2 Corinthians 1 - Patamuna New Testament Revised

¹ Sàlà màlà kaleta Paul winàpaino, Christ Jesus neunokoppù Katù yeselu yawà nùmenukappù, molopai kùtonpa kon Timothy winàpaino. Katù sochiyi Corinth pon piyak, molopai tamù'nawolon kon Katù ponalok kon kappon yamùk Achaia yawolon kon piyak inmenukappù.

² Tàwà Katù kùkàipùnù kon molopai Itepulu Jesus Christ elepai'nokon wakù pe we'nàtok molopai echitonpa pe we'nàtok ke.

Paul Uya Tenki Te Katù Pàk

³ Tenki tepai'nokon uchi Katù Kùyepulu kon Jesus Christ Kàipùnù pàk, Kàipùnù kon, Katù tùsentuppasen tamù'nawolon ewan ipik uyàttok iwinàpai pàk!

⁴ Ina yewan ipik mùkkàlà tamù'nawàlà ina talumattàtok yau, mùkyamlo yà'là yekkwa là wettalumattàntok yawà tùutàsan yewan ipittàtoppe ina uya, màlà ewan ipik Katù uya ina yewan ipittàppù lùppù ike ke.

⁵ Tukkan Christ talumattàtok pùkkù pe ina wechi kasa làma, Christ yai nàlà ina yewan ipik wechi màlà tukke.

⁶ Ina wettalumattà yau, eyewan kon ipik pe iwechi màlà molopai ewepùikattàtok kon iwinà pe. Ina yewan ipittàsak yau, eyewan kon ipik pe iwechi màlà talumattàntok ina nùpàlikappù yekkwa lùppù pàlika auya'nokon yau.

⁷ Enpen ina wettok àpàkù'nokon meluntà pe man. Masapùla ina nùttuyan ina wettalumattàtok pùkkù pe ewechi kon kasa làma, ina yewan ipittàtok pùkkù pe nàlà ewechi kon màlà.

⁸ Ina wettalumattàppù Asia po ittu auya'nokon iche ina man utonpa yamùk. Eke pe kulu wettalumattàntok wechippù ina po, ipàlika ina uya yentai, màlàpàk tùwelikù kon pe ina uya ittuppù.

⁹ Ina yewan yau weli'nà pe ittuppù ina uya. Tùse sàlà wekkupùppù màlà tùpàkù'nokon enpen ina wechi tukaik, tùse Katù iwelichak kon wuluukanài pàk neken enpen ina wettoppe.

¹⁰ Àsà kulu weli'nàtok yapai ina mokkappù Katù uya, molopai ina mokka ya màlà. Enpen ina wettok tùsak ina uya man ipàk ina mokkatukkatok ya pàk.

¹¹ Àwàpùlema kon winà nàlà ina ipùikattàtàk kon. Màlà kasaichi iwechi màlà àwàpùlematok kon ina pona useiku molopai Katù uya ina pùlema màlà, tukkan kon uya tenki te toppe ina pàkànsau.

Paul Wekkuttok Ikupù Pàk Wemyakanmatok

¹² Sàlà màlà ina yauchinapanài. Ina usenumenkatok nekamayan tamù'nawolon ina nùkupùppù sàlà wolù yau, ailon pe wakù pe ina wechippù ànù'là tennakaik pùla, ina welaikatok ewinàkàik nokon yau kulu. Ina wessak man enpen Katù pàk ina pùikattàtoppe ya, sàlà non pon yapàiketù ke pùla.

^13-14 Masapùla emenukanài'nokon ina enene kon molopai ànùttu kon neken pàk. Sàlà pe wakù pe ina ittu auya'nokon pen, tùse itepulu Jesus weyu yattai tamù'nawolon ittu auya'nokon màlà wakù pe. Ina yapulà kon pa, ina uya ayapulàkon kasa làma.

¹⁵ Sàlà ittui'ma kulu akakklanpa kon pàk wekkupùppù wapiya, autauchinpa kon pa asak itekkwa.

¹⁶ Masapùla akakklanpa kon pàk wekkussak man Macedonia pona utà pe molopai tu'ma wennapo pe upùkattàtok auya'nokon yau utàtoppe Judea pona.

¹⁷ Sàlà kupù pàk wekkupù yau, usennaka pe na' mekamatantàu? Unkupù kupù uya yau na' iku'nài Iulà kappon kasa, “Ewaik, ewaik,” molopai “Kane, kane,” tetoppe uya màlà yattai lùppù?

¹⁸ Katù wechi ailon pe kasa, ikupù uya tetok uya àpàkù'nokon wechippù màlà, “Ewaik” molopai “Kane” tawon pe pùla.

¹⁹ Masapùla Jesus Christ, Katù Mumu, yekamasak lùppù àpàkù'nokon Silas, Timothy, molopai Iulà tawonnan nekamappù, mùkkàlà “Ewaik” molopai “Kane” tetok pen. Tùse làkku “Ewaik” mùkkàlà tàwàlàlà.

²⁰ Masapùla Christ uchi mùkkàlà “Ewaik” tetok Katù uya ikupù tùuya tetok yau. Sàlà wenai uchi Jesus Christ yau “Emen” te màlà, Katù yapulàtok iwinà pe.

²¹ Masapùla Katù mùkkàlà ina ku'nài ailon pe kulu ina wettoppe, àpokon pe'nokon, wema'nàtok kù'nokon Christ yau pàk. Katù uchi mùkkàlà kùyamanàippù tùponaloppe.

²² Mùkkàlà tùponaloppe we'nà'nokon yentok ipàkàlà tùnài kùpàkù'nokon, molopai Wakù Akkwalù ke kùlepanài'nokon kùyewan kon yak tamù'nawolon itesappe tùwettok lepantok tùuya kùponalok kon pe yentok ipàkàlà pe.

²³ Katù tekamappoyaik uyekamanài pe, uyewan ittunài mùkkàlà. Usentuppa àpàkù'nokon pàk “Corinth pona utà pen” teppù uya.

²⁴ Ailon tetok auya'nokon ipàk woton yekamaiche eyepulu kon pe ina wechi pen sàlà. Autauchinpatok kon ponaloppe làkku ina we'wotokoma sàlà àpokonpe'nokon, meluntà pe ewechi kon ailon tetok yau pàk.