John 2 - Patamuna New Testament Revised

Wemali'mantok Cana po

¹ Icholùwano wei yattai wemali'mantok wechippù pata Cana po, Galilee yawon po. Jesus san wechippù molo,

² molopai tùwemali'masan uya Jesus kà'masak wechippù inenupa ton pokonpe wemali'mantok yak.

³ Tok uku wain u'matùppù yau, Jesus san uya, “Wain wenukapùppù man,” teppù ipàk.

⁴ “Nossan, màlà ikukkà kùkai upàk. Masa uweyu uyàssak pùla lùppù man,” teppù ya tùsan pàk.

⁵ Jesus san uya apyoto yamùk pàk, “Yà'làlà te ya yau mùkuttàik,” teppù.

⁶ Jew yamùk wechippù màlà wekolùkantok yeselu yesappe Katù nanùmù yeppe. Màlàpàk màlà 6 pe tàk yapai ikonekasak kon wai yamùk wechippù molo. Tewinan uya 20 wapùla 30 gallons yachippù.

⁷ Jesus uya apyoto yamùk pàk, “Wai yamùk yanùkkapàttàk kon tuna ke,” teppù. Màlàyau tok uya yanùkkapàtùppù tanùkkakasse kulu.

⁸ Molopai tok pàk, “Yanùntàk kon uchi molopai matàik uta'lettàn yepulu piyak,” teppù ya. Tok uya yalàppù ipyak.

⁹ Molopai tuna iwemyakanmasak lùppù wain pe yonpappù ya. I'nailàpai là iwessepoloppù ittuppù ya pen, apyoto yamùk tuna yanùnnài nan nùssan uya neken ittu tùse màlàpàk tùwemali'masen umoine kà'mappù ya.

¹⁰ Molopai ipàk, “Tamù'nawolon kon mùkyamlo wapiya wakù wain ne'nàinan, molopai nen uchi ikà'masak kon uya yeuno'makasak yau àkàmlàk lùppù àli lùiwa nepù tok uya, tùse wakù mainanpappù auya man sàlà tepose,” teppù ya.

¹¹ Sàlà màlà wapiya kulu eke tùwotokoyi yamùk piyattàppù Jesus uya Cana, Galilee yawon po. Molo màlà kupù tùuya ke tapàikketù yenpoikappù ya. Màlàyau inenupa ton uya ailon tetok tùuya'nokon Ipàk.

¹² Màlà tùpo Jesus, ichan, yakonnon moloppai inenupaton tukaik tok utàppù Capernaum pona. Molo tok uko'mamùppù malalà.

Katù yùwùk Tak Jesus Utà

¹³ Usentaka'nàppà yattai Jew yamùk uta'lettà weyu wechi mei pùla yau, Jesus utàppù Jerusalem pona.

¹⁴ Katù yùwùk tau paka yamùk, kalinilu yamùk, wakokkwa yamùk chilanmannan yepoloppù ya, molopai tùulon kon wechi chichiupe tùtepùlùyikon piyau'ne pùlayatta yenchimapàtù pàk.

¹⁵ Wappu kapùppù ya molopai màlà ke tamù'nawàlà tok yenpakkappù ya tok yùkùnnon paka yamùk molopai kalinilu yamùk là pokonpe Katù yùwùk tapai. Pùlayatta yenchimannan pùlayattayi yapon lattàpàtùppù ya, molopai pùlayatta pun yamùk ta'nùpùppù ya.

¹⁶ Wakokkwa yamùk chilanmannan pàk, “Tok yenpakkatàkkon sàlà tapai. Yà'là kasa Ukàipùnù yùwùk kussak auya'nokon màlà yà'làlà chilanma yùwùk pe,” teppù ya.

¹⁷ Inenupa ton uya ittuppù Katù Maimu we'menukasak uya, “Àyùwùk pùnùnmatok uya eke pe man,” teppù lùppù.

¹⁸ Màlàyau Jew yamùk yepulu yamùk uya Ipàk, “Yà'là ken yentok ipàkàlà tensen pen kupù auya ina uya yentoppe, ikasaichi sàlà yamùk kupù auya yattai?” teppù.

¹⁹ Jesus uya tok maimu yeikuppù, “Sàlà Katù yùwùk yamokklottàk kon molopai àsolùwau wei yau yamù tukka uya màlà,” tukaik.

²⁰ Jew yamùk yepulu yamùk uya Imaimu yeikuppù, “46 pe kilichimochi sàlà Katù yùwùk yamùppù màlà tùse ken na' uchi àsolùwawon neken wei yau yamùkapù auya?” tukaik.

²¹ Tùse Jesus uselupappù nen màlà tesak pàk.

²² Tùwelikù tùpo iwe'wuluukasak yattai, inenupa ton uya wa teppù ya lùppù ittuppù, màlàpàk ailon teppù tok uya Katù Maimu yau iwe'menukasak pàk, molopai Jesus maimuppù pàk.

²³ Jerusalem po Jesus wechi Usentaka'nàppà yattai Uta'lettàntok pàk yau, tukkan kon kappon yamùk uya eke ton tùwotokoyi kupùya yeneppù molopai ailon teppù tok uya ipàk.

²⁴ Tùse Jesus uya ailon te tok pàk pùla iwechippù, tok yewan yawon ittu tùuya pàk. Molopai tamù'nawolon kon kappon yamùk ittu kulu tùuya pàk.

²⁵ Ànù'là uya kappon yamùk pàk telupa iche pùla iwechippù, masapùla kappon yamùk yewan ittu tùuya pàk.