Revelation 18 - Patamuna New Testament Revised

Babylon Wekkawai'matok

¹ Sàlà tùpo tùulon inchelù uttà epùn poi yeneppù uya. Eke pe apàikkek yesappe iwettok, molopai itakkwayi uya tamù'nawolon non polo yakkwakappù.

² Iwentaimeppù eke pe, “Iwekkawai'masak man! Eke Babylon wekkawai'masak man! Imawali yamùk yùwùk molopai tamù'nawolon àli ton akkwalù yamùk patassek pe iwenasak man, molopai tamù'nawà ànùk yekkwa là àli ton molopai ewanma pe tùkussan tolon yamùk wemapù màlà yau.

³ Masapùla tamù'nawolon kon kappon yamùk pata yamùk non pon yawolon kon uya àli italumayippù pe iwettok yeuku inchippù màlà. Meluntà, àli pe eppai iwettok tesak ke yeuku. Non pon kon kin yamùk uya àli kussak man ipokonpe itayappù pe pùla echii'ma. Molopai kàyik yamùk mamin chilanmannan molopai ye'mannan non pon kon wenasak man eke pe mamin yesappe, tùuseka'nonkaik àli kuttok ya winàpai,” tukaik.

⁴ Màlàyau tùulon mayin yetappù uya epùn poi, “Epakkatàk kon yapai, uponalok kon kappon yamùk! Àli ton kuttok ya pùkkù pe kettàu, ipokonpe tùtalumattàssan pe!

⁵ Masapùla àli kuttok ya wepilichak man kau epùn tepose. Molopai Katù nùttuyan àli inkupùppù lùppù.

⁶ Inkupùppù kasa làma ikuttàk kon. Ye'matàk kon asak itekkwa meluntà ke, ikupùppù ya kasa làma. Ichawù yanùkkatàk kon tinchisen ke, asakitekkwa meluntà ke, inkonekappù ke.

⁷ Wakù pe temamin ke tùwechi yawà itapulàppù. Màlà kaichalà làma ilepatàk kon talumattàntok molopai usewankono'mantok ke. Masapùla, ‘Sà motau chichiu pe wessaik Kuwin Iulà! Itayappù iwelichak pen Iulà, molopai usewankono'ma ittu uya pen màlà!’ te pàk man tewan yau.

⁸ Sàlà wenai tamù'nawàlà italumattàtok uyàpù màlà ipona tewin wei yau, Weli'nàtok, usewankono'mantok, molopai iwan, ipottà màlà apok ke. Masapùla Itepulu Katù italumattànài mùkkàlà apàikkek,” teppù ya.

⁹ Kin yamùk non pon kon iwekumasak kon nùssan molopai wakù pe temamin ke iwechipàk iitapulà tonpa pe iwessak kon nùssan kalawù màlà molopai tok usewankono'ma kulu màlà pata wenai iyatù kelechin yene tùuya'nokon yau.

¹⁰ Mei satippe tok wechi màlà, masapùla iwettalumattàtok pàk tùsenalippa kon pàk, molopai, “Entuppak! Entuppak man! Sàlà eke molopai meluntà pata Babylon! Tachinpe pùla kulu atalumattàtok uyàssak man,” te tok uya.

¹¹ Mamin ye'mannan molopai ichilanmannan non pon kon kalawù màlà, tok usewankono'ma iwenai, masapùla ànù'là uya temamin kon ye'ma pùla nen uchi iwechi pàk,

¹² tùkolùyi kon, tichilùpayi kon, wakù ton tàk yamùk molopai pearl yamùk. Wakù ton kuyalikku, linen molopai silk, tùtalilen molopai ichuweyu kuyalikku ye'ma pùla nen uchi iwechippù. Molopai yà'là yekkwa là appoi'ne tùkà'nùnsan yei yamùk, yà'là yekkwa ton nà ikonekasak kamo yà yapai molopai epekkek yei yapai, kalukuli walai yapai, ayan pun yapai, molopai ekayu tàk walai, marble ye'ma pùla nen uchi iwechi pàk.

¹³ Molopai yei pippà yamùk cinnamon molopai spice itesek ye'ma pùla iwechi uya tok kalanpa, molopai tùpottàsen appoi'nan, myrrh, frankincense, wain, molopai kaiwan palu, molopai eke'ne yasukasak pùlomù, molopai paali walai, paka yamùk molopai kalinilu yamùk, kawale yamùk molopai kanau yamùk, apyoto yamùk molopai là kappon yamùk yakkwalù ye'ma pùla.

¹⁴ Tok uya nàlà ipàk, “Tamù'nawolon wakù ton itesappe eppai ewettok waliwomùppù man, molopai tamù'nawà eyemamin molopai wakù pe temamin ke ewemattok utàppù man, molopai yepotu'ma auya pen màlà,” te.

¹⁵ Sàlà mamin ye'mannan molopai ichilanmannan, temaminke iwenasak kon màlà pata yau wechi màlà mei satippe, masapùla italumattàtok pàk tùusenalippa kon pàk. Tok kalawù màlà molopai tok usewankono'ma,

¹⁶ molopai, tok uya, “Entuppak! Entuppak man! Àli pe kulu man màlà eke patassek pona! Tùwepontàsen pe iwechippù wakù linen yak, tùtalilen molopai ichuweyu yak, molopai tùpolo kolù, wakù ton tàk yamùk molopai pearl yamùk tùsak ya wechippù!

¹⁷ Molopai tachin pe pùla kulu tamù'nawàlà sàlà mamin yamùk lachimapàssan!” te màlà ipàk. Tamù'nawàlà kanau yanàinan molopai kanau yawon kon, kanau yanàinan yo'non kon molopai tamù'nawàlà tùulon kon tùwemattok kon yeponnan palau po wechippù mei satippe,

¹⁸ Molopai tok wentaimeppù iyatù kelechin yenei'ma'nokon. “Tùulon eke pata pùla nai'nùk iwechippù, sàlà eke pata yekkwa!” tukaik.

¹⁹ Non sululukkappù tok uya tùppai kon pona, tok kalawùppù molopai tok usewankono'mappù. “Entuppak! Entuppak kulu man eke pata pona! Eke pata màlà tamù'nawàlà mùkyamlo kanau yamùk palau polo tùwessan yesak ton wenappù temamin ke itemamin pàk lùppù! Molopai tachin pe pùla kulu tamù'nawàlà itesappe tùwettok lachimappàssan!” tukaik.

²⁰ Atauchinpatàk kon, imattanùttok pàk epùn! Atauchinpatàk kon, Katù ponalok kon kappon yamùk, yeunossak kon, molopai Katù Maimu yenpoikannan! Masapùla Katù uya italumattàsak man inkupùppù àpàkù'nokon wenai!

²¹ Màlàyau apàikkek inchelù uya eke kulu tàk yanùmùppù molopai yenu'mappù ya palau kak, “Sàlà kasaichi eke pata Babylon yenu'ma màlà àsà pe, molopai ichene tu'ma pen nen uchi màlà,” tei'ma.

²² “Tùwayi kon tàulùnpannan, yà'là yekkwa là wai tàulùnpannan uya, salakuwa molopai paka letù walai tàulùnpa useta tu'ma pen nen uchi màlà ayau! Ànù'là tùwe'wotokomasen yà'là yekkwa là yau wessepotukka ayau pen nen uchi màlà, molopai ak tàwù useta pen nen uchi màlà!

²³ Yà'là yattai tu'ma là lanppu yakkwayi usene ayau pen màlà, tùwemali'masan ema'non molopai umoine tawonnan maimu useta ayau pen. Mamin chilanman nan molopai ye'mannan, àponalok kon wechippù kulu màlà eke pe tamù'nawàlà sàlà non po, molopai epiyassanù ke tamù'nawàlà kappon yamùk non pon kon yennakappù auya,” teppù ya nàlà.

²⁴ Katù Maimu yenpoikannan mùnù wenai, molopai Katù ponalok kon kappon yamùk mùnù yepoloppù màlà, màlà pata yau, ewaik, tamù'nawolon kon kappon yamùk iwàsak kon non po mùnù.