Luke 4 - Patamuna New Testament Revised

Jesus Ittutok

¹ Jesus wennapoppù màlà Jordan poi Wakù Akkwalù ke tùwanùsse, molopai Wakù Akkwalù uya yalàppù wontaik yak.

² Màlà motau Makui uya ittuppù 40 pe wei kaichalà. Yà'làlà napùppù ya pen màlà màlà yattai. Màlàpàk iwan pe kulu iwechippù màlà wei wenukassak yau.

³ Makui, uya ipàk, “Katù Mumu pe ewechi yau, sà tàk yekamappokà eki pe iwena toppe,” teppù.

⁴ Jesus uya yeikuppù, “Katù Maimu uya màlà, ‘Kappon wemattok eki pàk neken kulu là pùla iwechi màlà, tùse tamù'nawolon Katù Maimu pàk,’ ” tesak tukaik. {DEU 8.3}

⁵ Màlàyau yalàppù ya, kawon wùk pona molopai tewinanpa tamù'nawolon wolù yau itepulu pe, itepoi we'nàtok yekamappù ipàk.

⁶ “Sàlà yepulu pe we'nàtok ke elepa uya molopai tamù'nawàlà temamin ke we'nàtok ke,” teppù ya ipàk. “Tamù'nawàlà itùsak lùppù sàlà uyemyak molopai itùlù uya nàlà màlà ànù'là unanùmù yemyak,” teppù ya.

⁷ “Tamù'nawàlà nen uchi sàlà wechi àponalok pe màlà uyapulàsak auya yau,” teppù ya.

⁸ Jesus uya yeikuppù, “Katù Maimu uya, ‘Itepulu Katù inamakà molopai mùkkàlà neken ya'là ekkà molopai iponalok pe e'wotokomakà!’ tesak man,” tukaik. {DEU 6:13}

⁹ Màlàyau Makui uya yalàppù Jerusalem pona, molopai kawon kulu Katù Yùwùk ipu pona itùlùppù ya. Molopai ipàk, “Katù Mumu pe ewechi yau, epukakà sàlà motapai,” teppù ya.

¹⁰ “Masapùla Katù Maimu uya, ‘Katù uya Inchelù yamùk pàk yekama màlà wakù pe amainanpa toppe tok uya,’ tesak man,

¹¹ ‘Tok uya ayachi màlà temyatù kon ke atta wànà auya tàk pona tukaik,’ tawon nàlà màlà,” teppù Makui uya. {PSA 91.1,12}

¹² Jesus uya yeikuppù, “Katù Maimu màlà, ‘Itepulu Katù kùttùlùi ittuntok yak’, tawon,” tukaik. {DEU 6.16}

¹³ Tamù'nawàlà Jesus ittu pàk tùwechi yenuka'nùssak tùuya yau, Makui uya inàmàppù malalà.

Jesus uya tùwotokoyi piyattà Galilee po

¹⁴ Màlàyau Jesus wennapoppù Galilee pona molopai Wakù Akkwalù meluntàlù wechippù ya'là màlà. Itekale usetappù màlà pata yamùk Galilee yawolon yawàlà.

¹⁵ Kappon yamùk yenupappù ya màlà tok wepilittok itak tau molopai tamù'nawolon kon uya yapulàppù màlà.

Jesus Nulunpappù Nazareth po

¹⁶ Màlàyau Jesus utàppù màlà Nazareth pona, temokkappù lùppù yau yak. Molopai Jew wàlàkkattok yattai iitàppù màlà wepili'nàtok itak tak tùwessek kasa. Iwe'wuluukappù màlà Katù Maimu yekamase kaleta yapai.

¹⁷ Molopai Katù Maimu yenpoikanài Isaiah itesek, kaletayi tùlùppù màlà itemyak. Kaleta yakkokappù ya molopai yepoloppù ya iwe'menukasak lùppù.

^18-19 “Wakù Akkwalù Itepulu winàpaino upo man. Ukalapaimasak ya man, Wakù Itekale yekamatoppe uya entuppa'nokon pàk. Uyeunossak ya man, wemokkantok yekamatoppe uya yachisak kon pàk molopai enpùnon yentoppe. Molopai tùtalumattàsan mokkase tok talumattàtok yapai. Itepulu Katù uya tùponalok kon kappon yamùk pùikattàtok yattai yekama toppe uya!” tukaik.

²⁰ Kaleta yakkoloppù ya, innapoppù ya itùnàippù yemyak molopai iweleutappù. Tamù'nawolon kon kappon yamùk wepilittok itak tawon kon wechippù itenupàkà.

²¹ Tok yelupa pàk iwepyattàppù, “Sàlà Katù Maimu nekkupàssan ailon pe iwekkupù màlà teppù kasa sàlà pe yekama metapùsatàik nùk kasa,” tukaik.

²² Molopai tamù'nawolon kon uselupappù wakù pe màlà ipàk. Molopai tok usenumenkappù wakù mayin iichelupappù lùppù pàk. Tok uya, “Joseph mumu pen ken na' mùkkàlà?” teppù.

²³ Tok pàk, “Tùttuyaik yekamasak lùppù yekama auya'nokon upàk, ‘Ipitànài, echipittàkà,’ tawon. Molopai, ‘Màlà yamùk ànkupùppù Capernaum po lùppù ina netappù nàlà ikukkà apatasek yau,’ te nàlà auya'nokon màlà upàk.

²⁴ “Ailon kulu sàlà,” teppù Jesus uya. “Ànù'là Katù Maimu yenpoikanài mùkkàlà tanùnsen kulu pen ipatassek yau.

²⁵ Kùyetatàk kon, ailon pe iwechi màlà. Tukkan kon itayappù iwelichak kon wechippù màlà Israel po Elijah yattai, konok pùla iwechi yau 3 1/2 pe kilichimochi molopai eke pe iwan wechippù màlà tamù'nawolon pata yawàlà.

²⁶ Tùse Elijah yeunokoppù pen màlà tok piyak tùse itayappù iwelichak lùppù pata Zarephath pon piyak neken, pata Sidon yawon pon piyak.

²⁷ Molopai tukkan kon welei pokon kon wechippù màlà Israel po Elijah yattai tùse tok wennapù wakù pe pen màlà, tùse Naaman, Syrian pon neken,” teppù Jesus uya tok pàk.

²⁸ Tamù'nawolon kon kappon yamùk wepili'nàtok itak tawon kon we'naikassak wechippù màlà sàlà yetasak tùuya'nokon yau.

²⁹ Molopai tok we'wuluukappù. Tok uya Jesus pàlàkappù pata yapai. Molopai tok uya yalàppù wùk nakatta pona, tùpatassek kon konekasak ipo tùuya'nokon pona, yenu'matoppe tùuya'nokon wùk poi.

³⁰ Tùse tukkan kon ton kùlottawà itàppù.

Kàyik Àli Akkwalù Yen

³¹ Màlàyau Jesus utàppù Capernaum pona, pata Galilee pon pona, kappon yamùk yenupappù ya molo, Jew yamùk wàlàkkattok yattai.

³² Tamù'nawolon kon usenumenkappù màlà enupantok ya yeselu pàk, masapùla imaimu wechi apàikkek pe pàk.

³³ Kàyik wechippù màlà molo wepili'nàtok itak tau àli akkwalù yen. Iwentaimeppù eke pe.

³⁴ “Yà'là pe ina wechi iche messan, Jesus Nazareth pon? Ina mattanùsse na’ àuyàssak màlà? Eyittuyan Iulà, Àmàlà mùkkàlà wakù, Katù winàpaino!” tukaik.

³⁵ Jesus uya meluntà pe akkwalù pàk, “Eppana ekkà, molopai epakkakà kàyik yapai!” teppù. Àli akkwalù uya kàyik yenu'mappù tok yemloto po, molopai iwepakkappù yapai tùmattanùsse pùla.

³⁶ Tamù'nawolon kon usenumenkappù màlà. Molopai tok uya tùtonpa kon pàk, “Yà'là yekkwa ken sàlà usenupantok? Meluntà pe molopai apàikkek pe ku pùsàlà kàyik àli akkwalù wepakka toppe nekamai, molopai nepakkai!” teppù.

³⁷ Molopai Jesus yekale utàppù màlà tamù'nawolon màlà pata yawàlà.

Jesus Uya Tukkan Kon Kappon Yamùk Ipittà

³⁸ Jesus uya wepili'nàtok itak nàmàppù molopai iitàppù Simon yùwùk tak. Simon yewoppù wechippù e'nek pe iwàkkàmi'masak, molopai Jesus pàk tok uya yekamappù.

³⁹ Iitàppù molopai satippe iwechippù itekkwek piyau molopai iwàkàmi'matok pàk, “Wa là àmolonkakkà,” teppù ya. Màlàyau iwàkkàmi'makapùppù molopai iwà'mùssakappù asse'ne kulu, tok yeipa konekappù ya.

⁴⁰ Wei wewomù tùpo, kappon yamùk uya tamù'nawàlà e’nek ton tùpatalo'nan itepalan ton nepùppù Jesus piyak. Temyatù tùlùppù ya tewin pàk tok pona molopai tok ipittàppù ya.

⁴¹ Àli ton akkwalù nàlà wepakkappù tukkan kon kappon yamùk yapai, tùwentaimeipàtùi’ma' nokon, “Katù Mumu, Àmàlà!” tukaik. Jesus uya tok yàulàmappù molopai tok uselupa toppe ikupùppù ya pen, masapùla tok uya enupanài Christ pe tùwechi ittu pàk.

Jesus uya Itekale Yekama Judea po

⁴² Ko'làma kulu Jesus uya màlà pata nàmàppù molopai iitàppù tùkkenan pata yak. Kappon yamùk uya iwappù, molopai yepossak tùuya'nokon yau tok wechippù yeleutanùpù iche iità tukaik.

⁴³ Tùse tok pàk, “Wakù Itekale, Katù wettok Itepulu pe, yekale yekama uya nàlà màlà tùulon pata yamùk yau, masapùla màlà kusse màlà Katù uya uyeunossak,” teppù Jesus uya.

⁴⁴ Màlàpàk Itekale yekamappù ya wepili'nàtok itak yamùk tau Judea po.