1 Pità 1 - Pinyin

¹ Àŋwàʼnə̀ zə̀ a furə̀ ambo mɨ̀ŋə̀ Pità ngàŋə̀ ntwuumə̀ Yěsû Kristù, mmə ndèrə̀ ambo pànə̀ pɨ Nẅùə̀ nɨ a tsoʼnə, pobə mə nchyə̂ tsaʼa ngàŋə nɨ̀ghaanə̀ amwuə pàa àlaʼà Pontùsə̀, nɨ Galatia, nɨ Kàpàdosyà, nɨ Asia farə amwuə Bithynia.

² Tǎ Nẅùə̀ à tsoʼò mə a wɨghə a nɨ zùŋə̀ tsaʼnə à lə̀ nùŋə̀nə; Àzhwùə̀ e a ghɨ̀rə̀ nɨ̀ pə pànə̀ pɨ laanə̀nə a nɨ mə ndzuʼù ànwùə̀ nɨ Yěsû Kristù à wə̀ nshwəŋə̀ a nɨ zùŋə̀ tsaʼnə à sùunə a wɨghə nɨ àzwuumə̀ nɨ̀shwàʼà za nɨ à lə̀ ŋânə la nɨ a pənə àləəmə̀ e. Nẅùə̀ â nèrə̀ àpòŋə̀ ntɨŋmə̀ e yè noʼnə aŋunə pɨghə, nkɨ ŋŋâ a wɨghə nɨ àporə̀porə̀ yè noʼnə.

Pə̀ənə̀ nùŋə̀ ntɨŋmə̀ aŋunə Nẅùə̀ ntə mbyabə̀ àzwuumə̀ nɨ a ghoŋə̀nə nɨ nkuŋə̀

³ Pə̀ənə̀ ŋâ a mɨyàa ambo Nẅùə̀ Tǎ pɨ Ndòʼnə̀mbyə̂ ɨ̀wə̀ənə̀ Yěsû Kristù. À lə̀ kòŋə̀ a wəənə̀ tɨsɨŋnə ŋŋâ a wəənə̀ nɨ nɨ̀chyə̂mbyə̂ yɨ̀ shwuə̀ tsaʼnə à lə̀ zhwuumə̀nə a Yěsû Kristù aŋunə nɨ̀wɨghə̀. Ntii ànwùə̀ zanə, pə̀ənə̀ pə nnùŋə̀ ntɨŋmə̀ aŋunə Nẅùə̀ ntə mbyabə̀ tsaʼa pànə̀ nɨ pɨ pənə nɨ nɨ̀chyə̂mbyə̂,

⁴ ntə mbyabə̀ a nɨ zɨghə̀ ɨ̀pwuumə̀ pa nɨ ka pèrə mə mbɨ̂ e, ka mə lɨ̂ e, kə̀ ka kɨ mə kẅebə̀ e tsaʼnə pèrə lə̀ pənə. Nẅùə̀ à nùŋə̀ ɨ̀pwuumə̀ pə̀ la ambo pɨghə a nɨ̀pwuurə̀.

⁵ Ɨ̀pwuumə̀ pə̀ chyə̂ ambo pɨghə pa nɨ Nẅùə̀ nɨ à pənə nɨ mɨ̀tɨ̀ŋnə̀ à fuukə̀ mə̀ a wɨghə amwuə ngəʼə̀ mbə̀ʼə nɨ̀ ghǎ mbə nɨ nɨ̀chwarə̀ wa nɨ nɨ̀ pənə nɨ ẅèrə, mbə ghǎ zəənə̀ a ẅèrə amwuə ndẅùutə nkwùə̀.

⁶ Nɨ̀ pə nɨ nɨ̀ghaʼà mbə̀ʼə mɨ̀nwùə̀ mèrə mə̀, mbaa pə tsaʼnə a chi təəmə̀ aŋunə mətùmə nkwùə̀ lo nɨ̀ sòmnə̀ ntii ngəʼə̀ nɨ nɨ̀ wə̀ ndzəənə̀ pobə nɨ̀zhwiʼì Nẅùə̀.

⁷ À wa zhwiʼì la a nɨ zəənə̀ lo àpyiimə̀ ntɨŋmə̀ àzɨghə a tɨ̀ŋnə̀ lo. À tə mbə pə àtɨ̀ŋnə goldə̀ nɨ mbə̀ʼə pɨ tsə̀ŋə̀, pɨ pa nkɨ nzhwiʼì nɨ ɨ̀mǔ. A tyiʼə̀ mbə lə, pɨ tyiʼə̀ ka zhwiʼì e a àpyiimə̀ ntɨŋmə̀ àzɨghə nɨ a tsàarə̀nə a goldə̀, mbə̀ʼə a chi ntɨ̀ŋnə̀ ndèrə̀ nɨ mbyə̀? Lenəla, nɨ̀linə̀ nɨ Nẅùə̀ faŋə̀, mbə nɨ àghuʼtə̀ amwuə njyə̂ za nɨ Yěsû a ghǎ tô.

⁸ Mbaa pə tsaʼnə nɨ̀ pirə̀ mə a wɨghə a ye tɨ zəənə̀ la. Nɨ̀ wə̀ nkòŋə̀ e mbaa pə tsaʼnə ka nɨ̀ mə ndzəənə̀ a wɨghə a ye tɨ̀tsòŋə̀ la, nɨ̀ nùŋə̀ ntɨŋmə̀ ɨ̀wɨghə aŋunə ze. Nkɨ mbə nɨ mbuurə̀ nɨ̀ghaʼà za nɨ mbə̀ʼə ka ntswùə̀ shwəŋə̀ e.

⁹ Nɨ̀ pə nɨ nɨ̀ghaʼà tɨ àndànə̀ ntiinə Nẅùə̀ à fuukə̀nə a wɨghə amwuə ngəʼə̀; la ɨ̀sùmə nɨ nɨ̀ nùŋə̀nə ntɨŋmə̀ wɨghə aŋunə ze.

¹⁰ Ngàŋə ntwuumə̀ Nẅùə̀ zhyə̀ nɨ lə̀ mənə ntiitə̀ lo àpòŋə̀ ntɨŋmə̀ Nẅùə̀ nɨ a pənə àzɨghə la a ghǎ tô, pobə lə̀ lanə ntàʼà nkɨ mbyiitə̀ mɨ̀nwùə̀ mbə̀ʼə nɨ̀chwarə̀ ẅèrə wə̀

¹¹ Pobə lə̀ taŋnə̀ a nɨ zhyə̂ nkwùə̀ ghu farə tsaʼnə ɨ ghǎ tô. Nkwùə̀ za nɨ àzhwùə̀ Kristù a lə̀ mənə nshwəŋə̀nə amwuə mɨ̀ntɨŋmə̀ ɨ̀mobə nkɨ mə ntiitə̀ mbuurə̀ ngəʼə̀ nɨ Kristù à ghǎ zəənə̀ pobə mbuurə̀ àghuʼtə̀ nɨ Kristù à ghǎ pə nɨ zèrə.

¹² Nẅùə̀ à lə̀ ghɨ̀rə̀ ngàŋə ntwuumə̀ zèrə zə̀ zhyə̂ lo ka pobə lə̀ mə nfàʼà a ghobə la aŋunə ɨ̀shìʼnə̀ ɨ̀ghobə, pobə lə̀ mə nfàʼà pə aŋunə ɨ̀shìʼnə̀ ɨ̀wɨghə. Pobə lə̀ shwəŋə̀ a wɨghə nɨ mɨ̀nwùə̀ ma nɨ pànə̀ nɨ pɨ shwəŋə̀nə ntwuumə̀ ghù ɨ̀shìʼnə̀ wa tɨ̀tsòŋə̀ pobə shwəŋə̀ mə a wɨghə ndàŋə̀ a ndzùmə̀ àzhwùə̀ Nẅùə̀ nɨ a furə̀nə a nɨ̀pwuurə̀. Lə a pə ànwùə̀ nɨ pəngèrə̀ pa ngyìi a nɨ zhyə̂.

Nẅùə̀ à wə̀ nfuŋə̀ a wəənə̀ lo pə̀ənə̀ chyə̂ a nɨ̀chyə̂mbyə̂ ghù ndaanə̀nə

¹³ Nɨ̀ chwuʼtə̀ mbɨ̀ŋmə̀ a nɨ fàʼà, ngẅìimə̀ mbɨ̀ŋmə̀ ɨ̀zɨghə, ntə̂ àtwuə̀ a nɨ pyabə̀ a àpòŋə̀ ntɨŋmə̀ Nẅùə̀ nɨ à ghǎ nèrə̀ nkwùə̀ nɨ Yěsû ǎ nèrə̀ ɨ̀pɨ̀ŋmə̀ e ambo ŋwùə̀ ntsùmə̀.

¹⁴ Tsaʼa ɨ̀poonə̀ nɨ pɨ pa ndzuʼnə̀, kò nɨ̀ pyiimə̀ a wɨghə lo ghɨ̀rə̀ mɨ̀nwùə̀ mɨ tɨ̀pòŋə̀ ma nɨ mbɨ̀ŋmə̀ ɨ̀zɨghə lə̀ mənə ntàʼà nkwùə̀ nɨ nɨ̀ lə̀ pirə̀nə amwuə ɨ̀pùʼu.

¹⁵ Nɨ̀ laanə̀ amwuə mɨ̀nwùə̀ ma mɨ̀tsùmə̀ nɨ nɨ̀ wa ngɨ̀rə̀, tyìʼə̀ tsaʼa Nẅùə̀ wa nɨ à lə̀ fuŋə̀nə a wɨghə à kɨnə ndaanə̀.

¹⁶ Mbə̀ʼnə àŋwàʼnə̀ Nẅùə̀ a shwəŋə̀nə lo, “Nɨ̀ laanə̀ tyìʼə̀ tsaʼnə ǹkɨnə ndaanə̀ àzâ.”

¹⁷ Tsaʼnə nɨ̀ wa nfuŋə̀ a Nẅùə̀ nɨ Tǎ ɨwɨghə nkwùə̀ nɨ nɨ̀ mənə nchàʼtə̀ a Nẅùə̀, a pə ze wa nɨ à wa tsoʼtə̀ mɨ̀sàʼa ka kòŋə̀ e a ŋwùə̀, ndzùŋə̀ e pə ngɨ̀rə̀ mɨ̀nwùə̀ ɨ̀zobə la, nɨ̀ tə nchyə̂ a nɨ̀chyə̂mbyə̂ nɨ àkẅàrə̀ Nẅùə̀ nkwùə̀ ɨ̀tsùmə̀ nɨ nɨ̀ pənə a àlaʼà yè nyaanə.

¹⁸ Mbə̀ʼnə nɨ̀ zhyə̂nə àzwuumə̀ nɨ à lə̀ tsuʼnə ɨ̀twuə̀ ɨ̀pɨghə nɨ zèrə aŋunə nɨ̀chyə̂mbyə̂ àfǐfǐ wa nɨ pɨ̀tǎ ɨ̀pɨghə lə̀ nèrə̀nə a wɨghə nɨ ẅèrə. Ka àzwuumə̀ ghu a pə e zhyə̀ nɨ a za mbɨ̂ tsaʼa goldə̀ kə̀ silbà.

¹⁹ Nẅùə̀ à lə̀ chwarə̀ a wɨghə la nɨ àləəmə̀ Kristù za nɨ a tsə̂nə la. À lə̀ pə tsaʼa mômbyə̂ nɨ̀shwàʼà wa nɨ ka à pə e nɨ àlòʼo kə̀ nɨ ntsɨ̀ŋnə ɨ̀tse.

²⁰ Nẅùə̀ à lə̀ tsoʼò mə e zaʼà pɨ pòŋə̀ tsùŋə̀ àtwuə̀ ɨ̀shyə̂ ntyiʼə̀ ngɨ̀rə̀ pɨ zhyə̂ e amwuə mɨ̀njyə̂ mɨ̀ndẅùutə mə ntii wɨghə.

²¹ Nɨ̀ lə̀ làŋə̀ la ndzùmə̀ ze nnùŋə̀ ntɨŋmə̀ ɨ̀wɨghə aŋunə Nẅùə̀ wa nɨ à lə̀ zhwuumə̀nə e aŋunə nɨ̀wɨghə̀ ŋŋâ e nɨ àghuʼtə̀. Lenəla, àpyiimə̀ ntɨŋmə̀ àzɨghə nɨ nɨ̀nùŋə̀ ntɨŋmə̀ mbyabə̀ a chyə̂ la aŋunə Nẅùə̀.

²² Tsaʼnə Nẅùə̀ à lə̀ sùu mə a wɨghə nɨ̀ laanə̀ ntiinə nɨ̀ wə̀ ndzùŋə̀ a nkǔŋə nkuŋə la, nɨ̀ tyiʼə̀ mbə nɨ nkǔŋə nkuŋə ɨ̀kòŋnə̀ aŋunə pɨlyimə ɨ̀pɨghə la, nɨ̀ kòŋə̀ a ŋwùə̀ moʼo moʼo nɨ ntɨŋmə̀ ɨ̀wɨghə ɨ̀tsùmə̀.

²³ A nɨ làŋə̀ a ndzùmə̀ àshwəŋnə̀ Nẅùə̀ za nɨ a za nchyə̂ nkɨ ngoŋə̀ nɨ nkuŋə̀ la, Nẅùə̀ à kẅirə̀ mbyə̂ a wɨghə nɨ̀ tyiʼə̀ mbə tsaʼa ɨ̀poonə̀ pɨ ŋònə̀ wa nɨ à wa ka kwɨghə̀ e, ka pə e pə ŋònə̀ nɨ à wa nkwɨghə̀ tsaʼa pɨ̀mǎ pobə pɨ̀tǎ ɨ̀pɨghə pənə.

²⁴ Mbə̀ʼnə àŋwàʼnə̀ Nẅùə̀ a shwəŋə̀ lo, “Ŋwùə̀ mɨsoŋə à chyə̂ mbə la tsaʼa nɨ̀yìinə, nɨ̀pòŋə̀ e ntsùmə̀ a kɨ mbə tsaʼa tǒŋtǒŋə Nɨ̀yìinə ntsùmə̀ à wa mbobə̀, tǒŋtǒŋə a kẅùurə̀,

²⁵ la àshwəŋnə̀ Ndòʼnə̀mbyə̂ a ghoŋə̀ nɨ nkuŋə.” Lə̌ ntwuumə̀ ghu nɨ pɨ lə̀ chwiitə̀nə ambo pɨghə la.