Hibrù 6 - Pinyin

¹ Tsaʼnə a pənə lə la, pə̀ənə̀ làŋə̀ nɨ mbyə̀ ngɨ̀rə̀ mɨ̀nwùə̀ tsaʼa pànə̀ nɨ pɨ kẅuə̀ mə amwuə àpyiimə̀ ntɨŋmə̀ ka pə chi ghɨ̀rə̀ a wəənə̀ pə mɨ̀nwùə̀ ma nɨ pə̀ənə̀ lə̀ zàamə̀nə ndanə̀ mbə̀ʼə Kristù la. Kò pə̀ənə̀ chi nshwəŋnə̀ a wəənə̀ mbə̀ʼə mɨ̀nwùə̀ nɨ pə̀ənə̀ lə̀ zàamə̀nə nzhyə̂ tsaʼa nɨ̀twuunə̀ a nɨ ghɨ̀rə̀ mɨ̀nwùə̀ nɨ mɨ ma ndòo a nɨ̀wɨghə̀ ntô pobə nɨ̀nùŋə̀ ntɨŋmə̀ aŋunə Nẅùə̀.

² Mɨ̀nwùə̀ mə mɨ̀tse chi mbə tsaʼa nɨ̀nèrə̀ mɨ̀nwùə̀ mbə̀ʼə àkẅiirə̀ nchyə, nɨ nɨ̀nùŋə̀ mbô àtwuə̀ ŋwùə̀ lo pɨ pə nchyâ mborə̀ aŋunə ze, nɨ nɨ̀nèrə̀ mɨ̀nwùə̀ lo pànə̀ ghǎ kwɨghə̀ kẅirə̀ zhwuumə̀ a nɨ̀wɨghə̀, ghobə nɨ̀nèrə̀ farə tsaʼnə Nẅùə̀ à ghǎ chyâ ɨ̀sàʼa aŋunə pə̀ənə̀ nɨ nkuŋə.

³ Pə̀ənə̀ làŋə̀ nɨ mbyə̀, lə̌ ànwùə̀ nɨ pə̀ənə̀ pə ghɨ̀rə̀ mbə̀ʼə Nẅùə̀ a pyiimə̀.

⁴ A tɨ̀ŋnə̀ ambo pànə̀ pa nɨ pobə waʼà mə àpyiimə̀ ntɨŋmə̀ àzobə a nɨ pə̀ŋə̀ mɨ̀ntɨŋmə̀ ɨ̀mobə ntiinə pobə lə̀ pyə̀ mə mbyiimə̀ lo ntwuumə̀ Nẅùə̀ la nkǔŋə nkuŋə nkɨ nzhwiʼì àzwuumə̀ nɨ Nẅùə̀ à ŋânə nkɨ nkẅiirə̀ Àzhwùə̀ Nẅùə̀ tsaʼa pɨ̀tse pə̀ənə̀.

⁵ Pobə zhwiʼì mə nkɨ nzhyə̂ mbòŋnə àshwəŋnə̀ Nẅùə̀, nkɨ nzhyə̂ tsaʼnə mɨ̀tɨ̀ŋnə̀ mɨ Nẅùə̀ ghǎ fàʼà amwuə njyə̂ nɨ ɨ ghǎ tô.

⁶ Pobə tə mbəla ngwaʼà àpyiimə̀ ntɨŋmə̀ àzobə, yi ǎ tɨ̀ŋnə̀ a nɨ ghɨ̀rə̀ pobə̂ pə̀ŋə̀ mɨ̀ntɨŋmə̀ ɨ̀mobə ntiinə pobə pə̀ nkẅirə̀ nkẅuumə̀ la a Moonə̀ Nẅùə̀ aŋunə àtɨ̀ghə pànkə̀nə, mmə nchyâ ɨ̀sɨŋnə̀ àtwuə̀ ze a tɨ̀tɨ̀rə̀ pə̀ənə̀.

⁷ Nẅùə̀ à wa nchyâ mborə̀ aŋunə àpàbə ɨ̀shyə̂ za zə̀ nɨ a za nkẅiirə̀ mbə̀ŋə̀ nɨ ɨ̀ lônə aŋunə nkɨ mmə ngɨ̀rə̀ mɨ̀zɨghə̀ kɨ mə nkoʼò aŋunə ambo pànə̀ nɨ pə lyiʼnə zèrə.

⁸ La ɨ̀shyə̂ ɨ̀ tə mbə zhyə̀ nɨ pɨ̀kɨkobə pobə ngunə̀ pa nkoʼò aŋunə, yi zèrə ɨ̀ tyiʼə̀ mbə la àfǐfǐ. Mbuurə̀ ɨ̀shyə̂ zə̀ ɨ̀ kùʼnə̀ lo mbə̀ʼə Nẅùə̀ a chyâ ndòonə̀ aŋunə, ɨ̀mǔ tyiʼə̀ ntòonə̀ a zèrə.

⁹ Pəə patə mmə nshwəŋnə̀ pə lə nɨ pɨlyimə ɨ̀pəə, pəə zhyə̂ lo ɨ̀pwuumə̀ nɨ pòŋə̀nə ntsàarə̀ pa ghu ambo pɨghə, mbə ɨ̀pwuumə̀ nɨ pèrə ɨ tônə pobə nɨ̀chwarə̀.

¹⁰ Ka Nẅùə̀ â pə e ngàŋə̀ pɨ̀chwìrə̀ nɨ mbə̀ʼə a lə̀ənə̀ àfàʼà àzɨghə pobə ɨ̀kòŋnə̀ nɨ nɨ̀ nèrə̀nə aŋunə ze tsaʼnə nɨ̀ lə̀ mənə ngyèmpə̀ pə̀ənə̀ ɨ̀pe, nɨ̀ wə̀ nkɨ mbirə̀ mmə ngyèmpə̀.

¹¹ Ànwùə̀ nɨ pəə tàʼnə nɨ ntɨŋmə̀ ɨ̀wəə ɨ̀tsùmə̀ a chyə̂ la lo ŋwùə̀ wɨghə moʼo moʼo a lèrə̀ nɨ mbyə̀ mbə tyìʼə̀ nɨ mbuurə̀ ntɨŋmə̀ zə̀ tə ngə̀ ndẅùutə̀ mbə̀ʼə ghǎ kẅiirə̀ ɨ̀pwuumə̀ pa nɨ nɨ̀ nùŋə̀nə ntɨŋmə̀ mmə mbyabə̀ la.

¹² Ka pəə mə ntàʼà a wəə la lo nɨ̀ pə pɨ̀lòŋə; pəə tàʼà pə lo nɨ̀ pə tsaʼa pànə̀ nɨ pobə nùŋə̀nə ntɨŋmə̀ aŋunə Nẅùə̀ nkɨ mbə nɨ àẅìimə̀ ntɨŋmə̀ mbə̀ʼə ghǎ kẅiirə̀ àzwuumə̀ nɨ Nẅùə̀ à lə̀ kàʼnə la.

Nkàʼnə Nẅùə̀ a nkǔŋə nkuŋə

¹³ Nkwùə̀ nɨ Nẅùə̀ à lə̀ mənə nkàʼà Abràhamə̀, ka ŋònə̀ ɨ̀tse a lə̀ pə e ghu ntsàarə̀ a Nẅùə̀ nɨ mbə̀ʼə Nẅùə̀ a tsə̀əmə̀ aŋunə nɨ̀linə̀ ɨ̀tse, Lenəla a tyiʼə̀ ntsə̀əmə̀ aŋunə nɨ̀linə̀ ɨ̀tse àtwuə̀ ɨ̀pɨ̀ŋmə̀ e,

¹⁴ nshwəŋə̀ lo, “A tyìʼə̀ nkǔŋə nkuŋə lo mbɨ chyâ mborə̀ aŋunə ghò, ŋŋâ o nɨ ngẅàrə̀ yè noʼnə.”

¹⁵ Tsaʼnə Abràhamə̀ a lə̀ ẅìimə̀nə ntɨŋmə̀ la, à lə̀ pyabə̀ nkɨ nkẅiirə̀ àzwuumə̀ nɨ Nẅùə̀ a lə̀ kàʼnə e nɨ zèrə la.

¹⁶ Ŋwùə̀ à tsə̀əmə̀ la aŋunə nɨ̀linə̀ nɨ ŋònə̀ nɨ à tsàarə̀nə e, ntsə̀əmə̀ zèrə zə̀ ɨ̀ kɨ ndə̂ àtànkə̀ àtsùmə̀.

¹⁷ Nẅùə̀ à lə̀ mə ntàʼà nèrə̀ a laanə̀ ambo pànə̀ pa nɨ à lə̀ kàʼnə la lo ka nkàʼnə e ɨ pə ghǎ kẅebə̀ e. Lenəla, à lə̀ tsə̀əmə̀.

¹⁸ Mɨ̀nwùə̀ mɨmbaa chyə̂ ghu nɨ mbə̀ʼə mɨ laʼa nkẅebə̀ e apə̀, myə̀ nɨ mɨ nèrə̀nə lo mbə̀ʼə Nẅùə̀ a laʼa nnyìi e a chwìrə̀ apə̀. Njiilo pə̀ənə̀ pa nɨ pə̀ənə̀ kɨ̀ɨrə̀nə ngə̀ ndə̀əmə̀ a ɨ̀sùmə Nẅùə̀ la, pə̀ənə̀ ẅìimə̀ ntɨŋmə̀ mbyabə̀ nkàʼnə za nɨ Nẅùə̀ à lə̀ kàʼnə ambo pə̀ənə̀ la.

¹⁹ Ànwùə̀ zèrə zə̀ nɨ pə̀ənə̀ nùŋə̀nə ntɨŋmə̀ mbyabə̀ la a chyə̂ ambo pə̀ənə̀ la tsaʼa mbàŋə̀ nɨ ndwùnə̀ ŋwùə̀ a zəʼnə̀nə aŋunə, à ẅìimə̀ a wəənə̀ pə̀ənə̀ təəmə̀ ntɨ̀ŋnə̀ nɨ mbə̀ʼə àzwuumə̀ àtse a nə̀ʼə̀ e a wəənə̀ apə̀. Ànwùə̀ zèrə zə nɨ pə̀ənə̀ pa mbyabə̀ la a ghɨ̀rə̀ pə̀ənə̀ làŋə̀ atsəʼə za nɨ a ghàbə̀nə Ndâ Mɨ̀shwàʼà Nẅùə̀ a nɨ̀pwuurə̀ nkwuunə̀ ndèrə̀ amwuə alyiʼə za nɨ a laanə̀nə mmyàanə̀ la.

²⁰ Yěsû à lə̀ kẅiirə̀ mbyə̀ nkwuunə̀ alyiʼə ghu àtwuə̀ nɨ pə̀ənə̀, ntyiʼə̀ mbə àtwuə̀ pɨ̀fò màʼà Nẅùə̀ nɨ a ghoŋə̀nə nɨ nkuŋə̀ amwuə ngẅàrə̀ Mèlchizedèkə̀.