Filipì 1 - Pinyin

¹ Mɨ̀ŋə̀ Pàolò ŋ̀ŋwàʼnə̀ àŋwàʼnə̀ zə̀ pəə Timotì, mbə ngàŋə àfàʼà Yěsû Kristù, mmə ntsàa àchàʼtə̀ ambo pànə̀ pɨ̀tsùmə̀ nɨ pobə pənə pànə̀ pɨ Nẅùə̀ ndàŋə̀ a ndzùmə̀ Yěsû Kristù nɨ pobə pənə a Filipì, farə ambo ɨ̀twuə̀ pobə ngàŋə àyèmpə̀ ɨ̀shwatə̀ ɨ̀poonə̀ pɨ Kristù.

² Pəə tsàa àchàʼtə̀ zə̀ mbə̀ʼə Tǎ ɨ̀wə̀ənə̀ Nẅùə̀koʼò nɨ Ndòʼnə̀mbyə̂ Yěsû Kristù, pobə̂ nèrə̀ a wɨghə nɨ àpòŋə̀ ntɨŋmə̀ àzobə nkɨ ŋŋâ a wɨghə nɨ àporə̀porə̀.

Pàolò a ŋâ a mɨyàa mbə̀ʼə ɨ̀poonə̀ pɨ Nẅùə̀ nɨ pənə a Filipì

³ Ngwa ŋŋâ a mɨyàa ambo Nẅùə̀ mə̀ nkwùə̀ ɨ̀tsùmə̀ nɨ ǹkẅempə̀nə a wɨghə.

⁴ Nkwùə̀ ɨ̀tsùmə̀ nɨ ngwa nchàʼtə̀ a Nẅùə̀ a àtwuə̀ pɨghə pɨ̀tsùmə̀, ntɨŋmə̀ mə̀ wa ndẅenə̀ nɨ nɨ̀ghaʼà mbə̀ʼə wɨghə,

⁵ ntii ndwuumə̀ nɨ nɨ̀ lə̀ lòonə ngyèmpə̀ mə̀ a nɨ sìimə̀ ntwuumə̀ ghù ɨ̀shìʼnə̀ wə̀ a nɨ furə̀ njyə̂ nɨ ndə̀ tônə nchwìitə̀ ntwuumə̀ ghù ɨ̀shìʼnə̀ wə̀ nɨ̀ pyiimə̀ tə ntô mbyàa sìnə̀ wə̀.

⁶ Ǹzhyə̂ tyìʼə̀ nkǔŋə nkuŋə lo Nẅùə̀ wa nɨ à lə̀ pìʼnə̀nə àfàʼà ɨ̀shìʼnə̀ zə̀ amwuə mɨ̀ntɨŋmə̀ ɨ̀mɨghə a tyìʼə̀ ze wa nɨ ǎ myàanə̀ tə mbyàa njyə̂ nɨ Yěsû à ghǎ kẅirə̀ tô.

⁷ Ǹkwàŋə̀ a lenə la ntiinə nɨ̀ wa amwuə ntɨŋmə̀ mə̀ tyìʼə̀ ɨ̀shìʼnə̀. Pɨghə pɨ̀tsùmə̀ kɨ mbə pə̀ənə̀ amwuə ɨ̀pòŋə̀ nɨ Nẅùə̀ à ghɨ̀rə̀nə aŋunə mɨ̀ŋə̀ tsaʼnə m̀bənə a ndâ ɨ̀tsaŋə̀ tɨ̀tsòŋə̀ farə nkwùə̀ nɨ ndə̀ mənə ndzòŋnə̀ mɨ̀làʼà mbə̀ʼə ntwuumə̀ ghù ɨ̀shìʼnə̀ mmə nshwəŋə̀ ambo pànə̀ lo ànwùə̀ nɨ ngwə̀ nshwəŋə̀ la, a tyìʼə̀ ntwuumə̀ ghù ɨ̀shìʼnə̀.

⁸ Nẅùə̀ à zhyə̂ lo ǹshwəŋə̀ tyìʼə̀ nkǔŋə nkuŋə lo nɨ̀ wa a ntɨŋmə̀ mɨ̀ŋə̀ tyìʼə̀ ɨ̀shìʼnə̀. Ǹkòŋə̀ a wɨghə la nɨ ɨ̀kòŋnə̀ Yěsû Kristù.

⁹ Ngwə̀ nchàʼtə̀ a Nẅùə̀ lo ɨ̀kòŋnə̀ ɨ̀wɨghə ɨ̂ kẅìʼnə̀, àzhìʼtə̀ àzɨghə â kẅìʼnə̀ amwuə ndwuumə̀ nɨ mbə̀ʼə nɨ̀ zhyə̂ shankə̀ mɨ̀nwùə̀,

¹⁰ mbə̀ʼə nɨ̀ zhyə̂ zəənə̀ a zhyə̀ nɨ a pòŋə̀nə mmyàanə̀, lenəla tyiʼə̀ pə wɨghə nɨ ntsɨ̀ŋnə kə̀ nɨ ɨ̀fèrə apə̀ tə mbyàa njyə̂ nɨ Kristù à ghǎ kẅirə̀ tô,

¹¹ mbə̀ʼə Yěsû Kristù â ghɨ̀rə̀ lo nɨ̀ ghɨ̀rə̀ mɨ̀nwùə̀ nɨ mɨ təəmə̀nə, lenəla pɨ̀ tə nguʼtə̀ nkɨ ngyetə̀ a Nẅùə̀.

¹² Pɨlyimə ɨ̀pâ, ǹtàʼà la lo nɨ̀ zhyə̂ lo mɨ̀nwùə̀ mɨ̀tsùmə̀ nɨ mɨ furə̀nə aŋunə mɨ̀ŋə̀ la, mɨ chi ngɨ̀rə̀ pə lo ntwuumə̀ ghù ɨ̀shìʼnə̀ wa ɨ̂ chi nsìimə̀ ndèrə̀ nɨ mbyə̀.

¹³ Lenəla, pɨ̀soyì pɨ̀tsùmə̀ nɨ pobə pa mbyabə̀ ntoʼò pànə̀ pɨ Romə̀ zhyə̂ lo ngwə̀ a nɨ̀ghə̂ a ndâ ɨ̀tsaŋə̀ lə ntii Kristù.

¹⁴ Nɨ̀pə mə̀ a ndâ ɨ̀tsaŋə̀ ghə à ghɨ̀rə̀ lo pɨlyimə ɨ̀pə̀ənə̀ pɨ̀noʼnə nùŋə̀ mɨ̀ntɨŋmə̀ ɨ̀mobə aŋunə Ndòʼnə̀mbyə̂, ndèrə̀ nɨ mbyə̀ nchwìitə̀ ànwùə̀ Nẅùə̀ nɨ ɨ̀tɨ̀ŋnə̀ ka mə pô a ghobə.

¹⁵ A tyìʼə̀ nkǔŋə nkuŋə lo pànə̀ pɨ̀tse amwuə pɨghə chwìitə̀ ntwuumə̀ Kristù nɨ àghə̀ʼnə̀ pobə àmàŋnə̀, la pɨ̀tse kɨ mə nchwìitə̀ ntwuumə̀ Kristù tyìʼə̀ nɨ àkwàŋə̀ yè ɨ̀shìʼnə̀.

¹⁶ Pèrə pə pànə̀ nɨ pobə pə nchwìitə̀ nɨ àkwàŋə̀ yè ɨ̀shìʼnə̀, pobə pə nchwìitə̀ la ntiinə pobə kòŋə̀nə mə̀, nkɨ nzhyə̂ lo Nẅùə̀ à tsoʼò mə̀ lo n̂tàŋə̀ ntwuumə̀ ghù ɨ̀shìʼnə̀ wə̀ nɨ ngwə̀ nchwìitə̀ la.

¹⁷ La pyə̀ pànə̀ pə nchwìitə̀ ntwuumə̀ Kristù pə nɨ àkwàŋə̀ tɨ̀pòŋə̀, ka pə ghobə nɨ mɨ̀ntɨŋmə̀ mɨ laanə̀nə, mmə ntàʼà pə lo ɨ̀mobə mɨ̀nwùə̀ yìinə̀ mbə̀ʼə pànə̀ tə ndzùŋə̀ a ghobə. Pobə ghɨ̀rə̀ a lenə la nɨ àkwàŋə̀ lo pobə̌ kẅìʼnə̀ chyâ ngəʼə̀ aŋunə mɨ̀ŋə̀ a ndâ ɨ̀tsaŋə̀ ghə.

¹⁸ Ka ǹtòʼò mə̀ ànwùə̀ zèrə zə. Ngwə̀ nɨ nɨ̀ghaʼà a nɨ zəənə̀ lo pɨ chwìitə̀ ntwuumə̀ Kristù amwuə ɨ̀làŋə ɨ̀tsùmə̀, kə̀ pɨ chwìitə̀ amwuə àkwàŋə̀ yè ɨ̀shìʼnə̀ kə̀ nɨ yè tɨ̀pòŋə̀, nɨ̀ghaʼà mə̀ a lèrə̀ nɨ mbyə̀,

¹⁹ ntiinə ǹzhyə̂nə lo, a nɨ làŋə̀ a ndzùmə̀ àchàʼtə̀ Nẅùə̀ àzɨghə pobə àyèmpə̀ nɨ Àzhwùə̀ Yěsû Kristù a ŋânə, a ghɨ̀rə̀ mə ǹfurə̀ a ndâ ɨ̀tsaŋə̀ ghə.

²⁰ Ngwə̀ ndanə ngyìi nɨ ntɨŋmə̀ mə̀ ɨ̀tsùmə̀ lo ka mbə ghɨ̀rə̀ mə̀ ànwùə̀ ɨ̀sɨŋnə̀ àtse la taŋnə̀ tɨ̀tsòŋə̀ tyìʼə̀ tsaʼnə ndə̀ pyə̀nə mmə ngɨ̀rə̀ a nɨ zəənə̀ lo ǹkyiitə̀ nɨ ɨ̀tɨ̀ŋnə̀ nguʼtə̀ a Kristù amwuə mɨ̀ŋə̀ kə̀ mbə ghù ntɨ̀ŋnə̀ amwuə àtwuə̀ ɨ̀shyə̂ ghə kə̀ nkwɨghə̀.

²¹ Ǹshwəŋə̀ a lenə la ntiinə ambo mɨ̀ŋə̀, ɨ̀sùmə nɨ n̂chyə̂ ɨ̀ chyə̂ pə a nɨ ghuʼtə̀ a Kristù, ǹtə pyə̀ nkwɨghə̀ kwɨghə̀nə, a pòŋə̀ ntsàarə̀ a nɨ nwuunə̀ a àtwuə̀ ɨ̀shyə̂ ghə.

²² La, a tə mbə zhyə̀ nɨ mbɨ chi chyə̂ a àtwuə̀ ɨ̀shyə̂ ghə, yi mbɨ pòŋə̀ fàʼà mɨ̀nwùə̀ a nɨ yèmpə̀ pə̀ənə̀. La ka ǹzhyə̂ mə̀ ànwùə̀ nɨ mbɨ tsoʼò.

²³ Nɨ ndwuumə̀ wə̀, ngwə̀ a tɨ̀tɨ̀rə̀ nchyə. Ànwùə̀ nɨ ngwə̀ ngyìi a chyə̂ lo ǹtàʼà a nɨ ghə̀ mbə pəə Kristù ntiinə zèrə zə̀ ànwùə̀ a pòŋə̀ ntsàarə̀ a nɨ pə a àtwuə̀ ɨ̀shyə̂ ghə.

²⁴ La a pòŋə̀ ambo pɨghə lo nchi ngoŋə̀ a àtwuə̀ ɨ̀shyə̂ ghə mbə̀ʼə yèmpə̀ a wɨghə.

²⁵ A nkǔŋə nkuŋə lo a ànwùə̀ nɨ mbɨ ghɨ̀rə̀. Ǹzhyə̂ lo mbɨ chi chyə̂ pə̀ənə̀ amwuə àtwuə̀ ɨ̀shyə̂ ghə mbə̀ʼə yèmpə̀ a wɨghə nɨ̀ kẅuə̀ ndèrə̀ nɨ mbyə̀, nɨ̀ghaʼà ɨwɨghə â kɨ nkẅìʼnə̀ amwuə àpyiimə̀ ntɨŋmə̀ àzɨghə.

²⁶ Ǹtə furə̀ ntô ntsirə̀ a wɨghə yi mɨ̀ntɨŋmə̀ ɨ̀mɨghə lẅenə̀ nɨ nɨ̀ghaʼà ntii ànwùə̀ nɨ Kristù Yěsû à ghɨ̀rə̀nə aŋunə mɨ̀ŋə̀.

Àkwùə̀ nɨ̀yìinə̀ ɨ̀poonə̀ pɨ Nẅùə̀

²⁷ Nɨ̀ chyə̂ a nɨ pə nɨ mbòomə ghù ɨ̀shìʼnə̀ amwuə ndwuumə̀ nɨ ntwuumə̀ Kristù ghù ɨ̀shìʼnə̀ ɨ tàʼnə la, mbə̀ʼə m̀bəla nfurə̀ ntô ndzəənə̀ a wɨghə kə̀ ka tô mə̀, ǹdzuʼù lo nɨ̀ wə̀ ntəəmə̀ ntɨ̀ŋnə̀, mbwuutə̀ mbə nɨ̀pùʼu nɨ moʼo ntaŋnə̀ pɨghə pɨ̀tsùmə̀ lo sìimə̀ ntwuumə̀ ghù ɨ̀shìʼnə̀ nɨ nɨ̀ pyiimə̀nə ndèrə̀ nɨ mbyə̀.

²⁸ Ǹdzuʼù lo nɨ̀ wə̀ təəmə̀ ka mə pô a wɨghə ngàŋə mbwùunə̀ ɨ̀zɨghə. Zèrə zə la àlènə̀ ambo pobə lo Nẅùə̀ à ghǎ tsɨ̀nkə̀ ngəʼə̀ àtwuə̀ pobə la chwarə̀ a wɨghə,

²⁹ ntiinə Nẅùə̀ wa nɨ à wa ngɨ̀rə̀ ɨ̀pòŋə̀ la à ŋâ mə a wɨghə nɨ ɨ̀sàanə̀ lo kò nɨ̀ nùŋə̀ a wɨghə pə ndàʼà ntɨŋmə̀ aŋunə Kristù, ǎ kɨ ghɨ̀rə̀ lo nɨ̀ zəənə̀ ngəʼə̀ ntii e.

³⁰ Lenəla, nɨ̀ wə̀ nkɨ mmə ndzəənə̀ ngəʼə̀ zhyə̀ nɨ nɨ̀ lə̀ zuʼnə lo ngwə̀ ndzəənə̀. Ǹkùmə̀ nkɨ mbirə̀ mmə ndzəənə̀ a zèrə tô pyàa sìnə̀ wə̀.