Ɨ̀fàʼà 1 - Pinyin

Nẅùə̀ a kàʼà a nɨ tsàa Àzhwùə̀ e a àtwuə̀ ɨ̀shyə̂

¹ Theophilus, amwuə ntsàambyə̀ àŋwàʼnə̀ mə̀, ndə̀ ŋwàʼnə̀ mbə̀ʼə mɨ̀nwùə̀ ma nɨ Yěsû à lə̀ mənə ngɨ̀rə̀ nkɨ mmə nnèrə̀ nkwùə̀ nɨ à lə̀ pìʼnə̀nə àfàʼà e,

² tə mbyàa njyə̂ nɨ Nẅùə̀ à lə̀ lòonə e nkoʼò ndèrə̀ a nɨ̀pwuurə̀, nkwùə̀ nɨ à lə̀ ŋânə àtəətə̀ ambo ngàŋə ntwuumə̀ ɨ̀ze za nɨ à lə̀ tsoʼnə la.

³ Nkwùə̀ nɨ Yěsû à lə̀ myàanə̀nə amwuə ngəʼə̀ e, à lə̀ nèrə̀ mbɨ̀ŋmə̀ e ambo pobə ngàŋə ntwuumə̀ ɨ̀ze amwuə mɨ̀ndwuumə̀ mɨ̀noʼnə myə̀ nɨ mɨ lə̀ ghɨ̀rə̀nə lo kò mɨnkə a chi mbə e amwuə pobə lo à wə̀ ghù ntɨ̀ŋnə̀. À lə̀ pə pobə pɨ pobə aŋunə njyə̂ mɨ̀ghumə̀ nɨ̀kwàa, lenəla nshwəŋnə̀ pobə pɨ pobə mbə̀ʼə ànwùə̀ Nɨ̀fò Nẅùə̀.

⁴ A lə̀ pə njyə̂ ɨ̀tse Yěsû a nwuunə̀ pobə ɨ̀zùŋə̀ ndzùmə̀ ɨ̀pe, ntiitə̀ a ghobə lo, “Kò nɨ̀ furə̀ a wɨghə a Yèrusalèmə̀, la nɨ̀ pyabə̀ mɨntyaŋnə ma nɨ Tǎ ɨwəə à lə̀ kàʼnə a wɨghə la; la ànwùə̀ nɨ ndə̀ shwəŋə̀nə ambo pɨghə lo,

⁵ ‘Jònə ngàŋə̀ àŋâ àkẅiirə̀ nchyə à lə̀ ŋâ àkẅiirə̀ nchyə ambo pɨghə la nɨ nchyə, la mɨ̀njyə̂ mɨ̀tse kɨ làŋə̀, àkẅiirə̀ nchyə àzɨghə a tyiʼə̀ mbə la nɨ Àzhwùə̀ Nẅùə̀.’”

Nẅùə̀ a lòo a Yěsû nkoʼò ndèrə̀ a nɨ̀pwuurə̀

⁶ Nkwùə̀ nɨ Yěsû à lə̀ nwuunə̀nə pobə ngàŋə ntwuumə̀ ɨ̀ze, pobə lə̀ pyiitə̀ e lo, “Ndòʼnə̀mbyə̂, wə̌ kẅirə̀ ŋâ ànwùə̀ nɨ̀fò ambo pànə̀ pɨ Israel tɨ̀tsòŋə̀?”

⁷ Yěsû a shwəŋə̀ ambo pobə lo, “Mɨ̀nkwùə̀ pobə mɨ̀njyə̂ mèrə mə chyə̂ a ɨ̀sùmə mɨ̀tɨ̀ŋnə̀ mɨ Tǎ, lenəla, ka a pə e alyiʼə àzɨghə a nɨ zhyə̂ mɨ̀nkwùə̀ mɨ̀ghu.

⁸ La nɨ̀ ghǎ kẅiirə̀ mɨ̀tɨ̀ŋnə̀ nkwùə̀ nɨ Àzhwùə̀ Nẅùə̀ a tônə ambo pɨghə, lenəla, nɨ̀ tyiʼə̀ nshwəŋnə̀ mbə̀ʼə mɨ̀ŋə̀ amwuə Yèrusalèmə̀ farə amwuə Judyà ntsùmə̀ pobə Sàmariyà, tə mbyàa a ndẅùutə àtwuə̀ ɨ̀shyə̂.”

⁹ Nkwùə̀ nɨ à lə̀ myàanə̀nə a nɨ shwəŋnə̀ la, Nẅùə̀ à lə̀ zùŋə̀ ndòo e nkoʼò ndèrə̀ a nɨ̀pwuurə̀ pobə təəmə̀ mmə naŋə̀, mbàʼà ɨ̀ zùŋə̀ nnàanə̀ e.

¹⁰ Pobə lə̀ pirə̀ mmə nnaŋə̀ tsaʼnə Yěsû à lə̀ mənə ndèrə̀ a nɨ̀pwuurə̀, nkɨ wùutə̀ pànə̀ pɨpaa təəmə̀ a nɨ̀pwùnə pobə ngẅî ɨtsəʼə pɨ̀fuə,

¹¹ mbyiitə̀ lo, “Pànə̀ pɨ Galìlyə̂, nɨ təəmə̀ a nɨ̀ghə̂ nnaŋə̀ àkə a nɨ̀pwuurə̀? Yěsû wə̀ nɨ pɨ lòonə ambo pɨghə nkoʼò ndèrə̀ a nɨ̀pwuurə̀ lə, à ghǎ kẅirə̀ tô ambo pɨghə tyìʼə̀ amwuə ndwuumə̀ nɨ nɨ̀ zəənə̀nə a koʼò ndèrə̀ a nɨ̀pwuurə̀ lyə̀.”

Pɨ tsoʼò a Màtyâ lo â lòo alyiʼə Yudà

¹² Lenəla, ngàŋə ntwuumə̀ Yěsû lə̀ furə̀ àtwuə̀ Mbarə̀ Olìvə̀ nkẅirə̀ ndèrə̀ a Yèrusalèmə̀ zhyə̀ nɨ a lə̀ pənə tsaʼa àtùmə marə̀ a nɨ ghə̀ mbyàa amwuə mbòmpə àlaʼà ngẅùunə.

¹³ Nkwùə̀ nɨ pobə lə̀ kwuunə̀nə a Yèrusalèmə̀, pobə lə̀ koʼò nkwuunə̀ amwuə ntaŋə a ndâ nɨkaŋə alyiʼə nɨ pobə lə̀ pənə ghu. Pànə̀ nɨ pɨ lə̀ pənə ghu à lə̀ pə Pità, nɨ Jònə, nɨ Jemə̀, nɨ Andrù, nɨ Filibə̀, nɨ Thomas, nɨ Bartholomew, nɨ Matyù, nɨ Jemə̀ moonə̀ Àlfeyùsə̀, nɨ Shimùnə̀ nɨ à lə̀ pənə amwuə àshwatə̀ nɨ pɨ pa nfuŋə̀ nɨ Zilòtə̀, farə Yudà moonə̀ Jemə̀.

¹⁴ Pobə lə̀ mə nshwatə̀ alyiʼə moʼo nkwùə̀ ɨ̀tsùmə̀ nchàʼtə̀ a Nẅùə̀ pobə pɨ pə̀ngyə̌ nɨ Màriyà mǎ pɨ Yěsû farə pɨlyimə pɨ mbyàŋnə̀.

¹⁵ Mɨ̀njyə̂ mɨ̀tse lə̀ làŋə̀, Pità a lòo ntəəmə̀ a tɨ̀tɨ̀rə̀ pɨlyimə ɨ̀pe lo shwəŋnə̀, (pobə lə̀ pə tsaʼa pànə̀ nkɨrə nɨ mɨ̀ghumə̀ mɨmbaa),

¹⁶ nshwəŋə̀ lo, “Pɨlyimə ɨ̀pâ, Àzhwùə̀ a lə̀ ghɨ̀rə̀ Dàfirə̀ a kwaa nshwəŋə̀ ànwùə̀ mbə̀ʼə Yudà, ŋònə̀ nɨ à lə̀ nèrə̀nə àlàŋə pɨ kô a Yěsû. Zèrə a lə̀ ghɨ̀rə̀ lo ànwùə̀ nɨ pɨ lə̀ ŋwàʼnə̀nə amwuə àŋwàʼnə̀ Nẅùə̀ a furə̀ ntəəmə̀.

¹⁷ Yudà à lə̀ pə taʼà ŋwùə̀ amwuə àshwatə̀ àzəə nkɨ mmə nfàʼà pəə pɨ pobə.”

¹⁸ (À lə̀ kunə̀ nkwɨghə̀, mɨ̀tô ɨ̀me furə̀ nkẅìnə̀ amwuə alyiʼə nɨ à lə̀ shwùunə̀nə a Yěsû ghu la.

¹⁹ Ŋwùə̀ ntsùmə̀ nɨ à lə̀ pənə amwuə Yèrusalèmə̀ à lə̀ zuʼù ànwùə̀ zèrə zə, lenəla, pobə tyiʼə̀ nfuŋə̀ alyiʼə ɨ̀shyə̂ zèrə zə̀ amwuə àshwəŋnə̀ àlaʼà àzobə nɨ “Àkeldamà,” nɨ ɨ̀sùmə ɨ̀ pənə lo, “Alyiʼə ɨ̀shyə̂ Àləəmə̀.”)

²⁰ Pità a shwəŋə̀ lo, “Mbə̀ʼnə pɨ lə̀ ŋwàʼnə̀nə amwuə àŋwàʼnə̀ Psalms lo, ‘Ndâ e ɨ̂ ghoŋə̀ yɨ̀ ndzopə̀; kò ŋònə̀ ɨ̀tse a chyə̂ e amwuə.’ “Pɨ kɨ nchi ŋŋwàʼnə̀ lo, ‘Ŋònə̀ ɨ̀tse â lòo alyiʼə àfàʼà e.’

²¹ A pòŋə̀ lo pə̀ənə̀ ghə̀ amwuə pànə̀ nɨ pobə lə̀ mənə ngyìinə̀ pə̀ənə̀ pɨ pobə pɨ Yěsû ntsoʼò a taʼà ŋwùə̀,

²² a nɨ furə̀ nkwùə̀ Jònə ngàŋə̀ àŋâ àkẅiirə̀ nchyə tə mbyàa nkwùə̀ nɨ pɨ lə̀ lòonə a Yěsû nkoʼò ndèrə̀ a nɨ̀pwuurə̀. Mbə̀ʼnə taʼà ŋònə̀ wə̀ ɨ̀tse ǎ tyiʼə̀ pə ndzəənə̀ zəənə̀nə pə̀ənə̀ pɨ pobə lo Yěsû à lə̀ zhwuumə̀ a nɨ̀wɨghə̀.”

²³ Lenəla, pɨ lə̀ kwàŋə̀ pànə̀ pɨpaa; Jòsebə̀ nɨ pɨ lə̀ mənə nfuŋə̀ e nɨ Barsabbas (pɨ kɨ nchi mmə nfuŋə̀ e nɨ Justùsə̀) nɨ Màtyâ.

²⁴ Pobə lə̀ làŋə̀ nɨ mbyə̀ nchàʼtə̀ a Nẅùə̀ nshwəŋə̀ lo, “Ndòʼnə̀mbyə̂, a zhyə̂ ghò nzhyə̂ àzwuumə̀ nɨ a pənə amwuə ntɨŋmə̀ ŋwùə̀. Nèrə̀ a wəə nɨ ŋònə̀ nɨ wə̀ tsoʼnə amwuə pànə̀ pə pɨpaa

²⁵ mbə̀ʼə a lòo alyiʼə àfàʼà ngàŋə̀ ntwuumə̀ Yěsû zhyə̀ nɨ Yudà à lə̀ waʼnə ndèrə̀ amwuə àze àlàŋə alyiʼə nɨ a kùʼnə̀nə ambo ze.”

²⁶ Lenəla, pobə lə̀ màʼà ɨpirə, ɨ kunə̀ aŋunə Màtyâ nɨ pɨ lə̀ lòonə e nkẅìʼnə̀ amwuə zhyə̀ ngàŋə ntwuumə̀ Yěsû ntsòbə̀ moʼo.