Filemònə̀ 1 - Pinyin

¹ Àŋwàʼnə̀ zə̀ a furə̀ ambo mɨ̀ŋə̀ Pàolò nɨ m̀bənə a ndâ ɨ̀tsaŋə̀ ntii Kristù Yěsû. A zèrə a ŋwàʼnə̀ pəə ndyimə ɨ̀wə̀ənə̀ Timotì. A mə ndèrə̀ ambo mbòŋə̀ ɨ̀swuə̀ ɨ̀wə̀ənə̀ Filemònə̀ nɨ pəə pɨ pobə pə nfàʼà,

² farə ambo àshwatə̀ ɨ̀poonə̀ pɨ Kristù nɨ a pənə a ndâ ze, nɨ ndyimə ɨ̀wə̀ənə̀ ghù mə̀ngyə̌ nɨ nɨ̀linə̀ ɨ̀tse pənə Afyà, nɨ Archippus nɨ pəə pɨ pobə pa nfàʼà ambo Kristù tsaʼa pɨ̀soyì.

³ Tǎ ɨ̀wə̀ənə̀ Nẅùə̀ pobə Ndòʼnə̀mbyə̂ Yěsû Kristù pobə̂ nèrə̀ a wɨghə nɨ àpòŋə̀ ntɨŋmə̀ nkɨ ŋŋâ a wɨghə nɨ àporə̀porə̀.

Pàolò a ŋâ a mɨyàa ambo Nẅùə̀ ntii Filemònə̀

⁴ Ndyimə mə̀ Filemònə̀, nkwùə̀ ntsùmə̀ nɨ m̀mənə nchàʼtə̀ a Nẅùə̀, ngwa nkẅempə̀ o ŋŋâ a mɨyàa ambo Nẅùə̀,

⁵ ntiinə ngwa ndzuʼù tsaʼnə wə̀ nùŋə̀nə ntɨŋmə̀ aŋunə Ndòʼnə̀mbyə̂ Yěsû farə tsaʼnə wə̀ pənə nɨ ɨ̀kòŋnə̀ aŋunə pànə̀ pɨ Nẅùə̀ pɨ̀tsùmə̀.

⁶ Ngwə̀ nchàʼtə̀ a Nẅùə̀ lo tsaʼnə wə̀ mənə nshwəŋə̀ mɨ̀nwùə̀ mbə̀ʼə àpyiimə̀ ntɨŋmə̀ o aŋunə Kristù ambo pànə̀ la, â ghɨ̀rə̀ pànə̀ tsùŋə̀ nzhyə̂ mɨ̀nwùə̀ mɨ̀shìʼnə̀ mɨ̀tsùmə̀ nɨ mɨ pənə amwuə pə̀ənə̀ ntii Kristù.

⁷ Ndyimə mə̀, wə̀ zhyə̂ lo wə̀ pə̀ʼkə̀ ntɨŋmə̀ mə̀ ngɨ̀rə̀ mbə nɨ nɨ̀ghaʼà ntiinə wə̀ lẅòmpə̀nə mɨ̀ntɨŋmə̀ mɨ pànə̀ pɨ Nẅùə̀ pɨ̀tsùmə̀.

Pàolò a puʼù mbô ambo Filemònə̀ mbə̀ʼə Ònesimùsə̀

⁸ Ntii ànwùə̀ zə̀, mbaa pə tsaʼnə m̀bənə nɨ ɨ̀tɨ̀ŋnə̀ tsaʼa ndyimə o a ndzùmə̀ Kristù a nɨ shwəŋə̀ lo wə̀ ghɨ̀rə̀ ànwùə̀ nɨ a kùʼnə̀nə ambo ghò a nɨ ghɨ̀rə̀,

⁹ mbɨ lèrə̀ nɨ mbyə̀ pə a nɨ puʼù mbô ambo ghò ntiinə ǹkòŋə̀nə o. A mɨ̀ŋə̀ Pàolò nɨ ǹtəəmə̀nə àtwuə̀ nɨ Kristù Yěsû, nkɨ mbə tɨ̀tsòŋə̀ mbə a ndâ ɨ̀tsaŋə̀ ntii Kristù Yěsû ghu.

¹⁰ Ngwə̀ mbuʼù mbô ambo ghò la ntii moonə̀ mə̀ Ònesimùsə̀ ẅùə̀ nɨ à lə̀ pə̀ŋə̀nə ntɨŋmə e ntyiʼə̀ moonə̀ mə̀ a ndzùmə̀ Kristù tsaʼnə m̀bənə a ndâ ɨ̀tsaŋə̀.

¹¹ À lə̀ pə àfǐfǐ ŋwùə̀ ambo ghò nkwùə̀ ntsàambyə̀, la tɨ̀tsòŋə̀ wə̀, à kùmə̀ tyiʼə̀ ngotə ngàŋə̀ àyèmpə̀ ambo ghò farə ambo mɨ̀ŋə̀.

¹² Ngwə̀ nkẅirə̀ ntsàa e ambo ghò tɨ̀tsòŋə̀; ze wa nɨ à pənə ntɨŋmə̀ mə̀.

¹³ Mbɨ kòŋə̀ a nɨ nùŋə̀ e a nɨ̀ghə̂ lo â tə nfàʼà ambo mɨ̀ŋə̀ aŋunə alyiʼə o amwuə nkwùə̀ zə̀ nɨ m̀bənə a ndâ ntii ntwuumə̀ ghù ɨ̀shìʼnə̀ wa.

¹⁴ La ka ǹtàʼà mə̀ a nɨ ghɨ̀rə̀ ànwùə̀ àtse tɨghu wə̀ pyiimə̀ ntiinə ka ntàʼà nyìimə̀ mə̀ a ghò. Ǹtàʼà pə lo wə̀ ghɨ̀rə̀ ànwùə̀ nɨ wə̀ kòŋə̀nə.

¹⁵ Nkwùə̀ ɨ̀tse ɨ̀sùmə nɨ à lə̀ myàʼtə̀nə o nkɨ̀ɨrə̀ aŋunə mətùmə nkwùə̀ ɨ lə̀ pə la lo à ghǎ kẅirə̀ kwə̂ ghoŋə̀ pɨghə ze nɨ nkuŋə̀.

¹⁶ La tɨ̀tsòŋə̀ ka à chi mbirə̀ e ndàʼà àpùʼù, à tsàarə̀ àpùʼù: a ndyimə o nɨ wə̀ kòŋə̀nə ndàŋə̀ a ndzùmə̀ Kristù. Ǹkòŋə̀ e ka mɨ̀zùŋə la mmə nkwàŋə̀ lo wə̌ kòŋə̀ e tsàarə̀ mə̀ tsaʼa àpùʼù o nkɨ nchi mbə tsaʼa ndyimə o ndàŋə̀ a ndzùmə̀ Ndòʼnə̀mbyə̂.

¹⁷ Lenəla wə̀ tə mbəla nzhyə̂ lo pùu pa nfàʼà tsaʼa taʼà ŋwùə̀ ambo Kristù, wə̀ kẅirə̀ nkẅiirə̀ Ònesimùsə̀ tyìʼə̀ tsaʼa wə̌ kẅiirə̀ mə̀.

¹⁸ À tə mbə lo à lə̀ fàntə̀ ànwùə̀ àtse ambo ghò kə̀ ngẅìimə̀ o nɨ àzwuumə̀ àtse, wə̀ pə̀ŋə̀ a zèrə nchyâ a nɨ̀linə̀ mɨ̀ŋə̀.

¹⁹ À ŋwàʼnə̀ mɨ̀ŋə̀ ŋŋwàʼnə̀ a zə̀ nɨ àpô mə: Mɨ̀ŋə̀ Pàolò mbɨ twuə̀ ka a chi mbə e ànwùə̀ nɨ mbə̀ʼə nchi nshwəŋə̀ ambo ghò lo ghò àtwuə̀ ɨ̀pɨ̀ŋmə̀ o wə̀ chyə̂ nɨ ndzǒ a nɨ twuə̀ ambo mɨ̀ŋə̀ nɨ ɨ pənə mbɨ̀ŋmə̀ o.

²⁰ Tsaʼnə a pənə lə la nɨ ndyimə mə̀, ghɨ̀rə̀ ànwùə̀ zə̀ ambo mɨ̀ŋə̀ aŋunə nɨ̀linə̀ nɨ ndòʼnə̀mbyə̂. Ghɨ̀rə̀ ntɨŋmə̀ mə̀ ɨ fiitə̀ tyìʼə̀ tsaʼa ndyimə mə̀ a ndzùmə̀ Kristù.

²¹ Ŋ̀ŋwàʼnə̀ lə la ntiinə ǹdanə nzhyə̂ tsaʼnə wə̀ wa ndzuʼnə̀ la nzhyə̂ lo wə̌ ghɨ̀rə̀ tsàarə̀ tsaʼnə ǹtàʼnə.

²² A nɨ chi ndèrə̀ nɨ mbyə̀, tsùŋə̀ ntaŋə pɨ̀ghɨ̀ɨnə̀ ambo mɨ̀ŋə̀, ntiinə ǹzhyə̂nə lo Nẅùə̀ ǎ zuʼù a nɨ̀yìi ɨwɨghə kẅirə̀ ŋâ mə̀ ambo pɨghə.

Ndẅùə̀ndzùmə̀ àchàʼtə̀

²³ Epafràsə̀ nɨ pəə ze pənə a ndâ ɨ̀tsaŋə̀ ntii Kristù Yěsû la, à wə̀ nchàʼtə̀ a wɨghə.

²⁴ Mark, nɨ Àristakùsə̀, nɨ Demàsə̀, nɨ Lukə̀ nɨ pobə pənə pànə̀ nɨ pəə pɨ pobə pa nfàʼà pə nkɨ nchàʼtə̀ o.

²⁵ Ndòʼnə̀mbyə̂ Yěsû Kristù â nèrə̀ àpòŋə̀ ntɨŋmə̀ e aŋunə pɨghə pɨ̀tsùmə̀.