John 15 - Patamuna New Testament Revised

Chi'nak Kùyali Yek

¹ “Iulà mùkkàlà ailon chi'nak grape yek, molopai Ukàipùnù mùkkàlà imainanpanài,” teppù Jesus uya.

² “Upanta pe nai'nùk tùwepetasen pen, yattàpàtù ya màlà. Molopai tùwepetasen koneka ya màlà wakù pe tukkeiwa iwepeta toppe.

³ Amyamlo wekonekasak man wakù pe masapùla umaimu yetasak auya'nokon pàk.

⁴ Uyau emakkà molopai Iulà nàlà wemapù màlà ayau. Grape yek màlà ipanta lùppù pe neken echii'ma tùwepetasen pen, tùse tek pàk neken tùwechi yau iwepeta, màlà kasa nàlà upàk pùla ewechi kon yau ewepeta kon pen màlà.

⁵ “Iulà mùkkàlà chi'nak, amyamlo mùkyamlo ipanta yamùk. Ànù'là uyau nemasai'nùk molopai yau nàlà wemasai'nùk mùkkàlà wepeta màlà tukke, masapùla Iulà pùla echii'ma yà'làlà kupù auya'nokon pen.

⁶ Ànù'là uyau pùla nemassai'nùk, mùkkàlà wechi màlà yenu'masak yei panta waipùtasak kasa, màlà yekkwa ton màlà tanussen molopai apok wa'nak tenu'massen iyattoppe.

⁷ Uyau ewemapù kon yau, molopai umaimu wechi ayau'nokon yau, iche ewettok yekamappokà molopai elepa màlà.

⁸ Tukke ewepeta kon yau, Ukàipùnù yapulàtok iwinà pe iwechi màlà. Sàlà winà unenupa ton pe ewechi kon yenpoika auya'nokon màlà.

⁹ Tù'nùn pe Ukàipùnù uya ukupù kasa u'nùn pe messatàik, pùnùnmantok uya yau uchi ettàk kon.

¹⁰ Eyenupatok kon uya kupù auya'nokon yau, pùnùnmantok uya yau ewechi kon màlà, Ukàipùnù uya uyenupatok yawàlà u'nùnmatok ya yau wechippù kasa.

¹¹ “Sàlà yamùk yekamappù uya àpàkù'nokon utauchinpatok wettoppe ayau'nokon, molopai autauchinpatok kon wettoppe tamù'nawàlà.

¹² Sàlà màlà enupantok uya. Tùuchi'nùnmaik ettàk kon, u'nùn pe àkupù kon uya kasa.

¹³ Eke kulu uchi'nùnmantok yenpoikatok kappon uya màlà tùweliche tùtonpa yamùk ponaloppe. Màlà yentaino kulu là uchi'nùnmantok pùn.

¹⁴ Uwechiyakonnon pe ewechi kon màlà yà'làlà tetok uya kupù auya'nokon yau.

¹⁵ Sàlà motapai apyoto yamùk pe, eyesatù kon uya pen sàlà, masapùla tepulu uya yà'làlà kupù ittunài pen mùkkàlà apyoto. Tùse eyesassak kon uya màlà uwechi yakon non tukaik, masapùla tamù'nawàlà Ukàipùnù winàpai unùttuppù ittu kon pa ikussak uya màlà.

¹⁶ Amyamlo uya uyanùnsak pen màlà, tùse Iulà uya ayanùnsak kon. Àutà kon pa epetaik, tachinpe molo tùwessen epelu ke. Màlà yattai yà'làlà yekamapposak auya'nokon Ukàipùnù pàk uyesek yai yau, elepa kon ya màlà.

¹⁷ Sàlà yamùk màlà enupantok uya, ‘Tùuchi'nùnmaik mettàik,’ tawon,” teppù Jesus uya.

Wolù Yawon Kon Uya Tewanma Pe Ku'nàtok

¹⁸ “Sàlà wolù yawon kon uya tewanma kon pe àkupù kon yau, ittutàk kon tewanma kon pe nàlà tok uya ukupùpù wapiya.

¹⁹ Sàlà wolù ponalok kon pe ewechi kon yau, à'nùnma kon ya màlà tùtonpa kon pe kulu ewechi kon kasa. Tùse sàlà wolù ponalok kon pen amyamlo, molopai ayanùnsak kon uya sàlà wolù winàpai pàk màlà, sàlà wolù yawon kon uya tewanma kon pe àkupù kon.

²⁰ Ittutàk kon àpàkù'nokon ‘Apyoto mùkkàlà tepotolù yentaino pen,’ ” teppù uya. “Utalumattàsak tùuya'nokon yau, tok uya nàlà atalumattà kon màlà. Tenupatok kon uya yawàlà tùwechi kon yau, tok wechi nàlà màlà tenupatok auya'nokon yawàlà.

²¹ Tùse sàlà yamùk kupù tok uya màlà ewinàkài'nokon uyesek pàkànsau. Masapùla uyeuno'nàippù ittu tùuya'nokon pùla iwechi pàk.

²² Tok yelupaik uyàpù pùla iwessak yau, àli pe tùmakuyi ke tok uchittuppù pen sàlà eppaino. Tùse sàlà pe tùmakuyi kon waputtàtok tok uya pùla iwechi màlà.

²³ Mùkkàlà tewanma pe uku'nài uya nàlà màlà nai'nùk Ukàipùnù kupù tewanma pe.

²⁴ Ànù'là nùkupù pen kusak uya tok kùlottau pùla iwechi yau tùmakuyi ke echii'ma àli pe tok uchittuppù pen sàlà eppaino. Tùse eke ton wotoko yamùk kupù uya yensak tok uya man, walà tùse tewanma kon pe tok uya ukupù molopai Ukàipùnù nàlà.

²⁵ Tùse sàlà yamùk wekkupùppù màlà tok Law yau iwe'menukasak lùppù yawàlà. ‘Tok uya tewanma kon pe ukupùppù yà'làlà pàkànsau pùla,’ tawon.

²⁶ “I'napailon Akkwalù yeunoko uya màlà. Iyàpù màlà Ukàipùnù winàpai. Mùkkàlà Àpùikattànài Ukàipùnù winàpaino uselupa màlà upàk.

²⁷ Amyamlo nàlà upàk meselupatàik, masapùla upyau ewechippù kon màlà iweppyattàppù motapai,” teppù Jesus uya.