John 8 - Patamuna New Testament Revised

Tùtayappù Pen Pokon Pe Nossan Wechi Yepoloppù

¹ Tùse Jesus utàppù Olive Tùpù pona.

² Yakon wei yattai ko'làma iwennappoppù Katù yùwùk tak. Màlàyau kappon yamùk uyàpùppù ipyak, iweleutappù, molopai tok yenupa pàk iwessa'molùkappù.

³ Law pàk enupannan molopai Pharisee yamùk uya nossan tùtayappù pen pokonpe iwessak lùppù nepùppù. Tok uya ichalattàppù tamù'nawolon kon yemloto pona.

⁴ Molopai tok uya Jesus pàk, “Ticha, pùsà nossan wechi tùtayappù pen pokonpe yeposak man.

⁵ Law yau Moses uya màlà, ‘Sàlà kasa iwessak lùppù wànà màlà tàk ke ekek pe,’ tesak ina pàk. Tùse yà'là mùkayan nen màlà pàk?” teppù.

⁶ Wa tok uya yekamappoppù màlà yachitok tùuya'nokon iwinà pe, italumattàtok tùuya'nokon ipàkàlà pe. Tùse Jesus wepeimappù molopai non menukappù ya temyatù ke.

⁷ Tok uya lùppù tekamappopàtù yau iwà'mùssakkappù, “Tàwà ànù'là imakuyi pùn wapiya kulu tàk yenu'mai ipona,” teppù ya tok pàk.

⁸ Wate tùpo iweleutatukkappù molopai non menukappù ya.

⁹ Yetasak tùuya'nokon yau, tok wessa'molùkappù tùutà kon pàk, tewin pàk wapiya eke ton utàppù, Jesus neken tùnànse nossan pokonpe.

¹⁰ Jesus we'wuluukappù, “Nossan, i'nai mùkyamlo? Ànù'là na' atalumattà woton pùla nai?” teppù Jesus uya.

¹¹ Nossan uya yeikuppù, “Kane, Uyepulu, ànù'là pùla man,” tukaik. Jesus uya ipàk, “Iulà uya nàlà atalumattà pen sàlà. Itàkà molopai tàwà amakuyi inonkakà,” teppù.

Jesus Wolù Weyu

¹² Màlà tùpo Jesus uya kappon yamùk yelupatu'mappù, “Iulà mùkkàlà sàlà wolù weyu. Ànù'là uya'là tùuyàssen usalà ewalupàttau pen màlà, tùse wema'nàtok weyu yesappe iwechi,” tukaik.

¹³ Màlàpàk Pharisee yamùk uya ipàk, “Eyiwalà, àponalok pe neken euselupa màlà, tùse euselupatok màlà ailon pen,” teppù.

¹⁴ Jesus uya tok maimu yeikuppù, “Uyiwalà là uponalok pe uselupa tùse ailon màlà uselupatok. Masapùla tùttuyaik i'nai motapai là uyàpùppù, molopai i'nai motak là utà. Tùse imotapai uyàpùppù wapùla imotak utàtok ittutok auya'nokon pùla messatàik.

¹⁵ Kappon yamùk yeselu yawàlà sà kasa messaik tawonnan amyamlo. Tùse ànù'là pàk watawon pen Iulà.

¹⁶ Tùse kappon pàk sà kasa messaik teuya pe iwechi yau, uselupatok wechi màlà ikasa. Masapùla tewincha pùla wechi pàk, Ukàipùnù uyeuno'nàippù mùkkàlà upyawon.

¹⁷ Iwe'menukasak man àmàlà' nokon Law yau, asa'lon kon uselupatok màlà ailon tukaik.

¹⁸ Iulà mùkkàlà upàk tùuselupasen molopai tùulon upàk tùuselupasen mùkkàlà Ukàipùnù, uyeuno'nàippù,” tukaik.

¹⁹ Màlàyau tok uya yekamappoppù, “I'nai ken uchi mùkkàlà Àkàipùnù?” tukaik. Jesus uya tok maimu yeikuppù, “Uyittu auya'nokon pùla messatàik, wapùla Ukàipùnù là. Uyittu auya'nokon yau Ukàipùnù nàlà ittu auya'nokon màlà,” tukaik.

²⁰ Sàlà màlà Jesus uselupappù Katù yùwùk tawon pùlayatta pilittok yak motau echii'ma, tùse ànù'là uya yachippù pen, masapùla iweyu uyàssak pùla lùppù iwechi pàk.

Utàyai'nùk yak Àutà kon pen

²¹ Màlàyau Jesus uya tu'ma tok pàk, “Utà sàlà, molopai uyiwa auya'nokon màlà. Tùse ewelikù kon màlà amakuyi kon yau. Utàyai'nùk yak àutà kon pen,” teppù.

²² Màlàyau Jew yamùk uya, “ ‘Utàyai'nùk yak àutà kon pen,’ nùkayan. Tùwe'wànà pàk na' wate ya màlà?” teppù.

²³ Jesus uya tok maimu yeikuppù, “Yo'non winon kon amyamlo, tùse Iulà mùkkàlà kaupaino. Sàlà wolù pon kon amyamlo, tùse Iulà mùkkàlà sàlà wolù pon pen.

²⁴ Ewelikù kon màlà amakuyi kon yau teuya nettainùk. ‘Mùkkàlà Iulà’ teuya pàk ailon te auya'nokon pùla ewechi kon yau, ewelikù kon màlà amakuyi kon yau,” tukaik.

²⁵ Tok uya yekamappoppù, “Ànùk ken uchi àmàlà?” tukaik. Jesus uya tok maimu yeikuippù, “Iweppyattà motapai àpàkù'nokon tekamatainùk Iulà.

²⁶ Tùse tukke àpàkù'nokon uselupatok molo man, molopai suwa messatàik tetok uya. Tùse uyeuno'nàippù mùkkàlà ailon kulu molopai kappon yamùk wolù yawon kon pàk unetappù neken iwinàpai yekamanài Iulà,” tukaik.

²⁷ Tok uya ittu pùla iwechippù Tùkàipùnù pàk telupa kon ya tùse.

²⁸ Màlàpàk Jesus uya tok pàk, “Kàyik Mumu yekainùnpasak auya'nokon yau, Mùkkàlà pe nen uchi uyittu auya'nokon màlà,’ molopai uyiwalà nàlà yà'là là kupùppù uya pe pùla, tùse Ukàipùnù uya neken uyenupatok pàk uselupappù pe iwechi.

²⁹ Uyeununo'nàippù mùkkàlà upyauwon, tewincha unànnài pen mùkkàlà. Masapùla tàwàlàlà yauchinpanài ku'nài Iulà,” teppù.

³⁰ Wa tukaik ichelupa tùse, tukkan kon uya ailon teppù ipàk.

Abraham Munkà

³¹ Màlàyau Jesus uya ailon tawonnan tùpàk Jew yamùk pàk, “Enupantok uya yawàlà ewechi kon yau, unenupa ton pe kulu ewechi kon màlà.

³² Ailon ittu auya'nokon màlà, molopai ailon uya apyoto pe pùla àkupù kon,” teppù.

³³ Tok uya imaimu yeikuppù, “Abraham payanùssan nen ina, yà'là yattai là ànù'là yapyoto pe ina wessak pùla man. Yà'là te ken uchi auya uya màlà, ‘Appyoto pe pùla àkupù,’ te?” tukaik.

³⁴ Jesus uya tok pàk, “Ailon kulu sàlà, ànù'là tùwemakuimasen mùkkàlà makui yapyoto.

³⁵ Apoyoto mùkkàlà tàwàlàlà itepulu yùwùk tau tùtonpa yamùk kùlottau tùwessen pen, tùse imu neken molonnà tàwàlàlà.

³⁶ Imu uya àmokkasak kon yau, imokkasak pe ewechi kon màlà apyoto pe làma pùla.

³⁷ Tùttuyaik Abraham payanùssan pe ewechi kon, tùse neichi uwàpai messatàik ko, masapùla umaimu patassek pùla eyewan kon yau iwechi pàk.

³⁸ Sàlà uselupa Ukàipùnù piyau wechi yau uneneppù pàk, molopai àkàipùnù kon nekamappù ku'nàinan amyamlo,” teppù.

³⁹ Màlàyau tok uya, “Abraham nen mùkkàlà ina kàipùnù,” teppù. Jesus uya tok maimu yeikuppù, “Abraham munkà pe ewechi kon yau, inkupùppù kupù auya'nokon sàlà eppaino.

⁴⁰ Màlà kasa uwàpai messatàik, mùkkàlà ailon yekamanàippù àpàkù'nokon Katù winàpai unetappù. Abraham uya nen sàlà walai kupù pùn!

⁴¹ Amyamlo mùkyamlo àkàipùnù kon nùkupù ku'nài nan,” teppù Jesus uya. “Yapàka yamùk pen nen ina. Tewinan neken nen mùkkàlà ina kàipùnù Katù, ” teppù tok uya Jesus pàk.

⁴² Jesus uya tok pàk, “Katù wechi àkàipùnù kon pe yau, u'nùnmatok auya'nokon pan. Masapùla Katù winàpai uyàsak pàk, molopai sàlà pe talà wessaik. Uyiwalà uyàsak pen, tùse mùkkàlà uya uyeunossak.

⁴³ Yà'là pe iwechi pàk uselupa ittu auya'nokon pùla ewechi kon? Masapùla uselupatok enetapai pùla ewechi kon pàk,” teppù.

⁴⁴ “Àkàipùnù kon Makui, ponalok kon amyamlo, molopai iche iwettok ku'nàinan. Iweppyattàppù motapai wànài pe iwessak màlà molopai kasei pe, masapùla ailon pùla iwechi màlà, yau. Kasei pe iichelupa yau iteselu màlà, masapùla kasei mùkkàlà molopai kasei kàipùnù.

⁴⁵ Tùse ailon yekama uya pàk, ailon te auya'nokon pùla man upàk.

⁴⁶ Ànùk amyamlo kùlottau àli ku'nài pe uyittuyan? Ailon pe uselupa tùse yà'là pe iwechi pàk ailon te auya'nokon upàk pen màlà.

⁴⁷ Katù ponalok kon mùkyamlo Katù Maimu yetannan. Tùse iponalok pe pùla ewechi kon pàk màlà yeta auya'nokon pùla iwechi,” teppù Jesus uya tok pàk.

Jesus molopai Abraham

⁴⁸ Jew yamùk yepulu yamùk uya yeikuppù, “Ikasa pùla na' iwechi màlà, ‘Samaria kok àmàlà molopai Makui nakkwalùttàppù,’ te ina uya yau?” tukaik.

⁴⁹ Jesus uya tok maimu yeikuppù, “Makui yakkwalù pùla nen man uyau. Ukàipùnù namanài Iulà, tùse amyamlo unamannan pen.

⁵⁰ Unamatok iwa uya pùla man. Tùse molo man tewinannà unamatok iwanài, ikasa ittunài mùkkàlà.

⁵¹ Ailon kulu sàlà, ànù'là umaimu yawolonnà wechi yau, weli'nàtok yene ya pen màlà,” tukaik.

⁵² Tok uya ipàk, “Ina nen uchi nùttuyan Makui wechi ayau pe. Abraham welikùppù molopai Katù Maimu yenpoikannan nàlà, tùse ‘Ànù'là umaimu yawàlà tùwessen welikù pen,’ te auya.

⁵³ Abraham uchi ina kàipùnù yentaino àmàlà? Iwelikùppù man molopai Katù Maimu yenpoikannan nàlà. Ànùk pe nen mechittuyan?” teppù.

⁵⁴ Jesus uya tok yeikuppù, “Uyiwalà utapulà yau, utapulàtok màlà yà'là pen. Tùse Ukàipùnù, Ukatùyi mùkayatài'nùk ipàk mùkkàlà uyapulànài.

⁵⁵ Ittu auya'nokon pùla là man, tùse tùttuyaik. Mùkkàlà ittu uya pùla man te uya yau, akasa'nokon kasei pe wechi màlà. Tùse unùttu mùkkàlà, imaimu yawàlà wettok.

⁵⁶ Atamo kon, Abraham utauchinpappù uyàpù weyu yene tùuya pe iwechi pàk. Yeneppù ya màlàpàk iitauchinpappù,” tukaik.

⁵⁷ Màlàyau Jew yamùk yepulu yamùk uya Jesus pàk, “50 pe kilichimochi yentakappù auya pùla messaik, tùse yà'là kasa Abraham yeneppù auya?” teppù.

⁵⁸ Jesus uya tok pàk, “Ailon kulu sàlà, Abraham wentu wapiya iwemassak lùppù Iulà. Molonnà Iulà,” teppù.

⁵⁹ Màlàpàk tàk yanùmùppù tok uya ipona yenu'matoppe tùuya'nokon. Tùse Jesus uso'namùppù, molopai iwepakkappù Katù yùwùk tapai.