Philippians 4 - Patamuna New Testament Revised

Enupantok

¹ Màlàpàk nen uchi utonpa yamùk, u'nùn pe kulu messatàik. Molopai eyenpai'nokon wessaik, masapùla utauchinpatok pe ewechi kon màlà, utapulàtok iwinà pe. Uwechi yakon non, ailon pe ettàk kon Itepulu pàk.

² Amyamlo asa'lon kon nossan yamùk Euodia molopai Syntyche tàwà ekkaichalà tùusenumenkaik ettàk kon Itepulu Jesus pàkànsau.

³ Molopai àmàlà nàlà ailon we'wotokoma yakon, pùsamlo nossan yamùk pùikattà auya iche wessaik. Masapùla tok we'wotokomasak man sa'man pe upokon pe Wakù Itekale yekama pàk Clement pokonpe tamùkke. molopai tamù'nawolon kon tùulon kon we'wotokoma yakon non Katù kaletayi, wema'nàtok yapon yau itesek nai'nannùk.

⁴ Tàwàlàlàichi tùutauchinpaik ettàk kon Itepulu Jesus ponaloppe ewemapù kon yawàlà. Wate uya tu'ma: tùutauchinpaik ettàk kon!

⁵ Wakù pe, àsà pe pùla mettàik tamù'nawolon kon pàk, Itepulu uyàpù màlà sàlà pe'nelà.

⁶ Tùutaimelunpaik kettàu yà'làlà pàk, tùse àwàpùlematok kon yau. Katù yekamappotàk kon, iche kulu ewettok kon yennatàk ipàk, tenki tetok itewan pe tàwàlà.

⁷ Molopai Katù winàpaino echitonpa pe we'nàtok, kappon nùttu yentaino uya eyewan kon molopai eusenumenkatok kon mainanpa màlà wakù pe Christ Jesus yau.

⁸ Wenukapù pe, utonpa yamùk, eusenumenkatok kon pe màlà yamùk: ailon pe nai'nannùk nechii molopai tapulàsen pe nai'nùk, ikasa nai'nùk, esuken nai'nùk, molùnpak nai'nùk, wakù pe kulu nai'nùk, molopai tapulàsan yeppe nai'nùk molopai tùnamasen pe nai'nùk.

⁹ Màlà eusenupappù kon ipàk molopai ananùmùppù kon uwinàpai ikuttàk kon, asakklàma umaimu molopai uyeselu yapai eneneppù kon. Molopai Katù elepanài'nokon echitonpa pe we'nàtok ke wechi apyau'nokon màlà.

Tenki Tetok Lepantok Pàk

¹⁰ Eke pe kulu utauchinpantok yesappe wessaik wemattok yau Itepulu Jesus yau. Masapùla tachinpe tùpo lùkkwà là upùikattà tu'ma auya'nokon pàk. Tùttuyaik yà'làlà eneunoppai kulu ewechippù kon upyak, tùse malalà ikupù auya'nokon yentai iwechippù.

¹¹ Molopai iche wechi pà'là wa te uya pen sàlà, masapùla ittusak uya man uyewan tàlàkka'nùsse wechi yà'làlà itesappe wettok pàk.

¹² Tùttuyaik yà'là kasa là yà'làlà pùla we'nà wechi, wapùla tukke là yà'làlà yesappe we'nà, iche we'nàtok yentai. Sàlà ittusak uya man i'nailàlà. Wapùla yà'là yattai là, uyewan tàlàkka'nùsse wettoppe, takkole là wechi yau wapùla iwan pe là, tukke là yà'là là yesappe wechi yau, wapùla malalà itesappe wechi yau.

¹³ Tamù'nawolon kupù uya màlà Christ yai, umeluntàlù ke ulepanài yai.

¹⁴ Tùse wakù pe mettantàu upùikattà pàk wettalumattàtok yau.

¹⁵ Amyamlo Philippi pon kon nùttuyan Macedonia nànsak uya yau, wapiya kulu Wakù Itekale yekama pàk wechi yau, amyamlo neken sochiyi tawon kon wechippù upùikkattàn nan pe. Amyamlo neken wechippù ulepannan pe molopai lepantok yeponnan pe uwinàpai.

¹⁶ Tewin itekkwa pùla upùikattà iche wechi Thessalonica po echii'ma yau, yeunokoppù auya'nokon upyak.

¹⁷ Lepantok yamùk neken nà enekkwappai wechi pàk pùla. Tùse làkku àntùlùppù kon pàkàlà itepeppù wekassak enenpai wechi pàk, sàlà yamùk lepantok tùsak auya'nokon pàk.

¹⁸ Tamù'nawolon ulepatok auya'nokon yeposak uya man. Molopai iche wettok yentak kulu nettai. Molopai sàlà pe tamù'nawolon iche wettok yesappe wessaik, Epaphroditus uya tamù'nawàlà ulepatok nessak man upyak apyapai'nokon. Sàlà yamùk wechi màlà wakù appoi'nan tùtùsen kasa Katù pona, itùsak yau Katù nanùmù pe nai'nùk molopai yauchinpanài pe nai'nùk kasa.

¹⁹ Molopai Katù Ukàipùnù uya iche kulu ewettok kon tùlù màlà itesappe tùwettok yawà tapulàtok yau, Christ Jesus winà.

²⁰ Tàwà Katù Kùkàipùnù kon tapulàtok yepoloi tàwàlàlà molopai tàwàlàlà. Emen.

Tewin Itekkwalok “Wakù Pe Na' Messatàu?” Tetok

²¹ “Wakù pe na' messatàu? ” tetok uya tamù'nawolon kon Katù ponalok kon pàk tùlù uya sàlà, Christ Jesus yai. Utonpa yamùk, talonkonnà upyawon kon kulu “Wakù pe na' messatàu?” nùkayan àpàkù'nokon.

²² Tamù'nawolon kon Katù ponalok kon talon konnà “Wakù pe na' messatàu?” nùkayan Kin Caesar, yùwùk tawon kon kulu.

²³ Tàwà wakù pe we'nàtok Itepulu Jesus Christ yau tamù'nawolon kon piyau nechii. Emen.