Revelation 6 - Patamuna New Testament Revised

Kalinilu Mule Uya Yachittok Ikkwàtù

¹ Màlàyau Kalinilu Mule uya wapiyalok 7 pan kaleta yachittok tonpa ikkwàtù takkokase yeneppù uya. Màlàyau yetappù uya asakùlà'nan kon nulànan kon ànùkyan nànan tonpa uya: “Àikkà!” te, wala'napi kasa Imaimu usetappù.

² Uyenu tùlùppù uya, màlàyau aimu'nan kawale wechippù molo. Ipo tùwessen uya ulapa yachippù, molopai alok ke ilepasak wechippù. Entaikantok yau iitàppù màlà entaikanse tùmeluntàlù ke.

³ Màlàyau Kalinilu Mule uya yakon yachittok ikkwàtùppù takkokase. Molopai yakon nulà nan kamo uya, “Àikkà,” te, yetappù uya.

⁴ Tùulon kawale wepakkappù, ichuweyu pe iwechippù. Ipo tùwessen lepasak wechippù meluntà ke, wepanta'mantok nettoppe ya sàlà non pona, kappon yamùk we'wàtoppe essentak. Màlàpàk ilepasak wechippù asa'lon yà eke kasupala ke.

⁵ Màlà tùpo Kalinilu Mule uya icholùwano yachittok ikkwàtùppù takkokase, molopai icholùwano nulà nan ànù'lànan uya, “Àikkà!” te, yetappù uya. Uyenu tùlùppù uya, màlàyau ikklùn kawale wechippù molo. Ipo tùwessen wechippù wemantok ike itemyau.

⁶ Mayin uyàpù yetappù uya asakùlà'nan kon nulànan kon ànùkyan nànan winàpai kasa. Màlàyau mayin uya, “Tewinan pùsau paali, àlichi walai wechi màlà tewin wei we'wotokomantok yepeppù pe, molopai àsolùwawon pùsau paali walai wheat, wechi màlà tewin wei we'wotokomantok yepeppù pe. Tùse olive yek molopai chi'nak grape yek kù'mattanùpùi,” teppù.

⁷ Màlàyau Kalinilu Mule uya ichakùlà'no yachittok ikkwàtùppù takkokase, ichakùlà'no nulà nan ànu'lànan uya, “Àikkà!” te yetappù uya.

⁸ Uyenu tùlùppù uya, màlàyau tenkoloimu'nan kawale wechippù molo. Ipo tùwessen yesettàsak wechippù Weli'nàtok pe, molopai iwelichak kon patassek wechippù màlà ite'mappù pàk mei pùla. Apàikkek ke tok lepasak wechippù màlà ipùkkù pe là (1/4 pe) non yepoi, wàntoppe wepanta'mantok yai, iwan ke, palan ke, molopai àsà ton kamo yamùk non pon kon ke.

⁹ Màlàyau Kalinilu Mule uya 5 pe iku'nài yachittok ikkwàtùppù takkokase. Altar yo'no mùkyamlo iwàsak kon nùssan yakkwalù yeneppù uya, masapùla Katù Maimu yekamasak tok uya pàk, molopai ailon pe tok wessak yekamatok tùuya'nokon yau pàk.

¹⁰ Eke pe tok wentaimeppù, “Meluntà Itepulu Katù, wakù kulu esukenan molopai ailon! Yà'là yattai ken kappon yamùk sàlà non pon kon ittu auya molopai tok talumattà auya ina wàsak tok uya pàk?” tukaik.

¹¹ Tamù'nawà tok lepappù màlà aimu'nan pon ke. Molopai tok pàk yekamappù tok wàlàkkattoppe malalà tu'ma, tamù'nawolon kon tok tonpa lùssan molopai apyoto ton nùssan tùwàsan pe tùwessan, tùkka, tok tùkkappù kasa ponalà.”

¹² Molopai Kalinilu Mule uya 6 pe iku'nài ikkwàtùppù takkokase. Àsà pe kulu tùlùpùnù wechippù molo, molopai wei wenappù ikklùn pe, ichin kuyalikku kasa, kapùi wenappù tamù'nawà ichuweyu pe mùn kasa.

¹³ Chilùkà yamùk wessolokappù non pona kak poi, akkla ton fig yepelu wessoloka tek poi meluntà assetun uya talo'ma yau kasa.

¹⁴ Kak utamoko'mappù, kaleta utamoko'ma kasa, tamù'nawolon wùk molopai tuna iwoino pata utamappù màlà tùpatassek yapai.

¹⁵ Màlàyau kin yamùk non pon kon, eke ton kappon yamùk, soicha yamùk yepoino kon, temamin kenan kon, meluntà ton, molopai tamù'nawolon kon tùulon kon kappon yamùk apyoto yamùk wapùla apyoto yamùk pen, uso'namùppù màlà tàk yeuta yak molopai wùk pon kon tàk yamùk kùlottak.

¹⁶ Wùk yamùk molopai tàk yamùk pàk tok uya, “Ina pona epukatàk kon, molopai ina yonantàk kon aponnok po chichiu pe nai'nùk yenu winàpai, molopai Kalinilu Mule we'naikatok winàpai!

¹⁷ Masapùla eke tok we'naikatok weyu talà man, ànùk uya ken ipàlika?” teppù tok uya.