Galatians 5 - Patamuna New Testament Revised

Christ Yau Imokkasak Pe We'nàtok

¹ Imokkasappe we'nàtoppe sàlà Christ uya kùmokkasakù'nokon. Meluntà pe à'mùssakkatàk kon molopai apyoto pe tu'ma we'nàtok yak kettùtàu.

² Yetatàk kon, Iulà Paul nekamayan àpàkù'nokon: ayattàtok kon pe ewekkupù kon Jew yamùk yattàtok yeselu yawàlà yau, Iwoton pe pùla Christ wechi màlà àpona.

³ Wa te uya tu'ma sàlà ànù'là kàyik yattàsak Jew yamùk yattàtok yeselu yawàlà pàk, “Tamù'nawolon law yawàlà nechii,” te uya.

⁴ Amyamlo Katù pokonpe ikasa tùwekkupùiche'nokon nai'nannùk law yawàlà tùwechi kon winà wepantakasak màlà Christ winàpai. Wakù pe Katù wettok yapai ewemokkasak kon màlà.

⁵ Tùse ailon tetok yai kulu imàmuku sàlà, ikasa we'nàtok Akkwalù winà enpen ipàk we'nà nai'nùk.

⁶ Masapùla Christ Jesus ponaloppe we'nà yau, Jew yamùk yattàtok yeselu yawàlà yattàsapspe we'nà wapùla yattàsappe pùla we'nà uya tùpatalà'ne ku'nàsak pen màlà. Tùse ailon tetok màlà tùttusen kulu tùusenpoikasen uchi'nùnmantok yai.

⁷ Wakù ye'ma tawà ku mettantàu tà! Ànùk eyeleutanùttantàu molopai àkuttantàu ailon yawàlà ewettok kon pe pùla?

⁸ Katù àkà'manài' nokon winà iwekkussak pen màlà.

⁹ “Malalon nùkkwà màlà yapuluwetanù'nài tamù'nawàlà pùlomù kùloimasak yau tùwe'wotokomasen.”

¹⁰ Tùttuyaik Itepulu yau tùulon usenumenkantok yanùmù auya'nokon pùla iwechi, molopai mùkkàlà utaimelunpantok yak àtùyatài'nùk talumattà màlà, ànùk pe là iwechi yau.

¹¹ Utonpa yamùk, yà'là pe ken iwechi pàk utalumattà sàlà Jew yamùk yattàtok wechi iche kulu we'nàtok pe yekama pàk lùppù wechi yau? Màlà wechi ailon pe yau, Christ wettalumattàtok pulusuk po yekama pàk wettok Usya tùulon kon utaimelunpatok kupù pen màlà.

¹² Mùkyamlo ayaimelunpayatài'nannùk utà Jew yamùk yattàtok yentak iche wessaik, tàwà tok nùsattàkapùi.

¹³ Amyamlo utonpa yamùk kà'mappù màlà apyoto pe pùla we'nàtok yak. Tùse sàlà apyoto pe pùla ewettok kon kùsapulàtàu àli ànkuppai ewettok yak ayanài'nokon pe. Tùse làkku tùwepùikattàse ettàk kon uchi'nùnmantok yau.

¹⁴ Masapùla tamù'nawolon law pilichak màlà tewinan usenupantok uya, “Ayakontalù i'nùnmakà eyiwalà mechi'nùnmayai'nùk kasa,” tawon. {Lev 19.18}

¹⁵ Ayakontalù pokonpe euchikkapàtù kon pàk, ausanù kon pàk ewechi kon yau, masa yentàk, aumatta kon màlà eyiwalà'nokon.

Wema'nàtok Akkwalù Winà

¹⁶ Màlàpàk uchi wa te uya sàlà: Akkwalù yau emattàk kon molopai àli ànkuppai ewettok kon yawàlà ewechi kon pen màlà.

¹⁷ Masapùla àli ànkuppai we'nàtok wechi màlà Akkwalù wettok iche pe pùla molopai Akkwalù wechi màlà àli ànkuppai we'nàtok wettok iche pe pùla. Echiche pùla tok wechi màlà. Màlàpàk iche ewettok kon kupù auya'nokon pen.

¹⁸ Tùse Akkwalù uya ayalà kon yau, law yo'no ewechi kon pen màlà.

¹⁹ Àli kùyeselu kon yau welaikantok màlà tensen ayupo, tayappùwannà pen wapùla noppùwannà pen pokon esenau we'nàtok, esuken pùla we'nàtok, àli neken ànkupai kulu we'nàtok,

²⁰ ikonekasak katù yemloto po wepeimantok, molopai meluntà àli akkwalù winàpai yeposak yapulàtok, tùulon kon yewanma'làtok, wakù pe tonpa pokonpe we'nà pùla we'nàtok, kùlùmàppe we'nàtok, we'naikantok, molopai amleppe we'nàtok. Tùusàulàmaik we'nàtok, iwepantapàssak pe'ne,

²¹ tùulon yemamin iche kùlùmàlunnàtok, wetùnnàtok, tamùkke wepili'nàtoke àli kusse molopai tùulon kon sàlà yekkwa ton ku'nàinan. Eyekamappoyatàu Iulà wapiya eyekamappoppù kon uya kasa. Mùkyamlo sàlà yamùk ku'nàinan uya Katù wettok itepulu pe yepolo pen màlà.

²² Tùse wakù ton Akkwalù winàpai tùuyàssan màlà pùnùnmantok, utauchinpantok, echitonpa pe we'nàtok, pàlikantok, usentupantok, wakù pe we'nàtok, ailon pe we'nàtok,

²³ tenpe we'nàtok, molopai esak yepulu pe we'nàtok. Sàlà yamùk winàkàik law pùla iwechi màlà.

²⁴ Molopai mùkyamlo Christ Jesus ponalok kon uya tamù'nawolon àli ànkuppai tùwettok kon pukapàssak màlà pulusuk pona iteselu yamùk pokonpe.

²⁵ Akkwalù uya lepansakù'nokon wema'nàtok ke yau, Akkwalù wenaimapai'nokon uchi.

²⁶ Tùulon kon yentai pe tukaik wekku'nà kùsettak, wapùla tonpa wannà pàk wessakolopan kùsettak, wapùla kùlùmàppe we'nà kùsettak.