Efesòsə̀ 1 - Pinyin

Àchàʼtə̀ Pàolò ambo ɨ̀poonə̀ pɨ Kristù a Efesòsə̀

¹ Àŋwàʼnə̀ zə̀ a furə̀ ambo mɨ̀ŋə̀ Pàolò nɨ m̀bənə ngàŋə̀ ntwuumə̀ Kristù tsaʼnə Nẅùə̀ à kòŋə̀nə, mmə ndèrə̀ ambo pànə̀ pɨ Nẅùə̀ a àlaʼà Efesòsə̀ nɨ pɨ nùŋə̀nə ntɨŋmə̀ ɨ̀ghobə aŋunə Kristù Yěsû.

² Àpòŋə̀ ntɨŋmə̀ Nẅùə̀ ghobə àporə̀porə̀ zhyə̀ nɨ a furə̀nə ambo Tǎ ɨ̀wə̀ənə̀ Nẅùə̀ pobə Ndòʼnə̀mbyə̂ Yěsû Kristù â pə ambo pɨghə.

Ɨ̀pwuumə̀ Àzhwùə̀ nɨ pə̀ənə̀ pənə nɨ pèrə ndàŋə̀ a ndzùmə̀ Kristù

³ Pə̀ənə̀ ntə ghuʼtə̀ a Nẅùə̀ nɨ à pənə Tǎ pɨ Ndòʼnə̀mbyə̂ ɨ̀wə̀ənə̀ Yěsû Kristù wa nɨ à chyânə mborə̀ aŋunə pə̀ənə̀ tsaʼnə à ŋâ mə a wəənə̀ nɨ ɨ̀pwuumə̀ àzhwùə̀ pa nɨ pənə a nɨ̀pwuurə̀ la.

⁴ Nẅùə̀ à lə̀ kɨ tsùŋə̀ àtwuə̀ ɨ̀shyə̂ zə̀ la nɨ à tsoʼò mə a wəənə̀ lo pə̀ənə̀ pwuutə̀ pə̀ənə̀ pɨ Kristù mbə pə̀ənə̀ ɨ̀pe pa nɨ pɨ laanə̀nə, ka kɨ pə e nɨ ntsɨ̀ŋnə ɨ̀tse amwuə nɨ̀chyə̂mbyə̂ ɨghobə a mbyə̀ ze.

⁵ Ntii ɨ̀kòŋnə̀ Nẅùə̀ aŋunə pə̀ənə̀, à lə̀ pyə̀ mə nnùŋə̀ lo lòo a wəənə̀ lo pə̀ənə̀ pə ɨ̀poonə̀ ɨ̀pe, a nɨ zùŋə̀ tsaʼnə a lə̀ pòŋə̀nə e a kɨ ntàʼà.

⁶ Njiilo pə̀ənə̀ tə nguʼtə̀ a Nẅùə̀ ntii àpòŋə̀ ntɨŋmə̀ e ghobə mɨ̀nwùə̀ mɨ yerə̀nə yerə̀nə ma nɨ à wa ngɨ̀rə̀ aŋunə pə̀ənə̀ ndàŋə̀ a ndzùmə̀ Moonə̀ e wa nɨ à kòŋə̀nə la.

⁷ À lə̀ kwɨghə̀ ntsuʼù ɨ̀twuə̀ ɨ̀pə̀ənə̀ nɨ àləəmə̀ e, ngɨ̀rə̀ Nẅùə̀ a lə̀ənə̀ ɨ̀fàntə̀ ɨ̀nwùə̀ ɨ̀pə̀ənə̀ ndàŋə̀ a ndzùmə̀ àpòŋə̀ ntɨŋmə̀ tɨndànə̀ e za.

⁸ Tsaʼnə Nẅùə̀ à pənə nɨ àzhìʼtə̀ nkɨ nzhyə̂ ànwùə̀ àtsùmə̀ la, à kẅìrə̀ àpòŋə̀ ntɨŋmə̀ e aŋunə pə̀ənə̀ zhyə̀ nɨ mbə̀ʼə pə̀ənə̀ mɨ̀nkə̀ a wəənə̀ apə̀.

⁹ À lə̀ ghɨ̀rə̀ ànwùə̀ nɨ à lə̀ kwàŋə̀nə, ngɨ̀rə̀ pə̀ənə̀ zhyə̂ ànwùə̀ nɨ à lə̀ lə̀əmə̀nə, tsaʼnə à lə̀ lòonə a Kristù mmyàanə̀ ànwùə̀ nɨ à lə̀ nùŋə̀nə lo ghɨ̀rə̀.

¹⁰ Àkwàŋə̀ Nẅùə̀ a chyə̂ la lo, nkwùə̀ ɨ̀ ghǎ kùʼù a pwuutə̀ àzwuumə̀ àtsùmə̀ nɨ a pənə a nɨ̀pwuurə̀ ghobə zhyə̀ nɨ a pənə àtwuə̀ ɨ̀shyə̂ a ɨ̀sùmə taʼà ŋwùə̀ nɨ à pənə àtwuə̀ mbə Kristù.

¹¹ Nẅùə̀ à ghɨ̀rə̀ ànwùə̀ àtsùmə̀ ndzùŋə̀ la tsaʼnə à lə̀ kwàŋə̀nə nnùŋə̀. À lə̀ pyə̀ mə ntsoʼò a wəənə̀ lo pə̀ənə̀ pə pə̀ənə̀ ɨ̀pe, mbwuutə̀ a wəənə̀ pɨ Kristù tsaʼnə à lə̀ tàʼnə.

¹² À lə̀ ghɨ̀rə̀ a lenə la lo pə̀ənə̀ pa nɨ pə̀ənə̀ zàamə̀nə mbə nɨ àkwàŋə̀ mmə mbyabə̀ a Kristù la, pə̀ənə̀ tyiʼə̀ ntə ngyerə̀ mɨ̀nwùə̀ mɨ yerə̀nə yerə̀nə ma nɨ Nẅùə̀ à wa ngɨ̀rə̀.

¹³ Ngə̀ aŋunə pɨghə, nɨ̀ lə̀ kɨ mbə àzɨghə pànə̀ pɨ Nẅùə̀ nkwùə̀ nɨ nɨ̀ lə̀ zuʼnə àshwəŋnə̀ nkǔŋə nkuŋə za nɨ a pənə ntwuumə̀ ghù ɨ̀shìʼnə̀ wa nɨ ɨ wa ndòo a nɨ̀chwarə̀ ntô la. Nɨ̀ lə̀ nùŋə̀ ntɨŋmə̀ ɨ̀wɨghə aŋunə Kristù, Nẅùə̀ a chyâ àlènə̀ pə̀ənə̀ ɨ̀pe aŋunə pɨghə nɨ a pənə Àzhwùə̀ Nẅùə̀ nɨ à lə̀ kàʼnə.

¹⁴ Àzhwùə̀ Nẅùə̀ a tyiʼə̀ mbə la àlènə̀ ànwùə̀ a nɨ nèrə̀ lo pə̀ənə̀ ghǎ kẅiirə̀ àzwuumə̀ nɨ Nẅùə̀ à lə̀ kàʼnə ambo pə̀ənə̀ ɨ̀pe. Zèrə zə̀ ànwùə̀ a ghɨ̀rə̀ a laanə̀ lo Nẅùə̀ à ghǎ chwarə̀ pə̀ənə̀ ɨ̀pe, pobə tə ngyerə̀ mɨ̀nwùə̀ nɨ à wa ngɨ̀rə̀.

Àchàʼtə̀ Nẅùə̀ Pàolò

¹⁵ Ntii mɨ̀nwùə̀ mə̀ nɨ Nẅùə̀ à ghɨ̀rə̀nə la, nkwùə̀ nɨ ndə̀ zuʼnə tsaʼnə nɨ̀ nùŋə̀nə ntɨŋmə̀ ɨ̀wɨghə aŋunə Ndòʼnə̀mbyə̂ Yěsû pobə tsaʼnə nɨ̀ kòŋə̀nə pànə̀ pɨ Nẅùə̀ pɨ̀tsùmə̀ la,

¹⁶ mbirə̀ mə mə̀ tɨ kaanə̀ a nɨ ŋâ a mɨyàa ambo Nẅùə̀ mbə̀ʼə wɨghə, nkɨ mmə nkẅempə̀ a wɨghə amwuə àchàʼtə̀ Nẅùə̀ mə̀ tyìʼə̀ nkwùə̀ ɨ̀tsùmə̀

¹⁷ Ngwə̀ nkɨ nchàʼtə̀ a Nẅùə̀ lo Nẅùə̀ Tǎ pɨ Ndòʼnə̀mbyə̂ ɨ̀wə̀ənə̀ Yěsû Kristù, mbə Tǎ nɨ à wa ngɨ̀rə̀ mɨ̀nwùə̀ mɨ yerə̀nə yerə̀nə lo â ŋâ Àzhwùə̀ e mbə̀ʼə â ghɨ̀rə̀ nɨ̀ pə nɨ àzhìʼtə̀, nchi nnèrə̀ a Nẅùə̀ ambo pɨghə mbə̀ʼə nɨ̀ tsùŋə̀ nzhyə̂ e.

¹⁸ Ngwə̀ ndoonə̀ lo Nẅùə̀ a nyaʼkə̀ ntɨŋmə̀ ɨ̀wɨghə nɨ̀ zəənə̀ nkàʼà e ɨ̂ ghɨ̀rə̀ nɨ̀ zhyə̂ ɨ̀pwuumə̀ pa nɨ nɨ̀ wa mbyabə̀ tsaʼnə à lə̀ fuŋə̀nə a wɨghə aŋunə la. Nkɨ nzhyə̂ àfùʼù nɨ a pənə amwuə mɨ̀nwùə̀ mɨ yerə̀nə yerə̀nə nɨ à lə̀ kàʼnə ambo pə̀ənə̀ ɨ̀pe,

¹⁹ nkɨ mmə nchàʼtə̀ a Nẅùə̀ mbə̀ʼə nɨ̀ zhyə̂ mɨ̀tɨ̀ŋnə̀ mɨ tɨ àndànə̀ ma nɨ mɨ pənə amwuə pə̀ənə̀ pa nɨ pə̀ənə̀ pa nnùŋə̀ ntɨŋmə̀ aŋunə ze. Mɨ̀tɨ̀ŋnə̀ mə ma nfàʼà la tsaʼa mɨ̀tɨ̀ŋnə̀ ɨ̀me mɨ̀ẅùunə ma,

²⁰ nɨ à lə̀ lòonə nzhwuumə̀ a Kristù ghu aŋunə nɨ̀wɨghə̀ ngɨ̀rə̀ a nwuunə̀ a pàa àpô ze yè zɨghə̀nə a nɨ̀pwuurə̀.

²¹ Lə̌ alyiʼə nɨ Kristù a pənə ghu mbə àtwuə̀ pànə̀ pɨ̀tsùmə̀ nɨ pɨ pa mbuʼtə̀ a nɨ̀pwuurə̀: mbə pànə̀ pɨ̀ẅùunə pobə ngàŋə mɨ̀tɨ̀ŋnə̀ nɨ pànə̀ nɨ pɨ pa mbuʼtə̀ àtwuə̀ ɨ̀shyə̂. À chyə̂ a àtwuə̀ ngàŋə̀ aləŋə àtsùmə̀ a àtwuə̀ ɨ̀shyə̂ ghə tɨ̀tsòŋə̀ pobə ẅùə̀ nɨ à ghǎ tô.

²² À lə̀ nùŋə̀ àzwuumə̀ àtsùmə̀ a ɨ̀sùmə mɨ̀kwùə̀ mɨ Kristù ngɨ̀rə̀ a pə àtwuə̀ ambo àshwatə̀ ɨ̀poonə̀ pɨ Kristù,

²³ nɨ à pənə mbɨ̀ŋmə̀ e nɨ ɨ̀ za ngɨ̀rə̀ pànə̀ zhyə̂ a ŋònə̀ nɨ Kristù à pənə ẅèrə nkɨ mbə ze wa nɨ à wa ngɨ̀rə̀ àzwuumə̀ àtsùmə̀ a pə amwuə ndwuumə̀ nɨ a pyə̀nə mbə pə.