Hebrews 5 - Patamuna New Testament Revised

¹ Eke kulu paatele mùkkàlà yanùnsak kappon yamùk kùlottapai iwe'wotokomatoppe kappon yamùk ponaloppe Katù pokonpe. Lepantok tùnai pe molopai kamo wànài pe, tùtùsen pe kappon yamùk makuyi ponaloppe.

² Masapùla tùmàlà pe nàlà attu'mùla tùwechi pàk kappon yamùk pàlikanài mùkkàlà, pakko pe molopai iitassappe lànen tok wechi tùse.

³ Sàlà wenai kamo wànài nàlà mùkkàlà tùmakuyi ponaloppe, kappon yamùk makuyi ponaloppe kamo wànà tùuya kasa.

⁴ Ànù'là mùkkàlà sàlà namantok yanùnnài tùyiwalà eke kulu paatele pe we'nàtok yau pen. Katù nùkà'mappù pe làkku iwechi màlà, Aaron wechippù kasa.

⁵ Màlà kasa làma Christ uya namantok yanùmùppù pen tùpona eke kulu patele pe tùwena yau. Tùse Katù uya ipàk, “Umu àmàlà, sàlà pe Àkàipùnù pe wenasak man,” teppù.

⁶ Tùulon yailà nàlà, “Paatele pe ewechi màlà tàwàlàlà, Melchizedek yekkwa pe,” teppù ya.

⁷ Tùwemapù non po yau Jesus wàpùlemappù màlà molopai Katù pawanattàppù ya eke pe tùkalanse molopai tenupalu tùkkwanse, tùpùikattà toppe ya weli'nàtok winàpai. Katù uya imaimu yetappù màlà masapùla tùmaimu yawàlà iwettùssak tamù'nawàlà pàk.

⁸ Katù Mumu pe lànen iwechi tùse, mayin yawàlà we'nàtok pàk iichenupappù màlà tùwettalumattàtok winà.

⁹ Ikasa kulu Jesus wekonekasak pàk, mùkyamlo tùmaimu yawolon kon nà pùikattà ya màlà tàwàlàlà.

¹⁰ Màlàyau Katù uya yanùmùppù màlà eke kulu paatele pe iwettoppe Melchizedek yekkwa pe.

Katù Winàpai Welattàn Tukaik Ekamappontok

¹¹ Màlà yentak palà ina nekama molo man àpàkù'nokon, sàlà pàk. Tùse sa'man pe ina uya yekama àpàkù'nokon wechi màlà, masapùla tànànpàk ittutok auya'nokon yau ewenasak kon pàk.

¹² Sàlà yattai'ne enupannan pe ewettok kon wechippù nai'nùk, tùse tu'ma wapiyalok usenupantok Katù Maimu yawon pàk eyenupanài'nokon iche lùppù messatàik. Manak iche ewechi kon, sa'man kùyali pen.

¹³ Ànù'là manak pàk nemassai'nùk wechi màlà mule pe lùppù. Iichenupasappe pùla tok wechi iwalai winàpai iwalai pen ittutoppe tùuya'nokon.

¹⁴ Sa'man kùyali màlà ichemokkasak kon ponalok. Mùkyamlo ichenupasak kon pe nai'nannùk, wakù winàpai àli ittun nan.