Hibrù 10 - Pinyin

Kristù à ŋâ mbɨ̀ŋmə̀ e tsaʼa mômbyə̂ nɨ̀shwàʼà nɨ nkuŋə̀

¹ Mbòomə pɨ̀Jew à chyə̂ mbə e la ndàʼà ləgrə ɨ̀pwuumə̀ pɨ̀shìʼnə̀ nɨ pòŋə̀ tô, ka mə nèrə̀ e ngotə nkǔŋə nkuŋə ɨ̀pwuumə̀ pɨ̀shìʼnə̀ pɨ̀ghu. Pɨ̀Jew pa nkɨ nshwàʼà pə mɨ̀shwàʼà mèrə mə mɨnguʼu mɨ̀tsùmə̀. Ka àlàŋə àtse a pə e ghu nɨ mbə̀ʼə mbuurə̀ mɨ̀nwùə̀ zə̀ ghɨ̀rə̀ lo pànə̀ nɨ pobə tônə ambo Nẅùə̀ pə pànə̀ nɨ mɨ̀nwùə̀ ɨ̀mobə pòŋə̀nə mmyàanə̀.

² A tə mbəla mbə lo mɨ̀shwàʼà mə ma ngɨ̀rə̀ lo pànə̀ nɨ pobə pa nguʼtə̀ a Nẅùə̀ pobə laanə̀, yi pobə ka mə myàʼtə̀ a ghobə a nɨ tə nshwàʼà mɨ̀shwàʼà mə, mɨ̀ntɨŋmə̀ ɨ̀mobə kɨ nchi mmə nsaʼà e a ghobə aŋunə tɨ̀pòŋə̀ ɨghobə apə̀?

³ La mɨ̀shwàʼà pə ɨ̀pwuumə̀ nɨ pèrə pa ngɨ̀rə̀ pobə kẅempə̀ a tɨ̀pòŋə̀ ɨghobə nguʼu ɨ̀tsùmə̀.

⁴ Mbə̀ʼnə àləəmə̀ pɨ̀lwuumə̀ pɨ nyàamə̀ pobə yè mɨ̀mbyə̂ a laʼa nsùu e a tɨ̀pòŋə̀ pə̀ənə̀ apə̀.

⁵ La ɨ̀sùmə nɨ Kristù à lə̀ shwəŋə̀nə ambo Nẅùə̀ nkwùə̀ nɨ à lə̀ mənə ntàʼà tô a àtwuə̀ ɨ̀shyə̂ la lo: “Ka wə̀ lə̀ tàʼà o la lo pànə̀ ŋâ mɨ̀nyàamə̀ aŋunə nɨ̀shwàʼà farə nchàʼtə Nẅùə̀ ambo ghò, la ngɨ̀rə̀ lo mbə pə nɨ mbɨ̀ŋmə̀.

⁶ “Ka wə̀ pə o nɨ nɨ̀ghaʼà aŋunə mɨ̀nyàamə̀ nɨ pɨ pa ntòonə̀ aŋunə alyiʼə mɨ̀shwàʼà kə̀ mɨ̀shwàʼà nɨ pɨ pa ngɨ̀rə̀ lo sùu mɨ̀nwùə̀ mɨ tɨ̀pòŋə̀.

⁷ “Lenəla, Kristù a shwəŋə̀ ambo Nẅùə̀ lo, ‘Ngwə̀ a nɨ̀ghə̂ a nɨ ghɨ̀rə̀ ànwùə̀ nɨ wə̀ tàʼnə lo ngɨ̀rə̀ la mbǎ Nẅùə̀, tyìʼə̀ tsaʼnə pɨ ŋwàʼnə̀nə mbə̀ʼə mə̀ amwuə àŋwàʼnə̀ Nẅùə̀.’”

⁸ À lə̀ zàamə̀ nshwəŋə̀ lo, “Ka wə̀ tàʼà o kə̀ nkòŋə̀ mɨ̀shwàʼà pobə nchàʼtə Nẅùə̀ kə̀ mɨ̀nyàamə̀ nɨ pɨ pa ntòonə̀ aŋunə alyiʼə mɨ̀shwàʼà pobə mɨ̀shwàʼà a nɨ sùu tɨ̀pòŋə̀.” À lə̀ shwəŋə̀ ànwùə̀ zə̀ mbaa pə tsaʼnə pɨ lə̀ mənə ŋŋâ mɨ̀shwàʼà mèrə mə ndzùŋə̀ a mbòomə la.

⁹ Kristù a chi nshwəŋə̀ lo, “Ngwə̀ lə mbǎ Nẅùə̀. Ǹtô a nɨ ghɨ̀rə̀ ànwùə̀ nɨ wə̀ tàʼnə.” Lenəla Nẅùə̀ à pyaatə̀ mə ɨ̀kàanə̀ ghù lwùnə̀ ntyiʼə̀ ndòo ghù shwuə̀ nkẅebə̀ ghu.

¹⁰ Tsaʼnə Yěsû Kristù à lə̀ ghɨ̀rə̀nə ànwùə̀ nɨ Nẅùə̀ à lə̀ tàʼnə lo â ghɨ̀rə̀ la, à sùu a wə̀ənə̀ pə̀ənə̀ laanə̀ ntii nɨ̀shwàʼà nɨ à lə̀ shwàʼnə a taʼà nkwùə̀ nɨ nkuŋə̀ nɨ mbɨ̀ŋmə̀ e.

¹¹ Ngàŋə màʼà Nẅùə̀ pɨ̀Jew pɨ̀tsùmə̀ fàʼà àfàʼà àzobə njyə̂ ɨ̀tsùmə̀ njyə̂ ɨ̀tsùmə̀, mmə ŋŋâ a taʼà nɨ̀shwàʼà nkwùə̀ noʼnə. La mbə̀ʼə mɨ̀shwàʼà mèrə mə̀ laʼa nsùu e a tɨ̀pòŋə̀ ŋwùə̀ apə̀.

¹² Nkwùə̀ nɨ Kristù à lə̀ shwàʼnə a taʼà nɨ̀shwàʼà nɨ à ghoŋə̀nə nɨ nkuŋə̀ a nɨ sùu a tɨ̀pòŋə̀, à lə̀ tyiʼə̀ nnwuunə̀ a pàa àpô Nẅùə̀ yè zɨghə̀nə.

¹³ La alyiʼə ghu nɨ à ẅùə̀ ntyiʼə̀ mbyabə̀ lo Nẅùə̀ a nùŋə̀ ngàŋə mbwùunə̀ ɨ̀ze a ɨ̀shyə̂ lo â nùŋə̀ mɨ̀kwùə̀ ɨ̀me aŋunə.

¹⁴ À làŋə̀ a ndzùmə̀ taʼà nɨ̀shwàʼà ngɨ̀rə̀ lo ŋònə̀ wa ntsùmə̀ nɨ Nẅùə̀ à sùunə a tɨ̀pòŋə̀ e â pə ŋònə̀ wa nɨ mɨ̀nwùə̀ ɨ̀me pòŋə̀nə mmyàanə̀.

¹⁵ Àzhwùə̀ Nẅùə̀ a chi nkɨ mbə la ndzəənə̀ zəənə̀nə a nɨ tiitə̀ a wəənə̀ nɨ mɨ̀nwùə̀ mèrə mə. À lə̀ zàamə̀ nshwəŋə̀ lo:

¹⁶ “Ndòʼnə̀mbyə̂ à wə̀ nshwəŋə̀ lo: Lə̌ ɨ̀kàanə̀ wa nɨ mbɨ wàrə̀ pəə pɨ pobə amwuə mɨ̀njyə̂ nɨ mɨ ghǎ tô: Mbɨ chyâ pɨ̀mbòomə ɨ̀pâ amwuə mɨ̀ntɨŋmə̀ ɨ̀mobə, ŋŋwàʼnə̀ a pèrə a àtwuə̀ pobə.”

¹⁷ A chi nkẅìʼnə̀ nshwəŋə̀ lo, “Ka mbə chi kẅempə̀ mə̀ a tɨ̀pòŋə̀ ɨ̀ghobə kə̀ ngɨ̀rə̀ ɨ̀nwùə̀ tɨ̀pòŋə̀ ɨ̀zobə.”

¹⁸ Nkwùə̀ nɨ Nẅùə̀ à lə̀ lə̀ənə̀ mə a tɨ̀pòŋə̀ pə̀ənə̀, ka pɨ pə chi shwàʼà e nɨ̀shwàʼà tsɨ̀tse a nɨ sùu tɨ̀pòŋə̀ ghu.

Nɨ̀ ghɨ̀rə̀ pə̀ənə̀ tô mbaatə̀ a Nẅùə̀

¹⁹ Pɨlyimə ɨ̀pâ, pə̀ənə̀ pə nɨ ɨ̀sàanə̀ a nɨ kwuunə̀ amwuə alyiʼə yè laanə̀nə mmyàanə̀ a nɨ làŋə̀ a ndzùmə̀ nɨ̀wɨghə̀ Yěsû.

²⁰ À lə̀ nyaʼkə̀ àlàŋə yè shwuə̀ àtse ambo pə̀ənə̀ a nɨ làŋə̀ ntomnə̀ a àpàa atsəʼə za, njiilo pə̀ənə̀ làŋə̀ amwuə mbə nɨ nɨ̀chyə̂mbyə̂. À lə̀ ghɨ̀rə̀ a lenə la tsaʼnə à lə̀ kwɨghə̀nə àtwuə̀ pə̀ənə̀.

²¹ Tsaʼnə pə̀ənə̀ pənə nɨ ɨ̀fò màʼà Nẅùə̀ ngẅùunə nɨ a pənə àtwuə̀ ndâ Nẅùə̀,

²² pə̀ənə̀ ghə̀ mbaatə̀ a Nẅùə̀ nɨ ntɨŋmə̀ ɨ̀wəənə̀ ɨ̀tsùmə̀, ntsùŋə̀ nnùŋə̀ ntɨŋmə̀ aŋunə ze, mbə nɨ mɨ̀ntɨŋmə̀ nɨ Nẅùə̀ à ghɨ̀rə̀ mə lo kò mèrə tə nkwàŋə̀ e a tɨ̀pòŋə̀, nkɨ mbə nɨ mɨ̀mbɨ̀ŋmə̀ nɨ Nẅùə̀ à sùu mə a mèrə nɨ nchyə ghu laanə̀nə.

²³ Pə̀ənə̀ təəmə̀ ntɨ̀ŋnə̀ mmə mbyabə̀ a zhyə̀ za nɨ pə̀ənə̀ pa nshwəŋə̀ lo pə̀ənə̀ nùŋə̀ ntɨŋmə̀ aŋunə la, ntiinə ka Nẅùə̀ â waʼà e tɨ ghɨ̀rə̀ ànwùə̀ nɨ à kàʼnə la.

²⁴ Ŋwùə̀ ntsùmə̀ amwuə pə̀ənə̀ â taŋnə̀ a nɨ zəənə̀ tsaʼnə mbə̀ʼə a yèmpə̀ a pɨ̀tse pə̀ənə̀ a nɨ kòŋə̀ pə̀ənə̀ farə a nɨ ghɨ̀rə̀ mɨ̀nwùə̀ mɨ ɨ̀shìʼnə̀.

²⁵ Kò pə̀ənə̀ waʼà a wəənə̀ a mbòomə ɨ̀wəənə̀ a nɨ tô mbwuutə̀ a taʼà alyiʼə tsaʼa pànə̀ pɨ̀tse pa ngɨ̀rə̀ la. La pə̀ənə̀ taŋnə̀ pə a nɨ tsùŋə̀ ngyèmpə̀ a ŋwùə̀ moʼo moʼo, ntiinə pə̀ənə̀ pə ndzəənə̀ lo njyə̂ nɨ Ndòʼnə̀mbyə̂ à ghǎ tô ɨ̀ zə̀ mbaatə̀.

²⁶ Pə̀ənə̀ tə lèrə̀ nɨ mbyə̀ a nɨ ghɨ̀rə̀ ɨ̀nwùə̀ tɨ̀pòŋə̀ tsaʼnə pə̀ənə̀ zhyə̂ mə a nkǔŋə nkuŋə la, nɨ̀shwàʼà tsɨ̀tse chyə̂ mbə e ghu a nɨ sùu a wəənə̀ aŋunə tɨ̀pòŋə̀ ɨ̀wə̀ənə̀ apə̀.

²⁷ Ànwùə̀ nɨ a ghoŋə̀nə a tyiʼə̀ mbə pə a nɨ tə mbyabə̀ nɨ àkẅàrə̀ tsaʼnə Nẅùə̀ à ghǎ tsoʼtə̀ mɨ̀sàʼa mɨ pə̀ənə̀. Pə̀ənə̀ kɨ mmə mbô ɨ̀mǔ ghu ɨ̀tɨ̀ŋnə̀ wa nɨ ɨ ghǎ tòonə̀ a ŋwùə̀ wa ntsùmə̀ nɨ à pàanə̀nə a Nẅùə̀ la.

²⁸ Ŋònə̀ nɨ à pəʼnə a mbòomə Mǔsî à wa nkwɨghə̀ tɨghu ŋwùə̀ à nèrə̀ àkoorə̀ mɨ̀lɨŋə̀ aŋunə ze nkwùə̀ nɨ pànə̀ pɨpaa kə̀ pɨtarə təəmə̀nə tsaʼa pɨ̀ndzəənə̀ zəənə̀nə aŋunə ànwùə̀ tɨ̀pòŋə̀ nɨ à ghɨ̀rə̀nə.

²⁹ Mbə̀ʼə a pə pə ɨla ambo ŋònə̀ wa nɨ à wa ngwâ a Moonə̀ Nẅùə̀? Mbə̀ʼə a pə pə la ambo ŋònə̀ wa nɨ à wa ndòo àləəmə̀ ɨ̀kàanə̀ Nẅùə̀ tsaʼa àzwuumə̀ nɨ ka à tsə̂ e nɨ à pənə àzwuumə̀ nɨ a za nsùu a wəənə̀ aŋunə tɨ̀pòŋə̀? Mbə̀ʼə a kɨ nchi mbɨ̂ pə la ambo ŋònə̀ wa nɨ à wa ndzòomə̀ Àzhwùə̀ Nẅùə̀ za nɨ a za nnèrə̀ àpòŋə̀ ntɨŋmə̀ la? Kwàŋə̀ mbuurə̀ ngəʼə̀ nɨ ŋònə̀ ghu ǎ zəənə̀ a zèrə!

³⁰ Pə̀ənə̀ zhyə̂ a ŋònə̀ wa nɨ à lə̀ shwəŋə̀nə lo, “La ǎ chyâ mɨ̀ŋə̀ chyâ ngəʼə̀ a àtwuə̀ ŋònə̀ wa nɨ à ghɨ̀rə̀nə a tɨ̀pòŋə̀ la; la ǎ twuə̀ mɨ̀ŋə̀ twuə̀ e aŋunə tɨ̀pòŋə̀ e.” Pə̀ənə̀ kɨ nzhyə̂ a ŋònə̀ wa nɨ à lə̀ shwəŋə̀nə lo, “Ndòʼnə̀mbyə̂ à ghǎ tsoʼtə̀ mɨ̀sàʼa mɨ pə̀ənə̀ ɨ̀pe.”

³¹ A ànwùə̀ yè pônə a nɨ kwuunə̀ amwuə mbô mɨ Nẅùə̀ wa nɨ à wa nchyə̂ la.

³² Nɨ̀ kẅempə̀ tsaʼnə a lə̀ pənə ambo pɨghə nkwùə̀ ntsàambyə̀. Nkwùə̀ wa nɨ nkàʼà Nẅùə̀ ɨ̀ lə̀ kyàʼà mə a wɨghə la, nɨ̀ lə̀ zəənə̀ ngəʼə̀ yɨ̀noʼnə la ka mɨ̀ntɨŋmə̀ ɨ̀mɨghə nə̀ʼnə̀ e.

³³ À lə̀ pə nkwùə̀ ɨ̀tse pɨ mə ndzòomə̀ a wɨghə nkɨ mmə nnyàŋə̀ a wɨghə amwuə pə̀ənə̀. Amwuə yɨ̀tse nkwùə̀, nɨ̀ chwuʼtə̀ mbɨ̀ŋmə̀ a nɨ pwuutə̀ pɨghə pɨ̀tse pə̀ənə̀ nɨ pɨ lə̀ mənə nnyàŋə̀ a ghobə nɨ ndwuumə̀ wə̀.

³⁴ Nɨ̀ lə̀ pə nɨ àsòmnə̀ aŋunə pànə̀ nɨ pobə lə̀ pənə a ndâ ɨ̀tsaŋə̀; nkwùə̀ nɨ pɨ lə̀ kẅiirə̀nə ɨ̀pwuumə̀ ɨ̀pɨghə ɨ̀tsùmə̀, nɨ̀ lə̀ ẅìimə̀ ntɨŋmə̀ ɨ̀wɨghə aŋunə pî ẅèrə wə̀ nɨ nɨ̀ghaʼà, ntiinə nɨ̀ lə̀ zhyə̂nə lo nɨ̀ chyə̂ nɨ àzwuumə̀ àtse nɨ a pòŋə̀nə ntsàarə̀ a pyə̀ nkɨ mbə àzwuumə̀ nɨ a ghoŋə̀nə nɨ nkuŋə̀.

³⁵ Lenəla, kò mɨ̀ntɨŋmə̀ ɨ̀mɨghə porə̀ e, ntiinə ntɨŋmə̀ ghu tɨ̀ŋnə̀ amwuə mɨ̀nwùə̀ mɨ Nẅùə̀ wa ntô nɨ mɨ̀ntsoʼnə̀ mɨ àfàʼà mɨ̀noʼnə.

³⁶ Nɨ̀ chyə̂ a nɨ ẅìimə̀ ntɨŋmə̀ a nɨ ghɨ̀rə̀ ànwùə̀ nɨ Nẅùə̀ à tàʼnə mbə̀ʼə kẅiirə̀ àzwuumə̀ za nɨ Nẅùə̀ à lə̀ kàʼnə la.

³⁷ Mbə̀ʼnə Àŋwàʼnə̀ Nẅùə̀ a shwəŋə̀nə lo: “Tyìʼə̀ aŋunə mətùmə nkwùə̀, ze wa nɨ à wə̀ ntô la ǎ tô, mbə tsə̀ŋə̀ e nkwùə̀ apə̀.

³⁸ Pə̀ənə̀ ɨ̀pâ nɨ mɨ̀nwùə̀ ɨ̀mobə təəmə̀nə ghǎ chyə̂ ntiinə pobə nùŋə̀nə ntɨŋmə̀ aŋunə mɨ̀ŋə̀. La ka mbə pə mə̀ nɨ nɨ̀ghaʼà pəə ŋwùə̀ ɨ̀ghobə ɨ̀tse nɨ ǎ kẅirə̀ e nɨ ndzùmə̀.”

³⁹ Ka pəə pə wəə pànə̀ nɨ pobə pa nkẅirə̀ nɨ ndzùmə̀ mbî. La pəə chyə̂ mbə pànə̀ nɨ pɨ nùŋə̀nə ntɨŋmə̀ aŋunə Nẅùə̀ a chwarə̀ a wəə.