Matthew 4 - Patamuna New Testament Revised

Jesus Ittu Makui uya

¹ Màlàyau Wakù Akkwalù uya Jesus yalàppù wontaik yak ittutoppe Makui uya.

² 40 pe wei molopai ewalupà iteipa pùla tùuko'mamù tùpo, Jesus wapàkkassak wechippù.

³ Makui uyàpùppù màlà ipyak molopai, “Katù Mumu pe ewechi yau, sà tàk yamùk wekonekatoppe pùlomù pusappe ipàk yekamakà,” teppù ya.

⁴ Jesus uya yeikuppù, “Katù Maimu uya nen, ‘Kappon wemapù pùlomù pusappàk nekennà pen màlà, tùse tamù'nawolon Katù uselupatok pàk,’ tesak màlà,” tukaik. {{Deut 8.3}

⁵ Màlàyau Makui uya Jesus yalàppù màlà Wakù esukenan Pata pona, molopai yalàppù ya kawon kulu Katù Yùwùk ipu pona.

⁶ Molopai Jesus pàk, “Katù Mumu pe ewechi yau epukakà non pona. Masapùla Katù Maimu uya, ‘Katù uselupa màlà tùyinchelùyi yamùk pokonpe àpàk. Tok uya ayachi màlà temyatù kon ke atta là wànà auya tàk yamùk pona tukaik,’ {Psa 91.11 12} tesak pàk,” teppù.

⁷ Jesus uya yeikuppù, “Tùse Katù Maimu uya nàlà, ‘Itepulu Akatùyi kùttùlùi ittutok yak,’ {Deu 6.16} tesak man,” tukaik.

⁸ Màlàyau nen uchi Makui uya Jesus yalàppù kawon kulu wùk pona, molopai tamù'nawolon itepulu pe itepoi we'nàtok non pon kon yenpoikappù ya, molopai eke pe màlà yamùk wettok yau.

⁹ “Tamù'nawàlà sàlà tùlù uya màlà eyemyak, eyese'mu yok tùwenase uyapulàsak auya yau,” teppù Makui uya.

¹⁰ Màlàyau Jesus uya yeikuppù, “Itàkà uwinàpai, Settan! Katù Maimu màlà, ‘Itepulu Akatùyi yapulàkà, molopai iponaloppe neken e'wotokomakà!’ tawon,” tukaik. {Deu 6.13}

¹¹ Màlàpàk Makui uya inàmàppù, molopai inchelù yamùk uyàpùppù. Molopai Jesus pùikattàppù tok uya.

Jesus Uya Tùwotokoyi Piyattà Galilee Po

¹² John tùsak patikichi tak yetasak tùuya yau, Jesus utàppù màlà pata Galilee pona.

¹³ Nazareth tùnànse itàppù Capernaum pona. Molo iwemappàtùppù palau Galilee piyawon Zebulun molopai Naphtali tawon yawon pata yau.

¹⁴ Sàlà wekkupùppù màlà Katù Maimu yenpoikanài, Isaiah, uselupatok uya màlà kasa iwechi màlà teppù kasa.

¹⁵ “Pata Zebulun molopai Naphtali, palau winon, Jordan latoi pon tùulon kon kappon yamùk Jew yamùk pen pata, Galilee po!

¹⁶ Kappon yamùk ewalupàttau tùwemassan uya eke akkwa yene màlà! Mùkyamlo weli'nàtok yewalupàyi pata yau tùwemassan pona akkwa ulenpamù màlà!” tawon.

¹⁷ Màlà motapai Jesus wepyattàppù itekale yekama pàk, “Amakuyi kon winàpai elattàtàk kon, itepulu pe we'nàtok epùn po mei pùla man!” tukaik. {ISA 9.1,2}

Jesus Uya Asakùlà'nan Molok Yachinnan Kà'ma

¹⁸ Tùusalà Galilee yena pàk yau, Jesus uya asa'lon kon echiyakonnon molok yachi pàk tùwessan yeneppù, Simon (Peter tukaik tesassen) molopai itonpa Andrew tawonnan. Tok wechippù màlà molok yachi pàk punwe yai.

¹⁹ Jesus uya tok pàk, “Uya'là àittàk kon molopai eyenupa kon uya màlà kappon yamùk ne'nàinan pe ewechi kon pa,” teppù.

²⁰ Asse'ne màlà yattai tok uya tùpunwe kon nàmàppù màlà molopai tok utàppù ya'là.

²¹ Itàppù màlà miyaiwa molopai asa'lon kon tùulon kon echiyakonnon làma, James molopai John tawonnan, Zebedee munkà yamùk yeneppù ya. Tùkanwa kon yau tok wechippù tùkàipùnù kon Zebedee pokonpe tùpunwe kon yale'nattàpàtù pàk. Jesus uya tok kà'mappù màlà.

²² Asse'ne màlà yattai tok uya kanau molopai tùkàipùnù kon nàmàppù màlà. Molopai tok utàppù Jesus ya'là.

Jesus uya E'nek Ton Ipittà

²³ Jesus utàppù màlà tamù'nawàlà Galilee yawàlà, kappon yamùk yenupa pe tok wepilittok itak tau, Wakù Itekale itepulu pe we'nàtok yekale yekama pe, molopai yà'là yekkwa ton nà itepalan ton molopai ite'netù kappon yamùk ipittà pe.

²⁴ Itekale usetappù màlà tamù'wàlà Syria pon pata yawàlà. Màlàpàk kappon yamùk uya tamù'nawàlà e'netton yalàppù ipyak yà'là yekkwa ton nà palan pàk tùwessan molopai ti'ninchan kulu. Molopai nàlà àli akkwalù yen yamùk, tùusa'mantapàssan, itokkassak kon nà nepùppù tok uya. Jesus uya tok ipittàppù màlà tamù'nawàlà.

²⁵ Ilinà pe kappon yamùk utàppù màlà ya'là Galilee poi, 10 pan pata poi, Jerusalem poi, Judea poi, Jordan latoi pon kon pata poi.