James 1 - Patamuna New Testament Revised

¹ Sàlà kaleta màlà James, Katù molopai Itepulu Jesus Christ yapyoto winàpaino. “Wakù pe na' messatàu?” tetok tamù'nawolon kon12 pan kon ikkok Katù ponalok kon kappon yamùk, iwetta'nùssak kon piyak inmenukappù.

Ailon Tetok Molopai Pukkek

² Utonpa yamùk! Atauchinpatàk kon yà'là yekkwa là ittuntok uyàpù ewinàkài'nokon yau,

³ masapùla mùttuyatàik ailon tetok auya'nokon uya màlà yekkwa ton ittuntok yawà àutà yau, ipàlikatok imeluntàlù pe we'nàtok wech itepeppù pe.

⁴ Tamù'nawolon tùpàlikaik ettàk, meluntà pe ewena kon pa, appù pe, ikasa tamù'nawàlà.

⁵ Tùse ànù'là àkklottau'nokon nai'nùk wechi pukkek pùla yau, nàpùlemaik, itùnài tùpyak yekamappoi; masapùla Katù mùkkàlà lepanài tùusetakkaik pùla molopai tùusàulàmaik pùla tamù'nawolon kon pàk.

⁶ Tùse ailon mùkatàik Katù yekamappo auya'nokon yau, molopai iwekkupù na'màichi lù tukaik pùla; masapùla ànù'là na'màichi lù tawon wechi màlà chipachipa palau pon kasa, màlà tùutàsen molopai tùutasse'masen assetun winà.

⁷ Ànù'là mùkkàlà yekkwa kappon yà'làlà yepolo tùuya Itepulu winàpai pe kùsekamatak,

⁸ masapùla asa'là ichenumenkatok wechi màlà tamù'nawolon tùnkupù yau.

Yà'là Pùla We'nàtok Molopai Temamin Ke We'nàtok

⁹ Tàwà yà'là pùn ailon tawon nùtauchinpai, masapùla Katù uya tanùnsak kon pàk, eke kulu mùkkàlà Katù yenu yau.

¹⁰ Tàwà temamin kenan kon ailon tawon kappon tùutauchinpaik nechii masapùla Katù uya tùnuttàsak pàk, àsà'mùla tùmasak ya pàk. Masapùla temamin kenan wena ippla màlà wanak yùpùlù kasa.

¹¹ Wei tùwepakkasen molopai tùwa'mintasen a'neppe molopai tùwattasen yaipùtanù'nài; itùpùlù tùwessolokasen molopai wakù pe iwettok tùumattasen. Màlà kasa làma temamin kenan kappon umatta màlà tùusemaminnùttà pe yekama ya tùse.

Ittuntok

¹² Tùutauchinpasen mùkkàlà kappon ailon pe tùwessen ittuntok kùlottawàlà. Masapùla ittuntok yentaika ya yau ilepa màlà wema'nà yalùko ke, e'mantok Katù uya itùlù tùuya tù'nùnmanài nan piyak teppù lùppù ke.

¹³ Ànù'là “Sàlà ittuntok màlà Katù winàpaino,” kùkkatak. Masapùla Katù mùkkàlà ànù'là ittunài àli ke pen molopai àli uya Katù ittu pen màlà.

¹⁴ Tùse kappon mùkkàlà tùttutok ke tàutamùipasen, molopai màlà uya imalentàsak àli ànkupai iwettoppe;

¹⁵ màlàyau àli ànkuppai iwettok màlà àli yak yanài, molopai àli kuttok ya màlà yanài weli'nàtok yak iwenukattoppe.

¹⁶ Màlàpàk kesennakatàu, utonpa yamùk u'nùn ton!

¹⁷ Tamù'nawolon wakù iwalai lepantok màlà tùuyàssen epùn poi; Katù winàpai, tamù'nawolon pata weyu yamùk kau nai'nùk màlà inkonekappù. Tùwemyakammasen pen, màlà tùse pùla tùwelattà yau ewalupà ne'nài pen.

¹⁸ Teselu winà Katù uya kùnepùppù kon emennak wema'nàtok yak màlà ailon tùmaimu yai, wapiyalok pata yau we'nàtoppe tùponalok kon kappon yamùk kùlottau.

Yetatok Molopai Ikuttok

¹⁹ Sàlà ittutàk kon, utonpa yamùk kulu! Tàwà tamù'nawolon kon asse'ne yetanài nan pe nechii, tùse tànànpàk tùuselupasan pe, molopai asse'ne tùwe'naikasen pe pùla.

²⁰ Masapùla kappon we'naikatok màlà wakù Katù yeselu wekuttok pùikattànài pen.

²¹ Màlàpàk uchi tamù'nawolon àli ton eyeselu kon inonkatàk kon Katù Maimu yawàlà ettàk kon àssà'mùla, àsà pe pùla molopai màlà imaimu inpàmàppù eyewan kon yak yanùntàk kon, màlà àpùikattànài'nokon yeppe nai'nùk.

²² “ Tetatai là te, ” tukaik kesennakatàu Katù Maimu yetasak auya'nokon yau. Tùse ikuttàk kon làkku.

²³ Masapùla ànù'là imaimu yetanài tùse iku'nài pen wechi màlà kappon wanamali yak tenpata yennài kasa.

²⁴ Tùusensen mùkkàlà molopai tùutàsen molopai asse'ne ànùk kasa là tùuseneppù puttàka'nù'nài.

²⁵ Tùse mùkkàlà, Law Katù winàpaino yennài echipalà, kappon yamùk pùikattànài àli kuttok yapai yennài molopai yene pàk tùwessen, tùnetappù tùputtà'ka'nùsse pùla tùse iku'nài, mùkkàlà pùlema màlà inkupù yawàlà.

²⁶ Ànù'là àkklottau'nokon nai'nùk, “Katù ya'lon Iulà,” tawon, molopai tani yesappe tùwessen pen wechi màlà yà'làlà wakù pùla, molopai ichennaka Katù ya'lon pe iwechi wechi yà'la pe pùla.

²⁷ Sàlà màlà wakù esuken we'nàtok Katù, Kùkàipùnù yemloto po: ichan pùnon molopai ikàipùnù pùnon mainanpa molopai itayappù iwelichak kon mainanpatok wettalumatàntok yau, molopai mattanù'nài àli yeselu winàpai we'nà màlà wakù.