghɨ̀rə̀ a lenə la mbə̀ʼə nɨ̀ gha mbə alyiʼə nɨ à pənə ghu nɨ̀ pə pɨ̀laanə̀nə, nkɨ mbə a wɨghə nɨ àwɨ̀ghə̀ ànwùə̀ kə̀ nɨ àpàbə tɨ̀pòŋə̀ àtse apə̀, â kɨ ndzəənə̀ e àfàntə̀ ànwùə̀ àtse aŋunə pɨghə apə̀.

²³ A kùʼnə̀ lo nɨ̀ làŋə̀ nɨ mbyə̀ tyìʼə̀ nɨ àpyiimə̀ ntɨŋmə̀ àzɨghə, ka nə̀ʼnə̀ a wɨghə, ntəəmə̀ ntɨ̀ŋnə̀ aŋunə ànwùə̀ nɨ nɨ̀ mənə mbyabə̀ ntiinə nɨ̀ lə̀ zuʼnə ntwuumə̀ ghù ɨ̀shìʼnə̀ wa. Ntwuumə̀ ghù ɨ̀shìʼnə̀ wa nɨ nɨ̀ zuʼnə la, a ntwuumə̀ nɨ pɨ lə̀ chwiitə̀nə ambo àtwuə̀ ɨ̀shyə̂ àtsùmə̀ ẅùə̀ nɨ mɨ̀ŋə̀ Pàolò ndə̀ tyiʼnə mbə ngàŋə̀ àfàʼà Nẅùə̀ la.

Àfàʼà Pàolò tsaʼa ngàŋə̀ àfàʼà àshwatə̀ ɨ̀poonə̀ pɨ Kristù

²⁴ Tɨ̀tsòŋə̀, ngwə̀ nɨ nɨ̀ghaʼà ntii ngəʼə̀ nɨ ǹdzəənə̀nə àtwuə̀ nɨ pɨghə. Tsaʼnə ǹdzəənə̀nə ngəʼə̀, m̀myàanə̀ ànwùə̀ nɨ a puŋə̀nə amwuə ngəʼə̀ nɨ Kristù à lə̀ zəənə̀nə àtwuə̀ nɨ mbɨ̀ŋmə̀ e, nɨ ɨ̀ pənə àshwatə̀ ɨ̀poonə̀ pɨ Kristù.

²⁵ Nẅùə̀ à ghɨ̀rə̀ mə m̀bə ngàŋə̀ àfàʼà a nɨ fàʼà ambo àshwatə̀ ɨ̀poonə̀ pɨ Kristù. A tsàa mə̀ lo n̂tsùŋə̀ nchwìitə̀ ntwuumə̀ ghu ambo pɨghə tyìʼə̀ ɨ̀shìʼnə̀.

²⁶ A lə̀ pə nkwùə̀ ntsàambyə̀ la ka àshwəŋnə̀ ghu a lə̀ furə̀ ndaanə̀ e ambo pə̀ənə̀ aŋunə mɨnguʼu mɨnguʼu pobə ɨ̀waanə̀ ɨ̀waanə̀. La tɨ̀tsòŋə̀ a ghɨ̀rə̀ mə a furə̀ ndaanə̀ ambo pànə̀ pɨ Nẅùə̀.

²⁷ Nẅùə̀ à lə̀ tàʼà lo pə̀ənə̀ ɨ̀pe zhyə̂ lo àfùʼù pobə mborə̀ Kristù za nkɨ mbə ambo pànə̀ nɨ ka pobə pə ghobə pɨ̀Jew. Ànwùə̀ yè lə̀əmə̀nə zèrə zə̀ a pə lo, nɨ̀ pyiimə̀ mmə mbyabə̀ lo nɨ̀ ghǎ kẅiirə̀ mborə̀ nɨ Nẅùə̀ à lə̀ shwəŋə̀nə lo à ghǎ ŋâ ambo pə̀ənə̀ ɨ̀pe.

²⁸ La ɨ̀sùmə nɨ pəə pa chwìitə̀ mbə̀ʼə Kristù ẅèrə wə̀ alyiʼə àtsùmə̀ nɨ pəə pa ndèrə̀. Pəə pə nkwàtə̀ a ŋwùə̀ ntsùmə̀ nkɨ nnèrə̀ a ŋwùə̀ ntsùmə̀ amwuə àlàŋə àzhìʼtə̀ àtsùmə̀ nɨ Nẅùə̀ a ŋânə ambo pəə. Pəə ghɨ̀rə̀ a lenə la ntiinə pəə tàʼnə lo pɨ̀ kẅiirə̀ a ghobə a mbyə̀ Nẅùə̀ tsaʼa pànə̀ nɨ àpyiimə̀ ntɨŋmə̀ àzobə a kẅuə̀nə nkùʼù.

²⁹ A nɨ zəənə̀ lo ngɨ̀rə̀ ànwùə̀ zèrə zə̀, ngwa nkyiitə̀ ka mɨ̀zùŋə. Mɨ̀tɨ̀ŋnə̀ mɨ Kristù nɨ mɨ pənə amwuə mɨ̀ŋə̀ ma ŋŋâ mə̀ nɨ mɨ̀tɨ̀ŋnə̀ a nɨ kyiitə̀.