Ephesians 6 - Patamuna New Testament RevisedMule yamùk molopai Tok Yan Yamùk, Tok Kàipùnù Yamùk 1 Mule yamùk, asan kon àkàipùnù kon maimu yawàlà ettàk kon Itepulu ponaloppe, masapùla sàlà uchi màlà iwalai ànkupù kon. 2 “Àkàipùnù kon molopai asan kon inamatàk kon ”tawon uchi màlà wapiyalok usenupantok, màlà kupù uya tetok pokon pan: 3 “tamù'nawolon wettok pe wakù pe apyau'nokon, molopai ewemapù kon pa sàlà pata yau tachin pe,” tawon. 4 Papai yamùk, àmunkà kon pàk àsà pe kettàu, tok kùssakolopatàu. Tùse làkku, tok yemokkatàk kon Itepulu ya'lon uya ekamappontok ke molopai enupantok ke. Tepotolù Kenan kon molopai Tùpoitolù Kenan Kon 5 Tepotolù kenan kon, kappon yamùk eyepotolù kon maimu yawàlà ettàk kon, nalippe, tùwe'namaik. Molopai ailon pe itewan ikuttàk kon, Christ ponaloppe ewe'wotokoma kon kasa. 6 Sàlàichi ikùttàk kon eyene kon tok uya yattai neken nà pùla, tok yauchinpapa neken nà. Tùse tamù'nawàlà eyewan kon ke Katù wettok iche ikuttàk kon, Christ yappyoto ton pe. 7 Àwotokoyi kon ikuttàk kon kappon tepotolù kenan we'wotokoma kasa tùutauchinpaik, Itepulu yapyoto pe ewe'wotokoma kon kasa, molopai kappon yamùk ponaloppe pùla. 8 Ittutàk kon uchi Itepulu uya tamù'nawolon kon ye'ma, ànùk yekkwa là apyoto wapùla apyoto pen, wakù wotoko inkupù yepeppù pe. 9 Potolù yamùk, màlà kasa làmaichi ettàk kon ayapyoto kon winàkàik. tok kùttalipapàttàu. Mùttuyatàik, mùkkàlà epùn pon wechi mùkyamlo molopai amyamlo Yepotolù pe. Tamù'nawolon kon ku'nài mùkkàlà ekkaichalà. Tamù'nawolon Katù winàpaino wepanta'man pon 10 Iwenukapù pe, wa te uya sàlà meluntà pe ettàk kon Itepulu yau, molopai itapàikketù eke kulu winà. 11 Tamù'nawolon wepanta'man pon Katù uya elepatok kon itùtàk kon, meluntà pe ewechi kon pa, àli, Makui uya enkuttàntok yentaika kon pa. 12 Masapùla wepanta'man nokon kappon yamùk pokonpe pen sàlà, tùse àli ton akkwalù meluntàlù kak yawolon kon pokonpe, itepulu yamùk, apàikketton, molopai sàlà ewalupà yawon kon itepulu yamùk tensan pen meluntàlù pokonpe. 13 Màlàpàk uchi Katù winàpaino tamù'nawàlà wepanta'man pon yanùntàk kon sàlà pe! Molopai nen uchi àli weyu uyàpù yau, eyeyaton kon uya panta'mantok yentaika kon pa. Molopai ewepanta'ma kon iwenukapù ponalà tùpo, meluntà pe lùppù ewechi kon pa. 14 Màlàpàk tùwekonekaik ettàk kon. Ailon ke epokùlùyittàtàk kon. Ikasa we'nàtok itùtàk kon àpplopo kon wapu pe. 15 Molopai wekonekansak Wakù Itekale echitonpa pe we'nàtok yekamatok attassa kon pe. 16 Tàwàlàlà ailon tetok yatàk kon awapu kon pe. Màlà ke tamù'nawolon pàlàu yamùk ulenpansak, Ene Makui uya pukantok yà'nùpù kon pa. 17 Molopai wepùikattàntok yanùntàk kon appai kon wapu pe, molopai Katù Maimu akasupalayi kon pe Wakù Akkwalù uya elepatok kon. 18 Àwàpùlema kon yau sàlà yamùk ikuttàk kon tamù'nawàlà Katù uya, pùikattàntok yennai'ma. Tàwàlàlà àpùlematàk kon Wakù Akkwalù meluntàlù yau. Màlàpàk tùwekonekaik ettàk kon. Ke'nonkatàu, màpùlematàik tamù'nawolon kon Katù ponalok kon kappon yamùk pona. 19 Molopai upona nàlà màpùlematàik, Katù uya ulepatoppe itekale ke, uselupa pàk wekonekasak yau, uselupatoppe meluntà pe tùusenalipaik pùla. Molopai Wakù Itekale yawon tùttusen pen yekamatoppe uya. 20 Sàlà wotoko kuttoppe uya uyeunossak nai'nùk molopai màlà pàkànsau sàlà patikichi tau wechi. Àpùlematàk kon meluntà pe tùusenalippaik pùla uselupatoppe Wakù Itekale yekama uya yau. Tewin Itekkwalok “Wakù pe na? messatàu?” tetok 21 Tychicus, kù'nùn, kùtonpa kon molopai ailon kulu apyoto Itepulu wotokoyi yau uya, elepa kon màlà tamù'nawolon uyekale ke, atta wechi molopai yà'là kupù uya ittu kon pa. 22 Màlàpàk uchi yeunoko uya sàlà apyakù'nokon. Atta là tamù'nawolon kon ina wechi yekamatoppe ya àpàkù'nokon, molopai màlà kasa eyewan kon meluntàtanùpù kon pa. 23 Tàwà uchi Katù Kùkàipùnù kon molopai Itepulu Jesus Christ echitonpa pe we'nàtok molopai uchi'nùnmantok tùlùi ailon tetok pokonpe, tamù'nawolon kon ailon tawonnan yemyak. 24 Tàwà wakù pe we'nàtok Katù winàpaino tamù'nawolon kon Kùyepulu Jesus Christ pùnùnma pàk nai'nannùk po nechii. |
Patamuna New Testament Revised © United Bible Societies, 1973, 2019.
Suriname Bible Society