Titus 2 - Patamuna New Testament Revised

Iwalai Meluntà Enupantok

¹ Tùse màlà iwalai enupantok ke kappon yamùk yenupakà.

² Amoko ton lùiwa kàyik yamùk yelupakà, elannek pe, wakù pe itekale, wakù pe tùttuse tùwessan pe tok wettoppe, meluntà pe ailon tetok tùuya'nokon yau, tùuchi'nùnmasan pe, molopai yà'là yekkwa là pàlikannan pe.

³ Màlà kasa làma nossan yamùk lùiwa wettoppe tok yelupakà, wakù pe Katù tùnamaik tùwemassan pe. Eimiponnan pe pùla nàlà, wapùla tùwetùnsan pe pùla. Wakù pàk làkku enupannan pe tok nechiik

⁴ ema'nomichi yamùk panamatoppe tok uya tùtayappù kon pùnùnmannan pe molopai tùmunkà kon nàlà,

⁵ tesak kon pe, wakù pe esuken, wakù pe alikyek pe tùwe'wotokomasan pe tùwùk kon tau, tùtayappù kon yentai pùla, ànù'là uselupa àli pe Katù yekale pàk tukaik.

⁶ Màlà kasa làma umoine ton yekamappokà tùttuik tùwemassan pe tok wettoppe.

⁷ Àmàlà nàlà, tamù'nawolon yau wakù pe yentok ipàkàlà pe ekkà wakù yà'làlà wotoko yau. Ailon pe ekkà molopai tùumayintaik enupantok auya yau, eusennaka pe pùla.

⁸ Wakù ailon mayin yapulàkà, imottùnpa yentaino, eyeyaton wettùtoppe tùwekkuli'matok kon yak yà'làlà àli pe tùuselupatok kon kùpàkù'nokon pùla iwechi pàk.

⁹ Tepulu kenan kon, tepulu kon maimu yawàlà nechii, molopai tok yauchinpa iche tok nechii tamù'nawolon yau. Tok maimu yeippàttak tok,

¹⁰ wapùla amappe tok kùsettak tok winàpai. Tùse làkku tàwàlà wakù pe, ailon pe tùwettok kon yenpoikaik tok, kùpùikattànài'nokon Katù pàk enupantok yapulàtok nettoppe tamù'nawàlà yau.

¹¹ Masapùla Katù uya wakù pe tùwettok yenpoikasak man tamù'nawolon kon kappon yamùk wepùikattàtok ponaloppe.

¹² Màlà wakù pe we'nàtok màlà enupanài àli pe Katù winàkàik wema'nàtok nonkatoppe, molopai wolù yeselu ànkuppai we'nàtok nonkatoppe, molopai tùttuik tùwemassen pe, ikasa, wakù pe wema'nàtok Katù tùnamaik molopai tapulàik iwemattok pe sàlà non po,

¹³ màlà Wakù kulu Wei màmuku pàk echii'ma enpen we'nàtok ipàk, eke Katù molopai Pùikattànài Jesus Christ yakkwayi usenpoika yau.

¹⁴ Iwettùlùppù màlà kùponalok kon pe, kùpùikattàse tamù'nawolon àli winàpai molopai kùkonekase esukenan kon kappon yamùk tùponalok kon pe kulu neken molopai wakù ànkuppai nokon kulu pe neken.

¹⁵ Sàlà yamùk ke kappon yamùk yenupakà, molopai tamù'nawàlà emeluntàlù, ayapàikketù yapulàkà tok meluntàpai'ma molopai eyetannan yàulàma auya yau. Màlàpàk ànù'là tùma'le eyentak.