Philippians 1 - Patamuna New Testament Revised

¹ Sàlà màlà kaleta Paul molopai Timothy tawonnan, Christ Jesus yapyoto ton winàpaino. Tamù'nawolon kon Christ Jesus ponalok kon pe tùwemassan Philippi po piyak imenukasak, tamùkke sochi yennàinan molopai tok pùikattànnan ponalok:

² Tàwà Katù Kùkàipùnù molopai Kùyepulu Jesus Christ elepai'nokon wakù pe we'nàtok molopai echitonpa pe we'nàtok ke.

Paul Wàpùlematok Tùnenupa Ton Pona

³ Tenki ukayaik Katù pàk tamù'nawàlà àpàkù'nokon, tàwàlà là àpàkù'nokon usenumenka yau.

⁴ Molopai tamù'nawàlà àpona'nokon wàpùlema yau tùwàpùlemasen Iulà tùutauchinpaik tàwàlàlà.

⁵ Masapùla upatùnayi pe ewessak kon Itekale yekama uya yau, wepyattà motapai sàlà tepose pàk.

⁶ Màlàpàk sàlà tùttuyaik kulu: Katù, sàlà wakù wotoko piyattànàippù ayau'nokon, wechi màlà ikupù pàk iwenukapù tepose Christ Jesus Weyu ponalà.

⁷ Tàwàlà uyewan pe tùwessan amyamlo! Màlàpàk ikasa iwechi màlà sàlà kasa usenumenka tamù'nawàlà àpàkù'nokon. Masapùla Katù uya ulepatok wakù pe we'nàtok pùkkù pe ewessak kon pàk. Sàlà pe patikichi tau wechi yau wapùla polopo Wakù Itekale wechi ailon pe yekama pàk wechi yau, iwenai wechi pe.

⁸ Katù mùkkàlà ittunài wa te uya wechi ailon pe, eke pe kulu tamù'nawàlà à'nùnmatok kon uya tùuyàssen Christ Jesus winàpai te uya yau.

⁹ Molopai sàlà màlà wàpùlematok, echi'nùn pe ewettok wenatoppe eke peiwa màlà yentak ittutok ke molopai miya lùiwa i'napailà yentok ke.

¹⁰ Wakù pe kulu neken nai'nùk yanùmù kon pa. Molopai nen uchi esuken ewemattok kon wettoppe, wakù pe eyekale kon wettoppe Christ wennappo sàlà motak ponalà.

¹¹ Jesus Christ uya àkupù kon màlà wakù eselu kupù pàk ewechi kon pa. Sàlà uya Katù yapulàtok molopai inamatok nepù màlà.

Christ Ponalok Iulà Wemapù Yawà

¹² Ittu auya'nokon iche wessaik, utonpa yamùk, màlà yamùk iwekkusak kon uwinàkàik uya kulu Wakù Itekale utàtoppe miyaiwa upùikattàsak pàk.

¹³ Màlàpàk tamù'nawolon kon itepulu yelasu ton molopai tamù'nawolon kon talonkonnà Christ yapyoto pe wechi pàk patikichi tau wechi ittuyan.

¹⁴ Molopai patikichi tau wettok uya tamù'nawolon kon lùiwa ailon tawonnan utonpa yamùk kussak man ailon tetok tùuya'nokon tùtoppe tok uya Christ yak. Meluntà peiwa Katù Maimu yekamatok tùuya'nokon yau tùwenatok kon pe tàwàlà tùusenalippaik pùla.

¹⁵ Ewaik, tùulon kon Christ pàk tùuselupassan masapùla kùlùmàppe tùwechi kon pàk, tewanma kon pe ukuppù tùuya'nokon pàk. Tùse tùulon kon tùuselupasan ipàk tamù'nawàlà wakù pe iteselu.

¹⁶ Pùsamlo mùkyamlo Christ yekale pàk tùuselupasan, wakù pe iteselu uchi'nùnmantok yapai. Masapùla Katù uya ulepasak sàlà Wakù Itekale wenai wettoppe.

¹⁷ Tùulon kon Christ yekale pàk tùuselupasan, ailon pe wakù pe itewan pùla, amlek peiwa, enekamapai pùla lùiwa echii'ma, eke peiwa utaimelunpantok koneka tùuya'nokon kasa tùttuse patikichi tau wechi tùse.

¹⁸ Yà'là pe pùla iwechi màlà! Màlà kasa iwechipàk utauchinpayaik walàtùse Christ yekale usekamatoppe i'nai kasa là, iwalai pen wapùla iwalai là iteselu pe. Ewaik, utauchinpa pàk lùppù wechi màlà.

¹⁹ Masapùla tùttuyaik àwàpùlematok kon molopai pùikattàntok Jesus Christ Yakkwalù nùtùlùppù winà sàlà yamùk yau wessai'nùk welattà màlà unonkatok pe.

²⁰ Masapùla i'napailà uyewan wettok iche molopai enpen wettok màlà yà'làlà unkupù yau wekkuli'ma tukaik uku'nài. Tùse tàwàlà molopai sàlà pe kulu umeluntàta màlà, tamù'nawàlà uke, Christ yapulàtok nettoppe uya, wemapù pe iwechi yau wapùla welikù pe là iwechi yau.

²¹ Masapùla yàlà ken màlà wema'nàtok? Christ mùkkàlà wema'nàtok upona. Weli'nàtok nen uchi màlà tà wakùiwa ne'nài.

²² Tùse wemapù yau wotoko kupù uya màlà eke peiwa, màlà pàk i'nai kulu là yanùmù uya ittu uya pùla man.

²³ Asakklàma sàlà yamùk yakkletau wessaik, tùulon yattai emappai wechi, tùulon yattai emappai pùla. Masapùla Christ piyak kulu itàpai uchittu utauchinpa kulu mà màlà tà eke pe talà wechi yentai.

²⁴ tùse pàli'yau wechi, wechi màlà wakù peiwa kulu, àpàkànsau'nokon kan.

²⁵ Ewaik, uyiche lùppù we'nàtok talà man. Salà non po wemapù pe lùppù iwa tùttuyaik, àpùikattà kon pàk, eunmeluntàta kon pa molopai tùutauchinpaik ewechi kon pa, ailon tetok auyau'nokon yau.

²⁶ Màlàyau akakklanpatukkasak kon uya yau autauchinpa kon màlà molopai Jesus Christ yapulà auya'nokon pàli'yau ukussak ya pàk.

²⁷ Tùse yà'là pe là wechi pe iwechi yau, Christ yekale nekama yawà memattàik tàwàlà. Màlàyau nen uchi eyense'nokon utà wapùla utà pùla là iwechi tùse eyekale kon neken nà yetatoppe uya, tamùkke tewin itewan, tewin ichenumenkatok, molopai meluntà pe ewechi kon wakù itekale ponaloppe yetatoppe uya.

²⁸ Kesenalippatàu eyeyaton kon pàk. Molopai sàlà uya yekama màlà tok pàk tok uya eyentaika kon pen, molopai tok yentaika auya'nokon. Masapùla Kàtù mùkkàlà entaikantok ke elepayatài'nùk!

²⁹ Masapùla elepasak kon màlà Christ Jesus yapyoto pe ewettok kon ke, ailon tetok neken auya'nokon ipàk winà pùla, tùse nàlà ewettalumattàtok kon iponaloppe winà.

³⁰ Màlàpàk uchi sàlà wepanta'mantok yau we'nàpai man tamùkke. Sàlà màlà màlà lùppù ipanta'ma uya mentantàunùk pena, molopai màlà lùppù ipanta'ma pàk wessai'nùk, yeta auya'nokon kasa.