Mark 16 - Patamuna New Testament Revised

Jesus Wuluukatok

¹ Jew yamùk Wàlàkkapù weyu usentakasak yau, Mary Magdala pon, molopai Salome, molopai Mary James yan tawonnan uya apoi'nan kalapa ye'mappù, Jesus yàkàppù kalapaimaik tùutà tok kon pe.

² Màlàyau Suntayakka yattai ko'làma kulu wei wepakka pe, tok utàppù uluwaik motak.

³ Asantawàlà tùutài'ma nokon, “Ànùk uya ken tàk pelenka uluwaik mùlatta poi?” teppù tok uya tùuyiwalà'nokon.

⁴ (Masapùla eke pe kulu màlà tàk wechippù.) Màlàyau yene tùuya'nokon yau, tàk pelenkakassak yeneppù tok uya.

⁵ Uluwaik yak tùwewonsak kon yau, tok uya umoine kàyik yeneppù aimu'nan kusan pon yau chichiupe kamik pen winà.(meluntà winà) Tok wettalipappù kulu màlà.

⁶ Màlàyau tok pàk, “Kettalipatàu, Jesus Nazareth pon iwa auya'nokon màlà, ipukapàssak lùppù pulusuk pona. Ipla man talà. Iwe'wuluukappù man. Imasa yentàk kon inonkappù yak lùppù,” teppù ya.

⁷ “Tùse itàtàk kon inenupaton nùssan pàk yekamatantàk molopai Peter pàk tukka, ‘Nùtàyan awapiya'nokon Galilee pona. Molo yene auya'nokon màlà yekamappù ya àpàkù'nokon kasa,’ mùkatàik,” teppù ya.

⁸ Màlàyau tok wepakkappù molopai aitun pe tok utàppù tàk yakasak uluwaik motapai, masapùla tok wettalipappù kulu màlà, kùkù pe tok wechippù. Ànù'là yelupappù tok uya pen, masapùla tok wettalipasak kulu wechippù.

PENALOK WENUKATTOK WAKÙ ITEKALE MOTAU Mary Magdala pon piyak Jesus Usenpoikatok

⁹ Ko'làma kulu Suntayaka yattai tùwe'wuluuka tùpo, màlà wei yattai, Jesus usenpoikappù wapiya kulu Mary Magdala pon piyak. Mùkkàlà 7 kaichalon kon àli akkwalù yenpakkappù tùuya lùppù yapai piyak. Nossan yamùk utàppù màlà Peter molopai itonpa yamùk piyak molopai malalà tamù'nawàlà itekale tùpàk kù'nokon yekamasak lùppù yekamappù tok uya tok pàk.

¹⁰ Màlàyau iitàppù inenupa ton nùssan pàk yekamaik. Tok usewankono'ma kulu molopai tok kalawù nàlà yepoloppù ya. Sàlà tùpo Jesus uya wakù tàwàlà tùwemassen Itekale yeunokoppù màlà wei wepakatok motapai wei wewontok yapai tùnenupa ton nùssan yai màlà tàwàlàlà wepùikattàntok yekale.]

¹¹ Nulà iwechi yensak tùuya yekama ya tùse, ailon teppù tok uya pen.

Jesus Usenpoikatok Asa'lon kon Tùnenupa ton nùssan piyak

¹² Sàlà tùpo, Jesus usenpoikappù asa'lon kon neken piyak, tùulon pe, tok utà tùulon pata yak kùlottau.

¹³ Màlàyau mùkyamlo asa'lon kon uya tùwennapposak kon yau yekama tùse, tok uya ailon teppù pen.

Jesus Usenpoikatok 11 pan kon piyak

¹⁴ Màlà tùpo 11 kaichalon kon tùnenupassan piyak ichenpoikappù tok uta'letà yattai. Tok yàulàmappù ya masapùla ailon tetok tok uya pùla iwessak pàk, molopai mùkyamlo nulà tùwechi yennàinan nùssan pàk ailon tesak tok uya pùla iwessak pàk.

¹⁵ Màlàyau, “Itàtàk kon tamù'nawolon pata yawàlà. Wakù Itekale yekamatantàk kon tamù'nawàlà kappon yamùk pàk,” teppù ya tok pàk.

¹⁶ “Ànù'là ailon tukaik ichenpataukasak kon wepùikattà màlà. Tùse ànù'là ailon tawon pen wechi màlà àli pe tùwettok pàkànsau tùwettalumattà pàk.

¹⁷ Molopai ailon tawonnan lepasak wechi màlà yentok ipàkàlà kuttok ya yapàiketù ke. Uyesek yau àli akkwalù yenpakka tok uya màlà. Molopai tok uselupa màlà tùpatalo'nan mayin yau.

¹⁸ Àkài là yanùnsak tok uya yau, molopai yà'làlà paichinù'manài inchichak tok uya yau, e'neppe tok wena pen. Molopai tok uya e'netton pona temyatù kon tùlù molopai e'netton wenna màlà,” teppù Jesus uya tok pàk.

Jesus Yanùntok Epùn Pona

¹⁹ Itepulu Jesus uya tùnenupa ton nùssan yelupasak tùpo, yanùmùppù Ikàipùnù uya epùn pona. Màlàyau iweleutappù Katù yemyatù kamik pen winà.

²⁰ Màlàyau inenupa ton nùssan utàppù Itekale yekamaik mailàlà. Molopai Itepulu Katù we'wotokomappù tok pokonpe. Molopai tok nekamappù lùppù yenpoikappù ya ailon pe iwechi yentok ipàkàlà pe tok yapàikketù yau. [