Revelation 19 - Patamuna New Testament Revised

Aleluya

¹ Sàlà yamùk tùpo eke pe tukkan kon kappon yamùk maimu kasa tùusetasen yetappù uya epùn po, “Katù yapulà! Wepùikattàntok, apulàntok molopai meluntà màlà kùkatùyi kon ponalok!” tukaik.

² “Ailon molopai iwalai màlà ittutok ya! Masapùla eke nossan kàyik yamùk yemyak tùwechilanmasen talumattàsak ya man, mùkkàlà non mattanù'nàippù lùppù àli kuttok tùuya kàyik yamùk pokonpe tùwettok ke. Katù uya ye'masak man, masapùla tapyoto yamùk wàsak ya pàk,” tukaik.

³ Tok wentaimeppù tu'ma màlà. “Katù yapulà! Eke pata uyatù kelechin wenuku màlà tàwàlàlà molopai tàwàlàlà,” tukaik.

⁴ 24 pan kon eke ton tùnamasan kappon yamùk molopai asakùlà'nan kon nulànan kon ànùkyan nànan wepeimappù molopai Katù yapulàppù tok uya Mùkkàlà chichiu pe tùwessen aponnok po molopai tok uya, “Emen, Tàwà wa nechii! Tàwà yapulà nechii!” teppù.

Kalinilu Mule Wemali'ma Yattai Uta'lettàntok

⁵ Màlàyau molo mayin uyàpùppù aponnok winàpai, “Kùkatùyi kon yapulàtàk tamù'nawolon kon itapyoto yamùk, molopai tamù'nawolon kon kappon yamùk asakklàma eke ton molopai echikili ton, mùkyamlo inaman nan!” tukaik.

⁶ Màlàyau yetappù uya eke pe ilinà kappon yamùk maimu kasa tùusetasen, eke tuna melu tàwù kasa, wala'napi wettoippàtù kasa. “Katù yapulàpai. Masapùla Itepulu tewinan, Mùkkàlà neken Meluntà kùkatùyi kon mùkkàlà Kin,” te tok uya.

⁷ “Utauchinpanpai'nokon molopai tùutauchinpaik we'nàpai'nokon man, eke pe iwettok yapulàpai'nokon! Masapùla Kalinilu Mule wemali'matok yattai uyàssak man, molopai inoppù woton wekonekasak man màlà ponaloppe.

⁸ Iwepontàtoppe ikupùppù màlà wakù linen pe ewechi kuyalikku yapai ikonekasak, tùulenpansen molopai ikopposak pen pon yak.” (Wakù linen pe iwechi kuyalikku wechi màlà Katù ponalok kon kappon yamùk nùkupùppù wakù, yekamanài pe.)

⁹ Màlàyau inchelù uya upàk, “Sàlà imenukakà, Tùutauchinpasan mùkyamlo ikà'masak kon, Kalinilu Mule wemali'matok yattai uta'lettàtok yak,” teppù. Molopai inchelù uya tùmaimu pùkkùttàppù, “Sàlà yamùk màlà ailon Katù Maimu,” tukaik.

¹⁰ Wekkawai'mappù itta piyau yapulàtoppe uya, tùse upàk, “Kùkkupùi! Apyoto Iulà àtonpa, molopai àtonpa yamùk tonpa tamù'nawàlà mùkyamlo ailon Jesus nenpoikappù yawàlà tùwemassan tonpa. Katù yapulàkà!” teppù ya. Masapùla màlà ailon, Jesus nenpoikappù uya màlà Katù Maimu yenpoikannan kupùppù tok uselupa toppe.

Aimu'nan Kawale Po Tùwessen

¹¹ Màlàyau epùn utakkokasak yeneppù uya, molopai molo iwechippù aimu'nan kawale. Ipo tùwessen yesattok wechippù Tùusetakkasen pen molopai Ailon, ikasa we'nàtok ke kappon yamùk ittunài mùkkàlà molopai ikasa tùwepanta'masen.

¹² Itenu wechippù màlà apok ulenpansak kasa, molopai tukkan alok yamùk wechippù ippai po. Itesek menukasak wechippù ipàk, tùse ànù'là uya ittu pùla iwechippù, tùse mùkkàlà uya neken yà'là pe là iwechi ittu.

¹³ Pon, yau iwettok wechippù màlà mùn yak ikichappe. Esek mùkkàlà yesattok yau wechippù “Katù Maimu,” tukaik.

¹⁴ Tùwepanta'masan epùn pon kon utàppù ya'là, aimu'na'nan kon kawale yamùk po molopai tok wepontàsak aimu'nan molopai ikopposak pen linen pon yak.

¹⁵ Yàkek asa'lon yà kasupala wepakkappù intapai, màlà ke eke pata yamùk non pon kon yentaika ya màlà. Meluntà ke itepulu pe iwechi màlà tok yepoi, molopai so'li tinchisen Tewinan, mùkkàlà neken Meluntà Katù we'naikatok àsà pe yeuku kakklà ya màlà mulu yai.

¹⁶ Ipon pàk molopai ichi pàk esek menukasak wechippù, “Kin yamùk Kinù, molopai itepulu yamùk Yepulu,” tukaik.

¹⁷ Màlàyau inchelù wechi satippe wei yau yeneppù uya. Iwentaimeppù eke pe tolon yamùk tùwainùnsan kau, pàk, “Àittàk kon, molopai epilittàk kon eke Katù uta'lettàtok yak!

¹⁸ Àittàk kon, kin yamùk pun yanse, eke ton pun, soicha yamùk yepulu yamùk pun, kawale yamùk molopai tok po tùwessan pun, tamù'nawolon kon kappon yamùk pun, apyoto yamùk molopai apyoto yamùk pen, eke ton molopai echikili ton,” tukaik.

¹⁹ Màlàyau yeneppù uya àsà ene molopai non pon kon kin yamùk molopai tok wepanta'ma tonpa yamùk wepilipùppù epanta'mase kawale pon winàkàik molopai iwepanta'ma tonpa yamùk winàkàik.

²⁰ Àsà ene yachippù màlà, tamùkke iwalai pen itekale yekamanàippù pokonpe, mùkkàlà tensan pen yamùk ku'nàippù itemlotopo. (Màlà tensan pen yamùk winà màlà mùkyamlo àsà ene uya pattàntok yesak ton yennakappù ya, molopai àsà ene kasa ikonekasak yapulànnan nùssan.) Àsà ene molopai iwalai pen itekale yekamanàippù tawonnan yenu'mappù màlà asakklàma, nulà apok yak kulupala kasa tùkà'nùnsen pokonpe tùuyassen yak.

²¹ Tok wepanta'ma tonpa yamùk wànàppù màlà asa'lon yà kasupala tùwepakkasen kawale po tùwessen mùta yapai ke, molopai tamù'nawàlà tolon yamùk uya tok pun yanùppù tùwakkota kon ponalà.