2 Corinthians 12 - Patamuna New Testament Revised

Paul we'neppàttok walai molopai yenpoikasak lùppù

¹ Utapulà pàk wechi màlà, yà'làlà wakù kupù ya pùla là tùse. Uselupa sàlà we'neppà'nàtok walainon molopai yenpoikasak kon lùppù Katù winàpaino pàk.

² Tùttuyaik kappon Christ pàk ailon tawon. 14 pe kilichimochi utàppù man mùkkàlà yalàppù kawon kulu kak pona tùpo. Ittu uya pùla man sàlà wekkupùppù pe kulu iwechi wapùla we'nepà'natok walai yeneppù ya pe iwechi, Katù neken nùttuyan.

³ Tùttuyaik pùsàlà kàyik yalàppù Katù tumà yak, ittu uya pùla man sàlà wekkupùppù pe kulu iwechi wapùla we'neppà'nàtok walai yeneppù ya pe iwechi, Katù neken nùttuyan.

⁴ Molopai yekama yentaino kon yamùk yetappù ya, kappon mùta nekama yentaino kon.

⁵ Màlàpàk utapulà sàlà pùsàlà kàyik pàk, tùse uyiwalà utapulà pen màlà, tùse uyattu'mùnù pàk neken.

⁶ Atapulàpai là wechi yau, pakko pe wechi pen màlà, masapùla ailon pe uselupa pàk. Tùse atapulàpai pùla wessaik masapùla ànù'là usenumenka eke pe upàk tùnene molopai tùneta unekama yau yentai iche pùla wechi pàk.

⁷ Sàlà yamùk eke ton kulu Katù nenpoikassan pàk eke pe utapulà tukaik iwinàpai uku'nài pe, àmà'nà ke ulepappù uyattùkanài pe. Màlà uyàpùppù màlà Makui winàpai utalumattàse.

⁸ Àsolùwau itekkwa Itepulu pawanattàppù uya imokka toppe ya uwinàpai.

⁹ Tùse upàk, “Wakù kuttok uya wechi màlà tamù'nawàlà àponaloppe, masapùla umeluntàlù wena màlà wakù pe kulu atu'mùla ewechi yau,” teppù ya. Màlàpàk utauchinpa kulu màlà utapulà attu'mùla wettok yau pàk, Christ meluntàlù wàlàkkattok pe upo.

¹⁰ Màlà kasa iwechi pàk Christ pàkànsau utauchinpasak man attu'mùla we'nàtok yau pàk, àli pe uselupantok yau, sa'man ton yau, talumattàntok kon yau molopai àsà ton yau. Masapùla attu'mùla wechi yau, meluntà pe nen uchi wechi màlà.

Paul wettok Corinth pon kon Ànpùikattàpai

¹¹ Pakko kasa welaikayaik, tùse ukussak auya'nokon màlà wa wettoppe. Amyamlo uya làkku nen wechi màlà wakù pe upàk tùuselupassan pe. Masapùla mùkyamlo “wakù ton kulu yeunossak kon,” ma'le kulu wechi pen nen nai'nùk ànùk pe pùla lànen wechi tùse.

¹² Ailon pe yeunossak pe wechi yekamanài kupùppù uya màlà àkklotau'nokon tamù'nawàlà pàlikantok ke. Tensen yekkwa ton pen yamùk, enumenkannan molopai enalippannan yamùk, molopai eke ton Katù yapàikketù yekamannan yamùk.

¹³ Yà'là kasa ken tùulon kon sochi yamùk ma'le ewechippù kon? Yà'làlà moka uya pùn ku' ewinàpai'nokon? Upàk tàwà esentupatàk kon sàlà iwalai pen kusak uya pàk.

¹⁴ Sàlà màlà icholùwano itekkwa pe akaklanpatok kon pe uya wekonekasak man. Molopai eyeka'nonka kon uya pen màlà masapùla eyiche'nokon wechi sàlà, àpùlayattayi kon pen. Mule yamùk mùkyamlo tùkàipùnù kon yamùk mainanpannan pen, tùse làkku mule yamùk mainanpa màlà tok kàipùnù yamùk uya.

¹⁵ Utauchinpa kulu nen màlà tamù'nawolon itesak pe wettok yapulà uya àponalok kon pe pak molopai uyapulà uya pàk nàlà àpùikattàtok kon pe uya. Malalà neken ken na' u'nùnma auya'nokon màlà à'nùnma kon uya eke pe pàk?

¹⁶ Esenumenkatàk kon, yà'làlà moka uya pùn ewinàpai'nokon. Tùse tùulon uya là, “Paul wechippù enakanài pe molopai enkuttànài kasei pe tùwettok ke,” te.

¹⁷ Yà'là ken tùkuttai kàyik yamùk uneunokossan winà yà'làlà yepotoppe uya ewinàpai'nokon?

¹⁸ Titus pawanattàppù uya iità toppe miyalà, molopai tùulon ailon tawon yeunokoppù uya ya'là. Titus ken na' yà'làlà yepotai ewinàpai'nokon? Kane! Mùkkàlà lùppù ken na' Akkwalù yesak ton pen ina molopai màlà lùppù yawà tùnkupù kon yau tùwessan pen?

¹⁹ Tamù'nawolon sàlà te uya ikasa ina wechi yenpoika toppe pe là yekama auya'nokon. Kane, màlà kasa pùla man. Ina tùuselupasan Christ wettok ina uselupa iche kasa, Katù yemloto po. Ina tonpa yamùk, tamù'nawolon ina nùkupù màlà tùwekkussen àpùikatàtok kon pe.

²⁰ Masapùla usenalipayaik miyalà uyàssak yau eyepolo kon uya yeselùkek iwechi pàk eyiche'nokon wettok kasa pùla. Molopai uyepolo auya'nokon uyiche ewettok kon kasa pùla. Usenalipayaik usàulàmantok, kùlùmà, molopai we'naikantok, amlek we'nàtok, àli pe uselupantok, molopai tùulon kon yekale pàk uselupantok, utapulàntok molopai utaimelunpantok yepolo uya àklottau'nokon yeselùkek iwechi pàk.

²¹ Usenalipayaik uyàttumasak yau Ukatùyi uya ukuli'ma yeselùkek iwechi pàk eyemloto kon po. Ukalawù màlà tukkan kon, mùkkyamlo iwemakuimasak kon nùssan pena molopai iwelattàsak kon àli ton winàpai pen wenai, àli pe tùwemattok kon yau tùwessan, tesak kon ke àli pe tùwessan molopai esak wettok ànkuppai ku'nàinan.