1 Peter 4 - Patamuna New Testament Revised

Iwemyakanmasak kon Wemattok

¹ Christ wettalumattàppù màlà talà non po màlàpàk uchi iwettalumattàppù kasa ewettalumattà kon pa ekonekatàk, tùwettalumattàtok pàlikasak ya àponalok kon pe pàk, masapùla ànù'là tùtalumattàtok yanùnnài weleutasak màlà àli kupù tùuya winàpai.

² Sàlà motapai uchi ewemattok kon talà non po yemakkwatàk kon Katù yeselu yawàlà, iche kappon wettok yawàlà pùla.

³ Masapùla eweyu kon yapulàppù auya'nokon pena ailon tawonnan pen nùkupù kupù pàk.Tùwe'namaik pùla àli pe ewemapùppù kon man, tùuseka'nonkaik eyewan kon wechippù iche ewettok kon kupù pàk, wetùnnàtok, tamùkke wepili'nàtok ata'letàse àli kuttok itenu yau, molopai akùlù pe ailon pen tùulon katù yemloto po wepeimantok yau.

⁴ Molopai sàlà pe ailon tawonnan pen usenumenkasak man tùpùkkù pe ewechi kon àli pe màttawà tùwettok kon molopai àsà pe tùwematok kon yau pùla nen uchi ewechi kon pàk, màlàpàk tok àmottùnpayatàu.

⁵ Tùse tok uya yeitok tùuya'nokon tùlù màlà Katù piyak, iwekonekasak nai'nùk nulà nan kon molopai iwelichak kon ittutoppe tùuya.

⁶ Sàlà kasaichi iwechipàk Wakù Itekale yekamappù màlà iwelichak kon pàk nàlà, tok ittutoppe kappon yamùk kasa, tamù'nawolon kon kappon yamùk ittu kasa; Wakù Itekale yekamappù màlà tok wettoppe nulà takkwalù kon yau Katù wemapù kasa, tàwàlàlà.

Wakù ton Katù uya Lepantok yesak ton

⁷ Tamù'nawolon yà'làlà wenukattok yattai mei pùla man. Eyesak kon pe ettàk kon, molopai enpen ettàk kon, àwàpùlema kon pe.

⁸ Wapiya kulu kappon yamùk tù'nùnmaik ettàk kon eke pe kulu, masapùla uchi'nùnmantok màlà tukkan àli waputtànài.

⁹ Àtonpa kon yewonnùttàk àwùk kon tak tùusàulàmaik pùla.

¹⁰ Tàwà tamù'nawolon kon tùlepatok tùnepoloppù kon Katù winàpai yapulài tùtonpa kon pùikattàtok tùuya'nokon iwinà pe, wakù ton Katù uya lepantok tùpatalà'ne nai'nùk yesappe.

¹¹ Ànù'là itekale yekamanài, tàwà Katù Maimu yekamai; ànù'là tùulon kon pùikattànài, tàwà tok pùikattài, meluntà, màlà Katù uya tùlepatok ke, tamù'nawolon yau apulàntok tùtoppe Katù piyak Jesus Christ yai, apulàntok molopai apàikkeppe we'nàtok iponalok tàwàlàlà molopai tàwàlàlà. Emen.

Wettalumattàntok Christ ponaloppe echii'ma

¹² Utonpa yamùk, kesenumenkatàu àsà ituntok mettalumattà yatài'nùk ipàkànsau pàk, yà'làlà tùwekkussen pen wekkupù kasa àpàkù'nokon.

¹³ Tùse làkku atauchinpatàk kon masapùla Christ wettalumattàppù kasa ewettalumattà kon pàk, autauchinpa kon pa eke pe kulu itakkwayi usenpoikasak yau.

¹⁴ Tùutauchinpasan pe ewechi kon màlà, àmottùnpasak kon yau Christ ponalok kon pe ewechi kon pàk; masapùla sàlà uya yekama màlà, màlà tùnamasen Akkwalù Katù winàpaino uttàsak àpona'nokon.

¹⁵ Ewettalumattà kon yau, kappon wànài pe là ewechi kon pàk ewettalumattà kon pe kùsettak, wapùla amappe ewechi kon pàk, wapùla àli ku'nài pe ewechi kon pàk, wapùla tùulon kon nùkupù ittuiche ewechi kon pàk.

¹⁶ Tùse ànù'là wettalumattà Christ ponaloppe yau, kùsekuli'matak, tùse tàwà tenki nùkai Katù pàk Christ ponaloppe tùwechi pàk.

¹⁷ Masapùla Ittuntok yattai weyu uyàssak man, ittuntok wepyattàtoppe; molopai Katù ponalok kon mùkyamlo wapiya ittu woton kon. Kùpàkù'nokon iwepyattà yau, atta ken iwenukapù mùkyamlo Wakù Itekale Katù winàpaino pàk ailon tawonnan pen pàk?

¹⁸ Molopai, “Sa'man pe kulu wakù ton kappon yamùk wepùikattà wechi yau, yà'là pe ken Katù pùnon molopai àli ton kappon yamùk wechi?” {Pro 11.31}

¹⁹ Màlàpàk uchi tàwà nettalumattà yai'nannùk Katù yeselu yawàlà ikasa nai'nùk kupùi molopai takkwalù kon tùlùi Mùkkàlà tùkonekanàippù kon yemyak, masapùla ikupù tùuya teppù tùuya lùppù ku'nài mùkkàlà tàwàlà.