1 Timothy 2 - Patamuna New Testament Revised

Yà'là Kasa Là Wàpùlemantok

¹ Wapiya kulu, tok ponalà'ne kappon yamùk pona àwàpùlema pa eyekamappoyan Iulà. Tamù'nawàlà tok pùikattàtoppe Katù uya màpùlemaik molopai tenki tetok auya tok pàk mekamaik Katù pàk.

² Kin yamùk, molopai tamù'nawolon kon potolù yamùk ponaloppe, wema'nàtoppe eppana àsà pùla molopai echitonpa pe, wakù pe Katù kùpùikattànài tauchinpaik molopai iwalai iteselu pe tùwelaikaik we'nàtoppe.

³ Sàlà màlà wakù molopai Katù Kùpùikattànài yauchinpa ya màlà,

⁴ tamù'nawolon kon wepùikattà ichelok mùkkàlà molopai ailon ittu tok uya iche tùwessen.

⁵ Masapùla Katù mùkkàlà tewinan, molopai tewinan nàlà molo man Katù molopai tamù'nawolon kon kappon yamùk yakkletawon, mùkkàlà kàyik Christ Jesus.

⁶ Iwettùsak lùppù tamù'nawolon kon kappon yamùk pùikattàtoppe tùuya. Sàlà ichi màlà Katù nenpoikappù wolù yawon kon nùttu pe iwekkuttok yattai tok wepùikattàtoppe.

⁷ Màlàpàk uchi sàlà uyeunossak kappon yamùk Jew yamùk pen yenupanài pe molopai ailon yekale yekamase. Ailon pe uselupa sàlà, kasei pe wechi pen!

⁸ Sochi pàk we'nà yattai'ne kàyik yamùk wàpùlema iche wessaik, kàyik yamùk Katù yemyak iwettùsak kon molopai temyatù kon tenkaik tùwàpùlemasan yek tùwe'naikaik pùla wapùla tùusàulàmaik pùla.

⁹ Ulichamichi wepontà nàlà wakù pe, tùttuik, tipippà kon tùwaputtàse iche wessaik, tùusema'nonpaik kolù ke wapùla pearl ke pùla, teseluttàpàsse tùppai tùkappàse pùla, molopai epekkek kulu là pon ke tùwepotàik pùla,

¹⁰ tùse wakù pe iwelaikatok, Katù ittunnan ulichamichi welaikatok kasa.

¹¹ Ulichamichi usenupa nen màlà eppana echii'ma molopai tamù'nawàlà àssà'mùla entuppak tùuchittuse.

¹² Enupantoppe tok uya tok ku'nài pen Iulà wapùla kàyik yamùk yentai tok wettoppe ikupù uya pùla man. Tàwà eppana tok nechii.

¹³ Masapùla Adam konekappù màlà wapiya, molopai màlà tùpo nen uchi Eve konekappù màlà.

¹⁴ Molopai Adam pen mùkkàlà yennakasak lùppù; ulichan làkku mùkkàlà yennakasak lùppù molopai Katù Maimu ikkwà'nàippù.

¹⁵ Tùse ulichan wepùikattà màlà tùumunkàta yai, ailon tetok, uchi'nùnmantok, esuken we'nàtok molopai tùttuik wema'nàtok, wakù pe tipippà tùwaputtàik tùwepontàsen pe tùwechi yau tàwàlà.