Romans 3 - Patamuna New Testament Revised

Katù Wettok Ailon Pe

¹ Jew peichi we'nà wechi màlà Jew pe pùla nai'nùk kappon yentai lùiwa? Yà'là ken wakù molonai teposen Jew yamùk yattàtok winà?

² Tukke yà'là là yawàlà! Wapiya kulu, Katù maimu tùlùppù màlà Jew yamùk yemyak.

³ Yà'là pe ken iwechi tok tonpa yamùk wechi ailon pe pùla yau? Sàlà uya ka' Katù wechi ailon pe pùla te pe iwechi màlà lù?

⁴ Kanekku! Tàwà Katù ailon pe nechii, tamùnawàlà kappon yamùk wechi kasei pe tùse. “Ikasaichi tùwemassen pe mechiik euselupa yau molopai eyittutok yentaikanài pe,” tukaik iwe'menukasak kasa. {Psa 51.4}

⁵ Tùse àli pe we'nàtok uya Katù wechi wakù pe kulu yenpoika yau, yà'là te ken kùuya'nokon? Katù uya talumattàn yau ka' iwalai pen mùkkàlà te lù? (Uselupayaik talà kappon usenumenkatok kasa.)

⁶ Kanekku! Katù wechi ikasa pùla yau, atta ken wolù yawon kon kappon yamùk ittu ya?

⁷ Tùse Katù wettok ailon pe wekkussak kasei pe wettok yai Katù yapulàtok iwinà pe ekepeiwa wapiya iwechippù yentai yau, yà'là pe ken uchi iwechi pàk makui yawon kasa utalumattàsak sàlà?

⁸ Walai yau “Àli ikuppai'nokon man màlà kupù winà wakù uyàttoppe,” te sàlà. Masapùla tùulon kon kappon yamùk uya sàlà kasa uselupa yekamasak man. Italumattàpai kulu tok wechi màlà.

Iwalai Kappon Pùla Iwechi Màlà

⁹ Màlàpàk nen uchi yà'là te sàlà, kùmyamlo ka' Jew yamùk wechi màlà mùkyamlo Jew yamùk pen yentai wakù peiwa lù? Kanekku! Yekamasak ina uya man Jew yamùk molopai Jew yamùk pen wechi ekkaichalà makui yo'no.

¹⁰ Iwe'menukasak kasa, “Tewinannà kappon ikasa tùwessen pùla iwechi màlà.

¹¹ Tewinannà ittunài pùla iwechi, wapùla Katù iwanài pùla iwechi.

¹² Tamù'nawolon kon kappon yamùk welattàsak màlà Katù winàpai, tamù'nawàlà tok utàsak màlà ikasa pùla. Ànù'là uya ikasa nai'nùk kupù pùla iwechi màlà, tewinannà uya ikupù pùla. {Psa14.1-3, Psa 53.1-3, Ecc 7.20}

¹³ Tok pùmù yeuta màlà iwu'nattàsak pen uluwaik walai. {Psa 5.9} Tok yani màlà eke pe kasei yapon, molopai tok maimu maik àkài ulaliyi walai. {Psa 140.3}

¹⁴ Tok mùta wanùssak màlà pa'nù'nàtok ke molopai maik ton ke. {Psa 10.7}

¹⁵ Molopai tok pùta màlà kappon mùnù ikkwanse tok yanài asse'ne.

¹⁶ Inailàlà tok utàsak yau te'mappù kon tau tok uya mattansak molopai usewankono'mantok nàmà màlà.

¹⁷ Tok uya echitonpa pe we'nàtok yeselu ittusak pùla iwechi màlà. {Isa 59.7,8}

¹⁸ Katù namannan pen nà mùkyamlo,” tukaik. { Psa 36.1}

¹⁹ Sàlà pe ittu'nokon man tamù'nawolon Law yau nai'nùk wechi, mùkyamlo yawàlà nemassai'nannùk ponaloppe. Tamù'nawolon kappon we'waputtàtok kon yeleutanùttoppe molopai tamù'nawàlà wolù yawon kon kappon yamùk nettoppe Katù uya ittuntok yak.

²⁰ Màlàpàk ànù'là kappon yanùmù ikasa Katù yenu yau, Law maimu yawàlà iwechi pàk pùla iwechi màlà. Law màlà kappon ku'nài àli kussak tùuya ittutoppe ya làkku.

Ikasa We'nàtok Ailon Tetok Yai

²¹ Tùse sàlà pe ikasa we'nàtok Katù winàpaino, yekamasak màlà Law winà pùla. Tùse Law molopai Katù Maimu yenpoikannan nùssan nekamappù.

²² Sàlà ikasa we'nàtok màlà Katù winàpai tùuyàssen Jesus Christ pàk ailon tetok yai tamù'nawolon kon ailon tawonnan piyak, masapùla tùpatalà we'nàtok pùla kulu iwechi màlà.

²³ Masapùla tamù'nawolon kon kappon yamùk wemakuimasak màlà, màlàpàk mei tok wechi Katù wettok wakù pe winàpai.

²⁴ Tùse lepantok wakù pe Katù wettok winà tok yanùnsak màlà ikasa Katù pokonpe Christ Jesus yai, mùkkàlà kùpùikattànài'nokon makui yapai.

²⁵ Katù uya Christ tùlùppù màlà tùwelittok winà kappon yamùk makuyi pàk usentupantoppe ailon tetok tok uya imùnù pàk yai. Katù uya itùlùppù màlà, iwalai teselu yekama pe. Pena kappon yamùk wemakuima yenpàtùppù ya màlà tok tùtalumattàik pùla.

²⁶ Màlà kupùppù Katù uya màlà ikasa tùwettok sàlà yattai yenpoika pe. Sàlà kasa Katù uya ikasa tùwechi yekama màlà molopai tamù'nawolon kon ailon tawonnan Jesus pàk yanùmù tùuya ikasa.

²⁷ Yà'là ken uchi molo nai utapulàntok ipàkànsau woton? Ipla man. Yà'là pe iwechi pàk? Masapùla ka' Law maimu yawàlà kappon wechi pàk lù? Kanekku, tùse ailon tetok kappon uya pàkàlà làkku.

²⁸ Màlàpàk ittusakù'nokon man kappon yanùnsak ikasa Katù pokonpe ailon tetok yai, molopai Law wettok iche kupù winà pùla.

²⁹ Wapùla Katù ken na' mùkkàlà Jew yamùk Katùyi neken? Jew yamùk pen Katùyi pen nàlà ken na' mùkkàlà? Ewaik, Jew yamùk pen Katùyi nàlà mùkkàlà.

³⁰ Katù mùkkàlà tewinan, tamù'nawolon kon yennài mùkkàlà ekkaichalà, màlàpàk Jew yattàtok yessan yanùmù ya màlà ikasa tùpokon pe ailon tetok tok uya yai, molopai Jew yamùk pen yanùmù ya ikasa tùpokon pe ailon tetok tok uya yai.

³¹ Ailon te kùuya'nokon pàk uchi Law wechi yà'là pe pùla pe ikupù màlà? Kanekku! Tùse ailon tetok màlà Law wechi wakù pe yenpoikanài.