Hibrù 12 - Pinyin

Nẅùə̀ a shìitə̀ ɨ̀poonə̀ ɨ̀pe

¹ Tsaʼnə pə̀ənə̀ pənə nɨ àpùŋə̀ pɨ ndzəənə̀ zəənə̀nə nɨ pobə kamnə̀nə a wəənə̀ la, pə̀ənə̀ waʼà àzwuumə̀ àtsùmə̀ nɨ a za nnàanə̀ àlàŋə àzəənə̀ pobə ànwùə̀ tɨ̀pòŋə̀ àtsùmə̀ nɨ a ẅìimə̀nə a wəənə̀ nkorə̀, lenəla ngẅìimə̀ a nɨ kɨ̀ɨrə̀ mɨ̀ndəənə̀ ma nɨ mɨ pənə a mbyə̀ pə̀ənə̀ la nɨ ntɨŋmə̀ ɨ̀wəənə̀ ɨ̀tsùmə̀.

² Pə̀ənə̀ tə̂ ɨ̀myə̂ ɨ̀məənə̀ aŋunə Yěsû nɨ à lə̀ ghɨ̀rə̀nə pə̀ənə̀ pə nɨ àpyiimə̀ ntɨŋmə̀ nkɨ ngɨ̀rə̀ a tɨ̀ŋnə̀ ngə̀ mmyàanə̀. À lə̀ pyiimə̀ ngəʼə̀ ntsùmə̀ ka pə e nɨ ɨ̀sɨŋnə̀ a nɨ kwɨghə̀ aŋunə àtɨ̀ghə pànkə̀nə ntiinə à lə̀ zhyə̂nə a nɨ̀ghaʼà ngẅùunə nɨ à ẅùə̀ a mbyə̀ mbyabə̀ e. À ẅùə̀ tɨ̀tsòŋə̀ nnwuunə̀ a pàa àpô aləŋə nɨ̀fò Nẅùə̀ yè zɨghə̀nə a nɨ̀pwuurə̀.

³ Nɨ̀ lanə nkwàŋə̀ tsaʼnə à lə̀ ẅìimə̀nə ntɨŋmə̀ ndzəənə̀ ngəʼə̀ nɨ ngàŋə ngɨ̀rə̀ ɨ̀nwùə̀ tɨ̀pòŋə̀ lə̀ ŋânə ambo ze. Lenəla, kò mɨ̀ntɨŋmə̀ ɨ̀mɨghə porə̀ nɨ̀ myàʼtə̀ ànwùə̀ nɨ nɨ̀ mənə ngɨ̀rə̀.

⁴ Tsaʼnə nɨ̀ pə̀ ntaŋnə̀ a nɨ zòŋnə̀ a tɨ̀pòŋə̀, nɨ̀ pirə̀ a wɨghə tɨ zòŋnə̀ mbyàa amwuə ntyə̌ nɨ mbə̀ʼə pɨ kẅirə̀ àləəmə̀ àzɨghə.

⁵ A chyə̂ lə lo nɨ̀ lə̀ənə̀ mə àshwəŋnə̀ za nɨ Nẅùə̀ à lə̀ shwəŋə̀nə a nɨ porəkə̀ mɨ̀ntɨŋmə̀ ɨ̀mɨghə tsaʼa ɨ̀poonə̀ ɨ̀pe? Àshwəŋnə̀ ghu a pə lo, “Moonə̀ mə, tə̂ àtwuə̀ nzhwiʼtə̀ amwuə nkwùə̀ za nɨ Ndòʼnə̀mbyə̂ a mənə nshìitə̀ o. Kò ntɨŋmə̀ o kɨ mborə̀ e nkwùə̀ nɨ a mənə nsaʼà o,

⁶ ntiinə Ndòʼnə̀mbyə̂ à wa nshìitə̀ la pànə̀ nɨ à kòŋə̀nə nkɨ mmə nchyâ ngəʼə̀ la aŋunə pyə̀ pa nɨ à lòonə tsaʼa ɨ̀poonə̀ ɨ̀pe.”

⁷ A pə amwuə nkwùə̀ nɨ nɨ̀ mənə ndzəənə̀ ngəʼə̀, nɨ̀ ẅìimə̀ ntɨŋmə̀ ɨ̀wɨghə ntiinə a nɨ̀shìitə̀ nɨ Nẅùə̀ à mənə nshìitə̀ a wɨghə tsaʼa ɨ̀poonə̀ ɨ̀pe. Mbə̀ʼnə ka moonə̀ ɨ̀tse a pə e ghu nɨ ka tǎ ɨ̀ghobə a mə nshìitə̀ e a ye.

⁸ À lə̀ ka mə shìitə̀ e a wɨghə tsaʼnə à wa nshìitə̀ ɨ̀poonə̀ ɨ̀pe, yi à nèrə̀ la lo ka nɨ̀ pə a wɨghə ngotə ɨ̀poonə̀ ɨ̀pe; pɨghə̌ ɨ̀poonə̀ nɨ pɨ pyə̂nə a àpyìinə.

⁹ Pə̀ənə̀ tə mbə nɨ pɨ̀tǎ nɨ pɨ pyə̂nə a wəənə̀ a àtwuə̀ ɨ̀shyə̂ ghə mmə ndzuʼnə̀ a ghobə nkwùə̀ nɨ pobə shìitə̀nə a wəənə̀, pə̀ənə̀ tyiʼə̀ ka tsùŋə̀ zuʼnə̀ a wəənə̀ a Tǎ ɨ̀wə̀ənə̀ nɨ à wa ŋŋâ a wəənə̀ nɨ àzhwùə̀ mbə̀ʼə pə nɨ nɨ̀chyə̂mbyə̂?

¹⁰ Pɨ̀tǎ nɨ pɨ pyə̂nə a wəənə̀ pa nshìitə̀ a wəənə̀ la aŋunə mətùmə nkwùə̀ amwuə ndwuumə̀ nɨ ɨ pòŋə̀nə ambo pobə, la Nẅùə̀ a mə nshìitə̀ a wəənə̀ pə aŋunə ɨ̀shìʼnə̀ ɨ̀wəənə̀ mbə̀ʼə pə̀ənə̀ tsùŋə̀ nzhyə̂ a nɨ pə pànə̀ nɨ pɨ laanə̀nə tsaʼa ze.

¹¹ Amwuə nkwùə̀ nɨ pɨ mənə nshìitə̀ a wəənə̀, pə̀ənə̀ lòo nkwùə̀ ghu pə tsaʼa nkwùə̀ àsòmnə̀, ka pə wəənə̀ nɨ nɨ̀ghaʼà. La a kɨ pə nkwùə̀ ndzùmə̀, pànə̀ pa nɨ à lə̀ shìitə̀nə a ghobə la chyə̂ nɨ àporə̀porə̀ nkɨ ngɨ̀rə̀ mɨ̀nwùə̀ mɨ təəmə̀nə.

Àkwàtə̀ mbə̀ʼə nɨ̀twuunə̀ a Nẅùə̀

¹² Lenəla, nɨ̀ ŋaŋə̀ mbô ɨ̀mɨghə ma nɨ mɨ kaanə̀ mə la àtɨ̀ghə, nkɨ nshyə̀ mɨ̀kwìʼtə ɨ̀mɨghə ma nɨ mɨ porə̀nə la.

¹³ Nɨ̀ mə ngyìinə̀ amwuə ɨ̀làŋə pa nɨ təəmə̀nə la njiilo kò pànə̀ pa nɨ mɨ̀kwùə̀ ɨ̀mobə kòotə̀ mə la mmyàanə̀ mbiʼtə̀, mèrə chi ntɨŋmə̀ tɨ̀ŋnə̀nə.

¹⁴ Nɨ̀ kyiitə̀ a nɨ pə nɨ àporə̀porə̀ pɨghə pɨ ŋwùə̀ ntsùmə̀ nkɨ mmə ngyìinə̀ àkwùə̀ nɨ̀yìinə̀ yè laanə̀nə, ntiinə ŋònə̀ nɨ ka àkwùə̀ nɨ̀yìinə̀ e a laanə̀ e ka a pə ghǎ zəənə̀ a Ndòʼnə̀mbyə̂.

¹⁵ Nɨ̀ zhìʼtə̀ a wɨghə lo kò ŋwùə̀ ɨwɨghə ɨ̀tse a pî ɨ̀pòŋə̀ nɨ Nẅùə̀ à ngɨ̀rə̀. Kò ŋwùə̀ ɨwɨghə ɨ̀tse a pə e tsaʼa àtɨ̀ghə yè lẅùə̀nə nɨ a koʼnə ntyiʼə̀ mmə ŋŋâ ngəʼə̀ nɨ ndyiʼə̀ za nɨ ɨ̀ furə̀nə aŋunə àkòbə̀ e.

¹⁶ Nɨ̀ zəənə̀ lo kò ŋwùə̀ ɨwɨghə ɨ̀tse a pə̀ŋə̀ ntyiʼə̀ e ngàŋə̀ ànyòrə̀kə̀ kə̀ ka mə pô e a Nẅùə̀ tsaʼa Esau, nɨ à lə̀ shwùunə̀nə ɨ̀lɨŋmə̀ e tsaʼa ntsàambyə̀ moonə̀ nɨ mɨ̀zɨghə̀ nɨ mbə̀ʼə pɨ zɨghə̀ a taʼà nkwùə̀.

¹⁷ Nɨ̀ zhyə̂ lo à lə̀ pə nkwùə̀ ndzùmə̀ la nchi mmə ntàʼà a nɨ kẅiirə̀ mborə̀ ambo tǎ ɨghobə; la a kantə̀ e, ntiinə ka àlàŋə àtse a lə̀ chi mbə e ghu a nɨ kẅebə̀ ànwùə̀ nɨ à lə̀ ghɨ̀rə̀nə, mbaa pə tsaʼnə à lə̀ chinə mmə ntàʼà nɨ nchyə a ɨ̀myə̂ ze.

¹⁸ Ka nɨ̀ tô mbyàa a wɨghə a mbyə̀ àzwuumə̀ za nɨ mbə̀ʼə nɨ̀ pètə̀ tsaʼnə pànə̀ pɨ Israel lə̀ tônə a mbyə̀ mbarə̀ Sinai nɨ ɨ̀mǔ ɨ lə̀ mənə nkɨrə̀ aŋunə. Ka nɨ̀ tô mbyàa a wɨghə a alyiʼə ndzùmə, alyiʼə nɨ a sinə̀nə nɨ nyimə̀, àghə̀ʼtə̀ a kɨ mmə ndàŋə̀.

¹⁹ Ka nɨ̀ zuʼù a wɨghə ntàŋnə̀ ɨ̀ mə ntswuə̀ a alyiʼə ghu pobə ngyə̀ ŋwùə̀. Nkwùə̀ nɨ pànə̀ pa lə̀ zuʼnə ngyə̀ Nẅùə̀ za, pobə lə̀ puʼù mbô lo kò a chi nshwəŋnə̀ e.

²⁰ Mbə̀ʼnə ntə̌ nɨ pɨ lə̀ ŋânə ambo pobə ɨ lə̀ tɨ̀ŋnə̀ nkɨ mmə nshwəŋə̀ lo, “A tə mbə pə nyàamə̀ mbètə̀ mbarə̀ zə, pɨ tumpə̀ a ẅèrə nɨ mɨ̀ghòorə nzhwuutə̀.”

²¹ Alyiʼə ghu a lə̀ mə nshwàŋə̀ pə̀ənə̀ tə Mǔsî a shwəŋə̀ lo, “Àkẅàrə̀ a ẅìimə̀ mə̀ tə ngwə̀ ngwùrə̀.”

²² La nɨ̀ kùmə̀ ntô a zɨghə̀ pə aŋunə mbarə̀ Zayònə̀, nkɨ ntô amwuə mbòmpə àlaʼà ngẅùunə Nẅùə̀ wa nɨ à pənə ghù ntɨ̀ŋnə̀; mbə Yèrusalèmə̀ wa nɨ à pənə a nɨ̀pwuurə̀ pəngèrə̀ nkaamə̀ nkaamə̀ pə ghu mmə ngaʼà.

²³ Nɨ̀ tô la amwuə àshwatə̀ pɨ̀tsàa pɨ mbyə̀ pɨ ɨ̀poonə̀ pɨ Nẅùə̀ nɨ pɨ ŋwàʼnə̀ mə mɨ̀linə̀ ɨ̀mobə a nɨ̀pwuurə̀, nkɨ ntô la ambo Nẅùə̀ nɨ à wa ntsoʼtə̀ mɨ̀sàʼa mɨ pànə̀ pɨ̀tsùmə̀, nkɨ ntô la ambo ɨ̀zhwùə̀ pànə̀ pa nɨ mɨ̀nwùə̀ ɨ̀mobə təəmə̀nə pobə nkɨ mbòŋə̀ mmyàanə̀.

²⁴ Nɨ̀ tô la ambo Yěsû nɨ à lə̀ tônə nɨ ɨ̀kàanə̀ ghù shwuə̀, nkɨ ntô ambo àləəmə̀ e nɨ pɨ lə̀ zàrə̀nə a kàʼà mɨ̀nwùə̀ mɨ̀shìʼnə̀ ntsàarə̀ àləəmə̀ Abèlə̀.

²⁵ Nɨ̀ zhìʼtə̀ a wɨghə a nɨ twuunə̀ ngyə̀ ŋònə̀ nɨ à shwəŋə̀nə ambo pɨghə. Pànə̀ nɨ pɨ twuunə̀nə ngyə̀ ŋònə̀ nɨ à lə̀ mənə nkwàtə̀ a ghobə a àtwuə̀ ɨ̀shyə̂ ka pobə kɨ̀ɨrə̀ a ghobə, mbə̀ʼə pobə tyiʼə̀ nkɨ̀ɨrə̀ ngyə̀ ŋònə̀ nɨ à wə̀ nkwàtə̀ a ghobə a nɨ̀pwuurə̀ lə ɨla?

²⁶ Ngyə̀ Nẅùə̀ ɨ̀ lə̀ ghɨ̀rə̀ àtwuə̀ ɨ̀shyə̂ àtsùmə̀ a nə̀ʼnə̀ nkwùə̀ ghu, la tɨ̀tsòŋə̀ à kàʼà mə̀ lo, “Ka mbə chi ghɨ̀rə̀ mə̀ pə ndàʼà àtwuə̀ ɨ̀shyə̂ zə̀ lo â nə̀ʼnə̀, mbɨ kɨ ghɨ̀rə̀ farə nɨ̀pwuurə̀ lo tsèrə nə̀ʼnə̀.”

²⁷ Àshwəŋnə̀ zə̀ lo, “Chi” a lanə nnèrə̀ lo ɨ̀pwuumə̀ pa nɨ pɨ lə̀ tsùŋə̀nə la pɨ ghǎ nə̀ʼə̀ pèrə tsoʼò, la pyə̀ pa nɨ mbə̀ʼə ka pɨ̀ nə̀ʼə̀ e a pèrə la ghǎ ghoŋə̀.

²⁸ Lenəla, pə̀ənə̀ tə ŋŋâ a mɨyàa ambo Nẅùə̀ ntiinə pə̀ənə̀ pə nɨ ànwùə̀ nɨ̀fò nɨ mbə̀ʼə ka pɨ nə̀ʼə̀ e. Pə̀ənə̀ tə nsəəkə̀ a Nẅùə̀ amwuə àlàŋə àtsùmə̀ nɨ ǎ pòŋə̀ e, nkɨ nsəəkə̀ e nɨ àkẅàrə̀,

²⁹ ntiinə Nẅùə̀ ɨ̀wə̀ənə̀ la ɨ̀mǔ nɨ ɨ wa ntòonə̀ àzwuumə̀ àtsùmə̀.