زەبوورەکان 96 - پەیمانی نوێ و زەبوورەکان بە سۆرانی1 په‌سنیه‌كی نوێ بۆ په‌روه‌ردگار بڵێن. په‌سنی بۆ په‌روه‌ردگار بڵێن ئه‌ی هه‌موو زه‌وی. 2 په‌سنی بۆ په‌روه‌ردگار بڵێن، ناوی پیرۆز بكه‌ن، ڕۆژ به ڕۆژ موژده‌ی ڕزگاری ئه‌و ڕابگه‌یه‌نن. 3 له‌نێو نه‌ته‌وه‌كان شكۆمه‌ندی ئه‌و ڕابگه‌یه‌نن، له‌نێو هه‌موو گه‌لان كاره سه‌رسوڕهێنه‌ره‌كانی. 4 چونكه په‌روه‌ردگار مه‌زنه و شایانی سوپاسی زۆره. سامناكه به‌سه‌ر هه‌موو خوداوه‌نده‌كانه‌وه. 5 چونكه هه‌موو خوداوه‌نده‌كانی گه‌لان بتن، به‌ڵام په‌روه‌ردگار ئاسمانانی دروست كردووه. 6 شكۆ و سه‌ربه‌رزی له به‌رده‌میدان. هێز و جوانی له پارساگاكه‌یدان. 7 پێشكه‌شی بكه‌ن به په‌روه‌ردگار ئه‌ی هه‌موو خێڵی گه‌لان، پێشكه‌شی بكه‌ن به په‌روه‌ردگار هێز و شكۆمه‌ندی. 8 پێشكه‌شی بكه‌ن به په‌روه‌ردگار شكۆمه‌ندی ناوی خۆی. دیاری بهێنن و وه‌رنه نێو باره‌گاكه‌ی. 9 به پارساییه‌كی ڕازاوه‌وه كڕنۆش بۆ په‌روه‌ردگار ببه‌ن. ئه‌ی هه‌موو خه‌ڵكی زه‌وی له به‌رده‌می بله‌رزن. 10 له‌نێو نه‌ته‌وه‌كاندا بڵێن: “په‌روه‌ردگار پاشایه‌تی ده‌كات. جیهان جێكیره و ناله‌قێت. به دادپه‌روه‌ری حوكم به‌سه‌ر گه‌لاندا ده‌دات”. 11 با ئاسمانان شادبێت و زه‌وی دڵخۆش بێت، با ده‌ریا و هه‌رچی تیایه‌تی بجۆشێت. 12 با كێڵگه و هه‌رچی تیایه‌تی شاگه‌شكه بن. ئینجا هه‌موو دره‌خته‌كانی دارستان په‌سنی بڵێن. 13 له به‌رده‌م په‌روه‌ردگار. چونكه هات. هات تا دادوه‌ریی زه‌وی بكات. دادوه‌ریی جیهان ده‌كات به دادپه‌روه‌ری. گه‌لانیش به سه‌رڕاستی. |