2 Peter 2 - Patamuna New Testament Revised

Katù Maimu Yenpoikannan Pe Tukaik Tùukaseitasan Pàk Enupannan

¹ Katù Maimu yenpoikannan pe tukaik tùukaseitasan usenpoikappù ina kùlottau pena, molopai màlà kasa làma tok usenpoika màlà amak yai ittu pùla àkklottau'nokon. Mattanù'nài, ailon pen pàk enupantok nepù màlà tok uya, molopai Kùyepulu kùye'manàippù kon Jesus nulunpa tok uya màlà, molopai sàlà kasa asse'ne mattantok nepù tok uya màlà tùpona'nokon.

² Màlà kasa làma àli ànkuppai tùwettok kon maimu yawàlà tok wechi màlà; molopai tok nùkupù winà, kappon yamùk uselupa àli pe ailon pàk.

³ Tùulon yemamin iche tùwettok kon yau pùsamlo ailon pen pàk enupannan uya ayapulà kon màlà pùlayatta yepotoppe tùuya'nokon enkuttànài panton yekama tùuya'nokon winà. Tùse pena yawà tok yeselu pàkàlà tok talumattàtok wekonekakassak wechippù màlà molopai tok mattanù'nài we'nùnsak pùla iwechi!

⁴ Masapùla inchelù yamùk àli pe iwessak kon yenpàtù Katù uya pùn tok wepetoppe Ittuntok winàpai, tùse tok yenu'mappù ya, màlà motau tok wechi màlà yaulonsak pe ewalupàttau, Ittuntok Weyu màmuku pàk.

⁵ Katù uya wapiyalok kon wolù yawon kon yempàtù pùn tok talumattàppù ya molopai tuna'ma nepùppù ya àli ton kappon yamùk pata pona; Noah pùikattàppù ya màlà, ikasa we'nàtok yekamanài, molopai 7 pan kon kappon yamùk.

⁶ Katù uya pata yamùk Sodom molopai Gomorrah tawonnan talumattàppù, imattanùpù pe apok ke ippla, molopai màlà yamùk kupùppù ya yentok ipàkàlà àli ton uya pe, tok uya yentoppe tùwekkupù woton àli ton winàkàik.

⁷ Lot pùikattàppù ya, wakù kàyik, àli yeselu iche pùla iwessak lùppù.

⁸ Mùkkàlà wakù kàyik, tùwemassen tok kùlottau wei kaichalà uya, sàlà yekkwa ton yeneppù molopai yetappù, màlàpàk wakù itewan utaimelunpasak wechippù tùpanama kon yetannan pen yeselu winà.

⁹ Màlàpàk Itepulu Jesus mùkkàlà i'nai kasa Katù pùnùnmannan pùikattàtok tùuya tok wettalumattàtok winàpai ittunài, molopai i'nai kasa àli ton kuttok tùuya wettalumattàntok yo'no ittunài Ittuntok Weyu ponalà,

¹⁰ mùkyamlo kulu akùlù iteselu wakù ke telupa kon yetannan pen molopai Katù yapàikketù nulunpannan. Tùusenalippaik pùla molopai meluntà pe àli pe tùuselupasan mùkyamlo kawon kon akkwalù yamùk winàkàik.

¹¹ Inchelù yamùk lànen, meluntà pe lùiwa nai'nannùk molopai apàikkeppe lùiwa, pùsamlo ailon ton pen pàk enupannan yentai, mùkyamlo Itepulu Katù yemloto po là àli pe tùuselupasan mottùnpan pe pen.

¹² Tùse pùsamlo wechi màlà tùusenumenkasan pe pùla tùwelaikasan teselu kon yawà pe, elannek ton kamo yamùk iwentusak kon tachi tok kon pe molopai tùwà tok kon pe kasa; yà'làlà mottùnpannan mùkyamlo tùnùttu kon pen. Tok mattanùpù màlà elannek ton kamo yamùk kasa;

¹³ talumattàntok ke tok ye'ma màlà talumattàntok tok nùkupùppù wenai. Tok pona utauchinpantok màlà yà'làlà kuttok tok uya ayupo weinai tùke'nokon iche tùwettok kon; kuli'mannan mùkyamlo auta'lettàtok kon pùkkù pe tùwechii'ma'nokon, masapùla ennakantok tùuya'nokon yeselu wechi tùwakùli kon pe pàk!

¹⁴ Tok yenu uya ulichan yene àli ànkuppai tùwesse pùla pen màlà. Àli ànkuppai tok wettok màlà tùweleutasen pen. Attu'mùnon kappon yamùk yamùipannan mùkyamlo àli kuttok yak. Tewan kon yenupasak tok uya màlà tùuseka'nonkasen pe yà'làlà iche tùwettok kon pe. Katù uya pa'nù'nàtok yo'no tok wechi màlà!

¹⁵ Tok uya tossalon asanta nànsak màlà molopai tok utassak; tok uya asanta Balaam, Beor mumu, nanùmùppù lùppù yanùnsak màlà. Pùlayata iwakùli mùkkàlà àli kupù tùuya winà inepolo,

¹⁶ yàulàmasak lùppù, màlà àli pe iwettok wenai. Itùkùn Tonki tùuselupasen pen uselupappù kappon maimu pe molopai Balaam welaikatok Katù pùn kasa yeleutanùpùppù ya.

¹⁷ Pùsamlo mùkyamlo a'mun tuna yen walai non, katuppluk yasak meluntà assetun uya walai non; Katù uya tok patassek kussak man tàwàlàlà ewalupà yau.

¹⁸ Ittu tùuya'nokon kasa kulu tùuselupasan mùkyamlo tùutapulà kon pe, molopai ikasa pùla tùwemassan winàpai iwemokkasak kon emennak pe, yamùipannan mùkyamlo yà'làlà akùlù teselu kon kupù tùuya'nokon yai.

¹⁹ Pùsamlo enupannan uya, “Iche ewettok kon ikuttàk kon, tàwà ayachinài'nokon pùla nechii!” te tok pàk, tàliyi kon toi'manài'nokon yeselu yapyoto pe echii'ma'nokon. Masapùla kappon mùkkàlà yà'làlà tentaikanàippù yapyoto.

²⁰ Masapùla kappon yamùk wepesak akùlù wolù yeselu yapàikketù winàpai Kùyepulu kon molopai Kùpùikattànài Jesus Christ ittutok tùuya'nokon winà yau, molopai yachitu'masak akùlù tok yeselu uya yau tok yentaika ya màlà, àsà yau nen uchi tok wechi iwenukapù pe, iwepyattà yau tok wechippù yentai.

²¹ Wakù pe iwa iwechippù eppaino tok pona wakù pe we'nàtok ye'ma ittusak tok uya pùla iwechi yau, ittusak tok uya yentai molopai nen uchi tok welattà màlà tùnamasen Law Katù winàpaino ittùsak kon tok yemyak winàpai.

²² Màlà iwekkusak lùppù tok pàk màlà yekamasak lùppù uya ailon pe iwechi yekama màlà, “A'a mùkkàlà tùwennapposen tùtalùkayi yekalepàk,” molopai, “Puluku ipùsak lùppù mùkkàlà tùwennapposen iklo yau ekkloimaik,” tawon. {Pro26.11}