Jemə̀ 1 - Pinyin

¹ A mɨ̀ŋə̀ Jemə̀ ngàŋə̀ àfàʼà Nẅùə̀ pobə yɨ̀ Ndòʼnə̀mbyə̂ Yěsû Kristù, mmə nchàʼtə̀ a wɨghə ngẅàrə̀ pànə̀ pɨ Israel za nɨ̀ghumə̀ ntsòbə̀ ɨpaa nɨ sapə̀nə alyiʼə alyiʼə amwuə àtwuə̀ ɨ̀shyə̂ ghə̀.

Àpyiimə̀ ntɨŋmə̀ ghobə àzhìʼtə̀

² Pɨlyimə ɨ̀pâ, nɨ̀ kẅiirə̀ mbuurə̀ nɨ̀zhwiʼì ntsùmə̀ nɨ ɨ̀ tsirə̀nə a wɨghə nɨ nɨ̀ghaʼà,

³ ntiinə, mbuurə̀ nɨ̀zhwiʼì ntsùmə̀ nɨ ɨ̀ za nzhwiʼì àpyiimə̀ ntɨŋmə̀ àzɨghə ɨ̀ za ngɨ̀rə̀ nɨ̀ pə nɨ àẅìimə̀ ntɨŋmə̀.

⁴ Nɨ̀ zəənə̀ lo àẅìimə̀ ntɨŋmə̀ àzɨghə a lèrə̀ nɨ mbyə̀ amwuə nɨ̀zhwiʼì ntsùmə̀ tə nkẅuə̀ nkoʼò nkùʼù, mbə tɨ àfàntə̀ ànwùə̀.

⁵ La ŋwùə̀ wɨghə ɨ̀tse à tə mbəla mbuŋə̀ àzhìʼtə̀, a loonə̀ amwuə àchàʼtə̀ Nẅùə̀ ambo Nẅùə̀, nɨ ǎ ŋâ ambo ze; mbə̀ʼnə Nẅùə̀ à wa ŋŋâ nɨ àpòŋə̀ ntɨŋmə̀ tɨ àndànə̀ ambo ŋwùə̀ ntsùmə̀, ka tsoʼtə̀ e mbô.

⁶ La nɨ̀ pə nchàʼtə̀ a Nẅùə̀ nɨ̀ pə nɨ àpyiimə̀ ntɨŋmə̀, kò nɨ̀ pə nɨ mɨnkə ntiinə ŋònə̀ wa ntsùmə̀ nɨ à wa mmɨnkə̀ à chyə̂ la tsaʼa nchyə wa nɨ ɨ wa mbə̀grə̀ amwuə nchyə ghu nɨŋnə̀nə, fèrə̀ a mə ntinə̀ a ẅèrə ndèrə̀ nkẅirə̀ ntinə̀ nkwə̂.

^7-8 Mbuurə̀ ŋònə̀ zèrə zə nɨ à loonə̀nə nɨ mɨ̀ntɨŋmə̀ mɨmbaa mbə nɨ mɨnkə aŋunə ɨ̀nwùə̀ ɨ̀tsùmə̀ la, ka à pə kẅiirə̀ e àzwuumə̀ àtse ambo Ndòʼnə̀mbyə̂.

Ngàŋə̀ nkabə̀ pobə ngàŋə̀ àfumə̀

⁹ Ndyimə ɨ̀wə̀ənə̀ ẅùə̀ nɨ à pənə ngàŋə̀ àfumə̀, â pə nɨ nɨ̀ghaʼà nkwùə̀ nɨ Nẅùə̀ à ŋaŋə̀nə e àtɨ̀ghə.

¹⁰ Ngàŋə̀ nkabə̀ ntsùmə̀ â kɨ mbə nɨ nɨ̀ghaʼà amwuə nkwùə̀ za nɨ Nẅùə̀ à shwuʼkə̀nə e a ɨ̀shyə̂ ntiinə ngàŋə̀ nkabə̀ ntsùmə̀ à ghǎ làŋə̀ tsaʼa tǒŋtǒŋə nɨ à pobə̀nə amwuə mɨpaʼa la.

¹¹ Mbə̀ʼnə, nkwùə̀ nɨ nẅùumə̀ à tânə ntɨ̀ŋnə̀ la, a tòonə̀ a nɨ̀yìinə ntsùmə̀, tǒŋtǒŋə a kẅìnə̀, nɨ̀pòŋə̀ e a kɨ mmyə̀. A ndəŋə ndəŋə tsaʼnə ngàŋə̀ nkabə̀ à ghǎ làŋə̀ amwuə nkwùə̀ nɨ à pənə nkarə̀ nfàʼà ɨ̀fàʼà ɨ̀pe.

Nɨ̀zhwiʼì ghobə nɨ̀kwàʼnə̀

¹² Mborə̀ ɨ̀ chyə̂ ambo ŋònə̀ wa ntsùmə̀ nɨ à lẅùutə̀nə ntəəmə̀ amwuə àpyiimə̀ ntɨŋmə̀ amwuə nkwùə̀ za nɨ nɨ̀zhwiʼì ntsùmə̀ à tônə ambo ze, ntiinə à tə ntsàarə̀ a nɨ̀zhwiʼì ẅèrə wə̀, Nẅùə̀ a tuŋə̀ ngùʼu e nɨ ɨ̀ pənə nɨ̀chyə̂mbyə̂ nɨ à lə̀ kàʼà mə ambo pànə̀ pa nɨ pɨ kòŋə̀nə e.

¹³ Mbuurə̀ àkwàʼnə̀ zə̀ ɨ̀ tə ntsirə̀ a ŋwùə̀ kò a shwəŋə̀ e lo, “Àkwàʼnə̀ zə̀ a furə̀ la ambo Nẅùə̀.” Mbə̀ʼnə pɨ pa ka kwàʼnə̀ e a Nẅùə̀, ka Nẅùə̀ àtwuə̀ ɨ̀pɨ̀ŋmə̀ e a kɨ mmə nkwàʼnə̀ e a ŋwùə̀.

¹⁴ La àkwàʼnə̀ a za ntô ambo ŋwùə̀ nkwùə̀ nɨ à ŋânə mbɨ̀ŋmə̀ e aŋunə ɨ̀pwuumə̀ pa nɨ ŋwùə̀ mɨsoŋə à tàʼnə la pèrə sùŋə̀ e nchyâ amwuə àzə̀ʼə̀ àkwàʼnə̀.

¹⁵ Ɨ̀pwuumə̀ pa nɨ ŋwùə̀ mɨsoŋə à wa ntàʼà la pa nkẅuə̀ amwuə ŋwùə̀ ntyiʼə̀ mbyə̀ a tɨ̀pòŋə̀; tɨ̀pòŋə̀ a kɨ nkẅuə̀ tə nkoʼò nkùʼù, a ŋâ a nɨ̀wɨghə̀.

¹⁶ Pɨlyimə ɨ̀pâ, njiilo kò pɨ fɨ̀kə̀ e a wɨghə.

¹⁷ Mbə̀ʼnə mɨntyaŋnə mɨ̀shìʼnə̀ mɨ̀tsùmə̀ pobə ɨ̀pwuumə̀ nɨ pòŋə̀nə mmyàanə̀ ɨ̀tsùmə̀ furə̀ la a nɨ̀pwuurə̀ nshwuʼə̀, pèrə furə̀ la ambo Nẅùə̀koʼò wa nɨ à lə̀ tsùŋə̀nə mɨ̀nkàʼà nɨ mɨ pənə a nɨ̀pwuurə̀, mbə ze wa nɨ ka à kẅebə̀ e, ka kɨ mə pə̀ŋə̀ e lo ŋâ ndzùmə tsaʼa ləgrə.

¹⁸ A nkòŋə̀ ze, à lə̀ tsùŋə̀ a wəənə̀ ndàŋə̀ a ndzùmə̀ àshwəŋnə̀ nkǔŋə nkuŋə e ngɨ̀rə̀ pə̀ənə̀ pə tsaʼa ntsàambyə̀ àzwuumə̀ aŋunə ɨ̀pwuumə̀ pa ɨ̀tsùmə̀ nɨ à lə̀ tsùŋə̀nə.

¹⁹ Pɨlyimə ɨ̀pâ, nɨ̀ tə̂ àtwuə̀ nzhyə̂ ànwùə̀ zə̀! A kùʼnə̀ lo ŋwùə̀ ntsùmə̀ a faʼa nzhyə̂ zhwiʼtə̀, ngẅìimə̀ àləəmə̀ e a nɨ faʼa nshwəŋnə̀ nkɨ ngẅìimə̀ mbɨ̀ŋmə̀ e a nɨ faʼa ndzaŋə̀ a loŋə,

²⁰ ntiinə ŋònə̀ nɨ à zaŋə̀nə a loŋə ka à ghɨ̀rə̀ e ànwùə̀ nɨ Nẅùə̀ à tàʼnə lo â ghɨ̀rə̀.

²¹ Lenəla, nɨ̀ waʼà ɨ̀nwùə̀ ntsɨ̀ŋnə ɨ̀tsùmə̀ pobə ɨ̀kwàŋə̀ tɨ̀pòŋə̀ ɨ̀tsùmə̀, nshwuʼkə̀ mbɨ̀ŋmə̀ ɨ̀zɨghə ŋŋâ ambo Nẅùə̀, mbyiimə̀ àshwəŋnə̀ za nɨ à pyə̀nə amwuə mɨ̀ntɨŋmə̀ ɨ̀mɨghə, mbə àshwəŋnə̀ za nɨ ǎ chwarə̀ a wɨghə.

²² Kò nɨ̀ kɨ nfɨ̀ghə̀ a wɨghə mbɨ̀ŋmə̀ ɨ̀zɨghə ndzuʼù a wɨghə ànwùə̀ Nẅùə̀ zuʼnə. A kùʼnə̀ lo nɨ̀ ghɨ̀rə̀ ànwùə̀ nɨ a shwəŋə̀nə.

²³ Ŋònə̀ nɨ à wa ndzuʼù ànwùə̀ Nẅùə̀ zuʼnə, ka mə fàʼà e nɨ zèrə, à chyə̂ la tsaʼa ŋònə̀ nɨ à naŋə̀nə ɨ̀sɨghə̀ e amwuə malèmə̀ ndzəənə̀ mbɨ̀ŋmə̀ e.

²⁴ Nkwùə̀ nɨ à naŋə̀ mə mbɨ̀ŋmə̀ e ndzəənə̀ tyìʼə̀ ɨ̀shìʼnə̀ a pə̀ŋə̀ ndèrə̀ e, la a kɨ pə tyìʼə̀ lə, a zùŋə̀ ndə̀ənə̀ e tsaʼnə mbɨ̀ŋmə̀ e ɨ̀ pənə.

²⁵ Ŋònə̀ nɨ à naŋə̀nə a mbòomə wa nɨ à kyàatə̀nə mɨnkɨrə mɨ ɨ̀tsaŋə̀ aŋunə pə̀ənə̀ ɨ̀shìʼnə̀, ntə̂ àtwuə̀ a nɨ fàʼà nɨ ẅèrə, ka pə zuʼù e zùŋə̀ lə̀ənə̀, Nẅùə̀ à ghǎ chyâ mborə̀ aŋunə ɨ̀nwùə̀ ɨ̀tsùmə̀ nɨ à wa ngɨ̀rə̀.

²⁶ Ŋònə̀ ɨ̀tse à tə mbə amwuə pɨghə nɨ à kwàŋə̀nə lo à tɨ̀ŋnə̀ amwuə ànwùə̀ Nẅùə̀ la ka zhyə̂ ẅìimə̀ e àləəmə̀ e, yi ànwùə̀ Nẅùə̀ e za la tyìʼə̀ àfǐfǐ, a kɨ mmə nfɨ̀kə̀ la mbɨ̀ŋmə̀ e.

²⁷ Ànwùə̀ nɨ Nẅùə̀koʼò Tǎ ɨ̀wə̀ənə̀ à lòonə lo a kùʼnə̀ ka pə e nɨ ntsɨ̀ŋnə a chyə̂ lo: nɨ̀ pə nnaŋə̀ pɨ̀tyə̌ pobə pɨ̀kwùə amwuə ngəʼə̀ ɨzobə, nkɨ nchi mbə a nɨ pyabə̀ mbɨ̀ŋmə̀ ɨ̀zɨghə mbə̀ʼə mɨ̀nwùə̀ mɨ àtwuə̀ ɨ̀shyə̂ tsə̀ŋə̀.