1 Jònə 1 - Pinyin

Àshwəŋnə̀ nɨ a za ŋŋâ nɨ̀chyə̂mbyə̂

¹ Pəə tàʼà ŋwàʼnə̀ ambo pɨghə mbə̀ʼə ŋònə̀ wa nɨ à pənə àshwəŋnə̀ Nẅùə̀ nɨ a za ntô nɨ nɨ̀chyə̂mbyə̂. À lə̀ pə ghu a nɨ̀pìʼnə̀ àtwuə̀ ɨ̀shyə̂. Pəə lə̀ zuʼù ànwùə̀ mbə̀ʼə e nkɨ ndzəənə̀ e nɨ ɨ̀myə̂ ɨ̀məə. Pəə lə̀ zəənə̀ e nɨ ɨ̀myə̂ ɨ̀məə la, nkɨ mbètə̀ e farə nɨ mbô ɨ̀məə.

² Nkwùə̀ nɨ à lə̀ tônə, pəə lə̀ zəənə̀ e nɨ ɨ̀myə̂ ɨ̀məə. Pəə lə̀ shwəŋnə̀ mbə̀ʼə e; lenəla pəə lə̀ tiitə̀ a wɨghə nɨ mɨ̀nwùə̀ mbə̀ʼə ze wa nɨ à wa ŋŋâ nɨ̀chyə̂ wa nɨ à ghoŋə̀nə nɨ nkuŋə̀ nɨ à lə̀ pənə pobə Tǎ ntyiʼə̀ ntô ngɨ̀rə̀ pəə zhyə̂ e.

³ Pəə tàʼà tiitə̀ a wɨghə la nɨ ànwùə̀ nɨ pəə lə̀ zəənə̀nə nkɨ ndzuʼù njiilo nɨ̀ pwuutə̀ pə̀ənə̀. Nɨ̀pwuutə̀ ɨ̀wə̀ənə̀ a ẅùə̀ nɨ pə̀ənə̀ pwuutə̀nə pə̀ənə̀ pɨ Tǎ nɨ Moonə̀ e Yěsû Kristù.

⁴ Pəə ŋwàʼnə̀ àŋwàʼnə̀ zə̀ ambo pɨghə la mbə̀ʼə ghɨ̀rə̀ nɨ̀ghaʼà ɨwɨghə a koʼò mbwùumə̀.

Nɨ̀chyə̂mbyə̂ pànə̀ nɨ pobə pa ngyìinə̀ amwuə nkàʼà

⁵ Tɨ̀tsòŋə̀, pəə pə ntiitə̀ a wɨghə la nɨ ntwuumə̀ nɨ pəə zuʼnə ambo Yěsû Kristù. Ntwuumə̀ ghu ɨ pə lo Nẅùə̀ la nkàʼà, ka tɨ̀pòŋə̀ ɨ̀tse a pə e amwuə ze.

⁶ Pə̀ənə̀ tə mbəla mmə nshwəŋə̀ lo pə̀ənə̀ pə nɨ̀pùʼu nɨ moʼo pə̀ənə̀ pɨ pobə la nchi mmə ngɨ̀rə̀ a tɨ̀pòŋə̀, yi pə̀ənə̀ nyìi la chwìrə̀, ka nkǔŋə nkuŋə a kɨ nchi mbə e amwuə mɨ̀nwùə̀ nɨ pə̀ənə̀ pa ngɨ̀rə̀.

⁷ La pə̀ənə̀ tə mə ngyìinə̀ amwuə nkàʼà tsaʼnə ze àtwuə̀ ɨ̀pɨ̀ŋmə̀ e à pənə nkàʼà la, yi pə̀ənə̀ pɨ pə nɨ̀pùʼu nɨ moʼo pə̀ənə̀ pɨ pɨlyimə ɨ̀pə̀ənə̀. Àləəmə̀ Yěsû Moonə̀ Nẅùə̀ â sùu tɨ̀pòŋə̀ ɨ̀wəənə̀ ntsùmə̀.

⁸ Pə̀ənə̀ tə mbəla mmə nshwəŋə̀ lo ka tɨ̀pòŋə̀ ɨ̀tse a pə e amwuə pə̀ənə̀, yi pə̀ənə̀ fɨ̀kə̀ la mbɨ̀ŋmə̀ ɨ̀zəənə̀, ka nkǔŋə nkuŋə a kɨ mbə e amwuə pə̀ənə̀.

⁹ La pə̀ənə̀ tə tsoʼò ntswùə̀ ɨ̀wəənə̀ ntiitə̀ a tɨ̀pòŋə̀ ɨ̀wə̀ənə̀ ambo Nẅùə̀, yi ǎ ghɨ̀rə̀ ànwùə̀ nɨ à lə̀ kàʼnə, kɨ ghɨ̀rə̀ amwuə àlàŋə nɨ a təəmə̀nə; ǎ lə̀ənə̀ ɨ̀fàntə̀ ɨ̀nwùə̀ ɨ̀pə̀ənə̀, kɨ sùu a tɨ̀pòŋə̀ ɨ̀wəənə̀ ntsùmə̀.

¹⁰ Pə̀ənə̀ tə shwəŋə̀ lo ka pə̀ənə̀ ghɨ̀rə̀ a wəənə̀ a tɨ̀pòŋə̀, yi pə̀ənə̌ fuŋə̀ a Nẅùə̀ la nɨ ngàŋə̀ pɨ̀chwìrə̀, ka àshwəŋnə̀ e â kɨ mbə e amwuə pə̀ənə̀.