Luke 6 - Patamuna New Testament Revised

Jew Wàlàkkattok Yattai Pàk Ekamappontok

¹ Jesus utàppù màlà àlichi walai yek kùlottawà Jew wàlàkkattok weyu yattai. Ya'lon kon wepyattàppù àlichi walai pàika pàk, ichokossoko'mappù tok uya temyau'nokon, molopai tok uya inapùppù.

² Pharisee tonpa yamùk uya, “Yà'là peichi iwechi pàk ina Law winàpaino uya kùkkuttàu Jew wàlàkkattok yattai tetok kupù auya'nokon màlà?” teppù.

³ Jesus uya tok yeikuppù, “Yennài nan pen ken na' amyamlo David uya yà'là là kupùppù tùmàlà molopai ta'lon kon kàyik yamùk wapàkkassak yau?

⁴ Iitàppù Katù yùwùk tak, eki napùppù ya itùsak lùppù Katù yemyak, molopai itùlùppù ya nàlà ta'lon kon kàyik yamùk yemyak. Tùse kùyenupatok kon maimu yawàlà pùla mà ànù'là uya inapù wechi màlà tà, tùse paatele yamùk neken nùnapù pe iwechi màlà,” tukaik.

⁵ Molopai Jesus uya itonpatàppù, “Kàyik Mumu mùkkàlà Jew yamùk wàlàkkattok yattai Yepulu,” tukaik.

Kàyik Ichei'mesak Itemyatù

⁶ Tùulon Jew yamùk wàlàkkattok weyu yattai Jesus utàppù Jew yamùk wepilittok itak tak molopai kappon yamùk yenupappù ya. Kàyik wechippù molo kamik pen itemyatù ichei'mesak.

⁷ Tùulon kon Law pàk enupannan tonpa yamùk molopai Pharisee yamùk wechippù màlà iwalai pen kussan tukaik tùuselupatok kon Jesus winàkàik ittuiche. Màlàpàk tok wechippù itenupàkà ànù'là ipittà ya Jew yamùk wàlàkkattok weyu yattai yeneiche.

⁸ Tùse Jesus uya tok usenumenkatok ittuppù màlà molopai kàyik ichei'mesak itemyatù pàk, “À'mùssakkakà molopai àikkà sàlà motak yakkletak,” teppù. Kàyik wà'mùssakappù molopai satippe iwechippù molo.

⁹ Màlàyau Jesus uya tok pàk, “Eyekamappoyatàu Iulà, Yà'là kupù ken Jew yamùk wàlàkkattok weyu yattai wechi màlà Law yawàlà? Wakù kupù wapùla àli kupù? Kappon yakkwalù pùikattà wapùla imattanùpù?” teppù.

¹⁰ Tok yeneppù ya tùwoi molopai kàyik pàk, “Eyemyatù yenkakà,” teppù ya. Màlà kasa ikupùppù ya molopai itemyatù uchipittàppù.

¹¹ Tùse tok we'naikasak wechippù, tok uselupappù yà'là là kupù tùuya'nokon Jesus winàkàik pàk.

Jesus Uya 12 Pan Kon Teunossan Woton Yanùmù

¹² Màlà yattai Jesus utàppù wùk pona àpùlemase, iwàpùlemappù pata temakkwase.

¹³ Wei wepakkasak yau ta'lon kon kà'mappù ya tùpyak molopai 12 pe tok yanùmùppù ya.Tok yesettàppù ya “teunossan” tukaik.

¹⁴ Simon (Peter pe nàlà inesettàppù) molopai Andrew itonpa, James, John, Philip, Bartholomew,

¹⁵ Matthew, Thomas, James Alphaeus mumu, Simon Zelotes tukaik tesassen,

¹⁶ Judas James mumu, molopai Judas Iscariot, Katù Mumu yeimipponài pe iwenasak lùppù.

Jesus Uya Enupantok Molopai Ipittàntok

¹⁷ Jesus uttàppù ta'lon kon pokonpe wùk poi, molopai satippe iwechippù nomon po tukkan kon tùwenaimanài nan kùlottau. Ilinà pe kulu kappon yamùk wechippù màlà molo tamùnawàlà Judea pon kon molopai Jerusalem pon kon, molopai palau yena pon Tyre molopai Sidon pon kon.

¹⁸ Tok uyàpùppù màlà Jesus yetase molopai echipittàse tepalan kon yapai. Mùkyamlo àli akkwalù naimelunpa ton uyàpùppù nàlà màlà molopai tok uchipittàppù.

¹⁹ Tamù'nawolon kon kappon yamùk wechippù yapàtùiche màlà, masapùla meluntà wepakkappù màlà yapai molopai tok ipittàppù ya tamù'nawàlà.

Utauchinpantok molopai Usewankono'mantok

²⁰ Jesus uya ta'lon kon yeneppù màlà molopai, “Tùutauchinpasan amyamlo entuppak tùwessan. Katù wechi eyepulu kon pe màlà!

²¹ “Tùutauchinpasan amyamlo napàkkassai'nannùk sàlà pe, auta'lettà kon màlà tùwenukasse. Tùutauchinpasan amyamlo nùsewankono'mayainan'nùk sàlà pe, masapùla àwàkklà kon màlà.

²² “Tùutauchinpasan amyamlo kappon yamùk uya eyeya'noma kon yau, ànulunpa kon yau, àmottùnpa kon yau, molopai àli ton amyamlo te, Kàyik Mumu pàkànsau yau!

²³ Tùuseka'nonkaik matauchinpatàik màlà wekkupù yau, masapùla eke e'mantok kupù man àponalok kon pe epùn po. Masapùla tok tamo yamùk uya màlà, màlà kupùppù Katù Maimu yenpoikannan winàkàik.

²⁴ “Tùse àsà àpo'nokon man, amyamlo, italumayippù pe pùla temamin ke nai'nan nùk sàlà pe, masapùla wakù pe talà ewemassak kon pàk!

²⁵ “Àsà àpo'nokon man, amyamlo, wakù pe yewetù nai'nannùk sàlà pe, masapùla awapàkkappù kon màlà! Àsà àpo'nokon man, amyamlo nàkklàyai'nan nùk sàlà pe. Masapùla eusewankono'ma kon màlà molopai akalawù kon.

²⁶ “Àsà pe iwechi màlà àpàkù'nokon tamù'nawolon kon uselupa wakù pe yau, masapùla tok tamo yamùk uya màlà, màlà yamùk teppù ailon ton pen itekale yenpoikannan pàk,” teppù ya.

Eyeyaton kon I'nùnmatàk kon

²⁷ “Tùse tekamayaik àpàkù'nokon mùkyamlo uyetayai'nannùk. Eyeyaton kon i'nùnmatàk kon, wakù ikuttàk kon eyeya'nomanài' nokon winàkàik.

²⁸ Wakù ikuttàk kon apa'nùssatài'nùk winàkàik molopai àli pe tùuselupasen ewinàkàik nokon pona àpùlematàk.

²⁹ Ànù'là uya àwànà eyenpata yai yau, tàwà ilatoi yai nàlà àwànài. Ànù'là uya ayassan kon yalà yau, tàwà àpon kon yepoino nàlà yalài.

³⁰ Ànù'là yà'làlà yennanài àpàkù'nokon mùlepatàik, molopai ànù'là uya emamin yasak yau kùsekamapotàu inappo toppe ya.

³¹ Kappon yamùk uya ewinàkài ikupù iche ewettok ikukkà tok winàkàik.

³² “À'nùnmanài nan neken pùnùnma auya'nokon yau, yà'là ken wakù yepolo auya'nokon? Àli ton là mà mùkyamlo tù'nùnmanài nan pùnùnmanài nan tà!

³³ Molopai wakù ku'nài nan neken ewinàkàik winàkàik wakù kupù auya'nokon yau, yà'là ken wakù yepolo auya'nokon? Àli ton nà mùkyamlo màlà ku'nài nan!

³⁴ Molopai itesak pe ewettok kon tùlù auya'nokon yapulà toppe, mùkyamlo tok uya innappo pe neken ànùttu kon yemyak yau, yà'là ken wakù yepolo auya'nokon? Àli ton nà mùkyamlo itesak pe tùwettok kon tùnài nan yapulà toppe wa làma innapposak yepotok pe tùuya' nokon.

³⁵ Tùse làkku eyeyaton kon i'nùnmatàk kon, wakù ikuttàk kon tok winàkàik. Itesak pe ewettok kon itùtàk kon yapulà toppe molopai innappo pàk enpen kettàu. Eke pe iche ewettok kon yepolo auya'nokon màlà, molopai Eke Meluntà tùnamasen Katù ponalok kon pe ewechi kon màlà. Masapùla wakù mùkkàlà tenki tawonnan pen pàk molopai àli ton pàk.

³⁶ Tùusentuppaik ettàk kon, Katù Àkàipùnù kon wechi tùusentuppaik kasa làma,” teppù Jesus uya.

Ànù'là sa'ne Ittutok molopai Italumattàtok

³⁷ “Ànù'là winàkàik àli pe kesenumenkatàu àli pe usenumenkan ewinàkàik tukaik. Ànù'là kùttalumattàtàu, Katù uya atalumattà kon tukaik ànù'là pàk mesentuppatàik molopai Katù usentuppa màlà àpàkù'nokon.

³⁸ Ànù'là ilepatàk kon, molopai Katù uya elepa kon màlà, eke pe yepolo auya'nokon ewe'lepappù kon yentai, yachi auya yentai. Anapulà ànù'là ponaloppe yapulà Katù uya màlà àponalok pe, wa lùppù,” teppù Jesus uya.

³⁹ Molopai Jesus uya sàlà panton yekamappù, “Enpùn kappon uya tùulon enpùn yalà yentai iwechi màlà, yalà ya yau, asakklàma tok wepuka màlà non yakasak yak.

⁴⁰ Tenupasen mùkkàlà tenupanài yentaino pen. Tùse tamù'nawolon yenupasak kon wechi màlà tenupanàippù kasa.

⁴¹ “Yà'là pe ken iwechi pàk àtonpa kon yenu yawon elekkwà kulu apok ippunuppù yennài nan amyamlo, tùse eke yei tense pùla eyenu kon yau?

⁴² Atta ken uchi àtonpa kon pàk, ‘Utonpa, masa elekkwà kulu apok ippunuppù tùmokkaiche eyenu yapai,’ te auya'nokon, eke yei eyenu yawon tense pùla là? Tùwetapansan amyamlo! Eke yei imokkakà eyenu yapai wapiya, molopai nen uchi elekkwà apok ippunuppù àtonpa kon yenu yawon yene auya'nokon màlà molopai imokka auya'nokon,” teppù Jesus uya.

Yei molopai Itepelu

⁴³ “Wakù nulà nan yei màlà àli pe itepelu tùwessen pen molopai italumayippù yei màlà wakù pe itepelu tùwessen pen.

⁴⁴ Tamù'nawolon yei màlà tùttusen itepelu winà fig itesek kùyali, pàikanài nan pen amyamlo àmà'nà yek poi, wapùla chi'nak itek grape itesek pàikanài nan pen amyalo kalalaik yek poi.

⁴⁵ Wakù kappon mùkkàlà wakù ne'nài wakù tewan yawon kon yapai, molopai àli kappon mùkkàlà àli ne'nài àli tewan yawon kon yapai. masapùla kappon mùta màlà tewan wanùssak ike nai'nùk pàk tùuselupasen,” teppù Jesus uya.

Asa'lon Kon Tapùi Yamùnnan

⁴⁶ “Yà'là pe ken uchi iwechi pàk uyesatù auya'nokon màlà, ‘Uyepulu, Uyepulu,’ tukaik unekamappù àpàkù'nokon kupùi'ma pùla?

⁴⁷ Ànù'là tùuyàssen upyak molopai umaimu yetanài, molopai iku'nài umaimu yawàlà wechi yà'là kasa là yekama uya màlà àpàkù'nokon.

⁴⁸ Tapùi yamùnàippù kasa iwechi màlà i'nak yakanàippù molopai yapon tùnàippù tàk pona. Tuna'ma uyàpùppù molopai tapùi wànàppù ya tùse ilaikappù ya pen, masapùla wakù pe kulu yamùsak pàk.

⁴⁹ Tùse mùkkàlà umaimu yetanài molopai iku'nài pen wechi màlà tapùi yamùnàippù yapon woton tùnonkaik pùla kasa. Tuna'ma uya tapùi wàssàk pon wàsak yau asse'ne kulu iwàpàppù. Àsà pe kulu iwekkawai'mappù màlà!” teppù Jesus uya.