Luke 17 - Patamuna New Testament Revised

Makui

¹ Jesus uya ta'lon kon pàk wateppù, “Yà'là yamùk là kappon yamùk ku'nài makui yak tok utàtoppe, wekkuppù pe man. Tùse àsà pe kulu iwechi màlà iwekkutoppe iku'nài pona!

² Wakù peiwa nen iwechi màlà, eke tàk, eppanài, yaulonsak i'mù pàk molopai yenu'masak palau kak yau, pùsamlo echikili ton nùkkwà wettoppe àli pe ikupù ya tukaik.

³ Màlàpàk esentàk kon! “Àtonpa kon wemakuima yau, mekamappotàik, molopai tùmakuyi winàpai iwelattà yau, mesentuppatàik ipàk.

⁴ Iwemakuimasak ewinàkàik 7 pe itekkwa tewin wei yau yattai, molopai màlà yattai'ne iyàppàtù apyak, ‘Usewankono'mayaik,’ kase yau, ipàk mesentuppatàik,” teppù ya.

Ailon tetok

⁵ Yeunossak kon uya Itepulu pàk, “Ailon tetok ina uya yeka'nùkkà,” teppù.

⁶ Itepulu uya yeikuppù, “Ailon tetok auya'nokon wechi mustard yenappà kaichalà yau, sàlà kùyali yek pàk, ‘Ekalakakà, akala pokonpe molopai àppànkà palau kak!’ te auya'nokon sàlà eppaino molopai amaimu kon yawàlà iwechi,” tukaik yeikuppù ya.

Apyoto Wotokoyi

⁷ “Tewinan nà àtonpa kon wechi tapyoto ke, umà yakanài pe là, wapùla kalinilu yamùk mainanpanài pe. Umà yapai ken na' iyàssak yau, ‘Asse'neiwa àikkà, molopai ata'lettàkà,’ tawonnan amyamlo? Kane ku!

⁸ Tùse, ‘Uyeipa ikonekakà molopai ekonekakà inepù pa, umàmukupa uta'lettà tùse molopai uwuku inchi uya tùse. Màlà tùpo là nen uchi auta'lettà màlà molopai àwuku inchi auya,’ tawonnan amyamlo ipàk.

⁹ Apyoto sa' mùkkàlà tenki tetok ipàk pen mayin yawàlà lànen iwechi tùse, ewaik na'?

¹⁰ Màlà kasa làmaichi ewechi kon nai'nùk, tamù'nawàlà yekamasak lùppù ànkupù kon pe kussak auya'nokon yau, ‘Apyoto yamùk neken nen ina, ina uya nen tùwotokoyi kon neken kussak sàlà,’ te màlà auya'nokon,” teppù Jesus uya.

10 Pan Kon Weleippa'nan Kon Ipittà

¹¹ Jerusalem pona tùutà pe Jesus utàppù màlà Samaria molopai Galilee tawon yakkletawà.

¹² Tùulon pata yak tùutà pe iitàppù màlà, màlà yattai 10 pan kon weleippa'nan kon uya yepoloppù. Mei tok wechippù màlà satippe.

¹³ Molopai tok wentaimeppù màlà, “Jesus, Itepulu! Ina pàk esentuppakà!” tukaik.

¹⁴ Jesus uya tok yeneppù màlà molopai tok pàk, “Itàtàk kon paatele uya eyentok kon pe,” teppù. Tok utà tùse tok uchipittàppù màlà wakù pe.

¹⁵ Tok tonpa wennapoppù Katù yapulà pe eke pe tùwentaimepàsse tùuchipittàsak yene tùuya pàk.

¹⁶ Iwettolùpattàppù màlà non pona Jesus pùta piyak, tenki tei'ma. Samaria pon pe iwechippù màlà.

¹⁷ Jesus uselupappù, “10 pan kon ku kàyik yamùk nùchipittài? I'nai ken mùkyamlo 9 pan kon?

¹⁸ Yà'là pe ken uchi iwechi pàk pùsàlà neken nà kaklan nennapppoi tenki kase Katù pàk?” tukaik.

¹⁹ Molopai Jesus uya ipàk, “E'wuluukakà, molopai itàkà. Ailon tetok auya uya pàli'yau amasak màlà,” teppù.

Katù Wettok Itepulu Pe Uyàttok

²⁰ Pharisee yamùk tonpa uya tekamapposak yà'là yattai là Katù wettok Itepulu pe uyàpù pàk yau. Jesus uya yeikuppù, “Katù wettok itepulu pe màlà tùusense là tùuyàssen pen.

²¹ Ànù'là uya, ‘Sàlà yenkà,’ wapùla, ‘Màlà yenkà,’ te pùla iwechi màlà. Masapùla Katù wettok itepulu pe màlà ayau'nokon tùwessen,” tukaik.

²² Màlàyau ta'lon kon pàk, “Wei uyàpù màlà Kàyik Mumu weyu, enenpai ewettok kon yattai, tùse yene auya'nokon pen màlà.

²³ Molo tok wechi màlà, ‘Mailà yenta,’ wapùla, ‘Sàilà yenkà,’ tawonnan. Tùse yense kùtàtàu!

²⁴ Pata wekamlippù uya pata yakkwaka sàlà motapai ilatoi pona kasa Kàyik Mumu wechi màlà tùweyu yattai.

²⁵ Tùse wapiya iwettalumattà màlà molopai sàlà palok kon kappon yamùk uya inulunpa màlà.

²⁶ Noah yattai iwechippù kasa làma iwechi màlà, Kàyik Mumu weyu yattai.

²⁷ Kappon yamùk wechippù màlà tùuta'lettà kon pàk molopai tùwuku kon inchi pàk, kàyik yamùk molopai nossan yamùk wechippù tùwemali'mapàtù kon pàk Noah wenuku tùkanwa yak ponalà, molopai tuna'ma uyàpùppù màlà, tok yeulankappù ya tamù'nawàlà.

²⁸ Màlà kasa làma iwechippù Lot yattai. Kappon yamùk wechippù màlà tùuta'lettà kon pàk molopai tùwuku kon inchi pàk, yà'làlà ye'mapàtù pàk molopai yà'làlà chilanma pàk, tùwàppàmà kon pàk molopai tapùi yamù pàk.

²⁹ Lot uya Sodom nànsak yau màlà wei yattai, apok molopai kulupala kasa tùkà'nùnsen uyàpùppù Epùn poi molopai tok pottàppù ya màlà tamù'nawàlà.

³⁰ Màlà kasaichi iwechi màlà Kàyik Mumu usenpoika yau.

³¹ “Màlà yattai kappon tùwùk ipu po tùwessen uttà tapluli yense tùwùk tak pen màlà. Màlà kasa làma kappon umà yau nai'nùk wennappo yà'là là yense pen màlà.

³² Lot noppù ittutàk kon!

³³ Ànù'là takkwalù pùnùnmanài tùponalok pe uya ilachima màlà, tùse ànù'là takkwalù lachimanài uya yepolo màlà.

³⁴ Màlà yewalupàyi tau asa'lon kon we'nùmù màlà tewinan tapon kon po. Tewinan nà yanùmù màlà, molopai yakon wà'nàmà.

³⁵ Asa'lon kon nossan yamùk wechi màlà a'naik yeppa pàk echippyau. Tewinan nà yanùmù màlà molopai yakon wà'nàmà.

³⁶ Asa'lon kon kàyik yamùk wechi màlà umà yau. Tewinan nà yanùmù màlà molopai yakon wà'nàmà màlà, ukayaik àpàkù'nokon,” teppù Jesus uya.

³⁷ Ya'lon kon uya yekamappoppù, “I'nailà ichi Itepulu?” tukaik. Jesus uya yeikuppù, “Ekek wettok imotau yak màlà kassanak yamùk wepilipù,” tukaik.